Maꞈtehˬ 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Gamfnaeq-eu Garkawv

¹ “Nawmaf bifnaeq gamfnaeq ngae, tsawrhaq bimawr-eu laer dirdaq-aer aqcawq-euq maeqshi mr-eu jeq maqbi pyeufni yanr-awq. Khoerlof-aer mr nar-aq, mq-euq khoertav jawr-eu nawmaf-euq Aqda-euq mrpoeq lafsawq maqza-a.

² “Khoermirnae, nawr bifnaeq gamfnaeq ngae, yawmuiq janrgeuf-eu tsawrhaq lof-aer taqmr. Aqyawf maf-aq, aqcawq bi jaceuq-eu laer zanrdawq khawqnymr-anr hawr-eu, garma doeni maeqhu paw darhae bibaw-awr bifnaeq gamfnaeq-eu mae. Ngar, nawmaf-anr aqdirma-aer aernaeq nyar, aqyawf maf-aq, yawqha-euq mrpoeq lafsawq yawqha zadzeur-euq mae.

³ Nawr bifnaeq gamfnaeq ngae, armar laf mrluf-eu jeq, arcar laf-anr taqbi siq.

⁴ Nawr bifnaeq gamfnaeq ngae, aqcawq maqmawr-eu gar mr-awq. Tsawrhaqzaq maq mawrnya-eu gar hawmawr nya-eu nawq-euq Aqda, nawq-anr aqcawq-euq maeqshi mrpoeq lafsawq bifnaeqlaf taef-a.

Guiqlanq Shar-eu Garkawv

⁵ “Nawmaf guiqlanqshar ngae, yawmuiq janrgeuf-eu tsawrhaq lof-aer taqghae. Aqyawf maf-aq, aqcawq bimawr-eu laer dirdaq-aer zanrdawq khawqnymr-euq lafkhoer hawr-eu garma gartsmr-anr yawf-awr guiqlanq sharmawf-eu mae. Ngar, nawmaf-anr aqdirma-aer aernaeq nyar, aqyawf maf-aq, yawqha-euq guiqlanq yawqha zadzeur-euq mae.

⁶ Nawr guiqlanqshar ngae, nawq-euq kuvlawv-euq lafkhoer urler-awr, larghov piqtaeq-awr nae, maq mawrlar-eu gar jawr-eu nawq-euq Aqda-anr shar-awq. Tsawrhaqzaq maq mawrnya-eu gar hawmawr nya-eu nawq-euq Aqda, nawq-anr aqcawq-euq maeqshi guiqlanq bifnaeqlaf taef-a.

⁷ Nawmaf guiqlanqshar ngae, lawrcifzaq lof-aer gadanr maqtsoeq-eu dawq ngaeqpov ngaeqlav taqlav. Aqyawf maf-aq, ghawqmya’ni tor-eu baqda’nae Miqyaer-anr gaqler taef-a laer noeq-eu mae.

⁸ “Nawmaf, aqyawfmaf lof-aer taqjanr. Aqjeq mirnae aernar-aq, nawqmaf-euq Aqda, nawmaf mawf-eu jeq, nawmaf maqshar-euq minav-aer siqnya luf-eu mae.

⁹ Khoermirnae, nawmaf guiqlanqshar ngae heulof-aer shar-awq: Mq-euq khoertav jawr-eu nga’maf-euq Aqda-or! Nawq-euq tsawrmyanr-anr yawzeu bibaw law.

¹⁰ Nawr uvlanr-eu jeq bi keuvle law. Mq-euq khoertav nawq-euq nuikhanr shir-eu jeq byan-eu lof-aer, mirtsaq-euq khoertav khawf bi byanle law.

¹¹ Iqnan mawf-eu dzaq-awr dawr-eu jeq, iqnan nga’maf-anr bifnaeqlaf.

¹² Aqcawq, nga’maf-anr mrbanq lavbanq laf-euq iqbax-anr nga’maf pyaeqnaeq-euq lof-aer, Nga’maf-euq iqbax-anr khawf, nawr pyaeqnaeq laf-awq.

