Maꞈtehˬ 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Gawqjawq-euq Khoertav Maeq-euq

¹ Yeqsur, tsawrhaq armaf mafma-anr ya’mawr ngae, gawqjawq-anr davler-awr nuir-euq mae. Khoerngae, zaqlanr deuq, aqyawf jawr-eu gar lar-euq mae.

² Khoerngae, aqyawf, khaqmae mrnga-awr aqyawf maf-anr heulof-aer maeqnaeq tsovnaeq-euq mae:

Guiqlanq Huiq-eu Tsawrhaq

³ “Saflar-euq lafkhoer irshaq shaq-eu tsawrhaq deuq-aq, guiqlanq huiq-eu mae. Aqjeq mirnae aernar-aq, mqtav mirkhanq-aq, aqyawf maf-euq mae.

⁴ “Ghawqshaq-aer ghae-eu tsawrhaq deuq-aq, guiqlanq huiq-eu mae. Aqjeq mirnae aernar-aq, aqyawf maf-anr bi noeqsarlar taef-a.

⁵ “Nuima nanqyuni ghae-eu tsawrhaq deuq-aq, guiqlanq huiq-eu mae. Aqjeq mirnae aernar-aq, mirtsaq-aq, aqyawf maf-anr of-eu jeqbir mae.

⁶ “Tsaq-awr dawr-eu jeq-anr maef-awr shuf-eu tsawrhaq deuq-aq, guiqlanq huiq-eu mae. Aqjeq mirnae aernar-aq, aqyawfmaf ya dzaqdaev ya dawrdaev taef-a.

⁷ “Aqcawq-anr ghawqshaq gaqnya-eu tsawrhaq deuq-aq, guiqlanq huiq-eu mae. Aqjeq mirnae aernar-aq, aqcawq, aqyawf maf-anr ghawqshaq gaqnaeq taef-a.

⁸ “Nuima shawrjaevni ghae-eu tsawrhaq deuq-aq, guiqlanq huiq-eu mae. Aqjeq mirnae aernar-aq, aqyawfmaf, Miqyaer-anr ya’mawr taef-a.

⁹ “Tsaqler dzoerlerni mr-eu tsawrhaq deuq-aq, guiqlanq huiq-eu mae. Aqjeq mirnae aernar-aq, aqyawf maf-anr Miqyaer-euq zaq laer kur taef-a.

¹⁰ “Tsaq-awr dawr-eu jeq-euq baqda’nae khaeq-awr khav-eu gar yadaq-eu tsawrhaq deuq-aq, guiqlanq huiq-eu mae. Aqjeq mirnae aernar-aq, mqtav mirkhanq-aq, aqyawf maf-euq mae.

¹¹ “Ngar baqda’nae aqcawq, nawmaf-anr yaeqbawq-aer aerlar, nawmaf-anr khaeqlar khavlar, maqngeur-eu gar jaqmyawf myawf-eu lafkhoer nawmaf-anr ghawqmya jeq aerdoerlar ngae, nawmaf guiqlanq huiq-eu mae.

¹² Laqkhaq caer-awr lurgha caergha-awq. Aqjeq mirnae aernar-aq, mq-euq khoertav nawmaf-euq mrpoeq lafsawq ghawqmya’ni jav-eu mae. Nawmaf-euq maeqhu daefyaf-euq Miqyaer gharduq ngaeqdan-eu tsawrhaq deuq-anr khawf, aqcawq, aqyawf maf-anr khoerlof-aer khaeqnaeq khavnaeq-euq mae.

Saqdeuf Hawr-eu Yawshaef

¹³ “Nawmaf-aq, mirtsaq-euq saqdeuf mae. Saqdeuf-aq, saqca tav-eu byov-ir nar-aq, aqjox-aer parbi tavlarnya nmr-mq? Saqdeuf khoer nuijeq-euq gharduq gardanr maqtsoeqni pyeuf-ir-euq mirnae, lafnyir shaevdzae-awr aqcawq nawqnawq-aer bican-eu gharduq taef-aer gardanr tsoeq-eu mae.

