Maꞈtehˬ 22 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Oermr Bar-eu Garkawv

¹ Khoerngae, Yeqsur, aqyawf maf-anr aerkhof naeq-eu lafkhoer yawjeq majeq dawq heu ja’naeq-euq mae:

² “Mqtav mirkhanq-aq, sanqpaq tiq ghaq, aqyawf-euq zaqyo-euq gharduq oermr bar-eu yawbui laeqhmq-eu gar dur-eu mae.

³ Aqyawf-euq kuirlaf zaqkhav deuq-anr khaerghae-awr, kurtaq-euq tsawrhaq-anr bi kurlaq-ir-euq mae. Aerkhawf, aqyawfmaf maq larmawf-eu mirnae maqlar-aq.

⁴ Sanqpaq khoerghaq, kuirlaf zaqkhav nuideuq-anr par khaerghae-awr, ‘Nawmaf, kurtaq-euq khoerdeuq-anr daqyan kur-ir-awq laer aernaeq-euq, “Dzaqbyawr lavdawv ghaq-euq ma. Mawrner hawr-eu jeqzaq yawtsur deuq saef-awr, yawqjeq navluf yawmuiq paq-aer laeqhmqdan taq-euq ma. Oermr bar-eu gar lar-awq.” ’

⁵ Aerkhawf, kurtaq-euq tsawrhaq khoerdeuq maq taqhuiq-aer yawqha-euq garma-anr yawqha ir-euq mae. Tiq ghaq-aq, aqyawf-euq yarngae ir-awr, tiq ghaq-aq, jeqgaf gaf-ir-euq mae.

⁶ Nuideuq-aq, kuirlaf zaqkhav khoerdeuq-anr nyaef-awr, yaeqbawq-aer janrnaeq-awr, aqyawf maf-anr saef-euq mae.

⁷ Sanqpaq khoerghaq garkawv khoer-anr yagaq ngae, nuima paer duidui lar-awr, guirzaq deuq-anr khaerghae-awr nae, kuirlaf zaqkhav deuq-anr saef-euq tsawrhaq khoerdeuq-anr bisaef-ir-euq mae. Aqyawf maf-euq meuq-anr khawf bi keuqdzae-euq mae.

⁸ Khoernar-aq, sanqpaq khoerghaq, aqyawf-euq kuirlaf zaqkhav-anr heulof-aer aernaeq-euq mae, ‘Oermr bar-eu yawbui yawmuiq-aer laeqhmq taq-euq ma. Aerkhawf, kurtaq-euq tsawrhaq deuq maqgeux nga.

⁹ Khoermirnae, nawmaf dov-ir-awr, garjawq-anr kharpuq khar mawrle-euq tsawrhaq-anr, oermr bar-eu gar lar-awq laer kurlaq-ir-awq.’

¹⁰ Khoerngae, kuirlaf zaqkhav khoerdeuq garjawq doeni ir-awr, kharpuq khar mawrle-euq tsawrhaq-anr, tsawrmuiq tsawrdoer maqtserni kuruiq laf-awr, oermr barduq-anr daqyan jawqbyan taq-euq mae.

¹¹ “Aerkhawf, Sanqpaq khoerghaq urlar-awr, daqyan deuq-anr hawle ngae, oermr bar-eu gar lar ngae yadm-eu maeqtsoeq maq dmluf-eu tiq ghaq-anr ya’mawr-awr,

¹² aqyawf-anr narhaq-eu, ‘Cawq-or! Oermr bar-eu gar lar ngae yadm-eu maeqtsoeq maqdmni, nawr heugar aqjox-aer lar-euq le?’ Khoerngae, tsawrhaq khoerghaq tiqdawq-iq maq aerkhof nya-aq.

¹³ Khoerngae, sanqpaq khoerghaq, kuirlaf zaqkhav khoerdeuq-anr aernaeq-eu, ‘Aqyawf-anr kuircuf lafcuf cuf-awr, lafnyir paw zanrtsuini ghae-eu gar bafdzae ghae-awq. Aqyawf khoergar jawr-awr, ngoerngoer-aer seuq yateuf taef-a.’

¹⁴ “Aqjeq mirnae aernar-aq, bikur-euq tsawrhaq yawmyaq khawf, tserdov-euq tsawrhaq-aq, yawcuiv mae.”

Gaersaq-anr Jeq Dovnaeq-eu Garkawv

¹⁵ Khoerngae, Paqliqsaer deuq dov-ir-awr, aqjox-aer ghae-awr nae Yeqsur, dawq-euq lanrju-anr bi pafler-eu paq nga laer bawqdzaq-ir-euq mae.

