Maꞈtehˬ 10 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ghaqkhaer 12 Ghaq Tserdov-euq

¹ Khoernar-aq, Yeqsur, aqyawf-euq zaqlanr 12 ghaq-anr kurlaf-awr, naef yawjawf deuq-anr taedov nya’ni, nar-awr gawr-eu kharngeur-eu jeq hawr-eu nargawr yawqjeq navluf lavtaq nya’ni, aqyawf maf-anr aryaq bif-euq mae.

² Ghaqkhaer khoer 12 ghaq-euq tsawrmyanr-aq heulof-aer mae: yawbae ghaq-aq, Sirmoq (Beqtuvluv laer khawf kur-eu mae) hawr-eu aqyawf-euq aqnyir Aqdaeqlaeq, Zeqbeqdaer-euq zaqyo Yaqkov hawr-eu Yaqkov-euq maernmr Yorhaq,

³ Pirlirpuv hawr-eu Baqtawrlaqmaer, Tormav hawr-eu jeq taf-eu Maqtaeq, Aqlaqpaer-euq zaqyo Yaqkov hawr-eu Taqdaer (Tsawrmyanr myanrmar-aq, Leqbaer laer mae),

⁴ Kaqnaqnir-euq armur-anr taf-eu Sirmoq hawr-eu Yeqsur-anr anqdzaq-euq Yurdav Irsaqgaqliqoq.

Zaqlanr 12 Ghaq-anr Khaerghae-euq

⁵ Yeqsur, ghaqkhaer 12 ghaq-anr dawq heulof-aer bif-awr khaerghae-euq mae: “Nawmaf, aqcawq tsawrjeuq tsawrca-euq garma-anr taqcan-ir. Nawmaf, Saqmaqliv tsawrhaq-euq meuq-anr khawf taq urler.

⁶ Byov-ir-euq Irsaqleqlav-euq nymrkhanq-euq yawrdeuq jawr-eu gar taef-aer ir-awq.

⁷ Nawmaf irluf ngae, ‘Mqtav mirkhanq keuvle shaw-iq mae’ laer dawqmaeq maeqmaeq-aer can-ir-awq.

⁸ Nar-awr gawr-eu tsawrhaq-anr lavtaq naeq-awr, shir-euq tsawrhaq-anr bi ghofdaef lar-awq. Coiqdoi nar-eu tsawrhaq-anr bi shawrlar-awr, naef-anr taedov-awq. Nawmaf yawqngaef-aer za-euq lof-aer, aqcawq-anr yawqngaef-aer bifnaeq-awq.

⁹ Jofpaf-anr pyur marbyav, shuir marbyav, guiqshuir marbyav taq dawvanrghae.

¹⁰ Garpaer-euq gharduq paertanr taqshaf ghae, paerkhanq nyiq kanr taq yurghae, saeqnawv hawr-eu gawqyoeq khawf taq yurghae. Aqjeq mirnae aernar-aq, gar mr-eu tsawrhaq-aq, dzaqdzaq dawrdawr za-eu geux-eu mae.

¹¹ “Nawmaf aqgeu meuq, aqgeu pu-anr ur-ir-eu maqkaq, khoergar jawr-eu tsawrhaq aqsur ghaq geux-eu la laer narhaq-awr, khoergar nae dov-ir ngae keuvni, nymr khoernymr-anr taef-aer jawr-awq.

¹² Aqyawf-euq nymr-anr urler ngae, aqyawf-anr dawq ngaeqghae naeq-awq.

¹³ Nymrkhanq khoerkhanq, nawmaf-euq nuisar of-eu jeq za-eu geux nar-aq, nuisar of-eu jeq nymr khoernymr-anr bi keuvle-awq. Aerkhawf, za-eu maqgeux nar-aq, nawmaf-euq nuisar of-eu jeq nawmaf-anr bi ghofkhof lar-awq.

¹⁴ Tsawrhaq tiq ghaq, nawmaf-anr maqha-aer nawmaf-euq dawq-anr maq narhaq nar-aq, nawmaf, nymr khoernymr-anr nae maqngeur nar-aq, meuq khoermeuq-anr nae dov-ir ngae, nawq-euq aqkuir-anr laeflar-euq khaqlaer baevkhar yaf-awq.

¹⁵ Ngar, nawmaf-anr aqdirma-aer aernaeq nyar, yarkhaqdar ngae nan, meuq khoermeuq-aq, Sordoq hawr-eu Gormorlav mirtsaq navmaqtser yadaq taef-a.

