Maˬkuˆ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yorhaq Dawqmaeq Maeq-eu

¹ Miqyaer-euq Zaqyo, Yeqsur Kali-euq guiqlanqdawq ardanq heulof-aer bae-euq mae.

² Miqyaer gharduq ngaeqdan-eu Irsaqyar heulof-aer boftaq-euq mae: “Hawde-eq! Ngar, nawq-euq garma bi shardanr-eu gharduq, Nawq-euq maeqhu ngaq-euq ghaqzaq ghaqkhaer-anr khaerghae-awr bi’ir ma. (Mlk 3:1)

³ Tsawrhaq tiq ghaq bawrtsanq bawrdanr-anr jawr-awr gur-eu, ‘ Sanqpaq Miqyaer -euq gharduq garma shardanr-awr, aqyawf-euq cankawv dawrcoeni shardawr-awq.’ ” (Isy 40:3)

⁴ Bartirsaq mrnaeq-eu Yorhaq bawrtsanq bawrdanr-anr dovle-awr, Miqyaer, iqbax pyaeq-eu jeq za’ni, noeqpov noeqpar-awr bartirsaq hageuf-eu garkawv dawqmaeq maeqluf-eu mae.

⁵ Yurdav mirkhanq doeni jawr-eu tsawrhaq hawr-eu Yeqlursaqlaeq-anr jawr-eu tsawrhaq dawqtawvluf, Yorhaq jawr-eu gar ir-awr, aqyawfmaf, yawqha-euq iqbax jadov jadov-aer, Yawrdaq lawrbaq-euq lafkhoer Yorhaq nae bartirsaq bi mrnaeq-euq mae.

⁶ Yorhaq-aq, lawtaw cafhm-euq maeqtsoeq dm-awr, jof-anr shaqkhov jofpaf paftaq-awr nae, nyaevbanr hawr-eu bawrtsanq-euq byaquir dzaq-eu mae.

⁷ Aqyawf dawqmaeq maeqmaeq-aer aer-eu, “Ngaq-euq maeqnan oeluf-eu ghaq-aq, ngaq-euq navmaqtser ghaq khavdzaeq-eu mae. Ngar-aq, awkhof-awr aqyawf-euq saeqnawv-euq arcav-anr tseuvpuir naeq-eu taef khawf maqgeux-a.

⁸ Ngar, nawmaf-anr ircuf nae bartirsaq mrnaeq luf-eu ma. Aerkhawf, aqyawf-aq, nawmaf-anr Yawshawr Saflar nae bartirsaq mrnaeqlaf taef-a.”

Yeqsur Bartirsaq Hageuf-euq

⁹ Khoerngae, heulof-aer pyeuflar-euq mae. Yeqsur, Gaqliqlaer mirkhanq Naqzaqlaer-anr nae oe-awr, Yawrdaq lawrbaq-euq lafkhoer Yorhaq nae bartirsaq bi mrnaeq-euq mae.

¹⁰ Aqyawf, ircuf-anr nae dovlar-euq naeq-aer mq panlar-eu gar ya’mawr-awr, Yawshawr Saflar, khaqkhoeq lof-aer aqyawf-euq khoertav zafka le-euq mae.

¹¹ Khoernar-aq, mq-anr nae tersar ngaeqdov lef-eu, “Nawr-aq, ngar zawr gaq-eu ngaq-euq Zaqyo ma. Ngar, nawq-anr nuikhanrshir duidui ma.”

Yeqsur Murjur Jur-eu Gar Yadaq-euq

¹² Khoernar-aq, tiqpov taef-aer Yawshawr Saflar, Yeqsur-anr bawrtsanq bawrdanr-euq lafkhoer khaerghae-awr bi’ir-euq mae.

¹³ Aqyawf bawrtsanq bawrdanr-anr 40 nan jawr ngae, naef Saqdaq, aqyawf-anr murjur jur-awr, bawrtsanq-euq jeqzaq yawghae deuq naeq-aer jawr-euq mae. Khoernar-aq, mqtav ghaqkhaer, aqyawf-anr ngaeqghae naeqle-euq mae.

Yeqsur Gar Mrdanq Bae-euq

¹⁴ Yorhaq kuv-euq lafkhoer bi nyaefur ghaq-euq nar-aq, Yeqsur, Gaqliqlaer mirkhanq-anr lar-awr, Miqyaer uvlanr-eu garkawv guiqlanqdawq maeq-euq mae.

