Maꞈtehˬ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur, Murjur Jur-eu Gar Yadaq-euq

¹ Khoerngae, Yeqsur, naef sanqpaq murjur jur-eu gar yadaqni, Yawshawr Saflar nae bawrtsanq bawrdanr-anr sheuqghae-euq mae.

² Aqyawf 40 nan 40 mir byanni dzardzaq sheuq-euq nar-aq, hawq maeflar-euq mae.

³ Khoerngae, murjur jur-eu ghaq oe-awr aqyawf-anr aernaeq-eu, “Nawr, Miqyaer-euq Zaqyo ngeur nar-aq, khaqlo heudeuq-anr kaqmur pyeuflar-awq laer dawq bif-awq lawr.”

⁴ Aerkhawf, Yeqsur aerkhof naeq-eu, “ ‘Tsawrhaqzaq-aq, dzaq-eu jeq-euq baqda’nae taef-aer daefnya-eu maqngeur-a. Miqyaer-euq khaqmae-anr nae dovle-euq dawq yawqdawq navluf-euq baqda’nae daefnya-eu mae’ (Dm 8:3) laer Yaerbof-euq lafkhoer boftaq-euq mae.”

⁵ Khoerngae, naef sanqpaq, Yeqsur-anr shawr-eu meuq-anr jav-eu uqduq tanqnymr nymrma-euq khaqboeq-anr gordzaeq dzaeq-eu tsanr-anr sheuqdav lef-awr,

⁶ aqyawf-anr aernaeq-eu, “Nawr, Miqyaer-euq Zaqyo ngeur nar-aq, tsawqka ghae-awq. Aqjeq mirnae aernar-aq, Yaerbof-euq lafkhoer boftaq-euq, ‘Sanqpaq Miqyaer, nawq-euq gharduq, Aqyawf-euq mqtav ghaqkhaer-anr khaer-awr, Nawq-euq aqkuir, khaqlo-anr maqya gazawni, Aqyawf maf-euq aqlaf, nawq-anr ciq taef-a.’ ” (Jc 91:11-12)

⁷ Yeqsur, aqyawf-anr aernaeq-eu, “ ‘Nawq-euq Sanqpaq Miqyaer-anr murjur taqjur’ (Dm 6:16) laer Yaerbof-euq lafkhoer boftaq-euq mae.”

⁸ Khoernar-aq, naef sanqpaq, aqyawf-anr gor duidui-eu gawqjawq-anr sheuqdav lef-awr, aqyawf-anr mirtsaq-euq khoertav kharjav-eu mirkhanq dawqtawvluf hawr-eu, mirkhanq khoerdeuq-euq yawshaef khanqsaer dawqtawv luf-anr bimawr-awr,

⁹ aqyawf, Yeqsur-anr aernaeq-eu, “Nawr pawqtsuif pawqdmq dmq-awr ngaq-anr uqduqtanq nar-aq, heudeuq dawqtawvluf ngar, nawq-anr bifnaeq ma.”

¹⁰ Khoerngae, Yeqsur, aqyawf-anr aernaeq-eu, “Naef Saqdaq-or! Dov-ir-awq. Aqjeq mirnae aernar-aq, Yaerbof-euq lafkhoer boftaq-euq, ‘Nawq-euq Sanqpaq Miqyaer-anr taef-aer uqduq yatanq-awr, aqyawf-euq gar taef-aer ya’mr-eu mae.’ ” (Dm 6:13)

¹¹ Khoerngae, naef sanqpaq, Yeqsur jawr-eu gar nae dov-ir-euq mae. Khoernar-aq, mqtav ghaqkhaer deuq oe-awr, aqyawf-anr ngaeqghae le-euq mae.

Yeqsur Gar Mrdanq Bae-euq

¹² Yorhaq, kuv-anr bi nyaefur-euq garkawv Yeqsur yagaq ngae, Gaqliqlaer mirkhanq-anr le-euq mae.

¹³ Khoernar-aq, Naqzaqlaer-anr nae dov-ir-awr, Zaqburloq hawr-eu Naqtaqlir mirkaq-anr lan landzer jav-eu Gaqbeqneqoq meuq-anr jawr-ir-euq mae.

