Luˇkaꞈ 9 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ghaqkhaer 12 Ghaq-anr Khaerghae-euq

¹ Yeqsur, ghaqkhaer 12 ghaq-anr kuruiq-awr, naef dawqtawv luf-anr ghaqlerni hawr-eu nargawr kharngeur-eu jeq-anr lavtaqnaeq nya’ni, aqyawf maf-anr baoq hawr-eu aryaq bif-euq mae.

² Miqyaer uvlanr-eu garkawv maeqnaeqni hawr-eu nar-eu deuq-anr lavtaq naeqni, aqyawf maf-anr khaerdov ghae-euq mae.

³ Yeqsur, aqyawf maf-anr heulof-aer aernaeq-euq mae, “Garpaer-euq gharduq gawqyoeq hawr-eu paertanr taq yurghae. Dzaqdzaq dawrdawr hawr-eu pyur khawf taq yurghae. Maeqtsoeq dzerpar khawf taq yurghae.

⁴ “Nymr aqgeu nymr-anr davler-euq maqkaq, khoergar nae maqdov-ir-euq khoerkeuvni khoernymr-anr yaf-awq.

⁵ Nawmaf-anr maqha-eu deuq-euq meuq-anr nae dov-ir ngae, nawmaf-euq aqkuir-anr laeflar-euq khaqlaer byuqkhar yaf-awq. Khoer-aq, aqyawf maf-euq yawlaeq bi dovlar-eu sarkir pyeuf-eu mae.”

⁶ Khoernar-aq, zaqlanr deuq dov-ir-awr, tiqpu sair tiqpu-anr guiqlanqdawq maeqnaeq-awr, khar irkeuv-eu gar nargawr lavtaq naeq-euq mae.

Heqlor Zanqler-euq

⁷ Yeqsur nae mr-euq garkawv dawqtawv luf-anr meuqsanr Heqlor yagaq ngae, tiqpawf-iq noeq maqdov-a. Aqjeq mirnae aernar-aq, Yorhaq shir-euq gar nae ghofdaef lar-euq nga laer tiqpavnav deuq aerluf-eu mae.

⁸ Tiqpavnav deuq-aq, Erlirya dovlar-euq nga laer aer-awr, tiqpavnav deuq-aq, arhuba-euq Miqyaer gharduq ngaeqdan-eu tiqghaqnav ghofdaef lar-euq nga laer khawf aer-eu mae.

⁹ Heqlor, Yeqsur-anr mawrmawf-awr aer-eu, “Yorhaq-euq uqduq ngaq nae bitov-euq ma tawr. Teulof-aer mrluf-eu garkawv ngar ya gaqluf-euq teughaq aqsur ghaq nga?”

Tsawrhaq 5,000 Ghaq-anr Bidzaq-euq

¹⁰ Khoerngae, ghaqkhaer deuq ghoflar-awr, kharmr kharshar-euq deuq Yeqsur-anr dzawrnaeq-euq mae. Yeqsur, aqyawf maf-anr taef-aer kurceuv-awr, Baeqdzerdaq-euq bawrtsanq bawrdanr-anr dov-ir-euq mae.

¹¹ Aerkhawf, tsawrhaq armaf mafma deuq yasiq-awr, aqyawf-euq maeqnan cantae ghae-euq mae. Yeqsur, aqyawf maf-anr ha-awr, aqyawf maf-anr Miqyaer uvlanr-eu garkawv maeqnaeq-euq uqtaf, nargawr lavtaqnaeq paq-aer ghae-eu tsawrhaq-anr lavtaq naeq-euq mae.

¹² Nanrma ga’anr-ir mawf ngae, ghaqkhaer 12 ghaq lar-awr nae aer-eu, “Tsawrhaq armaf mafma heudeuq, pu-anr maqngeur nar-aq, yarkhanq yarlawq-anr yaf-ir-awr, dzaqdzaq dawrdawr zeurdzaq-ir nya’ni, aqyawf maf-anr bighawq-ir-awq. Aqjeq mirnae aernar-aq, heugar-aq, bawrtsanq nga.”

¹³ Khoerngae, Yeqsur, aqyawf maf-anr aernaeq-eu, “Nawmaf, aqyawf maf-anr tiqjeqnav bidzaq-awq.” Zaqlanr deuq aer-eu, “Nga’maf kaqmur ngaq siq hawr-eu ngaqshaq nyiq mawr anr-eu taef ma. Tsawrhaq heudeuq dawqtawv luf-euq gharduq dzaqdzaq dawrdawr maqzeur-ir nar-aq maq lofler-a.”