¹⁴ “Nawmaf-aq, mirtsaq-euq yawshaef mae. Gawqjawq-euq uqdu jav-eu meuq-anr maq daeqkaqzaf nya-a.

¹⁵ Tsirkhmq dof-awr, khavpuq nae moftsanq-eu zanr maqjav-a. Paeqzaq mazaq mawrnya’ni tsirkhmq ciqtaq duq-anr ciqdav taq-eu mae.

¹⁶ Khoerlof-aer durni, nawmaf-euq yawshaef khawf aqcawq-euq maeqshi bibya-awq. Khoerlof-aer mr nar-aq, aqcawq, nawmaf mr-eu yawmuiq jeq-anr ya’mawr ngae, mq-euq khoertav jawr-eu nawmaf-euq Aqda-anr jaceuq taef-a.

Zanrdawq-euq Garkawv

¹⁷ “Ngar, zanrdawq hawr-eu Miqyaer gharduq ngaeqdan-eu deuq-euq dawq-anr lavcawv le-euq nga laer taqnoeq. Ngar lavcawv le-euq maqngeur, mrbyan le-euq ma.

¹⁸ Ngar, nawmaf-anr aqdirma-aer aernaeq nyar, mq hawr-eu mir byov-ir jir khawf, zanrdawq-euq lafkhoer-euq sanqbof tiq bof, tiq toeq taef-aer khawf maqbyov-ir-ar, dawqtawvluf ya byanlar taef-a.

¹⁹ Khoermirnae, aqsur ghaq maqkaq, zanrdawq khofdawq-euq lafkhoer nae nyirdzaeq dzaeq-eu tiq dawq-anr maq mrcaw-aer, aqcawq-anr khawf khoerlof-aer maeqnaeq tsovnaeq nar-aq, aqyawf-aq, mqtav mirkhanq-euq lafkhoer nyirdzaeq dzaeq-eu ghaq laer yabi kur taef-a. Aerkhawf, aqsur ghaq maqkaq, aqyawf mrcaw-eu uqtaf, aqcawq khawf khoerlof-aer mrcawni maeqnaeq tsovnaeq nar-aq, aqyawf-aq, mqtav mirkhanq-euq lafkhoer yawhuiq ghaq laer yabi kur taef-a.

²⁰ Ngar, nawmaf-anr aernaeq nyar, nawmaf-euq tsaq-awr dawr-eu jeq, zanr maeq-eu deuq hawr-eu Paqliqsaer deuq navmaqtser maq myaqdzaeq nar-aq, mqtav mirkhanq-euq lafkhoer tiqjeq ghaenae-iq maqya urler-ar.

Nuima Paer-eu Garkawv

²¹ “‘Tsawrhaq-anr taqsaef. Tsawrhaq-anr saef-eu tsawrhaq-aq, yarkhaq dar-eu gar yadaq mae,’ (Di 20:13; Dm 5:17) laer arhuba-euq tsawrhaq deuq-anr aernaeq taq-euq dawq, nawmaf yagaq-euq mae.

²² Aerkhawf, ngar, nawmaf-anr aernaeq nyar, tiqjeq-iq garkawv maqjav-eu gar nae nuima kharpaer-eu tsawrhaq-aq, yarkhaq dar-eu gar yadaq taef-a. Aqyuif aqnyir-anr ‘Dawrga’ laer khardaeq-eu tsawrhaq-aq, khavma armur-euq maeqshi yarkhaq dar-eu gar yadaq taef-a. Aqyuif aqnyir-anr ‘Aqdzawq argan’ laer khardaeq-eu tsawrhaq-aq, shiqbuir lanma miqdzaq-euq lafkhoer yadaq taef-a.

²³ Khoermirnae, nawr lawr-eu jeq, lawrduq-anr yurkeuv laf-awr lawr-eu laer ghae ngae, nawq-euq aqyuif aqnyir, nawq-anr nuima maqsar-eu tiqjeqnav jav-eu gar noeqdovlar nar-aq,

²⁴ lawr-eu laer ghae-eu jeq, lawrduq-euq maeqshi yurtaq yaf-awr, nawq-euq aqyuif aqnyir naeq-aer tsaqler dzoerlerni jeqhu janr-ir-awq. Khoersanr mirtsa ghoflar-awr lawrnaeq-eu jeq khoer lawrnaeq-awq.

