Maꞈtehˬ 21 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur, Yeqlursaqlaeq-anr Urler-euq

¹ Yeqsur hawr-eu zaqlanr deuq, Yeqlursaqlaeq-euq dawqpae cankeuv laf-awr, Saqloq gawqjawq-anr jav-eu Baerpaqjeq pu-anr larkeuv ngae, Yeqsur, zaqlanr nyiq ghaq-anr khaer-awr aernaeq-eu,

² “Nawnyaf maeqhu paw jav-eu pu-anr le-awr, pu-anr le’ur-euq naeq-aer khoergar manqtanqlav tiq mawr paftawf taq-euq gar ya’mawr-awr, dawqpae manq tanqlavzaq tiq mawr khawf jawr-eu gar ya’mawr taef-a. Arcav tseuvpuir-awr ngar jawr-eu gar tsanrlef-awq.

³ Tsawrhaq tiqghaqnav nawnyaf-anr tiqjeqpaq aerlar nar-aq, nawnyaf, ‘Sanqpaq mawf-eu nya jer’ laer aernaeq-awq. Khoerlof-aer aernaeq nar-aq, khoerghaq, nawnyaf-anr yawkawr-aer tsanr naeqlaf taef-a.”

⁴ Heudeuq dawqtawvluf pyeuflar-euq-aq, Miqyaer gharduq ngaeqdan-eu tsawrhaq nae aertaq-euq dawq heudawq byanlar-euq mae,

⁵ “Ziroq-euq zaqmiq-anr heulof-aer aernaeq-awq, ‘Hawsher-eq, nawq-euq Sanqpaq nuima nanqyuni, manq tanqlav-anr dziq-awr oeluf ngar-a, Manq tanqlavzaq-anr dziq-awr, nawr jawr-eu gar oeluf-eu mae.’ ” (Isy 62:11; Zkl 9:9)

⁶ Zaqlanr khoer nyiq ghaq, Yeqsur khaer-eu lof-aer le-awr mrler-euq mae.

⁷ Aqyawfnyaf, manqtanqlav hawr-eu manq tanqlavzaq tsanrlef-euq mae. Khoernar-aq, aqyawf maf-euq maeqtsoeq laevdav-awr, Yeqsur-anr bidziq-euq mae.

⁸ Tsawrhaq ghawqmya’ni yawqha-euq maeqtsoeq garma-anr khawq-eu deuq khawq, daor arpyaq coer-awr, garma-anr khawq-eu deuq khawq-euq mae.

⁹ Yeqsur-euq maeqhu maeqnan canluf-eu tsawrhaq armaf mafma deuq gur-eu, “Daqbir-euq Zaqyo-anr hosa’na! Sanqpaq Miqyaer-euq tsawrmyanr-euq uqmov oeluf-eu ghaq-aq, guiqlanqhuiq luf-ur! Gor duidui-eu jawrduq-euq lafkhoer hosa’na!” (Jc 118:26)

¹⁰ Khoernar-aq, Yeqsur, Yeqlursaqlaeq-anr urler ngae, meuq meuqlanni lawfgha lar-awr aer-eu, “Tsawrhaq heughaq aqsur ghaq nga?”

¹¹ Khoerngae, tsawrhaq armaf mafma deuq aerkhof naeq-eu, “Teughaq-aq, Gaqliqlaer mirkhanq, Naqzaqlaer-anr jawr-eu Miqyaer gharduq ngaeqdan-eu Yeqsur mae.”

Uqduq Tanqnymr Nymrma Lavshawr-euq

¹² Khoernar-aq, Yeqsur, uqduq tanqnymr nymrma-euq lafkhoer urler-euq naeq-aer, uqduq tanqnymr nymrma-euq lafkhoer myawq anqluf-awr zeurluf-eu tsawrhaq dawqtawv luf-anr taedov-awr, pyur dawqpar-eu tsawrhaq deuq-euq hawqje hawr-eu, khaqkhoeq anq-eu tsawrhaq deuq-euq nuirbov-anr ngawqdzae-euq mae.

¹³ Khoerngae, Yeqsur, aqyawf maf-anr aernaeq-eu, “ ‘Ngaq-euq nymr-anr guiqlanq shar-eu nymr laer yakur taef-a’ (Isy 56:7) laer boftaq-euq khawf, nawmaf, nymr heunymr-anr smrkhoeq tanrjoe-euq jawrduq bi pyeuflar taq-euq nga.”