¹⁴ Khoerngae, khoergar jawr-eu zaqyo aqli taef-aer 5,000 ghaq aerghaqni byan-eu mae. Khoerngae, Yeqsur, zaqlanr deuq-anr aernaeq-eu, “Aqyawf maf-anr tiq mur 50 ghaq, 50 ghaq-aer binuir-awq.”

¹⁵ Zaqlanr deuq khoerlof-aer janr-awr, tsawrhaq dawqtawv luf-anr binuir-euq mae.

¹⁶ Yeqsur, kaqmur khoer ngaq siq hawr-eu ngaqshaq khoer nyiq mawr yur-awr, mq paw haw-awr, Miqyaer-euq guiqlanq-anr jaceuq-euq mae. Khoernar-aq, ngawqpyaeq-awr, zaqlanr deuq-anr ciqnaeq-awr, tsawrhaq armaf mafma-euq maeqshi bi ciqtaq-euq mae.

¹⁷ Aqyawfmaf yawqghaq navluf tiqdaev yadzaq-euq mae. Dzaeqlar-euq deuq-anr ghovuiq ngae, khavpuq 12 puq byanlar-euq mae.

Beqtuvluv, Yeqsur-aq, Kali Mae Laer Aer-euq

¹⁸ Tiqpov-aq, Yeqsur tiq ghaq taef-aer guiqlanq sharluf ngae, zaqlanr deuq khawf aqyawf naeq-aer jawr-eu mae. Khoerngae, Yeqsur, aqyawf maf-anr narhaq-eu, “Tsawrhaq armaf mafma, ngaq-anr aqsur ghaq nga laer aerluf-eu la?”

¹⁹ Aqyawfmaf aernaeq-eu, “Tiqpavnav deuq-aq, Bartirsaq mrnaeq-eu Yorhaq nga laer aer-eu mae. Tiqpavnav deuq-aq, Erlirya nga laer aer-awr, tiqpavnav deuq-aq, Arhuba-euq Miqyaer gharduq ngaeqdan-eu tiqghaqnav ghofdaef lar-euq nga” laer khawf aerluf-eu mae.”

²⁰ Yeqsur, aqyawf maf-anr narhaq-eu, “Nawmaf lawr nae? Ngar, aqsur ghaq nga laer aer-eu le?” Beqtuvluv aerkhof naeq-eu, “Nawr-aq, Miqyaer-euq Kali mae.”

Yeqsur, Aqyawf Yashir-eu Garkawv Ngaeq-eu

²¹ Khoerngae, garkawv heu tiqghaq-anr-iq maqya ja’naeqni, Yeqsur, aqyawf maf-anr dawqkhav bif-euq mae.

²² Khoeruqtaf, Yeqsur aer-eu, “Tsawrhaq-euq Zaqyo-aq, shaqzanq ghawqmya jeq-anr yadaq-awr, aqyuif aqtsu deuq, pirma aqyuif deuq hawr-eu zanr maeq-eu deuq nae yabi byaerdzae-eu uqtaf, yabi saef taef-a. Aerkhawf, smq nan ngae nan-anr ghofdaeflar taef-a.”

²³ Khoernar-aq, Yeqsur, tsawrhaq dawqtawv luf-anr heulof-aer aernaeq-euq mae: “Tsawrhaq tiq ghaq, ngaq-euq maeqnan cantaelar mawf nar-aq, yawqha-euq nuikhanr byaerdzae yaf-awr, yawqnan navluf yawqha-euq lafyaq yawqha baf-awr nae, ngaq-euq maeqnan ya cantae-eu mae.

²⁴ Aqjeq mirnae aernar-aq, aqsur ghaq maqkaq, yawqha-euq daefzir bibuq-ir mawf nar-aq, daef-eu jeq yasmq taef-a. Aerkhawf, aqsur ghaq maqkaq, ngaq-euq gharduq, yawqha-euq daefzir bismq nar-aq, daefzir za taef-a.

²⁵ Tsawrhaq tiqghaqnav mirtsaq dawqtawvluf za-euq khawf, aqyawf-euq daefzir cawv-ir-awr byov-ir-euq ngeur nar-aq, aqyawf-euq gharduq aqjeq gardanr tsoeq-eu?

