Maˬkuˆ 12 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqgaf Yarkmr Mrpav Pav-euq Deuq

¹ Khoerngae, Yeqsur, aqyawf maf-anr yawjeq majeq dawq-anr nae heulof-aer maeqnaeq-euq mae: “Tsawrhaq tiq ghaq aqgaf yarkmr tiq kawq mr-awr, yarkmr yawmuiq-aer mrjawq-awr, aqgaf dzaruir nawqdovduq janr-awr nae, aqgaf yar-anr lof-eu nymrgor tiq nymr khawf tsov-euq mae. Khoernar-aq, aqgaf yarkmr-anr mr-eu deuq-anr ngaqnaeq yaf-awr, yawqkhanq yawqmir yawq-anr ghawqmyanrni jawr-ir-euq mae.

² Khoernar-aq, aqgaf pyav-eu aryamq keuvlar ngae, aqyawf-anr of-eu aqgaf arsiq za’ni, aqgaf yarkmr mrpav pav-eu deuq jawr-eu gar aqyawf, aqyawf-euq kuirlaf zaqkhav tiq ghaq-anr bile-euq mae.

³ Khoerngae, aqyawfmaf, kuirlaf zaqkhav khoerghaq-anr nyaef-awr diq-awr nae, aqlaf yawqngaef-aer bighof-ir-euq mae.

⁴ Khoermirnae, yarsanr ghaq, kuirlaf zaqkhav yawqghaq yawq-anr aqyawfmaf jawr-eu gar parbi le-euq mae. Aqyawfmaf, kuirlaf zaqkhav khoerghaq-anr khaqlo nae uqduq biqpaef-awr, aqyawf-anr yaeqbawq saerlu-aer janrnaeq-euq mae.

⁵ Khoernar-aq, yarsanr ghaq, kuirlaf zaqkhav yawqghaq yawq-anr parbi le ngae, aqyawfmaf, aqyawf-anr saef-euq mae. Khoernar-aq, kuirlaf zaqkhav nuideuq ghawqmya ghaq-anr parbi le ngae, aqyawfmaf, tiqpavnav deuq-anr diq-awr, tiqpavnav deuq-anr saef-euq mae.

⁶ Khoermirnae, yarsanr ghaq-aq, aqyawf zawr gaq-eu aqyawf-euq zaqyo tiq ghaq taef-aer dzerlar-euq mae, ‘Aqyawfmaf, ngaqli-anr yawzeubaw taef-a’ laer aer-awr, arsaq saqlar ngae, aqyawf-euq zaqyo-anr bile-euq mae.

⁷ Aerkhawf, aqgaf yarkmr mrpav pav-eu khoerdeuq, aqyawf maf-euq yawkaq aer-eu, ‘Heughaq-aq, jeqbir of-eu ghaq ngar-a. Dzawq, aqduimaf, aqyawf-anr saef kar-eur. Saef nar-aq, aqyawf-euq jeqbir aqduimaf za taef-a.’

⁸ Khoernar-aq, aqyawfmaf, aqyawf-anr nyaef-awr saef-awr nae, aqgaf yarkmr-euq lafnyir gheudzae-euq mae.

⁹ “Khoerngae jawr, aqgaf yar-euq yawsanr ghaq aqjox-aer janrnaeq-eu jeq nya? Aqyawf ghoflar-awr aqgaf yarkmr mrpav pav-eu khoerdeuq-anr saef-awr, aqgaf yarkmr khoerkmr nuideuq-anr bi mrpavpav taef-a.

¹⁰ Nawmaf, Yaerbof-euq lafkhoer heulof-aer boftaq-euq gar maq guihaw-aq lor? ‘Nymr tsov-eu deuq nae bafdzae taq-euq khaqlo khoersiq, Lafcoer-euq lozif pyeuflar-euq mae.

¹¹ Sanqpaq Miqyaer nae heulof-aer janr-euq mae. Heu-aq, aqdui-euq myavnuiv-euq gharduq arnavni zanqler paq-aer ghae-eu nga.’ ” (Jc 118:22-23)

¹² Aqyawfmaf, Yeqsur-aq, yawjeq majeq dawq-anr nae maeq-eu heu, aqyawf maf-anr ngaeqcoeq mawf-eu nga laer siqnya-eu mirnae, aqyawf-anr nyaef-eu laer laejae-eu mae. Aerkhawf, tsawrhaq baqmaf-anr guv-eu mirnae, aqyawf-anr ghawq-awr dov-ir-euq mae.