¹⁴ Myavbaef baef-eu tsawrhaq hawr-eu kuircawv cawv-eu tsawrhaq, uqduq tanqnymr nymrma-euq lafkhoer Yeqsur jawr-eu gar lar-awr, Yeqsur, aqyawf maf-anr lavtaq naeq-euq mae.

¹⁵ Pirma aqyuif deuq hawr-eu zanr maeq-eu deuq, Yeqsur nae mr-euq zanqler paq-aer ghae-eu jeq-anr ya’mawr-awr, zaqdeuq khawf uqduq tanqnymr nymrma-euq lafkhoer jawr-awr, “Daqbir-euq Zaqyo-anr hosa’na” laer gurluf-eu gar parya mawr-euq mirnae, nuima paer duidui-eu mae.

¹⁶ Aqyawfmaf, Yeqsur-anr narhaq-eu, “Zaq heudeuq aqjeq laer gurluf-eu nawq-anr gaqlar mir-a lor?” Yeqsur aerkhof naeq-eu, “Gaqlar mir-a-eq. ‘Zaqnanq deuq hawr-eu aqcoer dawrzaq deuq-euq khaqmae-anr nae, Byan duidui-eu jaceuq-eu dawq, nawr bi dovlar-eu mae’ (Jc 8:2) laer boftaq-euq gar nawmaf maq guihaw-aq laq?”

¹⁷ Khoernar-aq, aqyawf, aqyawf maf-anr nae ghawq-awr meuq-anr nae dov-ir-euq nar-aq, Beqtaqnir pu-anr yaf-ir-euq mae.

Siqguq Arbawr-anr Yaqkhaer Yaq-euq

¹⁸ Uqshawq paw meuq-anr ghoflerluf ngae, Yeqsur, hawq maeflar-euq mae.

¹⁹ Garma gardzer siqguq arbawr tiq bawr daef-eu gar mawr-awr haw-ir ngae, arsiq maqsiq-aer arpaf taef-aer maer-eu gar ya’mawr-euq mae. Khoerngae, Yeqsur, arbawr khoerbawr-anr, “Iqnan nae nar-aq, nawr arsiq tiqjawr-iq taqpar siqle” laer aernaeq ngae, arbawr khoerbawr tiqpov taef-aer bawrgur gur-ir-euq mae.

²⁰ Zaqlanr deuq ya’mawr ngae, zanq duidui ler-awr aer-eu, “Aqjeq mirnae siqguq arbawr aqyawf ngaejawr nae bawrgur gur-ir-euq nga?”

²¹ Khoerngae, Yeqsur, aqyawf maf-anr heulof-aer aerkhof naeq-euq mae: “Ngar, nawmaf-anr aqdirma-aer aernaeq nyar, nawmaf jan-awr, nuima povpov lavlav-aer maqghae nar-aq, ngaq nae siqguq arbawr heubawr-anr janrnaeq-euq lof-aer, nawmaf khawf janrnya-eu uqtaf, ‘Nawq-euq jawrduq-anr nae dov-ir-awr, iqmalavshav-anr gapuf-ir-awq’ laer gawqjawq heujawq-anr aernaeq ngae, khoerlof-aer pyeuflar taef-a.

²² Nawmaf guiqlanqshar ngae, jan-eu nuima anr nar-aq, kharshar-eu dawqtawvluf za taef-a.”

Yeqsur-euq Aryaq-euq Garkawv Narhaq-eu

²³ Yeqsur, uqduq tanqnymr nymrma-euq lafkhoer urler-awr maeqnaeq tsovnaeqluf ngae, pirma aqyuif deuq hawr-eu mirkhanqzaq-euq khoertav aqyuif aqtsu geufluf-eu deuq, aqyawf jawr-eu gar lar-awr narhaq-eu, “Nawr aryaq aqgeugar nae za-awr heudeuq mrluf-eu le? Aqsur ghaq nae nawq-anr aryaq bifnaeq laf-euq la?”

²⁴ Khoerngae, Yeqsur, aqyawf maf-anr heulof-aer aerkhof naeq-euq mae, “Ngar khawf nawmaf-anr tiq dawq narhaq la, nawmaf, ngaq-anr aerkhof naeqlaf nar-aq, ngar khawf aryaq aqgeugar nae za-awr heudeuq mrluf-eu le laer nawmaf-anr aernaeq ma.