²⁵ “Nawq-anr yarkhaq jaluf-eu ghaq naeq-aer yarkhaq dar-eu nymr-anr leluf ngae, nawnyaf-euq yawkaq yawkawr-aer lavtsaq-awq. Maq lavtsaq nar-aq, aqyawf, nawq-anr yarkhaq dar-eu ghaq-anr a’naeq taef-a. Yarkhaq dar-eu ghaq khawf nawq-anr lofpir-eu kuirlaf-anr a’naeq-awr, nawq-anr kuv-anr dawv taef-a.

²⁶ Ngar, nawq-anr aqdirma-aer aernaeq nyar, maq tsoeqtsaev-euq pyur tiq paev khardzer-eu khoer-aq, nawr, kuv-anr nae tiqjeq ghaenae-iq maqya dovle-ar.

Aqcawq Naeq-aer Banq-awr Joe-eu

²⁷ “‘Aqcawq naeq-aer taqbanq taqjoe’ (Di 20:14; Dm 5:18) laer arhuba-euq tsawrhaq-anr aernaeq taq-euq dawq, nawmaf yagaq-euq mae.

²⁸ Aerkhawf, ngar, nawmaf-anr aernaeq nyar, zaqmiq aqbur-anr haw-awr, banqmawf joemawf-eu nuima anr-eu aqsur ghaq maqkaq, yawqha-euq nuima-euq lafkhoer zaqmiq aqbur khoerghaq naeq-aer banq-awr joeghaq-euq mae.

²⁹ Nawq-euq myavnuiv armar nuiv, nawq-anr iqbax bi mrlaf-euq ngeur nar-aq, myavnuiv khoernuiv-anr kheufdov-awr biqdzae-awq. Mawrdo dolan-aer shiqbuir lanma-anr bi bafanr ghae-eu navmaqtser, arsaer tiq saer biteq-ir-eu-aq, muiqdzaeq taef-a.

³⁰ Nawq-euq aqlaf armar laf, nawq-anr iqbax bi mrlaf-euq ngeur nar-aq, khoerlaf tovtsaev-awr biqdzae-awq. Mawrdo dolan-aer shiqbuir lanma-anr ya’ur-ir-eu navmaqtser, arsaer tiq saer bidanq-ir-eu-aq, muiqdzaeq taef-a.

Miqzaq Khof-eu

³¹ “ ‘Yawqha-euq miqzaq-anr khof nar-aq, aqyawf-anr khof-euq sanqbof tiq jae yabif-eu mae’ (Dm 24:1) laer khawf aertaq-euq mae.

³² Aerkhawf, aqsur ghaq maqkaq, yawqha-euq miqzaq banq-awr khaqmiq sheu-eu maqngeur-eu gar nae khofnaeq nar-aq, yawqha-euq miqzaq-anr banq-awr joe-eu tsawrhaq bipyeuf-ir ni janr-eu mae. Miqkhof khoerghaq-anr kharsheuq-eu ghaq khawf, banq-awr joe-eu mae.

Kamq-eu Garkawv

³³ “ ‘Nawr maq mrnya-eu jeq-anr taqkamq. Aerkhawf, nawq nae kamq-euq lof-aer Sanqpaq Miqyaer-euq maeqshi mrbyan-awq’ (Bts 30:2; Dm 23:21-23) laer arhuba-euq tsawrhaq-anr aernaeq taq-euq dawq, nawmaf yagaq-euq mae.

³⁴ Aerkhawf, ngar, nawmaf-anr aernaeq nyar, tiqpawf-iq taqkamq, mq-anr ghoe-awr taqkamq. Aqjeq mirnae aernar-aq, mq-aq, Miqyaer-euq nuirmanq mae.

³⁵ Mirtsaq-anr ghoe-awr taqkamq. Aqjeq mirnae aernar-aq, mirtsaq-aq, Miqyaer-euq aqkuir cawqtaqduq mae. Yeqlursaqlaeq-anr ghoe-awr nae khawf taqkamq. Aqjeq mirnae aernar-aq, Yeqlursaqlaeq-aq, huiq-eu Sanqpaq uqdzan ghaq-euq meuq mae.