¹⁵ Aqyawf aer-eu, “Aryamq tsaqlar-euq mae. Miqyaer uvlanr-eu jeq dawqpae keuvle taq-euq mae! Nawmaf noeqpov noeqpar-awr, guiqlanq dawq-anr jan-awq.”

Kurbae Bae-euq Zaqlanr Deuq

¹⁶ Yeqsur, Gaqliqlaer lan landzer canluf ngae, Sirmoq hawr-eu aqyawf-euq maernmr Aqdaeqlaeq, lan-euq lafkhoer za dzaeluf-eu gar ya’mawr-euq mae. Aqnyaf nmr-aq, ngaqshaq nyaef-eu tsawrhaq mae.

¹⁷ Khoerngae, Yeqsur, aqnyaf nmr-anr aernaeq-eu, “Ngaq-euq maeqnan cantae lar-awq. Ngar, nawnyaf-anr ngaqshaq pov-eu lof-aer, tsawrhaq-anr pov-eu tsawrhaq bigeuf ma.”

¹⁸ Aqnyafnmr tiqpov taef-aer za byaerdzae yaf-awr, aqyawf-euq maeqnan cantae ghae-euq mae.

¹⁹ Yeqsur maeqhu paw uicuiv par can’ghae ngae, Zeqbeqdaer-euq zaqyo Yaqkov hawr-eu aqyawf-euq aqnyir Yorhaq, lawq-euq lafkhoer za dofluf-eu gar ya’mawr-euq mae.

²⁰ Yeqsur, tiqpov taef-aer aqnyaf nmr-anr kur-euq mae. Khoerngae, aqnyafnmr, aqyawf nyaf-euq aqda Zeqbeqdaer hawr-eu ghaqmanr manrdzaq-eu deuq-anr lawq-euq lafkhoer byaerdzae yaf-awr, Yeqsur-euq maeqnan cantae ghae-euq mae.

Naef Yawjawf-anr Taedov-euq

²¹ Aqyawfmaf Gaqbeqneqoq-anr le-euq mae. Landaw jawrnan ngae nan Yeqsur, zanrdawq khawqnymr-anr le’ur-awr maeqnaeq tsovnaeq-euq mae.

²² Aqyawfmaf, Yeqsur maeqnaeq tsovnaeq-eu gar zanq duidui ler-euq mae. Aqjeq mirnae aernar-aq, aqyawf-aq, zanr maeq-eu deuq lof-aer maqngeurni, aryaq jav-eu tiq ghaq lof-aer maeqnaeq tsovnaeq-eu mae.

²³ Khoerngae, zanrdawq khawqnymr-euq lafkhoer jawr-eu tsawrhaq tiq ghaq-anr naef yawjawf urler-awr gur-eu mae.

²⁴ Aqyawf aer-eu, “Naqzaqlaer tsawrhaq Yeqsur-or! Nawr, nga’maf-anr aqjeq taf-eu le? Nga’maf-anr lavcawv le-euq le lor? Nawr aqsur ghaq-a laer ngar siqnya ma. Nawr-aq, Miqyaer-euq Yawshawr ghaq mae.”

²⁵ Khoerngae, Yeqsur, aqyawf-anr daeq-awr aernaeq-eu, “Aqcircu, teughaq-euq lafkhoer nae dovle-awq.”

²⁶ Naef yawjawf khoermawr, tsawrhaq khoerghaq-anr yawkhav-aer bi teuvlar-awr, gurkhav lef-awr nae dovle-euq mae.

²⁷ Tsawrhaq khoerdeuq dawqtawvluf zanqler jir-awr, aqyawf maf-euq yawkaq ja-eu, “Aqjeq aqjox-aer nga heu? Aqgar-euq dawqmaeq dawqtsov yawshuif nga? Aqyawf aryaq jav-eu lafkhoer naef yawjawf deuq-anr dawq bif ngae, naef yawjawf deuq khawf, aqyawf-euq dawq-anr narhaq geuf-eu nga.”

²⁸ Khoermirnae, Yeqsur-euq tsawrmyanr Gaqliqlaer mirkhanq jawqlaw jawrlawr doeni yawkawr-aer gaqdoe-ir-euq mae.

Yeqsur, Nargawr Lavtaq-euq

²⁹ Aqyawfmaf zanrdawq khawqnymr-anr nae dovle-euq nar-aq, Yaqkov hawr-eu Yorhaq naeq-aer tiqpov taef-aer Sirmoq hawr-eu Aqdaeqlaeq-euq nymr-euq lafkhoer urler-euq mae.

³⁰ Khoerngae, Sirmoq-euq aqmawq aqbur ghaq pyaqpyaq-aer yufluf-eu mae. Aqcawq, aqyawf pyaqluf-eu garkawv, Yeqsur-anr aernaeq-euq mae.