Khaeq-awr Khav-eu Gar Yadaq Taef-a

¹⁶ “Hawsher-eq, ngar, nawmaf-anr khaqyaer baqmaf-euq tsanq-anr, yawr pyaequr ghae-eu lof-aer khaerghae-eu ma. Khoermirnae, nawmaf, arlawr lof-aer zaqsiq tsawrganr anr-awr, khaqkhoeq lof-aer aqcawq-anr maqcoeq maqcivni jawr-awq.

¹⁷ Nawmaf, tsawrhaq khoerdeuq-anr yanr-awq. Aqjeq mirnae aernar-aq, aqyawfmaf, nawmaf-anr khavma armur-anr a’naeq taef-a. Zanrdawq khawqnymr-euq lafkhoer nawmaf-anr juiflar taef-a.

¹⁸ Khoeruqtaf, ngaq-euq baqda’nae aqcawq, nawmaf-anr meuqsanr deuq hawr-eu sanqpaq deuq-euq maeqshi sheuqghae taef-a. Nawmaf, ngaq-euq gharduq aqyawf maf-euq maeqshi hawr-eu aqcawq tsawrjeuq tsawrca-euq maeqshi sarkir yakamq taef-a.

¹⁹ Aqcawq, nawmaf-anr yarkhaq bidar-eu laer a’naeq ngae, aqjeq aqjox-aer ya’ngaeq yatmr-eu la laer khanq taqlanr. Khoerngae yamq-anr, nawmaf ya’ngaeq-eu dawqdeuq, nawmaf-anr bifnaeqlaf taef-a.

²⁰ Aqjeq mirnae aernar-aq, dawq ngaeq-eu ghaq-aq, nawmaf maqngeur-a. Nawmaf-euq Aqda-euq Saflar, nawmaf-euq lafkhoer jawr-awr ngaeq-eu mae.

²¹ “Khoerngae, yawqha-euq maernmr yawkaq shir-eu gar keuvni anqdzaq-awr, aqda khawf yawqha-euq zaq-anr khoerlof-aer janr taef-a. Zaqdeuq khawf aqma aqda-anr muir-awr bishirni tov taef-a.

²² Khoeruqtaf, ngaq-euq tsawrmyanr baqda’nae tsawrhaq dawqtawvluf, nawmaf-anr byae taef-a. Aerkhawf, arsaqsaq ngae keuvni zif-eu tsawrhaq-aq, yabuq-ir taef-a.

²³ Nawmaf tiq meuq-anr jawr ngae, aqcawq khaeqlar nar-aq, yawqmeuq yawq-anr caevjawr-ir-awq. Ngar, nawmaf-anr aqdirma-aer aernaeq nyar, nawmaf, Irsaqleqlav-euq meuqdeuq-anr maq candoe-euq minav-aer, Tsawrhaq-euq Zaqyo oekeuv taef-a.

²⁴ “Zaqlanr-aq, saqlaq taf-aer maq huiqdzaeq-aer, kuirlaf zaqkhav khawf, yawsanr ghaq taf-aer maq huiqdzaeq-ar.

²⁵ Zaqlanr tiq ghaq, saqlaq lof-aer durlar-awr, kuirlaf zaqkhav tiq ghaq, yawsanr ghaq lof-aer durlar nar-aq, nuikhanr shir-awq. Aqcawq, nymrsanr ghaq-anr Beqsaqburlar laer kur-euq nar-aq, aqyawf-euq miqsawrzaq deuq-anr ngeurdzaeq arnavni par kurdoer-eu paq nga!

Aqsur Ghaq-anr Guv-eu Tsaq-eu La

²⁶ “Khoermirnae, aqyawf maf-anr taqguv. Aqjeq mirnae aernar-aq, daeqkaq taq-euq yawqjeq navluf panmaeq naeqlaf taef-a. Zaftaq-euq yawqjeq navluf khawf, aqcawq-anr maq siqler-aer maqjav nya-ar.

²⁷ Ngar, nawmaf-anr yawzanr-euq lafkhoer aernaeq-euq deuq, yawshaef bya-eu gar nawmaf aernaeq-awq. Nawmaf-anr khoeqsav naeq-euq deuq, nymrmq-anr davler-awr gurgaq-awq.

²⁸ Mawrdo-anr saefnya-eu khawf, saflar-anr maq saefnya-eu deuq-anr taqguv. Aerkhawf, mawrdo hawr-eu saflar-anr shiqbuir lanma-euq lafkhoer lavcawv nya-eu ghaq-anr guv-awq.