³⁶ Nawq-euq uqduq-anr ghoe-awr nae khawf taqkamq. Aqjeq mirnae aernar-aq, tsaerkanr tiq kanr pyurlar, navlarni nawr maq janrnya-a.

³⁷ Nawq-euq dawq-aq, ngeur nar-aq, ‘Ngeur ma,’ maqngeur nar-aq, ‘Maqngeur’ laer taef-aer aer-awq. Khoertaf-aer dzaeq-ir-euq nar-aq, yawdoer ghaq-anr nae oe-euq mae.

Aqcawq-anr Janrkhof Naeq-eu

³⁸ “ ‘Myavnuiv-euq poeq-aq, myavnuiv, seuq-euq poeq-aq, seuq’ (Di 21:24; Lb 24:20; Dm 19:21) laer aertaq-euq dawq, nawmaf yagaq-euq mae.

³⁹ Aerkhawf, ngar, nawmaf-anr aernaeq nyar, tsawrdoer-anr taq caekhof. Aqcawq, nawq-euq baqba armar paw taevlar nar-aq, yawqpyawqyawq ciqdaq naeq-awr bitaev-awq.

⁴⁰ Aqcawq, nawq-anr yarkhaq ja-awr paerkhanq lafkhoer kanr yurmawf nar-aq, lafnyir kanr khawf biyur-awq.

⁴¹ Aqsur ghaq maqkaq, nawq-anr katir-awr garma tiq lotsov bi’ir naeqlaf nar-aq, nawr, aqyawf naeq-aer nyiq lotsov keuvni ir-awq.

⁴² Nawq-anr shar-eu tsawrhaq-anr bif-awr, nawq-anr ngaqmawf parmawf-eu tsawrhaq-anr garjaw taq jawnaeq.

Muirlar-eu Tsawrhaq-anr Gaq-awq

⁴³ “ ‘Nawq-euq dawqpae jawr-eu tsawrhaq-anr gaq-awr, nawq-anr muir-eu tsawrhaq-anr byae-awq’ (Lb 19:18) laer aertaq-euq dawq, nawmaf yagaq-euq mae.

⁴⁴ Aerkhawf, ngar, nawmaf-anr aernaeq nyar, nawmaf-anr muir-eu tsawrhaq-anr gaq-awr, nawmaf-anr yaqkhaer yaq-eu tsawrhaq-anr dawq ngaeqghae naeq-awq. Nawmaf-anr byae-eu tsawrhaq-anr yawmuiq jeq janrnaeq-awr, nawmaf-anr khaeqlar khavlar-awr, yaeqbawq-aer zmqlar-eu tsawrhaq-euq gharduq guiqlanq shar-awq.

⁴⁵ Khoerlof-aer mr nar-aq, nawmaf-aq, mq-euq khoertav jawr-eu Aqda-euq zaqdeuq pyeuf-eu mae. Aqjeq mirnae aernar-aq, aqyawf-aq, tsawrmuiq-euq gharduq khawf tsawrdoer-euq gharduq khawf nanrma bi dovlar-awr, tsaq-awr dawr-eu tsawrhaq-euq khoertav khawf, maqtsaq maqdawr-eu tsawrhaq-euq khoertav khawf uqyaer bi yaerle-eu mae.

⁴⁶ Nawmaf, nawmaf-anr gaq-eu tsawrhaq-anr taef-aer gaq nar-aq, aqjeq-euq mrpoeq lafsawq za-eu? Jeq taf-eu tsawrhaq khawf khoerlof-aer janrluf-eu maqngeur-a lor?

⁴⁷ Nawmaf, nawq-euq aqyuif aqnyir-anr taef-aer dawqcawqpuq nar-aq, aqcawq taf-aer aqjeq dzaeq-eu le? Jeq taf-eu tsawrhaq khawf khoerlof-aer mrluf-eu maqngeur-a laq?

⁴⁸ Khoermirnae, mq-euq khoertav jawr-eu nawmaf-euq Aqda byan-eu lof-aer nawmaf khawf byanlar-awq.