Panmaeq 12 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqma Tiq Ghaq Hawr-eu Byavyanq

¹ Khoernar-aq, ngar, mq-euq khoertav huiq-eu bisiq bimawr-eu jeq tiqjeq-anr ya’mawr-euq ma. Zaqmiq aqbur tiq ghaq nanrma dm-awr, bala-anr nawqtaeq-awr, aqguir 12 siq tsof-eu shuir uqkhov khovtaq-euq mae.

² Aqyawf, aqnyir piluf-eu mae. Zaq ciqder le-awr nae nar duidui-eu mirnae, gurgur-aer teuvluf-eu mae.

³ Khoernar-aq, ngar, mq-euq khoertav bisiq bimawr-eu yawqjeqyawq parya mawr-euq ma. Khoerngae, uqduq shif siq tsof-awr, uqcoer tser coer tsof-eu, nertseuvni ghae-eu byavyanq yanqma tiq mawr dovle-euq mae. Aqyawf-euq uqduq shif siq luf shuir uqkhov shif khov khovluf-eu mae.

⁴ Aqyawf-euq dawqmiq nae mq-anr tsaeq-eu aqguir smq bymr-anr nae tiq bymr yavuiq-awr, mirtsaq-euq khoertav juifka ghaelef-euq mae. Byavyanq heumawr, aqnyir ciq-eu laer ghae-eu zaqmiq aqbur khoerghaq, zaq bawdov lef-euq nar-aq, zaq khoerghaq-anr dzaq-eu laer zaqmiq aqbur khoerghaq-euq maeqshi yawfluf-eu mae.

⁵ Khoerngae, zaqmiq aqbur khoerghaq, aqkar shmr gawqyoeq nae tsawrjeuq tsawrca dawqtawv luf-anr uvlanr-eu aqlizaq tiq ghaq ciq-euq mae. Khoernar-aq, aqyawf-euq aqlizaq-aq, Miqyaer jawr-eu gar hawr-eu aqyawf-euq nuirmanq jav-eu gar bi ciqdav lef-euq mae.

⁶ Khoernar-aq, zaqmiq aqbur heughaq bawrtsanq bawrdanr-anr caevjawr-ir-euq mae. Khoergar Miqyaer, aqyawf-anr 1,260 nan byanni bosav-eu laer aqyawf-euq gharduq jawrzar lavsav taq-euq mae.

Saqdaq, Mq-anr Nae Bi Biqka-euq

⁷ Khoerngae, mq-euq khoertav guirdeuv deuv-euq mae. Mirgeqlar hawr-eu aqyawf-euq mqtav ghaqkhaer deuq byavyanq khoermawr-anr guirdeuv deuv-euq mae. Byavyanq khoermawr khawf aqyawf-euq mqtav ghaqkhaer deuq sheuq-awr deuv-euq mae.

⁸ Byavyanq-euq armaf maq deuvghaq nya-aer, mq-euq khoertav aqyawfmaf jawrkhar maqpar za-eu mae.

⁹ Arhu-euq arlawr khoermawr pyeuf-eu, naef sanqpaq hawr-eu naef Saqdaq laer khawf kur-eu, mirtsaqzaq dawqtawv luf-anr sheuqbanq-eu byavyanq yanqma khoermawr, mirtsaq-euq khoertav bi biqka lef-awr, aqyawf-euq mqtav ghaqkhaer deuq-anr khawf, aqyawf naeq-aer tiqkawv lof-aer bi biqka lef-euq mae.

¹⁰ Khoernar-aq, ngar, mq-euq khoertav tersar yawkhav-aer heulof-aer aer-eu gar yagaq-euq ma: “Nymq-mr, aqdui-euq Miqyaer uvlanr-eu jeq, ghaq, kakhof-eu jeq hawr-eu aqyawf-euq Kali-euq aryaq keuvle-euq mae. Aqjeq mirnae aernar-aq, aqdui-euq Miqyaer-euq maeqshi uqcif nan’ghanr maqtserni, aqdui-euq aqyuif aqnyir-euq yawlaeq daqler-eu ghaq, bi biqka ghae-euq mae.

¹¹ Aqyawfmaf, Yawrzaq-euq shiq hawr-eu yawqha-euq sarkir kamq-eu dawq nae, yawlaeq daqler-eu ghaq-anr ghaqler-euq mae. Aqyawf maf-aq, khoer-euq gharduq, yawqha-euq daefzir-anr ghawqcawx cawv-aer maqghaeni, shir khawf shirpeuq-eu mae.

¹² Khoermirnae, mq hawr-eu mq-euq khoertav kharjawr-eu deuq-or! Nawmaf laqkhaq caer-awq. Aerkhawf, mirtsaq-euq khoertav hawr-eu iqmalavshav-euq lafkhoer jawr-eu deuq-aq, ghawqshar shaq-aer ya ghaesaef taef-a. Aqjeq mirnae aernar-aq, naef sanqpaq-aq, aqyawf-euq aryamq ghawqmyanrni maqpar jav-eu mae laer siqnya-eu mirnae, nuima paer duidui-eu lafkhoer nawmaf jawr-eu gar oeka-euq mae.”

Byavyanq, Aqma Ghaq-anr Khaeq-eu

¹³ Byavyanq khoermawr, aqyawf, mirtsaq-euq khoertav bi biqka lef-euq nga laer siqler ngae, aqlizaq ciq-euq zaqmiq aqbur khoerghaq-anr khaeqnaeq khavnaeq-eu laer taeluf-eu mae.

¹⁴ Aerkhawf, zaqmiq aqbur khoerghaq, arlawr khoermawr-anr nae yabuq-ir-awr, bawrtsanq bawrdanr-anr jav-eu aqyawf-euq jawrduq-anr zawghae nya’ni, khaqdzer dzerma-euq aqdanr nyiq danr bifnaeq-euq mae. Khoergar, smr yamq taf tiq pav byanni aqyawf-anr bosav naeq-euq mae.

¹⁵ Khoerngae, zaqmiq aqbur khoerghaq-anr ircuf nae bi budzaq-eu laer, arlawr khoermawr khaqmae-anr nae zaqmiq aqbur khoerghaq-euq narkhan paw, ircuf lawrgawv lof-aer mymrdzae lef-euq mae.

¹⁶ Aerkhawf, mirtsaq, zaqmiq aqbur khoerghaq-anr cawba naeq-euq mae. Mirtsaq, khaqmae mrnga-awr, byavyanq-euq khaqmae-anr nae mymrdzae lef-euq ircuf lawrgawv shuvanr jir-euq mae.

¹⁷ Khoerngae, byavyanq khoermawr, zaqmiq aqbur khoerghaq-anr nuima paer duidui-awr, dzerluf-eu aqyawf-euq zaqdeuq uvdeuq-anr guirdeuv deuv-ir-euq mae. Zaq khoerdeuq-aq, Miqyaer nae bif-euq dawq-anr mrcaw-awr, Yeqsur Kali-euq garkawv sarkir kamq-eu tsawrhaq mae.