Maꞈtehˬ 12 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Landaw Jawrnan-euq Yawsanr

¹ Landaw jawrnan ngae nan-anr Yeqsur, caeryar-anr irpav luf-eu mae. Aqyawf-euq zaqlanr deuq hawq maeflar-awr caernmr tseuvdzaq-euq mae.

² Paqliqsaer deuq khoer-anr mawr-awr Yeqsur-anr aernaeq-eu, “Hawsher-eq. Nawq-euq zaqlanr deuq landaw jawrnan-anr maq janrkhmq-eu jeq janrluf-eu nga.”

³ Khoerngae, Yeqsur, aqyawf maf-anr heulof-aer aernaeq-euq mae: “Daqbir hawr-eu aqyawf naeq-aer jawr-eu deuq, hawq maeflar ngae aqjox-aer janr-euq gar nawmaf maq guihaw-aq lor?

⁴ Aqyawf, Miqyaer-euq nymr-euq lafkhoer urler-awr, aqyawf hawr-eu aqyawf naeq-aer jawr-eu deuq khawf maq dzaqkhmq-eu lawrdzar kaqmur dzaq-euq mae. Kaqmur khoer-aq, pirma deuq maqngeur nar-aq, maq dzaqkhmq-eu maqngeur-a laq?

⁵ Khoeruqtaf, pirma deuq landaw jawrnan ngae nan uqduq tanqnymr nymrma-euq lafkhoer, landaw jawrnan-anr maq mrkhmq-eu jeq mr-euq khawf, aqyawf maf-euq khoertav iqbax taqkhar maqza-ar laer aertaq-euq zanrdawq-anr nawmaf maq guihaw-aq lor?

⁶ Aerkhawf, ngar, nawmaf-anr aernaeq nyar, uqduq tanqnymr nymrma navmaqtser huiq-eu ghaq heugar jawr-eu ma.

⁷ ‘Ngar lawrnaeq-eu jeq-anr geufmawf-eu maqngeur, ghawqshaq gaq-eu jeq-anr geufmawf-eu mir-a’ (Hs 6:6) laer aertaq-euq dawq khoerdawq-anr nawmaf siqnya-euq lawnmr-aq, iqbax maqanr-eu tsawrhaq-anr iqbax maqtaq-ar.

⁸ Aqjeq mirnae aernar-aq, Tsawrhaq-euq Zaqyo-aq, landaw jawrnan-euq Yawsanr ma.”

Lafshir Shir-eu Bi Taqler-euq

⁹ Yeqsur khoergar nae dov-ir-awr, aqyawf maf-euq zanrdawq khawqnymr-anr urler-euq mae.

¹⁰ Khoergar, aqlaf tiq pyawq shir-euq zaqyo aqli tiq ghaq jawr-eu mae. Tsawrhaq tiqpavnav deuq, Yeqsur-euq yawlaeq pov-awr daqler nya’ni aqyawf-anr narhaq-eu, “Landaw jawrnan ngae nan, nargawr lavsavkhmq mae laq?”

¹¹ Yeqsur, aqyawf maf-anr aernaeq-eu, “Nawmaf-euq lafkhoer aqsur ghaq maqkaq, yawr tiq mawr jawr-awr, landaw jawrnan ngae nan duqkhanq-anr ga’anr ghae-euq nar-aq, yawr khoermawr-anr nyaeftaeq-awr maq gheudov naeq-ar lor?

¹² Tsawrhaqzaq-aq, yawr navmaqtser arnavni poeqdzaeq-eu nga? Khoermirnae, landaw jawrnan ngae nan yawmuiq jeq mr-eu-aq, tsaq taef-a.”

¹³ Khoernar-aq, Yeqsur lafshir khoerghaq-anr aernaeq-eu, “Nawq-euq aqlaf cawqja-awq.” Aqyawf, aqlaf cawqja ngae, muiqkhof lar-awr, yawqlafyawq lof-aer muiqlar-euq mae.

¹⁴ Khoernar-aq, Paqliqsaer deuq dov-ir-awr, aqjox-aer ghae-awr nae Yeqsur-anr lavsaef-eu paq nga laer bawqdzaq-ir-euq mae.

