Panmaeq 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ardanq Bae-eu Dawq

¹ Yeqsur Kali nae panmaeq naeqlaf-euq, ghawqmyanr maqghae-aer pyeuflar-eu laer ghae-eu garkawv heudeuq-aq, aqyawf-euq ghaqzaq ghaqkhaer deuq-anr bimawr-eu laer Miqyaer nae aqyawf-anr bif-awr, panmaeq naeq-euq mae. Aqyawf, mqtav ghaqkhaer-anr ghoe-awr garkawv heudeuq, aqyawf-euq ghaqzaq ghaqkhaer Yorhaq-anr bi siqnya-euq mae.

² Yorhaq, aqyawf nae kharya mawr-euq dawqtawvluf, Yeqsur Kali-euq sarkir hawr-eu Miqyaer-euq dawqdeuq, kharngeur-eu lof-aer sarkirkamq taq-euq mae.

³ Miqyaer gharduq ngaeqdan-eu dawq heudeuq-anr gui-eu tsawrhaq, yagaq-eu tsawrhaq hawr-eu mrcaw-eu tsawrhaq-aq, guiqlanqhuiq taef-a. Aqjeq mirnae aernar-aq, aryamq keuvle shaw-iq mae.

Dawqcawq Puq-eu Dawq

⁴ Ngar-aq, Yorhaq ma. Aqsir mircoer-anr jawr-eu Kalizaq armur shif mur-anr sanqbof heu bofanr laf-euq ma. Arhu nae daef-eu, nymq-mr keuvni daefluf-awr, aqkar zafka le-eu laer ghae-eu ghaq hawr-eu Miqyaer-euq nuirmanq-euq maeqshi jawr-eu Saflar shif lar-euq guiqlanq yawdzanr, hawr-eu nuisar of-eu jeq, nawmaf-euq khoertav jav luf-ur.

⁵ Shir-euq tsawrhaq deuq-anr nae ghofdaef baebae lar-euq ghaq pyeuf-awr, mirtsaq-euq sanqpaq deuq-euq khoertav uvlanr-eu ghaq pyeuf-eu uqtaf, sarjax zif-eu lafkhoer sarkir kamq-eu Yeqsur Kali-euq guiqlanq yawdzanr hawr-eu nuisar of-eu jeq, nawmaf-euq khoertav jav luf-ur. Aqdui-anr gaq-awr aqyawf-euq shiq nae, aqdui-euq iqbax tsiqshawr naeqlaf-euq mae.

⁶ Khoeruqtaf, aqyawf, aqdui-anr aqyawf-euq Aqda Miqyaer-euq pirma hawr-eu sanqpaq bi pyeuflarni janrnaeq laf-euq mae. Yawshaef khanqsaer hawr-eu uvlanr-eu baoq, li-eu maqbawni aqyawf-anr of luf-ur. Aqmeq.

⁷ Hawde-eq. Aqyawf, mqdmr-euq lafkhoer zafkale taef-a. Myavnuiv yawqnuiv navluf, aqyawf-anr ya’mawr-awr aqyawf-anr tsawv-euq tsawrhaq deuq khawf ya’mawr taef-a. Mirtsaq-euq khoertav jawr-eu tsawrjeuq tsawrca dawqtawvluf, aqyawf-euq baqda’nae tsawrngoer ya’ngoer taef-a. Heulof-aer pyeuflar taef-a. Aqmeq.

⁸ Sanqpaq Miqyaer aer-eu, “Ngar-aq, Ardanq bae-awr Arsaq saq-eu ghaq, Aqlaqpar hawr-eu Ormeqgar ma. Ngar-aq, arhu nae daef-eu, nymq-mr keuvni daefluf-awr aqkar zafka le-eu laer ghae-eu baoq huiq duidui-eu ghaq ma.”

Yorhaq-anr Kali Mawrle-euq

⁹ Ngar, Yorhaq, nawmaf-euq maernmr pyeuf-awr, Yeqsur Kali-euq daqcoer orcoer-eu jeq, Miqyaer uvlanr-eu jeq hawr-eu shaq-awr zanq-eu jeq-euq lafkhoer nawmaf-euq cawq khawf pyeuf-eu ma. Ngar, Miqyaer-euq dawq hawr-eu Yeqsur Kali-euq garkawv sarkir kamq-euq mirnae, Baqmor laer kur-eu irjawlanr-anr ya jawrluf-eu ma.

