Maˬkuˆ 13 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Uqduq Tanqnymr Nymrma Yapyav-ir-eu

¹ Yeqsur, uqduq tanqnymr nymrma-anr nae dovleluf ngae, aqyawf-euq zaqlanr tiq ghaq, Yeqsur-anr aernaeq-eu, “Saqlaq-or! Hawsher-eq, khaqlo heudeuq arnavni huiq-awr, nymr heudeuq khawf arnavni hawmuiq-eu nga!”

² Khoerngae, Yeqsur, aqyawf-anr aernaeq-eu, “Nawr, zawr huiq-eu nymr heudeuq-anr mawrluf-eu nga aerlawq? Khaqlo loma heudeuq tiqsiq-euq khoertav tiqsiq maqjav-eu gar keuvni, yabi daepyav dzaejir taef-a.”

Arsaq Saq-eu Aryamq Paelar-euq

³ Khoernar-aq, Yeqsur, uqduq tanqnymr nymrma-euq nuibaq-anr jav-eu Saqloq gawqjawq-anr nuirluf ngae, Beqtuvluv, Yaqkov, Yorhaq hawr-eu Aqdaeqlaeq aqha’maf taef-aer ciqcurni lar-awr, Yeqsur-anr narhaq-eu,

⁴ “Garkawv heudeuq aqmyan pyeuflar-eu la? Heudeuq dawqtawvluf pyeuflar-eu laer ghae ngae, bisiq bimawr-eu arsaq saq-eu jeq, aqgeu jeq ya’mawr-eu la?”

⁵ Khoerngae, Yeqsur, aqyawf maf-anr heulof-aer aernaeq-euq mae: “Nawmaf, aqcawq nae maqbi sheuqbanq ghaeni yanr-awq.

⁶ Tsawrhaq ghawqmya’ni ngaq-euq tsawrmyanr zmqzmq-aer, ‘Ngar-aq, Kali ma’ laer aeraer-aer, tsawrhaq ghawqmya ni-anr sheuqbanqghae taef-a.

⁷ Guirdeuv deuvluf-eu gar hawr-eu guirdeuv deuv-eu laer ghaeluf-eu gar nawmaf yagaq taef-a. Aerkhawf, taq tsawqguv-ir, aqjeq mirnae aernar-aq, khoerdeuq ya pyeuflar taef-a. Aerkhawf, arsaq saq-eu maqngeur-a siq.

⁸ Tsawrjeuq tiqjeuq tirjeuq, mirkhanq tiqkhanq tirkhanq deuvcaecae taef-a. Ghawqmya gar mirluv luvlar-awr, maef-awr shuf-eu jeq hawr-eu shaq-awr zanq-eu jeq keuvle taef-a. Heudeuq dawqtawvluf shaq-awr zanq-eu ardanq bae-eu taef-a siq.

⁹ “Nawmaf yawqhar yawqha yawmuiq-aer yanr-awq. Aqjeq mirnae aernar-aq, aqcawq, nawmaf-anr khavma armur-anr a’naeq taef-a. Nawmaf, zanrdawq khawqnymr-euq lafkhoer yabi diq taef-a. Nawmaf, ngaq-euq baqda’nae, mirkhanq-anr uvlanr-eu deuq hawr-eu sanqpaq deuq-euq maeqshi yawf-awr, aqyawf maf-anr sarkir yakamq taef-a.

¹⁰ Aerkhawf, guiqlanqdawq heu, mirkhanq-euq tsawrjeuq dawqtawv luf-anr jeqhu yabi gaqdoe-ir taef-a.

¹¹ Aqcawq, nawmaf-anr yarkhaq dar-eu nymr-anr sheuqghae ngae, nawmaf aqjox-aer ya’ngaeq yatmr-eu laer, maq keuvlar-euq minav-aer khanq taqlanr. Khoerngae yamq-anr nawmaf-anr bingaeq bitmr laf-eu lof-aer ngaeq-awr tmr-awq. Aqjeq mirnae aernar-aq, dawq ngaeq-eu ghaq-aq, nawmaf maqngeur-eu, Yawshawr Saflar mae.

