Panmaeq 11 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Sarkir Kamq-eu Tsawrhaq Nyiq Ghaq

¹ Khoernar-aq, ngaq-anr dardza daeq-eu gawqyoeq-anr dur-eu artof-euq arkanq tiq kanq bifnaeq laf-awr, tersar tiq sar heulof-aer aer-eu mae, “Tur-awq. Miqyaer-euq uqduq tanqnymr nymrma hawr-eu lawrduq-anr dardza daeq-awr, uqduqtanq luf-eu tsawrhaq deuq-anr guihaw-ir-awq.

² Aerkhawf, uqduq tanqnymr nymrma-euq lafnyir jav-eu pyafkhanq-aq, maqdza’ni bijav-awq. Aqjeq mirnae aernar-aq, jawrduq khoer-aq, aqcawq tsawrjeuq tsawrca-euq aqlaf-euq lafkhoer anr-ir-awr, aqyawfmaf shawr-eu meuq-anr bala 42 siq byanni nawqtaeqtaq taef-a.

³ Ngar, ngaq-euq sarkir kamq-eu khoer nyiq ghaq-anr baoq bif ma. Aqyawf nyaf-aq, guqdar paerzeur-euq maeqtsoeq dm-awr 1,260 nan Miqyaer gharduq ngaeqdan taef-a.”

⁴ Aqyawf nyaf-aq, mirtsaq tanqkhawr-euq Miqyaer-euq maeqshi daef-eu saqloq arbawr nyiq bawr hawr-eu ciqtur taq-euq tsirkhmq dofdavduq nyiq hmq khoer mae.

⁵ Tsawrhaq tiqghaqnav, aqyawf nyaf-anr lavtanq lavnarmawf nar-aq, aqyawf nyaf-euq khaqmae-anr nae miqdzaq bawdov lef-awr, aqyawf nyaf-anr muir-eu deuq-anr puivsaef taef-a. Aqyawf nyaf-anr lavtanq lavnar mawf-eu tsawrhaq dawqtawvluf khoerlof-aer yashir taef-a.

⁶ Aqyawfnyaf, Miqyaer gharduq ngaeqdan taq-euq arnan-anr tsaqni, mq-anr piqtaeq-awr uqyaer maqbi yaerle-eu baoq anr-eu mae. Aqyawfnyaf, ircuf-euq khoertav baoq jav-awr, ircuf-anr shiq bipyeuf-ir nya-eu uqtaf, mirtsaq-euq khoertav bi keuvle mawf-eu khaeq-awr khav-eu yawqjeq navluf, armyav pov khawf bi keuvle nya-eu mae.

Sarkir Kamq-eu Aqnyaf Bisaef-euq

⁷ Aqyawfnyaf sarkirkamq ghaq-euq nar-aq, li-eu maqbaw-eu duqkhanq-anr nae dovlar-eu jeqzaq yawghae khoermawr, aqyawf nyaf-anr guirdeuv deuv-awr deuvghaq ngae, aqyawf nyaf-anr saef taef-a.

⁸ Aqyawf nyaf-euq mawrdo-aq, meuq meuqma-euq garma-anr ga taef-a. Meuq heumeuq-aq, saflar paw-euq tsawrmyanr Sordoq hawr-eu Irjirtuv laer kur-awr, aqdui-euq Sanqpaq lafyaq-euq khoertav bi tafsaef-euq meuq khoermeuq mae.

⁹ Khoerngae, yawqjeq navluf-euq tsawrhaq, arjeuq arca, dawqngaeq dawqbav hawr-eu tsawrjeuq tsawrca-anr nae lartaq-euq deuq, aqyawf nyaf-euq mawrdo-anr smq nan taf tiq pav keuvni, lmqbymr-anr maqbi bafpanqni ga-eu gar ya’mawr taef-a.

¹⁰ Heu nyiq ghaq shir-euq mirnae, mirtsaq-euq khoertav jawr-eu tsawrhaq deuq laqkhaqcaer duidui-eu lafkhoer yawbui bui-awr, tiqghaq tirghaq lafsawq bif taef-a. Aqjeq mirnae aernar-aq, Miqyaer gharduq ngaeqdan-eu tsawrhaq heu nyiq ghaq-aq, mirtsaq-euq khoertav jawr-eu tsawrhaq deuq-anr khaeqnaeq khavnaeq-euq mae.