³¹ Khoermirnae, Yeqsur, aqyawf-euq maeqshi le-awr, aqyawf-euq aqlaf-anr nyaeftaeq-awr nae gheuturnaeq ngae, pyaq-eu khoer lawq-ir-awr, Sirmoq-euq aqmawq, aqyawf maf-anr hawqbyawr lavdawv naeq-euq mae.

³² Nanrma ga’anr-awr, uqcif cifleluf ngae, aqcawq nar-awr gawr-eu tsawrhaq dawqtawvluf hawr-eu naef ur-eu tsawrhaq, Yeqsur jawr-eu gar sheuqlaf-euq mae.

³³ Meuq-anr kharjawr-eu tsawrhaq, nymr-euq ghovkhaeq-anr uiqlar taq-euq mae.

³⁴ Khoerngae, Yeqsur nargawr ghawqmya jeq narluf-eu tsawrhaq ghawqmya ghaq-anr lavtaq naeq-euq uqtaf, naef khawf ghawqmya mawr taedov-euq mae. Naef khoerdeuq, aqyawf-anr siqnya-eu mirnae, Yeqsur, naef khoerdeuq-anr dawq maqbi ngaeq-aq.

Gaqliqlaer-anr Dawqmaeq Maeq-euq

³⁵ Yeqsur uqshawq yawnaf-aer tur-awr, cofngaerni ghae-eu jawrduq-anr dov-ir-awr, khoergar guiqlanq shar-euq mae.

³⁶ Sirmoq hawr-eu aqyawf naeq-aer jawr-eu deuq, Yeqsur-anr pov-ir-euq mae.

³⁷ Aqyawfmaf, Yeqsur-anr povmawr ngae, aqyawf-anr aernaeq-eu, “Yawqghaq navluf, nawq-anr povluf-eu mae.”

³⁸ Khoerngae, Yeqsur, aqyawf maf-anr aernaeq-eu, “Ngar, dawqpae jav-eu meuqdeuq pudeuq-anr khawf, dawqmaeq ya’maeqni, aqduimaf maeqhu paw ir kar-eur. Aqjeq mirnae aernar-aq, ngar heulof-aer mr-eu laer oe-euq ma.”

³⁹ Khoernar-aq, aqyawfmaf Gaqliqlaer mirkhanq doeni ir-awr, aqyawf maf-euq zanrdawq khawqnymr-euq lafkhoer dawqmaeq maeq-awr, naef-anr khawf taedov naeq-euq mae.

Yeqsur, Coiqdoi Bi Shawrlar-euq

⁴⁰ Khoerngae, coiqdoi nar-eu tiq ghaq, Yeqsur jawr-eu gar lar-awr, pawqtsuif pawqdmq dmq-awr nae tanqshar-eu, “Nawr janrmawf nar-aq, ngar shawrlarni, nawr janrnya mae.”

⁴¹ Yeqsur, aqyawf-anr ghawqshaq hawgaq-awr, aqlaf cawqja-awr, aqyawf-euq khoertav toeqciv-awr nae aer-eu, “Ngar janrmawf mir-a. Nawr shawrlar-awq!”

⁴² Yeqsur khoerlof-aer aerghaq-euq naeq-aer, khoerghaq-euq coiqdoi nargawr khoer, tiqpov taef-aer byovjir-awr shawrlar-euq mae.

⁴³ Khoernar-aq, Yeqsur, aqyawf-anr dawq yawkhav-aer bif-awr, bighof-ir-euq mae.

⁴⁴ Yeqsur, aqyawf-anr aernaeq-eu, “Nawr, tiqghaq-anr-iq tiqjeq-iq taq ja’naeq de-eq. Pirma jawr-eu gar le-awr, nawq-euq mawrdo-anr bi tsermrhaw ler-awq. Nawr shawrlar-euq gar aqcawq yasiqni, Morseq nae dawq biftaq-euq lof-aer lawrnaeq-eu jeq lawrler-awq.”

⁴⁵ Aerkhawf, aqyawf dov-ir-awr nae garkawv khoer yawkhav-aer jakhawq ghae-awr, yawqgar navluf gaqdoe-ir taq-euq mae. Khoermirnae, Yeqsur, meuq-euq lafkhoer byacaevni maqpar urler nya-aer, bawrtsanq doeni jawrluf ngae, kharngeur-eu gar jawr-eu tsawrhaq deuq, aqyawf jawr-eu gar lar-euq mae.