Maꞈtehˬ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Siqzaq Ganryo Deuq Lar-euq

¹ Sanqpaq Heqlor uvlanrluf ngae, Yeqsur, Yurdav mirkhanq Baeqlaeqhaeq-anr daefle-euq mae. Khoerngae, siqzaq ganryo heumyav ghaq nanrma dovkhaeq paw nae Yeqlursaqlaeq-anr larkeuv-awr narhaq-eu,

² “Yurdav tsawrhaq-euq Sanqpaq geuf-eu laer daefle-euq ghaq aqgar jawr-eu la? Nga’maf, nanrma dovkhaeq paw aqyawf-euq aqguir-anr ya’mawr-awr, aqyawf-anr uqduq tanq-eu gharduq lar-euq ma.”

³ Sanqpaq Heqlor yagaq ngae, nuima tiqpawf-iq maqsar-a. Yeqlursaqlaeq-anr jawr-eu tsawrhaq dawqtawvluf khawf nuima maqsar-a.

⁴ Khoerngae, aqyawf, pirma aqyuif deuq hawr-eu zanr maeq-eu tsawrhaq dawqtawv luf-anr kuruiq-awr, Kali aqgeugar daefle-eu la laer narhaq-euq mae.

⁵ Aqyawfmaf heulof-aer aerkhof naeq-euq mae, “Yurdav mirkhanq, Baeqlaeqhaeq-anr daefle taef-a. Aqjeq mirnae aernar-aq, Miqyaer gharduq ngaeqdan-eu tsawrhaq heulof-aer boftaq-euq mae:

⁶ ‘Yurdav mirkhanq-anr jav-eu Baeqlaeqhaeq-or! Nawr-aq, Yurdav-euq meuqdeuq-euq lafkhoer nae teqdzaeq-eu meuq maqngeur-a. Aqjeq mirnae aernar-aq, aqkar, ngaq-euq Irsaqleqlav tsawrjeuq tsawrca-anr uvlanr-eu tiq ghaq, Nawq-euq lafkhoer nae dovlar taef-a.’ ” (Mik 5:2)

⁷ Khoerngae, Heqlor, aqcawq-anr maqbi siqni siqzaq ganryo khoerdeuq-anr kur-awr, aqguir khoersiq dovlar-euq aryamq narhaq duq-euq mae.

⁸ Khoernar-aq, aqyawf, aqyawf maf-anr Baeqlaeqhaeq-anr khaerghae-eu naeq-aer aernaeq-eu, “Nawmaf, zaq heughaq-anr yawmuiq-aer povmawr duq-ir-awq. Povmawr-euq nar-aq, ngar khawf aqyawf-anr uqduq yatanqni, ngaq-anr tsafgaqlar de-eq.”

⁹ Aqyawfmaf, sanqpaq-euq dawq yagaq-awr dov-ir-euq mae. Nanrma dovkhaeq paw ya’mawr-euq aqguir khoersiq par dovle-awr, aqyawf maf-euq maeqhuq maeqhuq-aer irghae-awr, zaq khoerghaq jawr-eu gar irkeuv ngae, khoertav naqler taq-euq mae.

¹⁰ Aqyawfmaf, aqguir khoersiq-anr ya’mawr ngae, laqkhaqcaer duidui-eu mae.

¹¹ Irkanr urler ngae, aqlizaq hawr-eu aqyawf-euq aqma Maqliv-anr ya’mawr-awr, pawqtsuif pawqdmq dmq-awr, aqlizaq-anr uqduq tanq-euq mae. Khoernar-aq, aqyawfmaf nae yurlaf-euq arpoeq zawr khav-eu lafsawq deuq beuqdov-awr, aqyawf-anr damqnaeq-euq mae. Lafsawq khoerdeuq-aq, shuir, lawrbaoq hawr-eu murlaq mae.

¹² Yufmav mav-eu lafkhoer, Sanqpaq Miqyaer, aqyawf maf-anr Heqlor jawr-eu gar taq ghofmawrler laer maeqnaeq-euq mirnae, aqyawfmaf yawqpawyawq nae aqyawf maf-euq mirkhanq-anr ghof-ir-euq mae.