²⁶ Aqsur ghaq maqkaq, ngaq-anr hawr-eu ngaq-euq dawq-anr shafdawr nar-aq, Tsawrhaq-euq Zaqyo khawf, aqyawf-euq yawshaef khanqsaer-euq lafkhoer maqaer, Aqda Miqyaer hawr-eu shawr-eu mqtav ghaqkhaer-euq yawshaef khanqsaer-euq lafkhoer maqaer zafkale ngae, tsawrhaq khoerghaq-anr shafdawr taef-a.

²⁷ Ngar, nawmaf-anr aqdirma-aer aernaeq nyar, heugar yawfluf-eu tiqghaqnav maqshir-euq minav-aer, Miqyaer uvlanr-eu jeq-anr ya’mawr taef-a.”

Yeqsur-euq Mawrdo Parlar-euq

²⁸ Khoerlof-aer aerghaq-awr yaef nan aerghaqni byanlar ngae, Yeqsur-aq, Beqtuvluv, Yorhaq hawr-eu Yaqkov sheuq-awr gawqjawq-anr guiqlanq sharler-eu laer le-euq mae.

²⁹ Guiqlanq sharluf ngae, aqyawf-euq myavpyawq parlar-awr, maeqtsoeq pyurdeuqni ghaelar-awr yawshaef bya duidui-eu mae.

³⁰ Khoerngae, tsawrhaq nyiq ghaq Yeqsur naeq-aer dawq ngaeqcawq luf-eu mae. Khoer-aq, Morseq hawr-eu Erlirya mae.

³¹ Aqyawfnyaf yawshaef khanqsaer-euq lafkhoer dovle-awr, ghawqmyanr maqghae-aer Yeqsur, Yeqlursaqlaeq-anr yashir-awr ya mrbyan-eu garkawv, aqyawf naeq-aer jacawq luf-eu mae.

³² Beqtuvluv hawr-eu aqyawf naeq-aer jawr-eu tsawrhaq yufkhavbyov taq-euq mae. Yufnoeq noeqlar ngae, Yeqsur-euq yawshaef khanqsaer hawr-eu aqyawf naeq-aer yawfluf-eu khoer nyiq ghaq-anr ya’mawr-euq mae.

³³ Khoernar-aq, tsawrhaq khoer nyiq ghaq, Yeqsur-anr nae ghawq-ir luf ngae, Beqtuvluv, Yeqsur-anr aernaeq-eu, “Sanqpaq-or! Aqduimaf heugar jawr-eu arnavni muiq-eu nya. Nga’maf saeqghawv smq ghawv ghawv ma. Nawq-euq gharduq tiq ghawv, Morseq-euq gharduq tiq ghawv hawr-eu Erlirya-euq gharduq tiq ghawv ghawv ma.” Beqtuvluv, aqyawf aqjeq ngaeqluf-eu le laer maq siqnya-a.

³⁴ Aqyawf khoerlof-aer aerluf ngae, mqdmr tiq tsanq aqyawf maf-anr uvtaeq le-awr, aqyawfmaf mqdmr-euq lafkhoer jawrluf ngae, aqyawfmaf guv-eu mae.

³⁵ Khoerngae, mqdmr-anr nae tersar ngaeqdov lef-eu, “Heughaq-aq, ngar zawr gaq-eu ngaq-euq Zaqyo ma. Nawmaf, aqyawf-euq dawq narhaq geuf-awq.”

³⁶ Tersar khoer naqler ngae, Yeqsur tiq ghaq taef-aer khoergar jawrluf-eu gar ya’mawr-euq mae. Aqyawfmaf nae ya’mawr-euq garkawv khoerdeuq, aryamq khoer-euq lafkhoer, tiqjeq-iq tiqghaq-anr-iq maq ja’naeq-aer ciqcurni jawr-euq mae.

Naef Yawjawf Ur-eu Aqli Tiq Ghaq-anr Bi Taqler-euq

³⁷ Nishawq ngae nan, aqyawfmaf gawqjawq-anr nae zafkale ngae, tsawrhaq ghawqmya’ni Yeqsur-anr halar-euq mae.

³⁸ Khoerngae, tsawrhaq armaf-euq lafkhoer-euq tiq ghaq, Yeqsur-anr gurgur-aer heulof-aer aer-eu mae: “Saqlaq-or! Nawq-anr shar ma. Ngaq-euq zaqyo-anr hawle naeqlaf sher-eq. Ngar, zaq heu tiq ghaq jawr-eu taef ma.