¹³ Iqbax murjur jur-eu maeqnan nga’maf-anr taqbi ir laf. Yawdoer jeq-anr nae nga’maf-anr bidzeur-ir laf. Uvlanr-eu jeq, baoq hawr-eu yawshaef khanqsaer dawqtawvluf, mqmaq maqbyav yarzir nawq-euq mae. Aqmeq.

¹⁴ “Aqcawq nae nawmaf-anr mrbanq lavbanq laf-euq deuq-anr nawmaf pyaeqnaeq nar-aq, mq-euq khoertav jawr-eu nawmaf-euq Aqda khawf, nawmaf nae mrbanq lavbanq-euq deuq-anr pyaeqnaeqlaf taef-a.

¹⁵ Aerkhawf, nawmaf, aqcawq nae mrbanq lavbanq laf-euq deuq-anr maq pyaeqnaeq nar-aq, mq-euq khoertav jawr-eu nawmaf-euq Aqda khawf, nawmaf nae mrbanq lavbanq-euq deuq-anr maq pyaeqnaeq-ar.

Dzardzaq Sheuq-awr Guiqlanq Shar-eu

¹⁶ “Nawmaf dzardzaq sheuq-awr guiqlanqshar ngae, yawmuiq janrgeuf-eu tsawrhaq lof-aer myavpyawq nyoeqkheurni taqjawr. Aqjeq mirnae aernar-aq, aqyawf maf-aq, dzardzaq sheuq-awr guiqlanq sharluf nga laer, aqcawq bisiq bimawr-eu laer, myavpyawq nyoeqkheurni jawr-eu mae. Ngar, nawmaf-anr aqdirma-aer aernaeq nyar, aqyawf maf-aq, yawqha-euq guiqlanq yawqha zadzeur-euq mae.

¹⁷ Nawr dzardzaq sheuq-awr guiqlanqshar ngae, myavduf puf-awr, uqduq tsaerkanr-anr tsir laef-awq.

¹⁸ Nawr dzardzaq sheuqluf nga laer aqcawq nae taqbi hawdov. Maq mawrlar-eu gar jawr-eu nawq-euq Aqda-anr bimawr nar-aq ghaq-ar. Tsawrhaqzaq maq mawrnya-eu gar hawmawr nya-eu nawq-euq Aqda, nawq-anr aqcawq-euq maeqshi guiqlanq bifnaeqlaf taef-a.

Mq-euq Khoertav Povuiq Taq-awq

¹⁹ “Mirtsaq-euq khoertav yawqha-euq gharduq pyurshuir myawqganq taq povuiqtaq. Mirtsaq-euq khoertav povuiqtaq nar-aq, shmrkaw kawler nya-awr, boeq dzaqnya-eu uqtaf, smrkhoeq khawf daepavanr laf-awr khoeqlar nya-eu mae.

²⁰ Aerkhawf, mq-euq khoertav pyurshuir myawqganq povuiq taq-awq. Mq-euq khoertav-aq, shmrkaw maq kawler nya-aer, boeq maq dzaqler nya-eu uqtaf, smrkhoeq khawf daepavanr lef-awr maq khoeqler nya-a.

²¹ Aqjeq mirnae aernar-aq, nawq-euq pyurshuir myawqganq aqgeugar jav nar-aq, nawq-euq nuima khawf khoergar jav-eu mae.

Mawrdo-euq Tsirkhmq

²² “Myavnuiv-aq, mawrdo-euq tsirkhmq mae. Khoermirnae, nawq-euq myavnuiv yawmuiq nar-aq, mawrdo dolan-aer yawshaef bya taef-a.

²³ Nawq-euq myavnuiv maqmuiq nar-aq, nawq-euq mawrdo dolan-aer zanrtsuini pyeuf-ir taef-a. Aerkhawf, nawq-euq lafkhoer anr-eu yawshaef zanrtsuini pyeuf-ir nar-aq, yawzanr khoer arnavni zanr nmr-mq!