Irjirtuv-anr Caevjawr-ir-euq

¹³ Aqyawfmaf ghof-ir dzeur-euq nar-aq, Sanqpaq Miqyaer-euq mqtav ghaqkhaer tiq ghaq, Yorsaev yufmav mav-eu lafkhoer dovle-awr aer-eu, “Tur-awr, aqlizaq hawr-eu aqyawf-euq aqma sheuq-awr Irjirtuv-anr caevjawr-ir-awq. Ngar, nawq-anr aernaeqlaf ngae keuvni khoergar jawr-awq. Aqjeq mirnae aernar-aq, Heqlor, aqlizaq-anr saef-eu laer pov taef-a.”

¹⁴ Khoerngae, Yorsaev tur-awr, uqcif saerghanr ma-aer aqlizaq hawr-eu aqyawf-euq aqma sheuq-awr, Irjirtuv-anr caevjawr-ir-euq mae.

¹⁵ Heqlor shir ngae keuvni, khoergar jawr-euq mae. Garkawv heu-aq, Sanqpaq Miqyaer nae aqyawf-euq gharduq ngaeqdan-eu tsawrhaq-anr ghoe-awr aertaq-euq dawq heudawq byanlarni pyeuflar-euq mae, “Ngar, ngaq-euq zaqyo-anr Irjirtuv-anr nae kurdov laf-euq ma.” (Hs 11:1)

Heqlor, Aqlizaq Deuq-anr Saef-euq

¹⁶ Khoernar-aq, aqyawf-aq, siqzaq ganryo deuq nae jaqmyawf bimyawf-euq nga laer Heqlor yasiq ngae, nuima paer duidui-eu mae. Aqyawf nae siqzaq ganryo deuq-anr narhaqduq taq-euq aryamq-anr sharsawx-awr, Baeqlaeqhaeq hawr-eu tanqghof tanqjawr-anr kharjawr-eu nyiq khof-euq lafov paw-euq aqli deuq-anr, tsawrhaq khaerghae-awr bi saefjir-euq mae.

¹⁷ Heu-aq, Miqyaer gharduq ngaeqdan-eu Yeqlaqmir nae aertaq-euq dawq heudawq byanlar-euq mae:

¹⁸ “Laqmar meuq-euq lafkhoer noeqdui noeqduir-awr tsawrngoer ngoer-eu tersar yagaq-euq mae. Khoer-aq, Laqkeqlar, aqyawf-euq zaqdeuq-euq baqda’nae ngoerluf-eu mae. Aqyawf-euq zaqdeuq maqpar jawr-eu mirnae, aqcawq, aqyawf-anr nuima maqbi sarlar nya-a.” (Ylm 31:15)

Naqzaqlaer-anr Ghofler-euq

¹⁹ Heqlor shirdzeur-awr, Yorsaev, Irjirtuv-anr jawrluf ngae, Sanqpaq Miqyaer-euq mqtav ghaqkhaer tiq ghaq, Yorsaev yufmav mav-eu lafkhoer dovle-awr heulof-aer aernaeq-euq mae,

²⁰ “Tur-awr, aqlizaq hawr-eu aqyawf-euq aqma sheuq-awr, Irsaqleqlav mirkhanq-anr ghofler-awq. Aqjeq mirnae aernar-aq, aqlizaq-anr saef-eu laer pov-eu ghaq shir-euq mae.”

²¹ Khoerngae, Yorsaev tur-awr, aqlizaq hawr-eu aqyawf-euq aqma sheuq-awr, Irsaqleqlav mirkhanq-anr ghofler-euq mae.

²² Aerkhawf, Aqgeqlar, aqyawf-euq aqda Heqlor-euq dzoeqdzaq za-awr, Yurdav mirkhanq-anr uvlanr luf-eu garkawv Yorsaev yagaq-euq mirnae, khoergar maq ghofler peuq-a. Yufmav mav-eu lafkhoer, Miqyaer, aqyawf-anr par maeqnaeq-awr, Gaqliqlaer mirkhanq-anr jawrler-euq mae.

²³ Naqzaqlaer laer kur-eu meuq tiq meuq-anr lekeuv-awr, khoergar jawr-euq mae. Khoer-aq, Miqyaer gharduq ngaeqdan-eu tsawrhaq nae aertaq-euq dawq heudawq byanlar-euq mae, “Aqyawf-anr Naqzaqlaer tsawrhaq laer kur taef-a.”