Maˬkuˆ 15 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pirlav, Yeqsur-anr Narhaq-euq

¹ Uqbya byalar-euq naeq-aer, pirma aqyuif deuq, aqyuif aqtsu deuq, zanr maeq-eu deuq hawr-eu khavma armur deuq dawqtawvluf uiqler-awr bawqdzaq-euq mae. Khoernar-aq, Yeqsur-anr paf-awr nae Pirlav jawr-eu gar sheuqha naeq-ir-euq mae.

² Khoerngae, Pirlav, Yeqsur-anr narhaq-eu, “Nawr, Yurdav tsawrhaq-euq Sanqpaq le lor?” Khoerngae, Yeqsur aerkhof naeq-eu, “Nawr aer-eu lof-aer ngeur ma.”

³ Pirma aqyuif deuq, aqyawf-euq khoertav iqbax ghawqmya jeq taq-eu mae. Aerkhawf, aqyawf tiqjeq-iq maq aerkhof naeq-aq.

⁴ Pirlav, aqyawf-anr par narhaq-eu, “Hawsher-eq, aqyawfmaf, nawq-euq khoertav iqbax ghawqmya jeq taqluf-eu gar nawr tiqjeq-iq maq aerkhof naeq-eu laer ghae-eu le lor?”

⁵ Khoerlof-aer aer-eu khawf, Yeqsur dawq tiqdawq-iq maq ngaeqkhof naeq-aq. Khoermirnae, Pirlav zanq duidui ler-eu mae.

Yeqsur Yashirni Dartsaev-euq

⁶ Baqsaqkaq yawbui kharbui ngae, kuv-anr ur-eu tsawrhaq deuq-euq lafkhoer, tsawrhaq armaf mafma bi pyaeqdov mawf-eu tiq ghaq-anr, Pirlav, aqyawf maf-anr pyaeqdov naeq-eu zanr jav-eu mae.

⁷ Khoerngae, Baqlaqbar laer kur-eu tsawrhaq tiq ghaq jawr-eu mae. Aqyawf-aq, puiq-awr muir-eu baqmaf gm-awr puiq-awr muir ngae, tsawrhaq-anr saef-euq mirnae, shmrcav nae bi paftaq-euq mae.

⁸ Khoerngae, tsawrhaq armaf mafma, Pirlav jawr-eu gar le-awr, aqmyanmyan janr-eu lof-aer janrnaeq laf-awq laer yawkhav-aer gur-eu mae.

⁹ Aerkhawf, Pirlav, aqyawf maf-anr narhaq-eu, “Nawmaf, ngaq nae nawmaf-euq gharduq Yurdav tsawrhaq-euq Sanqpaq-anr bi pyaeqnaeqmawf mir-a lor?”

¹⁰ Pirma aqyuif deuq, Yeqsur-anr myavnav nav-eu mirnae, ngar jawr-eu gar sheuqha lar-euq nga laer Pirlav siqnya-eu mae.

¹¹ Aerkhawf, aqyawf nae aqyawf maf-euq gharduq Baqlaqbar-anr pyaeqnaeqni pirma aqyuif deuq, tsawrhaq armaf mafma-anr lavluiq taq-euq mae.

¹² Pirlav, aqyawf maf-anr narhaq-eu, “Tox-aer mar-iq, Yurdav tsawrhaq-euq Sanqpaq laer nawmaf kur-eu ghaq-anr ngar aqjox-aer bi janrnaeq mawf-eu nya?”

¹³ Khoerngae, aqyawfmaf yawkhav-aer tiq pov pargur-eu, “Aqyawf-anr lafyaq-euq khoertav tafsaef-awq.”

¹⁴ Khoerngae, Pirlav, aqyawf maf-anr narhaq-eu, “Aqjeq mirnae bi tafsaef mawf-eu nya, aqyawf yawdoer aqjeq mr-euq la?” Khoerngae, aqyawfmaf ngaeq-aer nar-aq ngaeq-aer pargur-eu, “Aqyawf-anr lafyaq-euq khoertav tafsaef-awq.”

¹⁵ Pirlav, tsawrhaq armaf mafma-euq nuima tsaqni mrmawf-eu mirnae, aqyawf maf-euq gharduq Baqlaqbar-anr pyaeqnaeq-awr, Yeqsur-anr-aq, yanqcav nae juif-awr lafyaq-euq khoertav bi tafsaef-eu laer a’naeq-euq mae.

Yeqsur-anr Aqjaf Jafnaeq-euq

¹⁶ Khoerngae, guirzaq deuq, Yeqsur-anr guirmaf dzoeqnymr-euq lafkhoer sheuqur lef-awr, guirzaq tiq maf maflanni Yeqsur jawr-eu gar bi uiqlar-euq mae.