Tserdov-euq Kuirlaf Zaqkhav

¹⁵ Yeqsur garkawv khoer-anr yasiq ngae, khoergar nae dov-ir-euq mae. Tsawrhaq ghawqmya’ni, aqyawf-euq maeqnan cantae luf-eu mae. Aqyawf, tsawrhaq dawqtawv luf-anr lavtaq naeq-euq mae.

¹⁶ Aerkhawf, aqyawf, aqsur ghaq pyeuf-eu la laer taqbi siq de-eq laer Yeqsur, aqyawf maf-anr dawq bif-euq mae.

¹⁷ Khoer-aq, Miqyaer gharduq ngaeqdan-eu Irsaqyar nae aertaq-euq dawq heudawq byanlar-euq mae:

¹⁸ “Ngaq nae tserdov taq-euq ghaqzaq ghaqkhaer-anr hawsher-eq. Ngaq-euq nuima saflar, aqyawf-anr gaq duidui-awr, aqyawf-anr nuikhanrshir nya. Ngar, ngaq-euq Saflar, aqyawf-anr bif ma. Aqyawf, aqcawq tsawrjeuq tsawrca-anr tsaq-awr dawr-eu garkawv ja’maeq taef-a.

¹⁹ Aqyawf-aq, tsawrpyaer maqpyaer, gurgur-aer maqngaeq-a. Garma doeni khawf, aqyawf-euq tersar tiqghaq-iq maqya gaq-ar.

²⁰ Tsaq-awr dawr-eu jeq maq ghaqler-euq khoer-aq, Maq khaeftsaev-ir-aer ngeuqluf-eu artof-euq arkanq-anr aqyawf maqbi khaeftsaev-ir-ar. Uqkhoeq dudu-aer dofluf-eu tsirdif-anr aqyawf maq lavmiv naeq-ar.

²¹ Aqcawq tsawrjeuq tsawrca, aqyawf-euq tsawrmyanr-anr noeqtmq taef-a.” (Isy 42:1-4)

Yeqsur Hawr-eu Beqsaqburlar

²² Khoerngae, naef ur-awr dawq maq ngaeqnya-aer, myavbaef khawf baef-eu tiq ghaq-anr, aqcawq, Yeqsur jawr-eu gar sheuqlaf-euq mae. Yeqsur, khoerghaq-anr lavtaqnaeq ngae, dawq ngaeqnya lar-awr, myavnuiv khawf mawrnya lar-euq mae.

²³ Tsawrhaq armaf mafma dawqtawvluf zanq duidui ler-awr aer-eu, “Tsawrhaq teughaq, Daqbir-euq Zaqyo maqngeur nga laq?”

²⁴ Aerkhawf, Paqliqsaer deuq yagaq ngae aer-eu, “Tsawrhaq teughaq naef-anr taedov-eu-aq, naef-euq sanqpaq Beqsaqburlar-anr ghoeghoe-aer taedov-eu nga.”

²⁵ Yeqsur, aqyawf maf-euq nuinoeq-anr siqnya-eu mirnae heulof-aer aernaeq-euq mae: “Armur birpav-awr muir-eu mirkhanq yawqkhanq navluf, mirkhanq khanqtsoeq tsoeq-ir taef-a. Armur birpav-awr muir-eu meuq yawqmeuq navluf hawr-eu nymrkhanq yawqkhanq navluf khawf maqzif-ar.

²⁶ Naef Saqdaq-aq, naef Saqdaq-anr taedov nar-aq, yawqhar yawqha birpav-awr muir-eu mae. Khoerlof-aer janr nar-aq, aqyawf uvlanr-eu jeq aqjox-aer zifnya nmr-mq?

²⁷ Ngar, Beqsaqburlar-anr ghoeghoe-aer naef-anr taedov-eu ngeur nar-aq, nawmaf-euq zaqdeuq lawr nae, aqsur ghaq-anr ghoeghoe-aer naef-anr taedov-eu la? Khoermirnae, aqyawfmaf, nawmaf-anr yarkhaq dar-eu deuq pyeuf taef-a.

²⁸ Ngar, Miqyaer-euq Saflar-anr ghoeghoe-aer naef-anr taedov-eu ngeur nar-aq, Miqyaer uvlanr-eu jeq nawmaf jawr-eu gar keuvle-euq mae.