Gaersaq-anr Jeq Dovnaeq-eu Garkawv

¹³ Khoernar-aq, aqyawfmaf, Yeqsur dawq ngaeqbanq-eu gar lanrju bikhmr-eu laer Paqliqsaer tiqpavnav deuq hawr-eu Heqlor-euq tsawrhaq tiqpavnav deuq-anr Yeqsur jawr-eu gar khaerghae-euq mae.

¹⁴ Khoermirnae, aqyawfmaf lar-awr, aqyawf-anr heulof-aer aernaeq-euq mae, “Saqlaq-or! Nawr-aq, tsaq-awr dawr-eu tiq ghaq pyeuf-awr, yawtsaq yawdawr dawr-aer Miqyaer-euq garma maeq-eu mae. Aqcawq noeqdoer lar-eu gar khanq maqlanr-aer, myavpyawq huiqnyir khawf maqtser-a laer nga’maf siqnya-eu ma. Sanqpaq Gaersaq-anr jeq dovnaeq-eu tsaq mae lor, maqngeur nar-aq, maqtsaq-a laq?

¹⁵ Nga’maf yadovnaeq mae lor, maqngeur nar-aq, maqya dov-ar laq?” Yeqsur, aqyawfmaf yawmuiq janrgeuf-eu gar siqnya-awr, aqyawf maf-anr aernaeq-eu, “Aqjeq mirnae nawmaf, ngaq-anr tsermr haw-eu le? Ngaq-anr pyur marbyav tiq byav bihaw naeqlaf sher-eq.”

¹⁶ Khoernar-aq, aqyawfmaf bifnaeq-euq mae. Yeqsur, aqyawf maf-anr narhaq-eu, “Heu aqsur ghaq-euq shaevdzeuf hawr-eu aqsur ghaq-euq tsawrmyanr nga?” Khoerngae, aqyawfmaf, aqyawf-anr aerkhof naeq-eu, “Sanqpaq Gaersaq-euq nga.”

¹⁷ Khoerngae, Yeqsur aer-eu, “Sanqpaq Gaersaq-euq myawq-aq, sanqpaq Gaersaq-anr bif-awr, Miqyaer-euq myawq-aq, Miqyaer-anr bif-awq.” Khoerngae, aqyawfmaf, aqyawf-anr zanq duidui ler-euq mae.

Ghofdaef Lar-eu Garkawv

¹⁸ Khoernar-aq, tsawrhaqzaq ghofdaef lar-eu maqbaw-a laer aer-eu Saqduqgaer tiqpavnav deuq, Yeqsur jawr-eu gar lar-awr narhaq-eu:

¹⁹ “Saqlaq-or! Morseq, nga’maf-euq gharduq heulof-aer boftaq-euq mae, ‘Tsawrhaq tiq ghaq-euq ardov, zaq maq jawrle-euq minav-aer shir-awr, miqzaq ghaq taef-aer dzerlar-euq nar-aq, ardov ghaq tsuifdanq maqya danq-ir ni, aqyawf-euq aqnyir ghaq, aqyawf-euq miqzaq-anr yasheuq-eu mae.’ (Dm 25:5)

²⁰ “Dzeurlaf ngae, maernmr shif ghaq jawr-eu mae. Aqyuif yuifsaq ghaq miqzaq sheuq-awr, zaq maq jawrle-euq minav-aer shir-awr miqzaq ghaq taef-aer dzerlar-euq mae.

²¹ Khoernar-aq, aqghanr ghaq khawf, zaqmiqzaq heughaq-anr sheuq-awr, zaq maq jawrle-euq minav-aer shir-euq mae. Smr ghaq tiqghaq khawf khoerlof-aer mae.

²² Shif maernmrluf miqzaq heughaq-anr sheuq-awr, zaq maq jawrle-aq. Arsaq saqlar ngae, zaqmiqzaq heughaq khawf shir-euq mae.

²³ Khoermirnae, ghofdaef lar-eu arnan-anr aqyawfmaf yawqghaq navluf ghofdaeflar ngae, zaqmiq aqbur heughaq, aqgeu ghaq-euq miqzaq yageuf-eu la? Aqjeq mirnae aernar-aq, shif maernmrluf aqyawf-anr sheuq-euq mae.”