¹⁶ Khoernar-aq, aqyawf maf-euq zaqlanr hawr-eu Heqlor-euq armur-anr ur-eu tsawrhaq deuq-anr, Yeqsur jawr-eu gar khaerghae-awr heulof-aer bi narhaq-euq mae, “Saqlaq-or! Nawr-aq, tsaq-awr dawr-eu tiq ghaq pyeuf-awr, yawtsaq yawdawr dawr-aer Miqyaer-euq garma maeq-eu mae. Aqcawq noeqdoer lar-eu gar khanq maqlanr-aer, myavpyawq huiqnyir khawf maqtser-a laer nga’maf siqnya ma.

¹⁷ Khoermirnae, nawr, nga’maf-anr aernaeq laf-awq, sanqpaq Gaersaq-anr jeq dovnaeq-eu teu, Morseq-euq zanr-anr tsaq mae laq? Nawr aqjox-aer noeq-eu nya?”

¹⁸ Yeqsur, aqyawfmaf yawcawv jeq anr-eu gar siqnya-awr heulof-aer aer-eu mae, “Yawmuiq janrgeuf-eu tsawrhaq deuq-or! Aqjeq mirnae ngaq-anr tsermr haw-eu le?

¹⁹ Ngaq-anr jeq dov-eu pyur marbyav tiq byav bihaw naeqlaf sher-eq.” Khoerngae, aqyawfmaf, aqyawf-anr pyur marbyav tiq byav bifnaeq-euq mae.

²⁰ Khoerngae, Yeqsur, aqyawf maf-anr narhaq-eu, “Heu aqsur ghaq-euq arbar hawr-eu aqsur ghaq-euq tsawrmyanr nga?”

²¹ Aqyawfmaf aer-eu, “Sanqpaq Gaersaq-euq nga.” Yeqsur aer-eu, “Tox-aer mar-iq, sanqpaq Gaersaq-euq myawq-aq, sanqpaq Gaersaq-anr bif-awr, Miqyaer-euq myawq-aq, Miqyaer-anr bif-awq.”

²² Aqyawfmaf dawq khoerdawq-anr yagaq ngae, zanq duidui ler-awr, Yeqsur-anr ghawq-awr aqyawf jawr-eu gar nae dov-ir-euq mae.

Ghofdaef Lar-eu Garkawv

²³ Khoerngae nan, tsawrhaq ghofdaef lar-eu maqbaw-a laer aer-eu Saqduqgaer tiqdeuq, Yeqsur jawr-eu gar lar-awr heulof-aer narhaq-eu mae:

²⁴ “Saqlaq-or! Morseq aertaq-euq, ‘Tsawrhaq tiq ghaq, zaq maq jawrle-euq minav-aer shir-euq nar-aq, ardov ghaq-euq tsuif maqya danq-ir ni, aqnyir ghaq, aqyawf-euq miqzaq-anr yasheuq-eu mae.’ (Dm 25:5)

²⁵ “Dzeurlaf ngae, nga’maf-euq ghanrcae shif maernmr jawr-eu mae. Aqyuif yuifsaq ghaq miqzaq sheuq-awr, zaq maq jawrle-euq minav-aer shir-awr, aqyawf-euq miqzaq, aqyawf-euq aqnyir naeq-aer bi danqdzaq yaf-euq mae.

²⁶ Aqghanr ghaq khawf, smr ghaq tiqghaq khawf, shif ghaq tiqghaq-anr keuvni, zaqmiq aqbur khoerghaq-anr sheuq-awr, zaq maq jawrle-euq minav-aer shir-euq mae.

²⁷ Arsaq saqlar ngae, zaqmiq aqbur khoerghaq khawf shir-euq mae.

²⁸ Tox-aer mar-iq, ghofdaeflar ngae nan, khoer shif maernmr-euq lafkhoer nae, zaqmiq aqbur khoerghaq, aqgeu ghaq-euq miqzaq yageuf-eu la? Aqjeq mirnae aernar-aq, shif maernmrluf aqyawf-anr sheuq-euq mae.”

²⁹ Yeqsur heulof-aer aerkhof naeq-euq mae, “Nawmaf-aq, Yaerbof-anr khawf, Miqyaer-euq baoq-anr khawf maq siqnya-eu mirnae yawlaeq mae.