²⁹ “Ghaqkhav aqda tiq ghaq-euq nymr-anr urler-awr, aqyawf-euq myawqganq aqjox-aer daegeuf nya-eu la? Ghaqkhav aqda khoerghaq-anr jeqhu pafcuf ghaq-awr nae taef-aer, aqyawf-euq nymr-euq lafkhoer jav-eu myawqganq yurgeuf nya-eu mae.

³⁰ Ngar jawr-eu paw maqjawr-eu tsawrhaq-aq, ngaq-anr muir-eu paw jawrluf-eu mae. Ngaq naeq-aer maq bymrlar-eu tsawrhaq-aq, byavdzae-eu tsawrhaq mae.

³¹ “Khoermirnae, ngar, nawmaf-anr aernaeq nyar, tsawrhaq nae mrbanq-euq iqbax yawqjeq navluf hawr-eu, Miqyaer-anr yaeqbawq saerlu-aer aer-euq yawqjeq navluf-anr pyaeqnaeq taef-a. Aerkhawf, muiq-eu Saflar-anr yaeqbawq saerlu-aer aer-eu iqbax-anr maq pyaeqnaeq nya-a.

³² Tsawrhaq-euq Zaqyo-anr ngaeqbanq-euq aqgeu ghaq-euq iqbax-anr maqkaq, iqbax pyaeqnaeq nya-a siq. Aerkhawf, Yawshawr Saflar-anr ngaeqbanq-euq aqgeu ghaq-euq iqbax-anr maqkaq, heuzir-anr khawf, aqkar karzir-anr khawf, iqbax maq pyaeqnaeq-ar.

Arbawr Hawr-eu Arsiq

³³ “Arbawr yawmuiq nar-aq, arsiq khawf yawmuiq mae laer nawmaf siqnya-awr, arbawr maqmuiq nar-aq, arsiq khawf maqmuiq-a laer siqnya-eu mae. Arsiq-anr haw nar-aq, arbawr-anr siqlar taef-a.

³⁴ Dof khav-eu arlawr-euq zaqdeuq-or! Nawmaf-aq, tsawrdoer mirnae, dawqmuiq aqjox-aer ngaeqnya-eu lawr? Aqjeq mirnae aernar-aq, nuima-euq lafkhoer khar dawvbyan taq-euq jeq khaqmae-anr ngaeqdov laf-eu mae.

³⁵ Tsawrhaq yawmuiq deuq-aq, aqyawf-euq lafkhoer myawqganq yawmuiq shardawv taq-euq gar nae, yawmuiq jeq yurdov laf-awr, tsawrhaq yawdoer deuq-aq, aqyawf-euq lafkhoer myawqganq yawdoer shardawv taq-euq gar nae, yawdoer jeq yurdov laf-eu mae.

³⁶ Ngar, nawmaf-anr aernaeq nyar, tsawrhaq yawqghaq navluf yawqha nae gardanr maqtsoeq-eu dawq khar ngaeqtaq-euq lof-aer, yarkhaqdar ngae nan, yawqdawq navluf ya dzawrpov taef-a.

³⁷ Aqjeq mirnae aernar-aq, nawq-euq dawq-anr ghoe-awr nae, nawr-aq, tsaq-awr dawr-eu nga’ laer darnaeq-awr, nawq-euq dawq-anr ghoe-awr nae, yawlaeq nga laer yabi dar taef-a.”

Bisiq Bimawr-eu Jeq Sharhaw-eu

³⁸ Khoerngae, zanr maeq-eu deuq hawr-eu Paqliqsaer tiqpavnav deuq, Yeqsur-anr aernaeq-eu, “Saqlaq-or! Nawr, bisiq bimawr-eu jeq janr-eu gar, nga’maf mawrmawf mir-a.”

³⁹ Khoerngae, Yeqsur, aqyawf maf-anr heulof-aer aerkhof naeq-euq mae: “Zawr doer-awr jawflafni banq-awr joe-eu heuzir-aq, bisiq bimawr-eu jeq sharpov-eu mae. Miqyaer gharduq ngaeqdan-eu Yornav-euq bisiq bimawr-eu jeq maqngeur nar-aq, aqyawf maf-anr bisiq bimawr-eu yawqjeqyawq maq mrhawnaeq.