Sarkir Kamq-eu Aqnyaf Par Daeflar-euq

¹¹ Smq nan taf tiq pav byanlar ngae, Miqyaer-anr nae dovle-euq daef-eu jeq bif-eu saf, aqyawf nyaf-euq lafkhoer anrle-awr, aqyawfnyaf turlar-euq mae. Aqyawf nyaf-anr ya’mawr-euq tsawrhaq deuq guv duidui-ir-euq mae.

¹² Khoerngae, Miqyaer gharduq ngaeqdan-eu tsawrhaq khoer nyiq ghaq, “Heugar davlar-awq” laer mq-anr nae tersar sarma ngaeqdov lef-euq gar yagaq-euq mae. Khoernar-aq, aqyawfnyaf mqdmr-anr dziq-awr mqtav ledav-euq mae. Aqyawfnyaf ledav luf-eu gar, aqyawf nyaf-anr muir-eu tsawrhaq deuq khawf ya’mawr-euq mae.

¹³ Khoerngae yamq-anr, mirluvluv duidui lar-awr, meuq heumeuq tser bymr-anr nae tiq bymr gabyav-euq mae. Mirluv luv-euq baqda’nae, tsawrhaq 7,000 ghaq shir-euq mae. Nuideuq-aq, guv duidui-ir-awr, mq-euq khoertav jawr-eu Miqyaer-anr ciqhuiq ciqmanr-eu mae.

¹⁴ Ghawqshar shaq-aer ghaelar paq-aer ghae-eu nyiq jeq tiqjeq jir-euq mae. Hawtaq-awq. Ghawqshar shaq-aer ghaelar paq-aer ghae-eu smr jeq tiqjeq parkeuv le-a siq.

Darhae Shif: Dawqdzawr Mr-eu

¹⁵ Khoernar-aq, mqtav ghaqkhaer shif ghaq tiqghaq darhae baw ngae, mq-euq khoertav ghawqmya jeq-euq tersar yawkhav-aer aer-eu, “Mirtsaq-anr uvlanr-eu baoq-aq, aqdui-euq Sanqpaq Miqyaer hawr-eu aqyawf-euq Kali-euq pyeuflar-euq mae. Aqyawf mqmaq maqbyav yarzir uvlanr taef-a.”

¹⁶ Khoerngae, Miqyaer-euq maeqshi, yawqha-euq nuirmanq-anr yawqha nuirluf-eu aqyuif aqtsu 24 ghaq, mirtsa awbyav-awr Miqyaer-anr uqduq tanqtanq-aer

¹⁷ heulof-aer aer-eu mae: “Arhu nae daef-eu nymq-mr keuvni daefluf-awr, Aqkar zafka le-eu laer ghae-eu ghaq pyeuf-eu, Baoq huiq duidui-eu Sanqpaq Miqyaer-or! Nawq-euq huiq-eu baoq nae nymq-mr nawr uvlanr luf-eu mirnae, Nga’maf, nawq-euq guiqlanq-anr jaceuq ma.

¹⁸ Mirkhanq-euq tsawrjeuq nuima paerlar-awr, Nawq-euq nuima paer-eu jeq khawf keuvle-euq mae. Shir-euq tsawrhaq deuq-anr yarkhaq dar-eu aryamq khawf keuvle-euq mae. Nawq-euq ghaqzaq ghaqkhaer pyeuf-eu, Miqyaer gharduq ngaeqdan-eu tsawrhaq deuq hawr-eu, Nawq-euq tsawrmyanr-anr yawzeu baw-eu huiqzaq nyirzaq dawqtawv luf-anr mrpoeq lafsawq bif-eu aryamq keuvle-euq mae. Mirtsaq-anr lavcawv-eu deuq-anr nawr lavcawv-eu aryamq khawf keuvle-euq mae.”

¹⁹ Khoerngae, mq-euq khoertav jav-eu Miqyaer-euq uqduq tanqnymr nymrma panlar-awr, aqyawf-euq uqduq tanqnymr nymrma-euq lafkhoer, aqyawf-euq dawqma sarjax bawqkeuv-anr ya’mawr-euq ma. Khoernar-aq, mqmyawf myawf-awr, tersar manr-eu uqtaf, mqjeq jeq-awr mirluv luv-eu uqtaf, uqyaer arsiq khawf ga duidui-eu mae.