¹⁷ Aqyawfmaf, Yeqsur-anr nerpuir puir-eu paerkhanq paermanr bidm-awr, aqgan cirni nae uqdzanq lof-aer dzeuf-awr nae, aqyawf-anr bikhov-euq mae.

¹⁸ Khoernar-aq, aqyawfmaf, aqyawf-anr yawzeu baw-eu janrgeuf-awr aer-eu, “Yurdav tsawrhaq-euq Sanqpaq zirbaw zirza luf-ur!”

¹⁹ Aqyawfmaf, artof-euq arkanq tiq kanq yur-awr, aqyawf-euq uqduq-anr juif-awr, aqyawf-anr duqkhaq khashaeq-awr nae, pawqtsuif pawqdmq dmq-awr, aqyawf-anr uqduq tanq-euq mae.

²⁰ Aqyawfmaf aqjaf jafnaeq ghaq-euq nar-aq, aqyawf dmluf-eu nerpuir puir-eu paerkhanq paermanr nyaeflaev-awr, aqyawf-euq maeqtsoeq parbi dmkhof-awr nae, lafyaq-euq khoertav tafsaef-ir-eu laer aqyawf-anr sheuqdov ghae-euq mae.

Yeqsur-anr Tafsaef-euq

²¹ Khoerngae, Kurleqniq-anr jawr-eu Aqleqsaqdur hawr-eu Lurpur-euq aqda, Sirmoq laer kur-eu ghaq, pu paw nae cantsaevlaf luf-eu gar, guirzaq deuq, aqyawf-anr katir-awr Yeqsur-euq lafyaq bibaf-euq mae.

²² Khoernar-aq, aqyawfmaf, Yeqsur-anr ‘Gawrlaqgawrda’ laer kur-eu tsanr-anr sheuqkeuv lef-euq mae. ‘Gawrlaqgawrda’ laer aer-eu-aq, ‘Uqduqkhmq’ laer aermawf-eu mae.

²³ Khoerngae, aqcawq, Yeqsur-anr murlaq keuqtaq-euq aqgaf dzaruir bidawr-euq mae. Aerkhawf, aqyawf maqdawr-a.

²⁴ Khoernar-aq, aqyawfmaf, aqyawf-anr lafyaq-euq khoertav taftaeq-awr, aqyawf-euq maeqtsoeq aqgeu ghaq aqgeu jeq za-eu nga laer shaevtsaq tsaq-awr birgeuf-euq mae.

²⁵ Uqshawq paw naqliq ghoeq laf-anr aqyawfmaf, aqyawf-anr lafyaq-euq khoertav taftaeq-eu mae.

²⁶ Yeqsur-anr iqbax taq-eu laer laftav paw “YURDAV TSAWRHAQ-EUQ SANQPAQ MAE” laer bofmyanq taq-euq mae.

²⁷ Khoerngae, tanrjoe nyiq ghaq-anr khawf, aqyawf naeq-aer tiqkawv lof-aer armar paw tiq ghaq, arcar paw tiq ghaq laer lafyaq-euq khoertav taftaeq taq-euq mae.

²⁸ Heulof-aer pyeuflar-euq-aq, Yaerbof-euq lafkhoer boftaq-euq dawq heudawq byanlar-euq mae, “Aqyawf-anr mrbanq mrlaeq-euq deuq-euq lafkhoer sawxkeuq taq-euq mae.”

²⁹ Khoergar nae irtsaev lartsaev luf-eu tsawrhaq deuq naqlaf zeuvzeuv-aer, Yeqsur-anr yaeqbawq saerlu-aer heulof-aer aernaeq-eu mae, “Aqheur-eu! Nawr-aq, uqduq tanqnymr nymrma-anr pyavdzae-awr, smq nan-euq lafkhoer tsovpar ma laer aer-eu mae.

³⁰ Nawr yawqhar yawqha kakhof-awr, lafyaq-euq khoertav nae zafka le-eu jeq ngar-a!”

³¹ Pirma aqyuif deuq hawr-eu zanr maeq-eu deuq khawf, aqyawf maf-euq yawkaq Yeqsur-anr heulof-aer naqgha-eu mae, “Aqyawf, aqcawq-anr bibuq-ir nya-eu gar nae, yawqhar yawqha maqbi buq-ir nya-eu beu.

³² Aqdui mawr-awr ya janni, Irsaqleqlav-euq Sanqpaq Kali nymq-mr minav-aer lafyaq-euq khoertav nae bi zafkale sher-eq.” Aqyawf naeq-aer tiqkawv lof-aer lafyaq-euq khoertav bi taftaeq taq-euq tsawrhaq khawf, aqyawf-anr yaeqbawq saerlu-aer aer-eu mae.

Yeqsur, Lafyaq-euq Khoertav Shir-euq

³³ Khoernar-aq, nanlov caelar ngae nae uqciftaw naqliq smr laf-anr keuvni, mirtsaq dawqtawvluf zanrtsuini pyeuf-ir-euq mae.