¹² Khoerngae, yawqha-euq maernmr yawkaq shir-eu gar keuvni anqdzaq-awr, aqda khawf yawqha-euq zaq-anr khoerlof-aer janr taef-a. Zaqdeuq khawf aqma aqda-anr muir-awr bishirni tov taef-a.

¹³ Khoeruqtaf, ngaq-euq tsawrmyanr baqda’nae, tsawrhaq dawqtawvluf nawmaf-anr byae taef-a. Aerkhawf, arsaqsaq ngae keuvni zif-eu tsawrhaq-aq, yabuq-ir taef-a.

Shaqdui Zanq Duidui-eu Jeq

¹⁴ “Miqyaer gharduq ngaeqdan-eu Daqyeqlar nae aertaq-euq lof-aer, ‘Nawmaf, lavcawvbyov jir-eu ardzaeq-aer jawf-eu jeq’ jav paq-aer maqghae-eu jawrduq-anr javluf-eu gar ya’mawr ngae,” (Yaerbof heu-anr gui-eu tsawrhaq ghovshaw luf-ur) “Yurdav mirkhanq-anr jawr-eu tsawrhaq deuq danrtav caevdav lef-awq.

¹⁵ Nymrmq-anr dav-eu tsawrhaq taq zafkale, myawq laq-ir-eu laer khawf irkanr taq urler.

¹⁶ Yarngae jawr-eu tsawrhaq ghofler-awr maeqtsoeq taq laqler.

¹⁷ Khoerngae yamq-anr, aqnyir piluf-eu deuq hawr-eu aqcoer dawr-eu zaqnanq-euq aqma deuq, ghawqshar shaq-aer ya ghaesaef taef-a.

¹⁸ Yacaev-eu khoeryamq, tsanqgav yamq-anr maqya tsaqlarni nawmaf guiqlanq shar-awq.

¹⁹ Aqjeq mirnae aernar-aq, Miqyaer mqbae mirbae bae-euq nan-anr nae iqnan keuvni, maq pyeuflar haw-euq uqtaf, aqkar khawf maq pyeuflar-eu shaqdui zanq duidui-eu jeq, aryamq heuyamq-anr keuvle taef-a.

²⁰ Sanqpaq Miqyaer, arnan aryamq khoer-anr maq lavnymr-euq law nar-aq, tsawrhaq tiqghaq-iq maqbuq-ir nya-ar. Aerkhawf, aqyawf nae tserdov-awr tsaqtsov taq-euq deuq-euq gharduq sharnoeq-awr, aqyawf arnan aryamq khoer-anr lavnymr-euq mae.

²¹ “Khoerngae, ‘Hawlar-awq, Kali heugar jawr ngar-a, Kali khoergar jawr-eu mae’ laer tsawrhaq tiqghaqnav nawmaf-anr aerlar-eu khawf, nawmaf taqjan.

²² Aqjeq mirnae aernar-aq, Kali jaqmyawf deuq hawr-eu Miqyaer gharduq ngaeqdan-eu jaqmyawf deuq dovle taef-a. Ghaenya nar-aq, tserdov taq-euq tsawrhaq deuq-anr khawf sheuqbanq ghaeni, bisiq bimawr-eu jeq hawr-eu zanqler paq-aer ghae-eu deuq aqyawfmaf janrmaeq taef-a.

²³ Khoermirnae, nawmaf yanr-awq de-eq. Garkawv maq pyeuflar-euq minav-aer, ngar, nawmaf-anr yawqjeq navluf aernaeq jir-euq ma.