³⁹ Hawsher-eq. Naef, aqyawf-anr urler ngae, aqyawf tiqpov taef-aer yawkhav-aer gurlar-awr, naef heumawr aqyawf-anr guqti bi tiler-awr, khaqmae-anr nae buirmeuf paqpaq-aer bi dovle-eu uqtaf, aqyawf-anr lavtanq lavnar naeq-awr nae maqngeur nar-aq, yaw’awq-aer maq dovle-a.

⁴⁰ Naef heumawr-anr taedov naeqlaf sher-eq laer ngar, nawq-euq zaqlanr deuq-anr shar-euq khawf, aqyawfmaf maq taedov nya-a.”

⁴¹ Khoerngae, Yeqsur aer-eu, “Arma-er-e! Nuijan maqanr-aer, nanrpov-aer daef-eu heuzir-euq tsawrhaq deuq-or! Ngar, nawmaf naeq-aer aqmyan keuvni yajawr-awr parya or-eu la siq? Nawq-euq zaqyo heugar sheuqlaf-awq.”

⁴² Aqyawf larluf ngae, naef, aqyawf-anr daeqcoq ghae-awr, aqyawf-anr guqti bi tiler-euq mae. Khoerngae, Yeqsur, naef yawjawf khoermawr-anr daeq-awr, aqli khoerghaq-anr lavtaq naeq-awr nae, aqyawf-euq aqda-anr a’khof naeq-euq mae.

⁴³ Khoerngae, tsawrhaq dawqtawvluf, Miqyaer khanqsaer huiq-eu gar zanq duidui ler-euq mae. Yeqsur nae mr-euq yawqjeq navluf-anr tsawrhaq dawqtawvluf zanqler-awr jawrluf ngae, Yeqsur, zaqlanr deuq-anr aernaeq-eu,

Yeqsur, Aqyawf Yashir Mae Laer Paraer-eu

⁴⁴ “Nawmaf dawq heudeuq-anr naqbawr ciqkhmr-awr juiruiq taq-awq. Aqjeq mirnae aernar-aq, Tsawrhaq-euq Zaqyo, aqcawq-euq aqlaf-euq lafkhoer ya’anr-ir taef-a.”

⁴⁵ Dawq khoerdawq-euq dawqtsuif, aqyawf maf-anr maqbi ghovshaw nya’ni zaftaq-euq mirnae, aqyawfmaf dawq khoerdawq-anr maq ghovshaw nya-a. Aerkhawf, aqyawfmaf garkawv khoer-anr maq narhaq peuq-a.

Huiqdzaeq-eu Ghaq

⁴⁶ Khoerngae, aqyawf maf-euq lafkhoer aqgeu ghaq, aqcawq navmaqtser huiqdzaeq-eu la laer zaqlanr deuq yawkaq pyaerdzaq-eu jeq dovlar-euq mae.

⁴⁷ Yeqsur, aqyawf maf-euq nuima-euq lafkhoer noeqluf-eu jeq-anr siqnya-eu mirnae, zaq yawnyir tiq ghaq sheuqlaf-awr aqyawf-euq dawqpae bijawr-euq mae.

⁴⁸ Khoernar-aq, aqyawf, aqyawf maf-anr aernaeq-eu, “Ngaq-euq tsawrmyanr-euq uqmov zaq yawnyir heughaq-anr hageuf-eu tsawrhaq-aq, ngaq-anr hageuf-eu mae. Ngaq-anr hageuf-eu tsawrhaq-aq, ngaq-anr bi’oe-euq ghaq-anr hageuf-eu mae. Nawmaf dawqtawv luf-euq lafkhoer aqcawq navmaqtser nyirdzaeq-eu ghaq-aq, aqcawq navmaqtser huiqdzaeq-eu ghaq pyeuflar taef-a.”

Cawba-eu Tsawrhaq-anr Taq Lavtsoeq

⁴⁹ Khoerngae, Yorhaq aer-eu, “Sanqpaq-or! Tsawrhaq tiq ghaq, nawq-euq tsawrmyanr-anr ghoeghoe-aer naef-anr taedov luf-eu gar nga’maf ya’mawr-awr, nga’maf, aqyawf-anr lavtsoeq-euq ma. Aqjeq mirnae aernar-aq, aqyawf, nga’maf naeq-aer tiqkawv lof-aer nawq-euq maeqnan maq cantae-a.”

