Maꞈtehˬ 19 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqzaq Khof-eu Garkawv

¹ Khoerngae, heulof-aer pyeuflar-euq mae. Yeqsur garkawv khoerdeuq maeqghaq-euq nar-aq, Gaqliqlaer mirkhanq-anr nae dov-ir-awr, Yawrdaq lawrbaq-euq nanrma dovkhaeq paw jav-eu Yurdav mirkhanq-anr irkeuv-euq mae.

² Tsawrhaq armaf ghawqmya’ni, aqyawf-euq maeqnan cantae-awr, khoergar aqyawf, aqyawf maf-anr lavtaq naeq-euq mae.

³ Khoerngae, Yeqsur-anr tsermr haw-eu laer Paqliqsaer tiqpavnav deuq, aqyawf jawr-eu gar lar-awr narhaq-eu, “Aqjeq-euq garkawv-anr nae maqkaq, miqzaq khof-eu-aq, zanrdawq khofdawq-anr tsaq mae lor?”

⁴ Khoerngae, Yeqsur, aqyawf maf-anr heulof-aer aerkhof naeq-euq mae: “ ‘Ardanqbae ngae, tsawrhaqzaq-anr bae-euq ghaq, zaqyo aqli hawr-eu zaqmiq aqbur-anr bae-euq mae.’ (Adb 1:27; 5:2)

⁵ ‘Khoermirnae, zaqyo aqli-aq, yawqha-euq aqma aqda-anr nae yaghawq-awr, yawqha-euq miqzaq naeq-aer gawf-ir-eu lafkhoer, nyiq ghaq khawf tiq ghaq taef-aer pyeuflar-eu mae’ (Adb 2:24) laer boftaq-euq Yaerbof khoerdeuv, nawmaf maq guihaw-aq lor?

⁶ Tox-aer mar-iq, aqnyaf dzerzaq-aq, nyiq ghaq maqpar ngeur-aer, tiq ghaq taef mae. Khoermirnae, Miqyaer nae yurgawf-euq gar tsawrhaqzaq maq lavghawq khmq-a.”

⁷ Paqliqsaer deuq, aqyawf-anr narhaq-eu, “Tox-aer mar-iq, aqjeq mirnae Morseq, miqzaq ghaq-anr khof-eu sanqbof tiq jae bifnaeq nar-aq, khofnya taef-a laer dawq biftaq-euq la?” (Dm 24:1)

⁸ Khoerngae, Yeqsur, aqyawf maf-anr heulof-aer aernaeq-euq mae: “Nawmaf nuima ghanr-eu mirnae, Morseq, miqzaq khofnya taef-a laer pyaeqtaq-euq mae. Aerkhawf, ardanqbae ngae-aq, khoerlof-aer maqngeur-a.

⁹ Ngar, nawmaf-anr aernaeq nyar, banq-awr khaqmiq sheu-euq maqngeur-eu gar nae yawqha-euq miqzaq-anr khof-awr, yawqghaq yawq-anr sheuq-eu tsawrhaq aqgeu ghaq maqkaq, zaqmiq aqbur khoerghaq-anr banq-awr joe-euq mae.”

¹⁰ Khoerngae, zaqlanr deuq, Yeqsur-anr aernaeq-eu, “Miqzaq yozaq-euq yawkaq khoerlof-aer ghae-eu ngeur nar-aq, maq sheuqdanq dzaqni jawr-eu-aq, muiqdzaeq-eu jeq ngar-a.”

¹¹ Khoerngae, Yeqsur heulof-aer aernaeq-euq mae: “Dawq teudawq-aq, yawqghaq navluf hageuf coer-eu maqngeur-a. Miqyaer nae biftaq-euq deuq taef-aer hageuf coer-eu mae.

¹² Aqjeq mirnae aernar-aq, tsawrhaqzaq-aq, daefle ngae nae miqtsuif pyeuf-eu tsawrhaq khawf jawr-awr, tsawrhaq nae shawf-euq khawf jawr-eu uqtaf, mqtav mirkhanq-euq gharduq maqsheuq-eu khawf jawr-eu mae. Dawq heudawq-anr aqsur ghaq hageufcoer nya laer hageuf-awq.”

Yeqsur, Zaqdeuq-anr Dawq Ngaeqghae Naeq-euq

¹³ Khoernar-aq, Yeqsur nae aqlaf bafdav-awr guiqlanq bi sharnaeq-eu laer aqcawq, zaqdeuq-anr sheuq-awr Yeqsur jawr-eu gar lar ngae, zaqlanr deuq, tsawrhaq khoerdeuq-anr daeqnaeq-euq mae.

¹⁴ Khoerngae, Yeqsur aer-eu, “Zaqdeuq-anr taq lavtsoeq, ngar jawr-eu gar bilar-awq. Aqjeq mirnae aernar-aq, mqtav mirkhanq-euq lafkhoer-aq, heulof-aer ghae-eu deuq yajawr-eu mae.”

¹⁵ Khoernar-aq, Yeqsur, zaq khoerdeuq-euq khoertav aqlaf bafdav naeq-awr, khoergar nae dov-ir-euq mae.

Smrmuiq Smrbaw Hawr-eu Miqyaer-euq Mirkhanq

¹⁶ Khoerngae, tsawrhaq tiq ghaq, Yeqsur jawr-eu gar lar-awr narhaq-eu, “Muiq-eu Saqlaq-or! Ngar mqmaq maqbyav yarzir daef-eu jeq za’ni, gar yawmuiq aqgeu jeq ya’mr-eu la?”