Tsawrhaq-euq Zaqyo Zafka Le-eu

²⁴ “Arnan aryamq khoer-euq lafkhoer, shaqdui zanq duidui-eu aryamq khoer dzeur-euq nar-aq, nanrma zanrtsuini pyeuf-ir-awr, bala khawf yawshaef maqpar bya-aer,

²⁵ aqguir deuq mq-anr nae gaka le-awr, mqtav-euq baoq dawqtawvluf luvlar nyaelarjir taef-a.

²⁶ Khoerngae, aqyawfmaf, Tsawrhaq-euq Zaqyo zawr huiq-eu baoq hawr-eu yawshaef khanqsaer-euq lafkhoer, mqdmr-anr dziq-awr zafka le-eu gar ya’mawr taef-a. (Dyl 7:13)

²⁷ Khoerngae, aqyawf, aqyawf-euq mqtav ghaqkhaer deuq-anr khaerghae-awr, mirma oeqcoer oeqbawq-anr luf, mq heudzer-anr nae khoerdzer-anr keuvni, aqyawf nae tserdov taq-euq tsawrhaq deuq-anr bi kuruiqlaf taef-a.

Siqguq Arbawr-anr Haw-awr Yamqlaw Tof-awq

²⁸ “Nawmaf siqguq arbawr-anr haw-awr dzawgeuf-awq. Arbawr khoer, lafmyav-anr bawnmq nmqlar-awr pafcoev coevlar-euq nar-aq, jawrla yamq dovle shaw-iq ngar-a laer nawmaf siqnya-eu mae.

²⁹ Khoerlof-aer durni, garkawv heudeuq dawqtawvluf pyeuflar luf-eu gar nawmaf ya’mawr ngae, aryamq khoeryamq paele luf-awr, ghovkhaeq-anr oekeuv-euq ngar-a laer siqnya-awq.

³⁰ Ngar, nawmaf-anr aqdirma-aer aernaeq nyar, heuzir maqjir-euq minav-aer, heudeuq dawqtawvluf pyeuflar taef-a.

³¹ Mq hawr-eu mir byov-ir taef-a. Aerkhawf, ngaq-euq dawq-aq, tiqjawr-iq maqbyov-ir-ar.

Tiqghaq-iq Arnan Aryamq Maq Siqnya-a

³² “Aerkhawf, tsawrhaq tiqghaq-iq arnan hawr-eu aryamq khoer-anr maq siqnya-a. Mq-euq khoertav jawr-eu mqtav ghaqkhaer deuq khawf, Zaqyo khawf maq siqnya-a. Aqda Miqyaer tiq ghaq taef-aer siqnya-eu mae.

³³ Aryamq khoeryamq aqmyan keuvle-eu la laer nawmaf maq siqnya-eu mirnae, guiqlanq sharshar-aer yawbeur beur-aer jawr-awq.

³⁴ Aryamq khoer-aq, tsawrhaq tiq ghaq, yawqkhanq yawqmir yawq-anr ir-euq gar dur-eu mae. Aqyawf ir-eu laer ghae ngae, zaqkhav yawqghaq navluf-anr aryaq bif-awr, gar khawf birnaeq yaf-euq uqtaf, larghov-anr lof-eu ghaq-anr khawf, yawbeur beur-aer lofni dawq bifyaf-euq mae.

³⁵ Nawmaf, nymrsanr ghaq aqgeu ngae ghoflar-eu la laer maq siqnya-eu mirnae, nawmaf yawbeur beur-aer jawr-awq. Uqciftaw paw maqsiq, saerghanr caelar ngae maqsiq, yapoer doerlar ngae maqsiq, uqshawq paw maqsiq.

³⁶ Maqngeur nar-aq, maqnoeq maqdur-aer jawr ngae, aqyawf ghofkeuv lar-awr, nawmaf yufkhav taq-euq gar mawr taef-a.

³⁷ Ngar, nawmaf-anr aernaeq luf-eu heudeuq, tsawrhaq dawqtawv luf-anr khawf aernaeq luf-eu ma. Yawbeur beur-aer jawr-awq!”