⁴⁰ Yornav, ngaqshaq shaqma-euq uqmav-euq lafkhoer smq nan smq mir ur-euq lof-aer, (Yn 1:17) Tsawrhaq-euq Zaqyo khawf, mirtsaq-euq dawqdan smq nan smq mir yajawr taef-a.

⁴¹ Yarkhaqdar ngae nan, Nirnaqbeq meuq-anr jawr-eu tsawrhaq deuq turlar-awr, heuzir-anr yarkhaqdar taef-a. Aqjeq mirnae aernar-aq, Nirnaqbeq meuq-anr jawr-eu tsawrhaq deuq, Yornav dawqmaeq maeq-eu gar yagaq ngae, noeqpov noeqpar-euq mae. Hawsher-eq, heugar Yornav navmaqtser huiq-eu ghaq jawrluf ma.

⁴² Yarkhaqdar ngae nan, lafov paw-euq sanqpaqma turlar-awr, heuzir-anr yarkhaqdar taef-a. Aqjeq mirnae aernar-aq, zaqsiq tsawrganr zawr byan-eu Sorlaqmoq-euq dawq narhaq-eu laer, mqdzer mirdzer-anr nae aqyawf lar-euq mae. Hawsher-eq, Sorlaqmoq navmaqtser huiqdzaeq-eu ghaq heugar jawrluf ma.

Naef Yawjawf Par Ghoflar-euq

⁴³ “Naef yawjawf tiq mawr, tsawrhaq tiq ghaq-euq lafkhoer nae dov-ir-awr, guicorni ghae-eu gar irir larlar-aer, ghaqnaq naqduq pov-ir-euq khawf maq povmawr nya-aq.

⁴⁴ Khoermirnae, aqyawf aer-eu, ‘Ngar, ngaq nae dovle-euq ngaq-euq nymr-anr ghofler ma.’ Khoernar-aq, aqyawf ghofkeuvler ngae, nymr khoernymr yavjur taq-awr juirkheuni lavsav taq-euq uqtaf, yawqngaef-aer jav-eu gar ya’mawr-euq mae.

⁴⁵ Khoerngae, aqyawf, aqyawf naeq-aer bijawr-eu laer, aqyawf navmaqtser cawvdzaeq-eu naef shif mawr sheuqlaq-ir-awr jawrler-euq mae. Arsaq saqlar ngae-aq, tsawrhaq khoerghaq-euq ardeuv artiv, yawbae navmaqtser doerdzaeq-ir-euq mae. Zawr cawv-eu heuzir khawf khoerlof-aer pyeuflar taef-a.”

Yeqsur-euq Aqma Hawr-eu Aqnyir Deuq

⁴⁶ Yeqsur, tsawrhaq armaf mafma-anr maeqnaeqluf ngae, aqyawf-euq aqma hawr-eu aqyawf-euq maernmr deuq, Yeqsur-anr dawq ngaeqcawqmawf nya laer lafnyir paw yawfluf-eu mae.

⁴⁷ Khoerngae, tsawrhaq tiq ghaq, aqyawf-anr aernaeq-eu, “Nawqma hawr-eu nawq-euq maernmr deuq, nawq-anr dawq ngaeqcawq mawf-eu mirnae lafnyir paw yawfluf-eu mae.”

⁴⁸ Khoerngae, Yeqsur, khoerghaq-anr aerkhof naeq-eu, “Ngaqma aqsur ghaq-a? Ngaq-euq maernmr deuq aqsur ghaq la?”

⁴⁹ Khoernar-aq, Yeqsur, aqyawf-euq zaqlanr deuq-anr toeq-awr heulof-aer aer-eu mae, “Ngaq-euq aqma hawr-eu ngaq-euq maernmr deuq-anr hawsher-eq.

⁵⁰ Mq-euq khoertav jawr-eu ngaqDa nuima tsaqni kharmr-eu tsawrhaq-aq, ngaq-euq maernmr, ngaq-euq dmrma hawr-eu ngaq-euq aqma mae.”