Panmaeq 10 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ghaq Khav-eu Mqtav Ghaqkhaer

¹ Khoerngae, ngar, uqduq-euq khoertav arderlerkhan uqdzanq dzanq-awr, ghaq zawr khav-eu mqtav ghaqkhaer tiq ghaq, mqdmr dm-awr, mq-anr nae zafka le-eu gar ya’mawr-euq ma. Aqyawf-euq myavpyawq-aq, nanrma-anr dur-awr, aqkuir-aq, miqdzaq khawrzeur-anr dur-eu mae.

² Aqyawf-euq aqlaf-euq lafkhoer pantaq-euq sanqbof yawnyir tiq yov anr-eu mae. Aqyawf-euq armar kuir-aq, iqmalavshav-anr nawqtaeq taq-awr, arcar kuir-aq, mirtsaq-anr nawqtaeq taq-euq mae.

³ Aqyawf, arlaqjaqshir joeq-eu lof-aer tersar yawkhav-aer gurdov lef-euq mae. Aqyawf gurdov lef-euq naeq-aer, mqjeq shif ter jeq-eu lafkhoer dawq ngaeqdov lef-euq mae.

⁴ Mqjeq shif ter jeqghaq ngae, ngar, sanqbof boftaq-eu laer ghae-euq ma. Aerkhawf, ngar, mq-anr nae tersar heulof-aer ngaeqdov lef-eu gar yagaq-euq ma, “Mqjeq shif ter nae ngaeq-euq dawq khoerdeuq-anr nawr maqbofni jmq diqtaq-awq.”

⁵ Khoerngae, ngaq nae mawr-euq, iqmalavshav hawr-eu mirtsaq-anr nawqtaeq luf-eu mqtav ghaqkhaer khoerghaq, armar laf mq paw bafdir-awr,

⁶ mq hawr-eu mq-euq khoertav kharjawr kharjav-eu dawqtawv luf-anr, mirtsaq hawr-eu mirtsaq-euq khoertav kharjawr kharjav-eu dawqtawv luf-anr, iqmalavshav hawr-eu iqmalavshav-euq lafkhoer kharjawr kharjav-eu jeq-anr bae-euq ghaq pyeuf-eu, mqmaq maqbyav yarzir daef-eu ghaq-anr ghoe-awr kamq-eu lafkhoer aryamq maqpar nyinaqnya mae laer aer-eu mae.

⁷ Aerkhawf, mqtav ghaqkhaer shif ghaq tiqghaq darhae bawlar ngae nan, Miqyaer nae zaftaq-euq jeq byanlar taef-a. Zaftaq-euq khoerjeq-aq, dzeurlaf ngae, Miqyaer, aqyawf-euq ghaqzaq ghaqkhaer pyeuf-eu Miqyaer gharduq ngaeqdan-eu tsawrhaq deuq-anr dzawrnaeq taq-euq khoerdeuq mae.

Yorhaq, Sanqbof Yovzaq Dzaq-euq

⁸ Khoerngae, ngaq nae yagaq-euq mq-anr nae ngaeqdov lef-euq tersar khoer, ngaq-anr par aernaeq laf-eu, “Nawr ir-awr, iqmalavshav hawr-eu mirtsaq-anr nawqtaeq luf-eu mqtav ghaqkhaer khoerghaq-euq aqlaf-euq lafkhoer anr-eu, pantaq-euq sanqbof yawnyir khoeryov laq-ir-awq.”

⁹ Khoermirnae, ngar, mqtav ghaqkhaer khoerghaq jawr-eu gar le-awr, “Sanqbof yawnyir teuyov ngaq-anr bifnaeq laf-awq” laer sharler-euq ma. Khoerngae, mqtav ghaqkhaer khoerghaq, ngaq-anr aernaeq laf-eu, “Nawr yur-awr dzaq-awq. Sanqbof heu nawq-euq uqmav-euq lafkhoer khaqjawfni bi pyeuflar taef-a. Aerkhawf, nawq-euq khaqmae-euq lafkhoer-aq, byaquir lof-aer coerovni ghae taef-a.”

¹⁰ Khoerngae, ngar, mqtav ghaqkhaer khoerghaq-euq aqlaf-anr anr-eu sanqbof yawnyir khoeryov yur-awr dzaqjir-euq ma. Ngaq-euq khaqmae-euq lafkhoer-aq, byaquir lof-aer coerovni ghae-eu mir-a. Aerkhawf, dzaqanr ghae-euq naeq-aer, ngaq-euq uqmav khaqjawfni ghaelar-euq mir-a.

¹¹ Khoernar-aq, mqtav ghaqkhaer khoerghaq, ngaq-anr aernaeq-eu, “Nawr, ghawqmya jeq-euq tsawrhaq, tsawrjeuq tsawrca, dawqngaeq dawqbav hawr-eu sanqpaq ghawqmya ghaq-euq garkawv, Miqyaer gharduq parya ngaeqdan taef-a.”