Maꞈtehˬ 9 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur, Kuirshir Lafshir-anr Bi Taqler-euq

¹ Yeqsur, lawq-anr urler-awr lan-anr tsaev-awr nae, aqyawf-euq meuq-anr ghofkeuv lar-euq mae.

² Khoerngae, aqcawq, yufzar-anr galuf-eu kuirshir lafshir shir-eu tiq ghaq-anr, Yeqsur jawr-eu gar baflaf-euq mae. Yeqsur, aqyawfmaf jan-eu gar ya’mawr ngae, kuirshir lafshir shir-eu khoerghaq-anr aernaeq-eu, “Aqli-or! Laqkhaq caer-awq, nawq-euq iqbax pyaeqnaeq ghaq-euq ma.”

³ Khoerngae, zanr maeq-eu tsawrhaq tiqpavnav deuq, aqyawf maf-euq yawkaq aer-eu, “Tsawrhaq heughaq-aq, Miqyaer-anr yaeqbawq saerlu-aer aer-eu nga!”

⁴ Yeqsur, aqyawf maf-euq nuima-euq lafkhoer noeqluf-eu jeq-anr siqnya-awr aer-eu, “Aqjeq mirnae nawmaf-euq nuima-euq lafkhoer yawdoer jeq sharnoeq luf-eu le?

⁵ ‘Nawq-euq iqbax pyaeq-euq ma’ laer aer-eu hawr-eu, ‘Tur-awr can-awq’ laer aer-eu dawq heu nyiq dawq, aqgeu dawq awqdzaeq-eu la?

⁶ Tsawrhaq-euq Zaqyo-aq, mirtsaq-euq khoertav iqbax pyaeqnya-eu aryaq jav-eu ngar-a laer nawmaf-anr bisiq-eu ma.” Khoernar-aq, Yeqsur, kuirshir lafshir shir-eu khoerghaq-anr aernaeq-eu, “Tur-awr, nawq-euq yufzar baf-awr irkanr ghof-ir-awq.”

⁷ Khoerngae, tsawrhaq khoerghaq tsawqtur-awr irkanr ghof-ir-euq mae.

⁸ Tsawrhaq baqmaf deuq khoer-anr ya’mawr ngae, aqyawfmaf zanqler-awr, tsawrhaqzaq-anr khoerlof-aer ghae-eu aryaq bif-euq Miqyaer-anr ciqhuiq ciqmanr-eu mae.

Yeqsur, Maqtaeq-anr Kur-euq

⁹ Yeqsur khoergar nae maeqhu paw irluf ngae, Maqtaeq laer kur-eu tiq ghaq, jeq taf-eu nymr-anr nuirluf-eu gar ya’mawr-euq mae. Yeqsur, aqyawf-anr aernaeq-eu, “Ngaq-euq maeqnan cantae lar-awq.” Khoerngae, Maqtaeq tsawqtur-awr, Yeqsur-euq maeqnan cantae ghae-euq mae.

¹⁰ Yeqsur, irkanr-euq lafkhoer hawqjawq jawqluf ngae, jeq taf-eu tsawrhaq hawr-eu iqbaxzaq ghawqmya’ni lar-awr, Yeqsur hawr-eu aqyawf-euq zaqlanr deuq naeq-aer dzaqtaf luf-eu mae.

¹¹ Paqliqsaer deuq khoer-anr ya’mawr ngae, Yeqsur-euq zaqlanr-anr aernaeq-eu, “Aqjeq mirnae nawmaf-euq saqlaq, jeq taf-eu tsawrhaq hawr-eu iqbaxzaq naeq-aer hawqjawq jawqtaf luf-eu la?”

¹² Yeqsur khoer-anr yagaq-awr heulof-aer aernaeq-euq mae: “Jawrsar dov-eu tsawrhaq-aq, nargawr lavsav-eu tsawrhaq-anr maqmawf-ar, nar-eu tsawrhaq deuq taef-aer mawf-eu mae.

¹³ Nawmaf heudawq-euq dawqtsuif dzaw-ir-awq, ‘Ngar lawrnaeq-eu jeq-anr geufmawf-eu maqngeur, ghawqshaq gaq-eu jeq-anr geufmawf mir-a.’ (Hs 6:6) Ngar, tsaq-awr dawr-eu tsawrhaq-anr kur-eu laer oe-euq maqngeur, iqbaxzaq noeqpov noeqpar larni oe-euq ma.”

