Maꞈtehˬ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yorhaq Dawqmaeq Maeq-eu

¹ Khoerngae yamq-anr, Bartirsaq mrnaeq-eu Yorhaq dovlar-awr, Yurdav mirkhanq-anr jav-eu bawrtsanq bawrdanr-anr jawr-awr dawqmaeq heulof-aer maeqluf-eu mae,

² “Noeqpov noeqpar-awq. Aqjeq mirnae aernar-aq, mqtav mirkhanq keuvle shaw-iq mae.”

³ Miqyaer gharduq ngaeqdan-eu Irsaqyar nae aertaq-euq dawq heudawq-aq, Yorhaq-anr aerkeuv mawf-eu mae, “Bawrtsanq bawrdanr-anr tsawrhaq tiq ghaq-euq tersar gur-eu, ‘Sanqpaq Miqyaer-euq garma shardanr-awr, aqyawf-euq garma dawrcoeni lavdawr-awq.’ ” (Isy 40:3)

⁴ Yorhaq-aq, lawtaw cafhm-euq maeqtsoeq dm-awr, jof-anr shaqkhov jofpaf paftaq-awr nae, nyaevbanr hawr-eu bawrtsanq byaquir dzaq-eu mae.

⁵ Khoerngae, Yeqlursaqlaeq-anr jawr-eu tsawrhaq, Yurdav mirkhanq doeni jawr-eu tsawrhaq hawr-eu, Yawrdaq lawrbaq gawvtaw jawr-eu tsawrhaq dawqtawvluf Yorhaq jawr-eu gar ir-awr,

⁶ aqyawfmaf, yawqha-euq iqbax jadov jadov-aer, Yawrdaq lawrbaq-euq lafkhoer Yorhaq nae bartirsaq bi mrnaeq-euq mae.

⁷ Paqliqsaer deuq hawr-eu Saqduqgaer deuq ghawqmya’ni, aqyawf-euq bartirsaq hageuf le-eu gar ya’mawr ngae, aqyawf maf-anr heulof-aer aernaeq-euq mae, “Dof khav-eu arlawr-euq zaqdeuq-or! Aqkar keuvle-eu nuima paer-eu jeq-anr caevbuq nya’ni, aqsur ghaq nae nawmaf-anr aernaeq laf-euq la?

⁸ Nawmaf noeqpov noeqpar-euq gar geux-eu arsiq bi siqle-awq.

⁹ ‘Aqbyaqhaq-aq, nga’maf-euq aqda yawdzanr ma’ laer nawmaf-euq nuima-euq lafkhoer taqnoeq. Ngar, nawmaf-anr aernaeq nyar, Miqyaer-aq, khaqlo heudeuq-anr Aqbyaqhaq-euq zaq bi pyeuflar nya-eu mae.

¹⁰ Nymq-mr deuvhaq, arbawr-euq dawqpaeq-anr bafmawq taq-euq mae. Arsiq yawmuiq maq siqle-eu arbawr yawqbawr navluf turdzae-awr, miqdzaq-anr bafpuiv taef-a.

¹¹ Nawmaf noeqpov noeqparni, ngar-aq, aqdir nawmaf-anr ircuf nae bartirsaq mrnaeq luf-eu ma. Aerkhawf, ngaq-euq maeqnan oeluf-eu ghaq-aq, ngaq-euq navmaqtser baoq huiq-eu mae. Ngar-aq, aqyawf-euq saeqnawv yurnaeq-eu taef khawf maqgeux-a. Aqyawf-aq, Yawshawr Saflar hawr-eu miqdzaq nae nawmaf-anr bartirsaq mrnaeq taef-a.

¹² Aqyawf-euq aqlaf-euq lafkhoer caer bawseu nyaeftaeq taq-euq mae. Aqyawf-euq caerbymr saqkhawf lavluiv-awr, caermar deuq caerjir-anr pi’anr taef-a. Caerkhawf deuq-anr-aq, maqmiv-ir-eu miqdzaq nae keuqdzae taef-a.”

Yeqsur Bartirsaq Hageuf-euq

¹³ Khoerngae, Yeqsur, Yorhaq-euq bartirsaq hageuf-eu laer Gaqliqlaer mirkhanq-anr nae Yawrdaq lawrbaq-anr Yorhaq jawr-eu gar oe-euq mae.

¹⁴ Yorhaq, Yeqsur-anr lavnaq-awr aer-eu, “Ngar, nawq nae bartirsaq bi mrnaeq-eu tsaq mae. Nawr ghaq, ngar jawr-eu gar paroe-euq le lor?”

¹⁵ Khoerngae, Yeqsur, aqyawf-anr aerkhof naeq-eu, “Nymq-mr pov-aq, mrnaeq laf-awq. Aqjeq mirnae aernar-aq, aqdui-euq gharduq tsaq-awr dawr-eu jeq dawqtawvluf byanlarni mr-eu tsaq taef-a.” Khoernar-aq, Yorhaq, aqyawf-anr bartirsaq mrnaeq-euq mae.

¹⁶ Yeqsur bartirsaq hageuf ghaq-euq naeq-aer, ircuf-anr nae dovlar-euq mae. Khoerngae, aqyawf-euq gharduq mq panlar-awr, Yawshawr Saflar, khaqkhoeq lof-aer zafka le-awr nae, aqyawf-euq khoertav zawdawf le-euq gar aqyawf ya’mawr-euq mae.

¹⁷ Khoerngae, mq-anr nae tersar ngaeqdov lef-eu, “Heughaq-aq, ngar zawr gaq-eu ngaq-euq Zaqyo ma. Ngar, aqyawf-anr nuikhanrshir duidui ma.”