²⁴ Khoerngae, Yeqsur, aqyawf maf-anr heulof-aer aerkhof naeq-euq mae: “Nawmaf Yaerbof-anr khawf, Miqyaer-euq baoq-anr khawf maq siqnya-eu mirnae laeq-ir-euq maqngeur nga lor?

²⁵ Shir-euq tsawrhaq ghofdaeflar ngae nan, sheuqdanq dzaq-awr smrmir ir-eu maqbaw-aer, mqtav ghaqkhaer lof-aer pyeuflar-eu mae.

²⁶ Shir-euq tsawrhaq ghofdaef lar-eu garkawv-anr tafler-awr, Morseq-euq sanqbof-euq lafkhoer bawduv-euq garkawv boftaq-euq gar nawmaf maq guihaw-aq laq? ‘Ngar-aq, Aqbyaqhaq-euq Miqyaer, Irtsav-euq Miqyaer hawr-eu Yaqkov-euq Miqyaer ma’ (Di 3:6,15) laer Miqyaer, Morseq-anr aernaeq-euq mae.

²⁷ Miqyaer-aq, shirbyov-euq tsawrhaq-euq Miqyaer maqngeur-a. Aerkhawf, daefluf-eu tsawrhaq-euq Miqyaer mae. Teumirnae, nawmaf noeq-eu-aq laeq duidui ngar-a.”

Zanrdawq Khofdawq Huiqdzaeq-eu Dawq

²⁸ Khoerngae, zanr maeq-eu tiq ghaq lar-awr, aqyawfmaf tsawrpyaer pyaerluf-eu gar yagaq-euq mae. Yeqsur yawmuiq-aer aerkhof naeq-euq gar yasiq-awr, Yeqsur-anr narhaq-eu, “Zanrdawq khofdawq dawqtawv luf-euq lafkhoer nae huiqdzaeq dzaeq-eu uqdzan yawbae dawq aqgeu dawq la?”

²⁹ Yeqsur, aqyawf-anr heulof-aer aerkhof naeq-euq mae: “Zanrdawq khofdawq-euq lafkhoer nae uqdzan yawbae dawq-aq heudawq mae. ‘Irsaqleqlav tsawrhaq-or! Narhaq-awq. Aqdui-euq Miqyaer, Sanqpaq Miqyaer tiq ghaq taef-aer Sanqpaq Miqyaer pyeuf-eu mae.

³⁰ Zanrdawq khofdawq uqdzan yawbae dawq-aq, nawq-euq nuima dawqtawvluf, saflar dawqtawvluf, nuinoeq nuidur dawqtawvluf hawr-eu ghaq dawqtawvluf, nawq-euq Sanqpaq Miqyaer-anr gaq-awq.’ (Dm 6:4-5)

³¹ Nyiq dawq tiqdawq-aq, ‘Yawqha-euq mawrdo-anr gaq-eu lof-aer, yawqha-euq dawqpae jawr-eu tsawrhaq-anr gaq-awq.’ (Lb 19:18) Dawq heu nyiq dawq taf-aer huiqdzaeq-eu Zanrdawq khofdawq nuideuq maqpar jav mae.”

³² Khoerngae, zanr maeq-eu khoerghaq, Yeqsur-anr heulof-aer aernaeq-euq mae, “Saqlaq-or! Nawr aer-eu tsaq mae, ‘Miqyaer tiq ghaq taef-aer jawr-awr, (Dm 6:4) Aqyawf maqngeur nar-aq, Miqyaer nuighaq maqjawr-a’ (Dm 4:35; Isy 45:21) laer nawr aer-eu teu tsaq mae.

³³ Khoeruqtaf, ‘Nuima dawqtawvluf, nuinoeq dawqtawvluf, saflar dawqtawvluf hawr-eu ghaq dawqtawvluf, aqyawf-anr gaq-awr,’ (Dm 6:5) ‘Yawqha-euq mawrdo-anr gaq-eu lof-aer, yawqha-euq dawqpae jawr-eu tsawrhaq-anr gaq-eu-aq,’ (Lb 19:18) jeqzaq mawrlan-aer dzanpuiv-awr lawrnaeq-eu dawqtawvluf hawr-eu, lawrnaeq-eu nuideuq dawqtawvluf navmaqtser huiqdzaeq-eu mae.”