Dzardzaq Sheuq-eu Garkawv

¹⁴ Khoerngae, Yorhaq-euq zaqlanr deuq, Yeqsur jawr-eu gar lar-awr aer-eu, “Nga’maf hawr-eu Paqliqsaer deuq-aq, tiqkhaeq maqtaqni dzardzaq sheuq-eu ma. Aerkhawf, nawq-euq zaqlanr deuq aqjeq mirnae dzardzaq maqsheuq-eu la?”

¹⁵ Yeqsur, aqyawf maf-anr heulof-aer aernaeq-euq mae: “Yoshuif ghaq, cawqdeuq naeq-aer jawr ngae, cawqdeuq ghawqshaq-aer ghae taef-a lor? Aerkhawf, yoshuif ghaq-anr lavghawq-eu arnan keuvle taef-a. Khoerngae, aqyawfmaf dzardzaq yasheuq taef-a.

¹⁶ “Tsawrhaq tiqghaq-iq maeqtsoeq yawcaer-anr saqpar yawshuif nae paertsanr maqdof-ar. Dof nar-aq, doftaq-euq paertsanr khoertsanr, maeqtsoeq yawcaer-anr bipyaq-ir-eu uqtaf, yawbae navmaqtser pyaqdzaeq-ir taef-a.

¹⁷ Khoerlof-aer durni, tsawrhaq tiqghaq-iq shaqkhov irpuq yawoer-anr aqgaf dzaruir yawshuif maq shaevanr-ar. Shaevanr nar-aq, shaqkhov irpuq-anr dzaqpaef-awr, aqgaf dzaruir yoerdov-awr, shaqkhov irpuq khawf cawv-ir taef-a. Aerkhawf, aqgaf dzaruir yawshuif-aq, shaqkhov irpuq yawshuif-anr shaevanr taef-a. Khoerlof-aer janr nar-aq, nyiq jeqluf jeqhmq nya-eu mae.”

Yaqirlu-euq Zaqmiq Hawr-eu Shiq Dovdov-aer Nar-eu Zaqmiq Aqbur

¹⁸ Yeqsur garkawv khoerdeuq aernaeqluf ngae, zanrdawq khawqnymr-euq aqyuif tiq ghaq lar-awr, aqyawf-anr uqduq tanqtanq-aer aer-eu, “Ngaqbur nymq-mr hawrnae shir-aq siq, nawr, aqyawf-anr aqlaf bafdav naeqle sher-eq. Aqyawf daeflar taef-a.”

¹⁹ Yeqsur tur-awr, khoerghaq-euq maeqnan cantae ghae-euq mae. Aqyawf-euq zaqlanr deuq khawf, cantae ghae-euq mae.

²⁰ Khoerngae, 12 khof byanni shiq dovdov-aer narluf-eu zaqmiq aqbur tiq ghaq, Yeqsur-euq narkhan paw lar-awr, Yeqsur-euq paerkhanq paerdanq-anr toeqciv-euq mae.

²¹ Aqjeq mirnae aernar-aq, aqyawf, aqyawf-euq nuima-euq lafkhoer noeq-eu, “Ngar, aqyawf-euq paerkhanq-anr ya toeqciv-euq taef khawf taqler taef-a.”

²² Khoerngae, Yeqsur nanrghof ghofhaw-awr, zaqmiq aqbur khoerghaq-anr hawmawr-awr aernaeq-eu, “Zaqmiq-or! Laqkhaq caer-awq. Nawq-euq jan-eu jeq nae, nawq-anr bi taqler-euq mae.” Khoerngae yamq-anr nae, zaqmiq aqbur khoerghaq taqler-euq mae.

²³ Yeqsur, zanrdawq khawqnymr-euq aqyuif-euq nymr-anr le’ur ngae, bawqlaw baw-eu tsawrhaq hawr-eu tsawrhaq ghawqmya’ni tsawrngoer ngoerluf-eu gar ya’mawr-euq mae.

²⁴ Yeqsur, aqyawf maf-anr aernaeq-eu, “Dov-ir-awq, aqbur heughaq shir-euq maqngeur-a. Yufkhav luf-eu taef mae.” Khoerngae, aqyawfmaf, Yeqsur-anr uir-eu mae.