¹⁷ Khoerngae, Yeqsur, aqyawf-anr heulof-aer aerkhof naeq-euq mae, “Nawr aqjeq mirnae ngaq-anr muiq-eu ghaq laer kur-eu le? Miqyaer maqngeur nar-aq, yawmuiq tiqghaq-iq maqjawr-a. Miqyaer taef-aer muiq-eu mae. Aerkhawf, nawr daef-eu jeq-euq lafkhoer urlermawf nar-aq, zanrdawq khofdawq-anr mrcaw-awq.”

¹⁸ Aqyawf narhaq-eu, “Zanrdawq khofdawq aqgeu deuq?” Khoerngae, Yeqsur heulof-aer aernaeq-euq mae, “ ‘Tsawrhaq-anr taqsaef,’ ‘Aqcawq-euq miqzaq yozaq-anr taqbanq taqjoe,’ ‘Smrkhoeq taqkhoeq,’ ‘Maqtsaq maqdawr-eu sarkir taqkamq,’

¹⁹ ‘Nawqma nawqda-anr yawzeu baw-awq,’ (Di 20:12-16; Dm 5:16-20) ‘Yawqha-euq mawrdo-anr gaq-eu lof-aer, yawqha-euq dawqpae jawr-eu tsawrhaq-anr gaq-awq.’ ” (Lb 19:18)

²⁰ Khoerngae, zaqguq khoerghaq aer-eu, “Ngar yawnyir ngae nae heudeuq dawqtawv luf-anr yawmuiq-aer mrcaw laf-euq ma. Aqjeq parya mr-eu la siq?”

²¹ Yeqsur, aqyawf-anr aernaeq-eu, “Nawr byan-eu tsawrhaq pyeufmawf nar-aq, ghof-ir-awr, nawr kharjav-eu jeq dawqtawvluf anqdzae-awr nae, shaq-awr zanq-eu deuq-anr birnaeq-ir-awq. Khoerlof-aer janr nar-aq, mq-euq khoertav pyurshuir myawqganq javlar taef-a. Khoernar-aq, ngaq-euq maeqnan cantae lar-awq.”

²² Khoerngae, zaqguq khoerghaq dawq khoerdawq-anr yagaq ngae, noeqshaq duidui-eu lafkhoer candov ghae-euq mae. Aqjeq mirnae aernar-aq, aqyawf myawqganq ghawqmya’ni jav-eu mae.

²³ Khoerngae, Yeqsur, aqyawf-euq zaqlanr deuq-anr heulof-aer aernaeq-euq mae, “Ngar, nawmaf-anr aqdirma-aer aernaeq nyar, smrmuiq smrbaw deuq, mqtav mirkhanq-anr urler-eu-aq shaq duidui-eu mae.

²⁴ Ngar, nawmaf-anr par aernaeq nyar, lawtaw, aqghawf-euq lafnaq-anr urler-eu-aq, smrmuiq smrbaw deuq, Miqyaer uvlanr-eu jeq-euq lafkhoer urler-eu navmaqtser awq-eu mae.”

²⁵ Zaqlanr deuq dawq khoerdawq-anr yagaq ngae, zanq duidui ler-awr aer-eu, “Tox-aer mar-iq, aqsur ghaq kakhof-eu jeq za’nya-eu?”

²⁶ Yeqsur, aqyawf maf-anr haw-awr nae aernaeq-eu, “Heu-aq, tsawrhaqzaq janrnya-eu jeq maqngeur-a. Aerkhawf, Miqyaer-aq, yawqjeq navluf janrnya-eu mae.”

²⁷ Khoerngae, Beqtuvluv, aqyawf-anr narhaq-eu, “Hawsher-eq, nga’maf yawqjeq navluf byaerdzae yaf-awr, nawq-euq maeqnan cantae luf-eu ma. Khoer-euq gharduq, nga’maf aqjeq za-eu la?”

²⁸ Khoerngae, Yeqsur, aqyawf maf-anr heulof-aer aernaeq-euq mae, “Ngar, nawmaf-anr aqdirma-aer aernaeq nyar, yawqjeq navluf yawshuif parlar-awr, Tsawrhaq-euq Zaqyo, aqyawf-euq yawshaef khanqsaer huiq-eu nuirmanq-anr nuir ngae, ngaq-euq maeqnan cantae-eu nawmaf khawf, nuirmanq 12 manq-anr nuir-awr, Irsaqleqlav tsawrjeuq 12 jeuq-anr yarkhaq yadar taef-a.

²⁹ Ngaq-euq tsawrmyanr-euq gharduq, yawqha-euq nymr, maqngeur nar-aq, maernmr, dmrma, aqma aqda, zaqmiq zaqyo, daeyar, heudeuq byaerdzae yaf-euq tsawrhaq yawqghaq navluf, khoermyav maqtser 100 bymr za-eu uqtaf, mqmaq maqbyav yarzir daef-eu jeq za taef-a.

³⁰ Aerkhawf, aqcawq-euq maeqhu jawr-eu tsawrhaq ghawqmya’ni, aqcawq-euq maeqnan yajawr-ir taef-a. Aqcawq-euq maeqnan jawr-eu tsawrhaq ghawqmya’ni, aqcawq-euq maeqhu yajawr taef-a.