Miqyaer Hawr-eu Pyurshuir

²⁴ “Tsawrhaq tiqghaq-iq yawsanr nyiq ghaq-euq zaqkhav maqgeuf nya-ar. Tiq ghaq-anr byae nar-aq, tiq ghaq-anr gaq-eu mae. Maqngeur nar-aq, tiq ghaq-anr yawzeu baw-awr, tiq ghaq-anr yaeqbawq-aer ghae-eu mae. Nawmaf, tiqyamq-euq lafkhoer, Miqyaer-euq hawr-eu pyurshuir myawqganq-euq kuirlaf zaqkhav maq geufnya-a.

Khanq Taqlanr

²⁵ “Khoermirnae, ngar, nawmaf-anr aernaeq nyar, yawdaef daef-eu gharduq, aqjeq dzaq-awr aqjeq dawr-eu laer khanq taqlanr. Mawrdo-euq gharduq aqjeq dm-awr ghaq-eu laer khawf khanq taqlanr. Daefzir-aq, dzaqdzaq dawrdawr navmaqtser poeqdzaeq-eu maqngeur-a lor? Mawrdo khawf, maeqtsoeq navmaqtser poeqdzaeq-eu maqngeur-a laq?

²⁶ Nawmaf, khoertav paw zawluf-eu arjir-anr hawsher-eq. Arjir-aq, caer maqka, caer maqyaeq, caerjir-anr caer maq pi’anr taq-a. Aerkhawf, mq-euq khoertav jawr-eu nawmaf-euq Aqda, arjir khoerdeuq-anr bidzaq bi dawrluf-eu mae. Nawmaf, arjir khoerdeuq navmaqtser poeqdzaeq-eu maqngeur lor?

²⁷ Nawmaf-euq lafkhoer aqgeu ghaq maqkaq, khanqlanr-eu baqda’nae yawqha-euq zir tiq cav manrlarni aqsur ghaq janrnya-eu le?

²⁸ “Maeqtsoeq-euq garkawv aqjeq mirnae khanqlanr-eu le? Bawrtsanq-anr daef-eu kapaf aryaev aqjox-aer huiqlar-euq nga laer sharnoeqhaw sher-eq. Kapaf arbawq-aq, myawq maqmr, saqlaq khawf maqghawr-a.

²⁹ Aerkhawf, ngar, nawmaf-anr aernaeq nyar, Sorlaqmoq nae yadm yaghaq-euq yawshaef khanqsaer huiq-eu maeqtsoeq-aq, aryaev khoer tiq yaev navni khawf maqtawq-a.

³⁰ Jan-eu ghaq baq-eu tsawrhaq deuq-or! Iqnan daefluf-eu khawf, nishawq nan miqdzaq-anr bi jaevpuiv-eu yarmof-anr Miqyaer teunavni bidm bighaq-eu ngeur nar-aq, nawmaf-anr khoernav maqtser maqbi dm maqbi ghaq naeqlaf-ar lor?

³¹ “Khoermirnae, khanq taqlanr, heulof-aer taqngaeq, ‘Aqjeq yur-awr nae dzaq-eu? Aqjeq yur-awr nae dawr-eu? Aqjeq yur-awr nae dm-awr ghaq-eu paq nga?’

³² Aqcawq tsawrjeuq tsawrca-aq, khoerdeuq dawqtawv luf-anr povluf-eu mae. Nawmaf, heudeuq dawqtawv luf-anr mawf-eu mae laer mq-euq khoertav jawr-eu nawmaf-euq Aqda siqnya luf-eu mae.

³³ Nawmaf, Miqyaer uvlanr-eu jeq hawr-eu aqyawf-euq tsaq-awr dawr-eu jeq-anr jeqhu pov-awq. Khoerdeuq dawqtawvluf, aqyawf, nawmaf-anr biflanq naeqlaf taef-a.

³⁴ Khoermirnae, nishawq-euq gharduq khanq taqlanr. Aqjeq mirnae aernar-aq, nishawq-euq gharduq nishawq khanq lanrkhar za-awr, Aqyawf nan-euq gharduq aqyawf nan shaqzanq javlof-eu mae.