Maꞈtehˬ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur Kali-euq Tsuif

¹ Sanqbof heu-aq, Aqbyaqhaq hawr-eu Daqbir-euq Zaqyo, Yeqsur Kali-euq tsuif mae.

² Aqbyaqhaq-euq zaqyo-aq, Irtsav mae. Irtsav-euq zaqyo-aq, Yaqkov mae. Yaqkov-euq zaqyo-aq, Yurdav hawr-eu aqyawf-euq maernmr deuq mae.

³ Yurdav-euq zaqyo-aq, Taqmaq ovnae daefle-euq Peqlev hawr-eu Zeqlar mae. Peqlev-euq zaqyo-aq, Heqzaqloq mae. Heqzaqloq-euq zaqyo-aq, Lamq mae.

⁴ Lamq-euq zaqyo-aq, Aqmiqnaqdar mae. Aqmiqnaqdar-euq zaqyo-aq, Naqshoq mae. Naqshoq-euq zaqyo-aq, Saqlaqmor mae.

⁵ Saqlaqmor-euq zaqyo-aq, Laqhar ovnae daefle-euq Borzav mae. Borzav-euq zaqyo-aq, Lurta ovnae daefle-euq Orbaev mae. Orbaev-euq zaqyo-aq, Yeqshaer mae.

⁶ Yeqshaer-euq zaqyo-aq, sanqpaq Daqbir mae. Sanqpaq Daqbir-euq zaqyo-aq, Sorlaqmoq mae. (Sorlaqmoq-euq aqma-aq, Urliryav-anr tiq zanr ir-euq mae.)

⁷ Sorlaqmoq-euq zaqyo-aq, Leqhorbamq mae. Leqhorbamq-euq zaqyo-aq, Aqbiryav mae. Aqbiryav-euq zaqyo-aq, Aqsar mae.

⁸ Aqsar-euq zaqyo-aq, Yeqhorshaqpar mae. Yeqhorshaqpar-euq zaqyo-aq, Yorlamq mae. Yorlamq-euq zaqyo-aq, Urzir mae.

⁹ Urzir-euq zaqyo-aq, Yordamq mae. Yordamq-euq zaqyo-aq, Aqgav mae. Aqgav-euq zaqyo-aq, Heqzeqgir mae.

¹⁰ Heqzeqgir-euq zaqyo-aq, Maqnaqseq mae. Maqnaqseq-euq zaqyo-aq, Aqmoq mae. Aqmoq-euq zaqyo-aq, Yorsiv mae.

¹¹ Baqburloq mirkhanq-anr bi nyaefghae ngae, Yorsiv-euq zaqyo-aq, Yeqkornir hawr-eu aqyawf-euq maernmr deuq daefle-euq mae.

¹² Baqburloq mirkhanq-anr bi nyaefghae ghaq-awr nae, Yeqkornir-euq zaqyo-aq, Shaqtirlav mae. Shaqtirlav-euq zaqyo-aq, Zeqlurbaqbeqlar mae.

¹³ Zeqlurbaqbeqlar-euq zaqyo-aq, Aqbiruv mae. Aqbiruv-euq zaqyo-aq, Erlirkmq mae. Erlirkmq-euq zaqyo-aq, Aqzor mae.

¹⁴ Aqzor-euq zaqyo-aq, Zaqdov mae. Zaqdov-euq zaqyo-aq, Aqcmq mae. Aqcmq-euq zaqyo-aq, Erliruv mae.

¹⁵ Erliruv-euq zaqyo-aq, Erlaqzaq mae. Erlaqzaq-euq zaqyo-aq, Maqtaq mae. Maqtaq-euq zaqyo-aq, Yaqkov mae.

¹⁶ Yaqkov-euq zaqyo-aq, Maqliv-euq khaqdzerzaq Yorsaev mae. Kali laer kur-eu Yeqsur-aq, Maqliv-anr nae daefle-euq mae.

¹⁷ Khoermirnae, Aqbyaqhaq-anr nae Daqbir-anr keuvni 14 tsuif byan-eu mae. Daqbir-anr nae Baqburloq mirkhanq-anr bi nyaefghae ngae keuvni 14 tsuif, Baqburloq mirkhanq-anr bi nyaefghae-euq ngae-anr nae Kali-anr keuvni khawf 14 tsuif-eu byan mae.

Yeqsur Daefle-euq

¹⁸ Yeqsur Kali daefle-euq garkawv-aq heulof-aer mae. Aqyawf-euq aqma Maqliv-aq, Yorsaev-anr danqdzaq-ir ma laer aertsaev taq-euq mae. Aqyawfnyaf maq sheuqdanq dzaq-euq minav-aer, Maqliv, Yawshawr Saflar-euq baqda’nae zaq tsaevler-euq mae.

¹⁹ Aqyawf-euq yoshuif Yorsaev-aq, tsaq-awr dawr-eu tsawrhaq mae. Aqyawf, Maqliv-anr aqcawq-euq maeqshi myavpyawq narmaer maqbi cawv-ir mawf-eu mirnae, aqcawq-anr maqbi siqni ghawq ma laer noeqtaq-euq mae.

²⁰ Yorsaev khoerlof-aer sharnoeqluf ngae, aqyawf yufmav mav-eu lafkhoer, Sanqpaq Miqyaer-euq mqtav ghaqkhaer dovle-awr heulof-aer aer-eu mae: “Daqbir-euq zaqyo Yorsaev-or, nawq nae aertsaev taq-euq Maqliv-anr sheuqdanq dzaq-eu taq noeqshaq. Aqjeq mirnae aernar-aq, aqyawf piluf-eu zaq-aq, Yawshawr Saflar-euq baqda’nae tsaevler-euq mae.

²¹ Aqyawf, zaqyo tiq ghaq ciq taef-a. Nawr, aqyawf-anr Yeqsur laer ya myanrnaeq-eu mae. Aqjeq mirnae aernar-aq, aqyawf, aqyawf-euq tsawrjeuq tsawrca-anr iqbax-euq lafkhoer nae kakhofdov naeq taef-a.”

²² Heudeuq dawqtawvluf pyeuflar-euq-aq, Sanqpaq Miqyaer, aqyawf-euq gharduq ngaeqdan-eu tsawrhaq-anr ghoe-awr aertaq-euq dawq heudawq byanlar-euq mae:

²³ “Hawde-eq, miqdaf dafshawr tiq ghaq, zaq tsaevler-awr, Zaqyo tiq ghaq ciq taef-a. Aqcawq, aqyawf-anr Ermaqnoeqlar laer kur taef-a” (Isy 7:14) “Ermaqnoeqlar” laer aer-eu-aq, “Miqyaer, aqdui naeq-aer jawr mae” laer aermawf-eu mae.

²⁴ Yorsaev noeqlar-awr tur-euq nar-aq, Sanqpaq Miqyaer-euq mqtav ghaqkhaer nae aqyawf-anr aernaeq-euq lof-aer Maqliv-anr sheuqdav-euq mae.

²⁵ Aerkhawf, zaq khoerghaq maqciq-euq khoerkeuvni, Maqliv naeq-aer maq yuftaf-aq. Huqbaw zaqyo khoerghaq daefle-awr, aqyawf-anr Yeqsur laer myanrnaeq-euq mae.