³⁴ Uqciftaw naqliq smr laf keuvlar ngae, Yeqsur tersar yawkhav-aer gur-eu, “Erlir, Erlir, laqmaq saqbartaqniq?” Dawqtsuif-aq heulof-aer aermawf-eu mae, “Ngaq-euq Miqyaer-or! Ngaq-euq Miqyaer-or! Aqjeq mirnae nawr, ngaq-anr byaerdzae naeqlaf-euq le?” (Jc 22:1)

³⁵ Dawqpae yawfluf-eu tsawrhaq tiqpavnav deuq dawq khoerdawq-anr yagaq ngae aer-eu, “Hawsher-eq, aqyawf, Erlirya-anr kur-eu nya!”

³⁶ Khoerngae, tsawrhaq tiq ghaq caevghae-awr, iqmalavshav-euq arhmr tiq pyaeq caermyawvni ghae-eu aqgaf dzaruir-anr dawvduiv-awr, artof-euq arkanq-anr ganrcuf-awr nae, Yeqsur-anr cawqmir naeq-awr bidawr-awr aer-eu, “Taqtaeq law siq, Erlirya, aqyawf-anr lafyaq-euq khoertav nae ciqka naeqle nga lor laer haw kar-eur.”

³⁷ Khoernar-aq, Yeqsur tersar yawkhav-aer tiq ter gur-awr saf tsaev-euq mae.

³⁸ Khoerngae, uqduq tanqnymr nymrma-euq lafkhoer tawtaq-euq lawvkaq saqpar khoer, laftav-anr nae lafov keuvni, nyiq pav-aer pyaqdov ghae-euq mae.

³⁹ Yeqsur khoerlof-aer gur-awr saf tsaev-euq gar, lafyaq-euq maeqshi yawfluf-eu yardzoeq guirhuq tiq ghaq ya’mawr ngae aer-eu, “Tsawrhaq heughaq-aq, aqdir aqmar Miqyaer-euq Zaqyo ngar-a!”

⁴⁰ Khoergar nae uicuiv garmanr kaq-eu gar, zaqmiq aqbur tiqdeuq jawr-awr hawluf-eu mae. Aqyawf maf-euq lafkhoer, Maqliv Maqgaqdaqlar, Yaqkov yawnyir ghaq hawr-eu Yorseq-euq aqma Maqliv hawr-eu, Saqloqmeq heudeuq jawr-eu mae.

⁴¹ Aqyawf maf-aq, Yeqsur, Gaqliqlaer mirkhanq-anr jawr ngae, aqyawf-euq maeqnan cantae cantae-aer hawqmr dzarsaf ghaenaeq-euq deuq mae. Yeqsur naeq-aer Yeqlursaqlaeq-anr davlar-euq zaqmiq aqbur ghawqmya ghaq khawf khoergar jawr-awr hawluf-eu mae.

Yeqsur-anr Bafpanq-euq

⁴² Khoernar-aq, landaw jawrnan maq keuvlar-euq tiq nan ca ngae nan, laeqhmq-eu arnan pyeuf-eu mirnae, uqcif uqtaw tawle ngae,

⁴³ Aqlirmaqtaeq-anr jawr-eu Yorsaev laer kur-eu tiq ghaq lar-euq mae. Aqyawf-aq, khavma armur-euq lafkhoer aqcawq yawzeu baw-eu tiq ghaq pyeuf-awr, Miqyaer uvlanr-eu jeq-anr noeqtmq luf-eu tiq ghaq mae. Aqyawf nuima khaqduqni Pirlav jawr-eu gar le-awr, Yeqsur-euq mawrdo sharler-euq mae.

⁴⁴ Yeqsur shirdzeur-euq mirnae, Pirlav zanqler-eu mae. Khoermirnae, yardzoeq guirhuq-anr kurlaf-awr, Yeqsur shir-euq myanrlar-euq maeqlor laer narhaq-euq mae.

⁴⁵ Shirdzeur-euq garkawv aqyawf, yardzoeq guirhuq-anr nae yasiq ngae, Yeqsur-euq mawrdo, Yorsaev-anr a’naeq-euq mae.

⁴⁶ Khoernar-aq, Yorsaev, sheqsha saqpar zeurlaq-ir-awr, Yeqsur-euq mawrdo bafka-awr nae, sheqsha saqpar nae mawrtawv tawvghaq-euq nar-aq, khaqlo-anr taftaq-euq lmqbymr-euq lafkhoer baftaq-ir-euq mae. Khoernar-aq, lmqbymr-euq maeqkhaeq-anr khaqlo tiq siq laeqtsoeq yaf-euq mae.

⁴⁷ Maqliv Maqgaqdaqlar hawr-eu Yorseq-euq aqma Maqliv khawf Yeqsur-anr bafanr taq-euq tsanr-anr mawr-euq mae.