²⁹ Jartseuv nyiq mawr, guiqshuir paevsaq tiq paev nae anq-eu maqngeur-a lor? Nawmaf-euq Aqda Miqyaer nuima maqtsaq nar-aq, jartseuv tiqmawr-iq mirtsa maq gaka le-ar.

³⁰ Aqyawf, nawmaf-euq uqduq tsaerkanr yawqkanr navluf-anr khawf guijir taq-euq mae.

³¹ Khoermirnae, taqguv, nawmaf-aq, jartseuv ghawqmya mawr navmaqtser poeq-eu mae.

Yeqsur-euq Zaqlanr Ma Laer Aerdov-eu

³² “Khoermirnae, tsawrhaq-euq maeqshi ‘Ngar-aq, Yeqsur-euq zaqlanr ma’ laer aerdov-eu aqgeu ghaq maqkaq; ngar, mq-euq khoertav jawr-eu ngaqDa-euq maeqshi ‘Teughaq-aq, ngaq-euq zaqlanr ma’ laer, aerdov ma.

³³ Tsawrhaq-euq maeqshi, ‘Ngar-aq, Yeqsur-euq zaqlanr maqngeur’ laer aerdov-eu aqgeu ghaq maqkaq; ngar khawf, mq-euq khoertav jawr-eu ngaqDa-euq maeqshi, ‘Teughaq-aq, ngaq-euq zaqlanr maqngeur’ laer aerdov ma.

Bitsaq Bi Dzoerler-eu Laer Oe-euq Maqngeur

³⁴ “Nawmaf, ngar-aq, mirtsaq-euq khoertav bitsaq bi dzoerler-eu laer oe-euq nga laer taqnoeq. Ngar, bitsaq bi dzoerler-eu laer oe-euq maqngeur. Aerkhawf, micaer baf-awr oe-euq ma.

³⁵ Aqjeq mirnae aernar-aq, ngar-aq, heu-euq gharduq oe-euq ma: ‘Aqda hawr-eu zaq, aqbur hawr-eu aqma, keuqma hawr-eu boermiq aqma yawkaq, tiqghaq tirghaq muir-awr,

³⁶ yawqha-anr muir-eu tsawrhaq-aq, yawqha-euq nymrkhanq-euq zaqdeuq pyeuf taef-a.’ (Mik 7:6)

³⁷ “Ngaq-anr gaq-eu navmaqtser, aqma aqda-anr gaq-eu tsawrhaq-aq, ngaq-anr maqgeux-a. Ngaq-anr gaq-eu navmaqtser, zaq-anr gaq-eu tsawrhaq-aq, ngaq-anr maqgeux-a.

³⁸ Yawqha-euq lafyaq baf-awr, ngaq-euq maeqnan maq cantae lar-eu tsawrhaq khawf ngaq-anr maqgeux-a.

³⁹ Yawqha-euq daefzir za’ni pov-eu tsawrhaq-aq, daefzir yasmq taef-a. Aerkhawf, ngaq-euq gharduq daefzir smq-euq tsawrhaq-aq, daefzir ya povmawr taef-a.

Guiqlanq Za-eu

⁴⁰ “Nawmaf-anr hageuf-eu tsawrhaq-aq, ngaq-anr hageuf-eu mae. Ngaq-anr hageuf-eu tsawrhaq-aq, ngaq-anr bi’oe-euq ghaq-anr hageuf-eu mae.

⁴¹ Miqyaer gharduq ngaeqdan-eu tsawrhaq-anr Miqyaer gharduq ngaeqdan-eu tsawrhaq lof-aer sawx-awr hageuf nar-aq, hageuf-eu ghaq khawf, Miqyaer gharduq ngaeqdan-eu ghaq lof-aer guiqlanq za taef-a. Tsaq-awr dawr-eu tsawrhaq-anr tsaq-awr dawr-eu tsawrhaq lof-aer sawx-awr hageuf nar-aq, hageuf-eu ghaq khawf, tsaq-awr dawr-eu khoerghaq lof-aer guiqlanq za taef-a.

⁴² Ngar, nawmaf-anr aqdirma-aer aernaeq nyar, aqsur ghaq maqkaq, aqcawq taf-aer nyirdzaeq-eu ngaq-euq zaqlanr tiq ghaq-anr ircuf yawtsaef tiq khmq bidawr-euq taef khawf, khoerghaq-aq, guiqlanq maqza-aer maqghae-ar.”