³⁰ Ghofdaeflar ngae nan, sheuqdanq dzaq-awr, smrmir ir-eu maqbaw-aer, mq-euq khoertav jawr-eu Miqyaer-euq mqtav ghaqkhaer lof-aer pyeuflar taef-a.

³¹ Shir-euq tsawrhaq ghofdaef lar-eu garkawv-anr tafler-awr nae, Miqyaer, nawmaf-anr aertaq-euq dawq-anr maq guihaw-aq lor?

³² ‘Ngar-aq, Aqbyaqhaq-euq Miqyaer, Irtsav-euq Miqyaer hawr-eu Yaqkov-euq Miqyaer ma’ (Di 3:6,15) laer aqyawf aertaq-euq mae. Miqyaer-aq, shir-euq tsawrhaq-euq Miqyaer maqngeur-a. Daefluf-eu tsawrhaq-euq Miqyaer mae.”

³³ Tsawrhaq armaf mafma deuq, Yeqsur maeq-awr tsov-eu gar yagaq ngae zanq duidui ler-euq mae.

Zanrdawq Khofdawq Huiqdzaeq-eu Dawq

³⁴ Saqduqgaer deuq dawq maq ngaeqkhof nya’ni, Yeqsur nae janrnaeq-euq garkawv Paqliqsaer deuq yagaq ngae, aqyawfmaf uiqlar-euq mae.

³⁵ Aqyawf maf-euq lafkhoer zanrdawq siqzaq tiq ghaq, Yeqsur-anr tsermr haw-eu laer narhaq-eu,

³⁶ “Saqlaq-or! Zanrdawq-euq lafkhoer nae huiqdzaeq dzaeq-eu zanrdawq khofdawq aqgeu dawq la?”

³⁷ Yeqsur, aqyawf-anr heulof-aer aerkhof naeq-euq mae, “ ‘Nawq-euq nuima dawqtawvluf, saflar dawqtawvluf, nuinoeq nuidur dawqtawvluf, nawq-euq Sanqpaq Miqyaer-anr gaq-awq.’ (Dm 6:5)

³⁸ Dawq heudawq-aq, huiqdzaeq dzaeq-eu zanrdawq khofdawq yawbae dawq mae.

³⁹ Nyiq dawq tiqdawq khawf heudawq-anr dur-eu mae, ‘Yawqha-euq mawrdo-anr gaq-eu lof-aer, yawqha-euq dawqpae jawr-eu tsawrhaq-anr gaq-awq.’ (Lb 19:18)

⁴⁰ Zanrdawq khofdawq heu nyiq dawq-aq, zanrdawq dawqtawvluf hawr-eu Miqyaer gharduq ngaeqdan-eu tsawrhaq deuq-euq dawq dawqtawv luf-euq dawqpaeq duqpur mae.”

Kali, Aqsur Ghaq-euq Zaqyo La

⁴¹ Paqliqsaer deuq uiqler-awr jawr ngae, Yeqsur, aqyawf maf-anr narhaq-eu,

⁴² “Nawmaf, Kali-euq garkawv, aqjox-aer noeq-eu nya? Aqyawf aqsur ghaq-euq Zaqyo la?” Khoerngae, aqyawfmaf aer-eu, “Daqbir-euq Zaqyo mae.”

⁴³ Yeqsur, aqyawf maf-anr heulof-aer aerkhof naeq-euq mae, “Tox-aer mar-iq, aqjeq mirnae muiq-eu Saflar, Daqbir-anr sheuqghae ngae, Kali-anr ‘Sanqpaq’ laer kur-awr heulof-aer aer-eu la?

⁴⁴ ‘Sanqpaq Miqyaer, ngaq-euq Sanqpaq-anr aernaeq-euq, “Ngar, nawq-anr muir-eu deuq, nawq-euq aqkuir cawqtaqduq maqbi pyeuflar-euq khoerkeuvni, Ngaq-euq armar paw nuir-awq.” ’ (Jc 110:1)

⁴⁵ Daqbir, aqyawf-anr ‘Sanqpaq’ laer kur-eu ngeur nar-aq, aqyawf aqjox-aer Daqbir-euq Zaqyo par pyeufnya-eu la?”

⁴⁶ Khoerngae, tsawrhaq tiqghaq-iq dawq tiqdawq-iq maq aerkhofnaeq nya-aq. Khoerngae nan-anr nae nar-aq, tsawrhaq tiqghaq-iq, aqyawf-anr dawq tiqdawq-iq maqpar narhaq peuq-eu mae.