⁵⁰ Yeqsur aer-eu, “Aqyawf-anr taq lavtsoeq. Aqjeq mirnae aernar-aq, aqdui-anr maq lavtsoeq-eu tsawrhaq-aq, aqdui jawr-eu paw jawr-eu mae.”

Saqmaqliv Tsawrhaq-euq Pu, Yeqsur-anr Maqha-eu

⁵¹ Khoerngae, heulof-aer pyeuflar-euq mae. Yeqsur-anr mq-euq khoertav bi hadav lef-eu aryamq paelarluf ngae, Yeqlursaqlaeq-anr le ma laer aqyawf noeqtsov taq-euq mae.

⁵² Khoermirnae, aqyawf-euq maeqhu ghaqzaq ghaqkhaer deuq-anr khaer-awr bile-euq mae. Aqyawfmaf, Yeqsur-euq gharduq lavsavtaq ler-eu laer Saqmaqliv tsawrhaq-euq pu tiq pu-anr le’ur-euq mae.

⁵³ Yeqsur myavpyawq ciqpyawr-awr Yeqlursaqlaeq-anr leluf-eu mirnae, puzaq deuq, aqyawf-anr maq hageuf-a.

⁵⁴ Aqyawf-euq zaqlanr Yaqkov hawr-eu Yorhaq khoer-anr ya’mawr ngae aer-eu, “Sanqpaq-or! Erlirya nae mr-euq lof-aer, nga’nyaf nae mqtav-euq miqdzaq bi gale-awr, aqyawf maf-anr puivdzaq jirni nawr bi mrmawf ma lor?”

⁵⁵ Khoerngae, Yeqsur, aqyawfnyaf jawr-eu paw ciqpyawr lef-awr heulof-aer daeq-euq mae, “Nawmaf-aq, yawqha aqgeu jeq-euq saflar anrluf-eu nya laer maq siqnya-eu nga.

⁵⁶ Aerkhawf, Tsawrhaq-euq Zaqyo-aq, tsawrhaq-euq daefzir-anr lavcawv le-euq maqngeur, tsawrhaq-euq daefzir-anr bibuq-ir-eu gharduq oe-euq ma.” Khoernar-aq, aqyawfmaf yawqpu yawq-anr le-euq mae.

Yeqsur-euq Maeqnan Cantae-eu Arpoeq

⁵⁷ Tiqnan, aqyawfmaf garpaer-anr leluf ngae, tsawrhaq tiq ghaq, Yeqsur-anr aernaeq-eu, “Sanqpaq-or! Nawr aqgeugar ir-eu maqkaq, ngar, nawq-euq maeqnan cantaelar ma.”

⁵⁸ Khoerngae, Yeqsur aer-eu, “Byaqhir-aq, khaeqbanq baw-awr, mqtav zaw-eu arjir khawf banq jav-eu mae. Aerkhawf, Tsawrhaq-euq Zaqyo-aq, uqduq bafdarkhar khawf maqza.”

⁵⁹ Khoernar-aq, Yeqsur yawqghaq yawq-anr aernaeq-eu, “Ngaq-euq maeqnan cantae lar-awq.” Aerkhawf, khoerghaq aer-eu, “Sanqpaq-or! Ngar ghof-ir-awr ngaqda-anr jeqhu bi bafpanq-ir laf.”

⁶⁰ Khoerngae, Yeqsur aer-eu, “Shir-euq tsawrhaq-anr-aq, shir-euq tsawrhaq nae bi bafpanq-awq. Aerkhawf, nawr-aq, ir-awr Miqyaer uvlanr-eu garkawv maeqnaeq-ir-awq.”

⁶¹ Yawqghaqyawq aer-eu, “Sanqpaq-or! Ngar, nawq-euq maeqnan cantaelar ma. Aerkhawf, ngaq-anr irkanr jawryaf-euq deuq-anr jeqhu bi dzawrgaq-ir laf.”

⁶² Khoerngae, Yeqsur aer-eu, “Aqlaf, nyoqtsaeq lafyoeq-anr nyaeftaeq-awr, nanrghof ghofhaw-eu tsawrhaq-aq, Miqyaer uvlanr-eu jeq-anr maqgeux-a.”