³⁴ Khoerghaq yawmuiq-aer sharnoeq sharnoeq-aer aerkhof laf-eu gar Yeqsur ya’mawr ngae aer-eu, “Nawr-aq, Miqyaer uvlanr-eu jeq-anr nae maqpar kaq-eu ngar-a.” Khoerngae nae nar-aq, tsawrhaq tiqghaq-iq Yeqsur-anr tiqjeq-iq maqpar narhaq peuq-euq mae.

Kali, Aqsur Ghaq-euq Zaqyo La?

³⁵ Khoerngae, Yeqsur, uqduq tanqnymr nymrma-euq lafkhoer maeqnaeq tsovnaeqluf ngae, aqyawf maf-anr heulof-aer narhaq-euq mae, “Aqjeq mirnae zanr maeq-eu deuq, Kali-aq, Daqbir-euq Zaqyo mae laer aer-eu la?

³⁶ Yawshawr Saflar, Daqbir-anr sheuqghae ngae, aqyawf-euq mawrdo nae heulof-aer aertaq-euq mae, ‘Sanqpaq Miqyaer, ngaq-euq Sanqpaq-anr aernaeq-euq, “Ngar, nawq-anr muir-eu deuq, nawq-euq aqkuir cawqtaqduq maqbi pyeuflar-euq khoerkeuvni, ngaq-euq armar paw nuir-awq.” ’ (Jc 110:1)

³⁷ Daqbir, aqyawf-euq mawrdo khawf aqyawf-anr ‘Sanqpaq’ laer kur-eu ngeur nar-aq, aqyawf aqjox-aer Daqbir-euq Zaqyo par pyeufnya-eu la?” Tsawrhaq armaf mafma laqkhaq caertavni aqyawf maeq-eu gar narhaq luf-eu mae.

Yeqsur, Zanr Maeq-eu Deuq-anr Daeq-euq

³⁸ Yeqsur, aqyawf maf-anr maeqnaeq tsovnaeq ngae heulof-aer aernaeq-euq mae: “Nawmaf, zanr maeq-eu deuq-anr yanr-awq, aqyawf maf-aq, paerkhanq paermanr dmdm-aer canmawf-eu mae. Laevkawv doeni aqcawq, aqyawf maf-anr dawqcawq puqlar-eu gar geufmawf-eu mae.

³⁹ Zanrdawq khawqnymr-euq lafkhoer khanqsaer javdzaeq-eu nuirduq-anr nuirmawf-awr, yawbuibui ngae muiqdzaeq-eu nuirduq-anr nuirmawf-eu mae.

⁴⁰ Aqyawfmaf, miqcoeq miqma-euq nymr-anr khaeqdzaq khavdzaq-eu mae. Aqcawq bimawr-eu gharduq guiqlanq ghawqmanrni shar-eu mae. Tsawrhaq khoerdeuq-aq, aqcawq-euq navmaqtser yarkhaq dar-eu gar yadaq taef-a.”

Miqcoeq Miqma Tiq Ghaq-euq Pyurdamq

⁴¹ Khoerngae, Yeqsur pyurdamq dawvduq-euq dawrnaq-aer nuir-awr, pyur damqlar-eu tsawrhaq deuq pyurdamq aqjox-aer damq-eu nga laer hawluf-eu mae. Smrmuiq smrbaw ghawqmya ghaq pyur ghawqmya’ni dawvanr-eu mae.

⁴² Khoerngae, irshaq irtaw miqcoeq miqma tiq ghaq lar-awr, tiq paev poeq-eu guiqshuir marbyav nyiq byav dawvanr-euq mae.

⁴³ Yeqsur, aqyawf-euq zaqlanr deuq-anr kurlaf-awr heulof-aer aernaeq-euq mae, “Ngar, nawmaf-anr aqdirma-aer aernaeq nyar, irshaq irtaw miqcoeq miqma heughaq-aq, pyurdamq khar dawvlar-euq tsawrhaq dawqtawv luf-euq myavmaqtser dawv-euq mae.

⁴⁴ Aqjeq mirnae aernar-aq, nuideuq-aq, ghawqmya’ni jav-eu gar nae yurdov-awr dawvlar-euq mae. Aerkhawf, miqcoeq miqma heughaq-aq, shaq duidui-eu lafkhoer, aqyawf kharjav-eu bifnaeq jir-awr, yawdaef daef-eu gharduq maqtaqni dawvanr jir-euq mae.”