²⁵ Yorhaq-euq bartirsaq mrnaeq-eu jeq aqgeugar nae oe-euq la? Mq-euq khoertav nae oe-euq la lor? Maqngeur nar-aq, tsawrhaq-anr nae lar-euq la laq?” Khoerngae, aqyawf maf-euq yawkaq jasawx-eu lafkhoer aer-eu, “Aqduimaf, ‘Mq-euq khoertav nae oe-euq mae’ laer aernar-aq, aqyawf, ‘Tox-aer mar-iq, nawmaf, aqyawf-anr aqjeq mirnae maqjan-eu le’ laer aerlar taef-a.

²⁶ Aerkhawf, aqduimaf, ‘Tsawrhaq nae bimr-euq mae’ laer aernar-aq khawf, tsawrhaq armaf mafma deuq-anr guv mir-a nawq. Aqjeq mirnae aernar-aq, tsawrhaq dawqtawvluf, Yorhaq-aq, Miqyaer gharduq ngaeqdan-eu tsawrhaq mae laer sawxtaq-euq mae.”

²⁷ Khoermirnae, aqyawfmaf, Yeqsur-anr aerkhof naeq-eu, “Nga’maf maqsiq.” Yeqsur aer-eu, “Tox-aer mar-iq, ngar khawf aryaq aqgeugar nae za-awr heudeuq mrluf-eu le laer nawmaf-anr maq aernaeq.”

Zaqyo Nyiq Ghaq-euq Garkawv

²⁸ Yeqsur heulof-aer par aernaeq-euq mae, “Garkawv heukawv nawmaf aqjox-aer sharnoeq-eu nya? Tsawrhaq tiq ghaq, zaqyo nyiq ghaq jawr-eu mae. Aqyawf, zaqyo aqyuif ghaq jawr-eu gar ir-awr aer-eu, ‘Zaqyo-or! Iqnan aqgaf yarkmr-anr gar mr-ir de-eq.’

²⁹ Khoerngae, zaqyo aqyuif ghaq aer-eu, ‘Ngar maqir.’ Aerkhawf, aqyawf noeqpov lar-awr ir-euq mae.

³⁰ Khoernar-aq, aqyawf, zaqyo aqnyir ghaq jawr-eu gar khawf ir-awr, khoerlof-aer aernaeq-euq mae. Aqyawf aer-eu, ‘Euq, da-or! Ngar ir ma.’ Aerkhawf, aqyawf maqir-aq.

³¹ Zaqyo khoer nyiq ghaq-anr nae, aqda-euq nuima tsaqni mr-eu aqgeu ghaq nya?” Aqyawfmaf aerkhof-eu, “Aqyuif ghaq mir-a.” Khoerngae, Yeqsur, aqyawf maf-anr heulof-aer aernaeq-euq mae, “Ngar, nawmaf-anr aqdirma-aer aernaeq nyar, jeq taf-eu tsawrhaq hawr-eu mawrdo anq-eu tsawrhaq deuq-aq, nawmaf-euq jeqhu nae Miqyaer uvlanr-eu jeq-euq lafkhoer urler luf-eu mae.

³² Aqjeq mirnae aernar-aq, Yorhaq, nawmaf jawr-eu gar tsaq-awr dawr-eu garma-euq lafkhoer oe-euq khawf, nawmaf, aqyawf-anr maqjan-a. Aerkhawf, jeq taf-eu tsawrhaq hawr-eu mawrdo anq-eu deuq-aq, aqyawf-anr jan-euq mae. Nawmaf khoerdeuq jan-eu gar ya’mawr-euq khawf, iqbax maq noeqpov maq noeqpar-aer aqyawf-anr maqjan-a.”

Aqgaf Yarkmr Mrpav Pav-eu Deuq

³³ “Yawjeq majeq dawq yawqdawq yawq-anr narhaq sher-eq. Yarsanr aqda tiq ghaq, aqgaf yarkmr tiq kmr mr-awr, yarkmr yawmuiq-aer mrjawq-awr, yarkmr-euq lafkhoer aqgaf dzaruir nawqdovduq janr-awr nae, yarkmr-anr lof-eu nymrgor tiq nymr khawf tsov-euq mae. Khoernar-aq, aqgaf yarkmr-anr mr-eu deuq-anr ngaqnaeq yaf-awr, yawqkhanq yawqmir yawq-anr ghawqmyanrni jawr-ir-euq mae.