¹⁴ Garkawv khoer-aq, Miqyaer gharduq ngaeqdan-eu Irsaqyar nae aertaq-euq dawq heudawq byanlar-euq mae:

¹⁵ “ Aqcawq tsawrjeuq tsawrca -euq Gaqliqlaer pyeuf-eu Zaqburloq mirkhanq hawr-eu Naqtaqlir mirkhanq, Lan landzer ir-eu garma hawr-eu Yawrdaq lawrbaq khoerpaw baq-anr jawr-eu deuq,

¹⁶ Yawzanr-euq lafkhoer jawr-eu tsawrhaq heudeuq, Zawr bya-eu yawshaef-anr ya’mawr-euq mae. Mirkhanq heudeuq-anr hawr-eu shir-eu narshmr-euq uqmov nuirluv-eu tsawrhaq deuq-euq gharduq, yawshaef byadov le-euq mae.” (Isy 9:1-2)

¹⁷ Khoerngae nae nar-aq, Yeqsur dawqmaeq maeqdanq bae-eu lafkhoer aer-eu, “Noeqpov noeqpar-awq. Aqjeq mirnae aernar-aq, mqtav mirkhanq keuvle taq-euq mae.”

Kurbae Bae-euq Zaqlanr Deuq

¹⁸ Yeqsur, Gaqliqlaer lan landzer canluf ngae, Beqtuvluv laer kur-eu Sirmoq hawr-eu aqyawf-euq aqnyir Aqdaeqlaeq, aqnyafnmr, lan-euq lafkhoer za dzaeluf-eu gar ya’mawr-euq mae. Aqnyaf nmr-aq, ngaqshaq nyaef-eu tsawrhaq mae.

¹⁹ Yeqsur, aqnyaf nmr-anr aernaeq-eu, “Ngaq-euq maeqnan cantae lar-awq. Ngar, nawnyaf-anr, ngaqshaq pov-eu lof-aer, tsawrhaq-anr pov-eu tsawrhaq bipyeuf ma.”

²⁰ Aqnyafnmr tiqpov taef-aer za byaerdzae yaf-awr, aqyawf-euq maeqnan cantae ghae-euq mae.

²¹ Khoergar nae maeqhu paw par irghae ngae, Zeqbeqdaer-euq zaqyo Yaqkov hawr-eu aqyawf-euq aqnyir Yorhaq-anr ya’mawr-euq mae. Aqnyaf nmr-aq, aqyawfnyaf nmr-euq aqda Zeqbeqdaer naeq-aer lawq-euq lafkhoer-euq za dofluf-eu mae. Khoerngae, Yeqsur, aqnyaf nmr-anr kur-euq mae.

²² Aqyawf nyafnmr tiqpov taef-aer lawq-anr byaer-awr, aqda-anr ghawq-awr nae, Yeqsur-euq maeqnan cantae ghae-euq mae.

Yeqsur Nargawr Bi Taqler-euq

²³ Yeqsur, Gaqliqlaer mirkhanq doeni cancan-aer, zanrdawq khawqnymr-euq lafkhoer maeqnaeq tsovnaeq-awr, mqtav mirkhanq-euq guiqlanqdawq maeqnaeq-euq uqtaf, tsawrhaq khoerdeuq kharnar khargawr-eu jeq hawr-eu nargawr yawqjeq navluf-anr lavtaq naeq-euq mae.

²⁴ Aqyawf-euq garkawv Surliv mirkhanq-anr keuvni gaqdoe-ir-euq mae. Khoerngae, nargawr ghawqmya jeq nar-eu tsawrhaq, nargawr yawkhav-aer ya daqluf-eu tsawrhaq, naef ur-eu tsawrhaq, mawrbawq seu-eu tsawrhaq hawr-eu kuirshir lafshir shir-eu tsawrhaq dawqtawv luf-anr, aqcawq, Yeqsur jawr-eu gar sheuqlaf-awr, Yeqsur, aqyawf maf-anr lavtaq naeq-euq mae.

²⁵ Khoerngae, Gaqliqlaer mirkhanq, Deqgaqborlir mirkhanq, Yeqlursaqlaeq, Yurdav mirkhanq, Yawrdaq lawrbaq-euq nanrma dovkhaeq paw nae tsawrhaq armaf mafma tiq maf lar-awr, aqyawf-euq maeqnan cantae luf-eu mae.