²⁵ Khoerngae, tsawrhaq armaf-anr bidov-ir-awr, Yeqsur urler-euq mae. Aqbur khoerghaq-euq aqlaf-anr nyaeftaeq ngae, aqbur khoerghaq turlar-euq mae.

²⁶ Garkawv khoer mirkhanq khoerkhanq khanqlanni gaqdoe-ir-euq mae.

Myavbaef-anr Bi Mawrnya Lar-euq

²⁷ Yeqsur khoergar nae dov-ir ngae, myavbaef nyiq ghaq, aqyawf-euq maeqnan gurgur-aer cantae-eu lafkhoer aer-eu, “Daqbir-euq Zaqyo-or! Nga’nyaf-anr ghawqshaq gaqnaeq laf-awq.”

²⁸ Yeqsur, nymr-euq lafkhoer urler ngae, myavbaef khoer nyiq ghaq, aqyawf jawr-eu gar lar-euq mae. Yeqsur, aqyawf nyaf-anr narhaq-eu, “Ngar janrnya taef-a laer nawnyaf jan ma lor?” Khoerngae, aqyawfnyaf aer-eu, “Sanqpaq-or! Nga’nyaf jan ma.”

²⁹ Khoerngae, Yeqsur, aqyawf nyaf-euq myavnuiv-anr toeqciv-awr aer-eu, “Nawnyaf jan-eu lof-aer pyeuflar luf-ur.”

³⁰ Khoerngae, aqyawf nyaf-euq myavnuiv mawrnya lar-euq mae. Yeqsur, aqyawf nyaf-anr dawq yawkhav-aer bif-eu, “Nawnyaf yanr-awr, garkawv heu tiqghaq-anr-iq taqbi siqnya de-eq.”

³¹ Aerkhawf, aqyawfnyaf dov-ir-awr, Yeqsur-euq garkawv mirkhanq khoerkhanq doeni bi gaqdoe jir-euq mae.

Aqdzawq Tiq Ghaq-anr Dawq Bi Ngaeqnya Lar-euq

³² Aqyawfmaf dov-ir luf ngae, aqcawq, Yeqsur jawr-eu gar, naef ur-eu aqdzawq tiq ghaq-anr sheuqlaf-euq mae.

³³ Naef-anr taedov ghaq ngae, aqdzawq khoerghaq dawq ngaeqnya lar-euq mae. Khoerngae, tsawrhaq armaf mafma deuq zanqler-awr aer-eu, “Irsaqleqlav-euq lafkhoer, heulof-aer ghae-eu jeq tiqjawr-iq maq mawrhaw-aq.”

³⁴ Aerkhawf, Paqliqsaer deuq aer-eu, “Aqyawf-aq, naef sanqpaq-anr ghoeghoe-aer naef-anr taedov-eu nga.”

Yeqsur Ghawqshaq Gaq-eu

³⁵ Khoerngae, Yeqsur, meuqdeuq pudeuq doeni ir-awr, aqyawf maf-euq zanrdawq khawqnymr-euq lafkhoer maeqnaeq tsovnaeq-awr, mqtav mirkhanq-euq garkawv guiqlanqdawq maeqnaeq-euq mae. Khoeruqtaf, kharnar khargawr-eu jeq hawr-eu nargawr yawqjeq navluf-anr lavtaq naeq-euq mae.

³⁶ Yeqsur, tsawrhaq armaf mafma deuq-anr ya’mawr ngae, aqyawf maf-anr ghawqshaq gaq-eu mae. Aqjeq mirnae aernar-aq, aqyawf maf-aq, bo-eu ghaq maqjawr-aer caevbyav taq-euq yawr lof-aer dur-awr ghaq baqluf-eu mae.

³⁷ Khoerngae, Yeqsur, aqyawf-euq zaqlanr deuq-anr heulof-aer aernaeq-euq mae, “Caer myanlar taq-euq ghawqmya’ni jav-eu khawf, yaeq-eu tsawrhaq uicuiv taef mae.

³⁸ Khoermirnae, Aqyawf-euq caeryar-anr caer yaeq-eu tsawrhaq bi’oe-awq laer caer lavluiv-eu Sanqpaq Miqyaer-anr shar-awq.”