³⁴ Aqgaf arsiq pyav-eu aryamq tsaqlar ngae, aqyawf-euq kuirlaf zaqkhav tiqdeuq-anr aqgaf yarkmr-anr mr-eu deuq jawr-eu gar bile-awr, aqgaf arsiq bi pilaq ler-euq mae.

³⁵ Aqgaf yarkmr-anr mr-eu deuq kuirlaf zaqkhav khoerdeuq-anr nyaef-awr, tiq ghaq-anr diq-awr, tiq ghaq-anr saef-awr, tiq ghaq-anr-aq, khaqlo nae biq-euq mae.

³⁶ Yawbae pov myavmaqtser yarsanr khoerghaq, kuirlaf zaqkhav deuq-anr parbi le-euq mae. Aqgaf yarkmr-anr mr-eu deuq yawbae pov lof-aer aqyawf maf-anr khawf janrnaeq-euq mae.

³⁷ Arsaq saqlar ngae, ‘Aqyawfmaf, ngaqli-anr yawzeubaw taef-a’ laer aer-awr, aqyawf-euq zaqyo-anr aqyawfmaf jawr-eu gar bile-euq mae.

³⁸ Aqgaf yarkmr-anr mr-eu deuq, zaqyo khoerghaq-anr ya’mawr ngae, aqyawf maf-euq yawkaq aer-eu, ‘Heughaq-aq, jeqbir of-eu ghaq ngar-a. Dzawq, aqduimaf, aqyawf-anr saef-awr, aqyawf-euq jeqbir yurgeuf kar-eur.’

³⁹ Khoernar-aq, aqyawfmaf, aqyawf-anr nyaef-awr, aqgaf yarkmr-euq lafnyir daeqdov ghae-awr saef-euq mae.

⁴⁰ “Aqgaf yar-euq yawsanr ghaq ghoflar ngae, aqgaf yarkmr-anr mr-eu khoerdeuq-anr aqjox-aer janrnaeq-eu jeq nya?”

⁴¹ Aqyawfmaf, Yeqsur-anr aerkhof-eu, “Aqyawf, tsawrcawv khoerdeuq-anr yawkhav-aer janrnaeq taef-a. Khoernar-aq, aqyawf, aryamq tsaq ngae, aqgaf arsiq pyavnaeq-eu aqgaf yarkmr-anr mr-eu tsawrhaq yawqdeuq yawq-anr par ngaqnaeq taef-a.”

⁴² Yeqsur, aqyawf maf-anr heulof-aer aernaeq-euq mae, “Yaerbof-euq lafkhoer heulof-aer boftaq-euq gar nawmaf maq guihaw-aq lor? ‘Nymr tsov-eu deuq nae bafdzae taq-euq khaqlo khoersiq, Lafcoer-euq lozif pyeuflar-euq mae. Sanqpaq Miqyaer nae heulof-aer janr-euq mae. Heu-aq, aqdui-euq myavnuiv-euq gharduq arnavni zanqler paq-aer ghae-eu nga.’ (Jc 118:22-23)

⁴³ “Khoermirnae, ngar, nawmaf-anr aernaeq nyar, Miqyaer uvlanr-eu jeq nawmaf-euq lafkhoer nae yurdov-awr, Miqyaer uvlanr-eu jeq-euq arsiq siqle-eu tsawrjeuq tsawrca-anr bifnaeq taef-a.

⁴⁴ Khaqlo khoersiq-euq khoertav gadav-euq yawqghaq navluf khaef-ir khoev-ir taef-a. Khaqlo khoersiq nae kharbi gadav-euq tsawrhaq-aq, ya’meur yaloer-ir taef-a.”

⁴⁵ Pirma aqyuif deuq hawr-eu Paqliqsaer deuq, Yeqsur nae aer-euq yawjeq majeq dawq-anr yagaq ngae, aqyawf, aqyawf maf-euq garkawv ngaeqluf-eu nga laer siqnya-euq mae.

⁴⁶ Aqyawfmaf, aqyawf-anr nyaefmawf-eu khawf, tsawrhaq armaf mafma-anr guv-eu mae. Aqjeq mirnae aernar-aq, tsawrhaq armaf mafma khoerdeuq, Yeqsur-aq, Miqyaer gharduq ngaeqdan-eu tsawrhaq mae laer sawxtaq-euq mae.