¹⁰ Ngar, Sanqpaq Miqyaer-euq arnan-anr, muiq-eu Saflar-euq lafkhoer jawrluf ngae, darhae tersar lof-aer ngaq-euq narkhan paw, khav duidui-eu tersar-anr yagaq-euq ma.

¹¹ Tersar khoer aer-eu, “Ngar-aq, Ardanq bae-eu hawr-eu Arsaq saq-eu ghaq, Aqlaqpar hawr-eu Ormeqgar ma. Nawr kharya mawr-eu jeq sanqbof-euq lafkhoer boftaq-awr, Aqsir mircoer-anr jawr-eu Erpersu, Saqmeuqnav, Beqgaqmor, Tiqyaqdiqlar, Saqdir, Pirlaqdeqpir hawr-eu Lawqdiqciv Kalizaq armur heu shif mur-anr sha’naeq-awq.”

¹² Ngar, ngaq-anr dawq ngaeqcawq-eu tersar gaqlar-eu paw nanrghof ghofhaw-euq ma. Ngar nanrghof ghofhaw ngae, shuir nae janr-euq tsirkhmq dofdavduq shif hmq-anr ya’mawr-euq ma.

¹³ Shuir nae janr-euq tsirkhmq dofdavduq khoer shif hmq-euq ghanrcae, aqkuir-anr keuvni paerkhanq paermanr dmghoeq-awr, khanq-anr shuir jofpaf paftaq-euq Tsawrhaq-euq Zaqyo lof-aer dur-eu tiq ghaq jawr-eu mae.

¹⁴ Aqyawf-euq uqduq hawr-eu tsaerkanr-aq, pyurdeuqni ghae-eu yawr cafhm hawr-eu ngaer lof-aer pyurdeuqni ghae-awr, aqyawf-euq myavnuiv-aq, miqdzaq miqlmr lof-aer dur-eu mae.

¹⁵ Aqyawf-euq aqkuir-aq, miqdzaq tsawqbym-euq lafkhoer kharshawr-awr, jeqguir taq-euq guiqshuir lof-aer dur-awr, aqyawf-euq tersar-aq, ircuf ghawqmya’ni yoer-eu tersar-anr dur-eu mae.

¹⁶ Aqyawf-euq armar laf-anr aqguir shif siq nyaeftaeq luf-awr, aqyawf-euq khaqmae-anr nae miseuq nyiq paw baw-awr tav duidui-eu micaer tiq kanr dovle-euq mae. Aqyawf-euq myavpyawq-aq, nanrma tsaeq-eu lof-aer narguir guir-eu mae.

¹⁷ Ngar, aqyawf-anr ya’mawr ngae, shir-euq tsawrhaq lof-aer aqyawf-euq aqkuir-euq dawqpae coqdzae ghae-euq mir-a. Khoerngae, aqyawf-euq armar laf ngaq-euq khoertav bafdav-awr heulof-aer aer-eu mae, “Taqguv. Ngar-aq, Ardanq bae-eu hawr-eu Arsaq saq-eu ghaq ma.

¹⁸ Dzeurlaf ngae, ngar shir-euq khawf, nymq-mr ngar-aq, daefluf-eu ghaq pyeuf-eu ma. Hawsher-eq, li-eu maqbawni daef-eu ghaq khawf ngeur-eu ma. Aqmeq. Shir-eu jeq hawr-eu shir-eu mirkhanq-euq manqtawf tawfdur, ngaq-euq aqlaf-euq lafkhoer anrluf-eu ma.

¹⁹ Khoermirnae, nawq nae kharya mawr-euq deuq, nymq-mr pyeufluf-eu deuq hawr-eu aqkar pyeuflar-eu laer ghae-eu deuq boftaq-awq.

²⁰ Nawq nae ya’mawr-euq, ngaq-euq armar laf-anr anr-eu aqguir shif siq hawr-eu, shuir nae janr-euq tsirkhmq dofdavduq shif hmq-anr tafler-awr zaftaq-euq dawqtsuif-aq heulof-aer mae: aqguir shif siq-aq, Kalizaq armur shif mur-euq mqtav ghaqkhaer deuq mae. Shuir nae janr-euq tsirkhmq dofdavduq shif hmq-aq, Kalizaq armur shif mur mae.”