Maˬkuˆ 16 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur Ghofdaef Lar-euq

¹ Landaw jawrnan dzeur-euq nar-aq, Maqliv Maqgaqdaqlar, Yaqkov-euq aqma Maqliv hawr-eu Saqloqmeq, Yeqsur-euq mawrdo-anr shaevdav naeq-ir-eu gharduq yawsaw deuq zeur-euq mae.

² Tiqjaw-euq lafkhoer yawbae ngae nan, uqshawq yawnaf-aer nanrma dovlar ngae, aqyawfmaf lmqbymr-anr ir-euq mae.

³ Khoerngae, aqyawf maf-euq yawkaq ja-eu, “Aqdui maf-euq gharduq lmqbymr maeqkhaeq-euq khaqlo-anr aqsur ghaq nae bi ngawqdzaenaeq nmr-mq?”

⁴ Aerkhawf, aqyawfmaf uqduq ghawrleur-awr haw ngae, khaqlo khoersiq ngawqdzae taq-awr jav-eu gar ya’mawr-euq mae. Khaqlo khoersiq-aq, zawr huiq-eu mae.

⁵ Aqyawfmaf lmqbymr-euq lafkhoer urler ngae, pyurdeuqni ghae-eu paerkhanq paermanr dmluf-eu zaqyo aqli zaqguq tiq ghaq armar paw nuirluf-eu gar ya’mawr-awr guv duidui-ir-euq mae.

⁶ Khoerngae, zaqguq khoerghaq, aqyawf maf-anr heulof-aer aernaeq-euq mae, “Taqguv! Lafyaq-euq khoertav bi tafsaef-euq Naqzaqlaer tsawrhaq Yeqsur-anr nawmaf povle-eu ngar-a. Aqyawf ghofdaef lar-awr heugar maqpar jawr mae. Aqyawf-anr baftaq-euq tsanr-anr hawlar-awq.

⁷ Khoernar-aq, nawmaf ghofler-awr, aqyawf-euq zaqlanr-anr hawr-eu Beqtuvluv-anr heulof-aer aernaeq ler-awq, aqyawf, nawmaf-euq maeqhu nae Gaqliqlaer mirkhanq-anr leluf-eu mae. Aqyawf nae aertaq-euq lof-aer, khoergar nawmaf, aqyawf-anr ya’mawr taef-a.”

⁸ Khoerngae, aqyawfmaf guv-awr yawdzuq dzuq-eu mirnae, lmqbymr-anr nae yawkawr-aer dov-ir-awr caevkhof lef-euq mae. Aqyawfmaf guv-eu mirnae tiqghaq-anr-iq tiqjeq-iq maq ja’naeq-aq.

Yeqsur, Maqgaqdaqlar-anr Bimawr-euq

⁹ Khoernar-aq, tiqjaw-euq lafkhoer yawbae ngae nan, uqshawq yawnaf-aer Yeqsur ghofdaef lar-euq mae. Aqyawf-euq mawrdo aqyawf nae naef shif mawr taedov naeq-euq Maqliv Maqgaqdaqlar-anr jeqhu bimawr-euq mae.

¹⁰ Aqyawf garkawv khoerdeuq, Yeqsur naeq-aer jawr-euq deuq-anr aergaq ler-euq mae. Khoerngae, aqyawfmaf dawqkawq kawqkawq-aer yawkhav-aer ngoerluf-eu mae.

¹¹ Yeqsur daefluf-eu mae laer Maqliv nae ya’mawr-euq garkawv, aqyawfmaf yagaq-euq khawf maqjan-a.

Zaqlanr Nyiq Ghaq-anr Bimawr-euq

¹² Khoernar-aq, zaqlanr deuq-euq lafkhoer keuq-eu nyiq ghaq, meuq-euq lafnyir canluf ngae, Yeqsur, aqyawf-euq mawrdo yawqjeq yawq-aer parlar-awr nae, aqyawf nyaf-anr bimawr-euq mae.

¹³ Aqyawfnyaf ghofler-awr, zaqlanr nuideuq-anr ja’naeq-euq khawf, zaqlanr khoerdeuq, aqyawf nyaf-anr maqjan-a.

Sanqpaq Yeqsur-euq Huiq-eu Khaerdawq

¹⁴ Khoernar-aq, ghaqkhaer 11 ghaq hawqjawq jawqluf ngae, Yeqsur, aqyawf maf-anr bimawr-euq mae. Aqyawfmaf maqjan-eu uqtaf, nuima ghanr-eu mirnae, Yeqsur, aqyawf maf-anr daeqnaeq-euq mae. Aqjeq mirnae aernar-aq, aqyawf ghofdaef lar-euq gar ya’mawr-euq tsawrhaq deuq-euq dawq-anr aqyawfmaf maqjan-a.

¹⁵ Khoernar-aq, Yeqsur, aqyawf maf-anr heulof-aer aernaeq-euq mae: “Mirtsaq doeni ir-awr, tsawrhaq dawqtawv luf-anr guiqlanqdawq maeqnaeq-ir-awq.

¹⁶ Jan-awr bartirsaq hageuf-eu tsawrhaq-aq, kakhof-eu jeq za taef-a. Aerkhawf, maqjan-eu tsawrhaq-aq, yarkhaq dar-eu gar yadaq taef-a.

¹⁷ Jan-eu tsawrhaq deuq-aq, bisiq bimawr-eu jeq heudeuq mrdovlaf taef-a. Aqyawfmaf, ngaq-euq tsawrmyanr-anr ghoe-awr naef-anr taedov taef-a. Aqyawfmaf dawqbav yawshuif deuq bav taef-a.

¹⁸ Aqyawfmaf, arlawr-anr nyaefnya-awr, dzardof dawr ngae tiqjeq-iq maq pyeuflar-ar. Aqyawfmaf, nar-awr gawr-eu tsawrhaq-euq khoertav aqlaf bafdavnaeq ngae, tsawrhaq khoerdeuq taqler taef-a.”

Yeqsur Mq-euq Khoertav Ghofdav Ler-euq

¹⁹ Sanqpaq Yeqsur, aqyawf maf-anr dawq khoerlof-aer ngaeqnaeq ghaq-euq nar-aq, mq-euq khoertav bi sheuqkhofdav lef-awr, Miqyaer-euq armar paw nuir-euq mae.

²⁰ Zaqlanr deuq dov-ir-awr, yawqgar navluf dawqmaeq maeq-ir-euq mae. Sanqpaq Miqyaer, aqyawfmaf naeq-aer gar mr-awr, aqyawfmaf nae maeq-euq dawq bi duqdzaeq larni, bisiq bimawr-eu jeq khawf bi mawrluf-eu mae. Aqmeq.