Luˇkaꞈ 8 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur-anr Cantae-eu Zaqmiq Aqbur Deuq

¹ Khoernar-aq, ghawqmyanr maqghae-aer, Yeqsur tiqmeuq sair tiqmeuq, tiqpu sair tiqpu-anr dawqmaeq maeqmaeq-aer Miqyaer uvlanr-eu garkawv guiqlanqdawq maeqnaeq-ir-euq mae. Ghaqkhaer 12 ghaq khawf aqyawf naeq-aer ir-euq mae.

² Yeqsur nae naef yawjawf ur-eu gar taedov naeq-euq hawr-eu nar-awr gawr-eu bi taqler-euq zaqmiq aqbur tiqpavnav deuq khawf aqyawf naeq-aer ir-euq mae. Aqyawf maf-euq lafkhoer, naef shif mawr ur-eu gar bi taedov-euq Maqgaqdaqlar laer kur-eu Maqliv,

³ Heqlor-euq myawqganq-anr hawpir-eu Kursav-euq nymrdanq Yorhaqna, Sursaqnav hawr-eu zaqmiq aqbur nuideuq ghawqmya ghaq, aqyawf naeq-aer ir-euq mae. Zaqmiq aqbur heudeuq-aq, yawqha-euq pyurshuir myawqganq zmqzmq-aer, Yeqsur hawr-eu ghaqkhaer deuq-anr ngaeqghae danteq naeq-euq mae.

Siqyoeq Saeq-eu Garkawv

⁴ Khoerngae, tsawrhaq ghawqmya’ni uiqle-awr, yawqmeuq navluf-anr jawr-eu tsawrhaq, Yeqsur jawr-eu gar oekeuv ngae, Yeqsur yawjeq majeq dawq-anr nae heulof-aer maeqnaeq-euq mae:

⁵ “Siqyoeq saeq-eu tiq ghaq siqyoeq saeq-eu laer dov-ir-euq mae. Aqyawf saeq ngae, tiqpavnav deuq-aq, garma-anr ga-ir-euq mae. Siqyoeq khoerdeuq-anr tsawrhaq nawqnawq-aer can-awr, mqtav zaw-eu arjir nae tovdzaq jir-euq mae

⁶ Tiqpavnav deuq-aq, khaqlo-euq khoertav gadav-ir-awr, mirtsaq yawgui mirnae, daefdov lar-euq nar-aq nyoeq-ir kov-ir-euq mae.

⁷ Tiqpavnav deuq-aq, aqgan daefmyaq-eu tsanr-anr ga-ir-euq mae. Aqgan bawduv maerlar-awr, arji khoerdeuq-anr uvtaeq taq-euq mae.

⁸ Tiqpavnav deuq-aq, mirtsaq mirmuiq-anr ga-ir-awr, daeflar maerlar-awr, arsiq 100 bymr siqle-euq mae.” Yeqsur khoerlof-aer aerghaq ngae, tersar yawkhav-aer aer-eu, “Naqbawr tsof-awr khar gaqnya-eu tsawrhaq narhaq-awq.”

Aqjeq Mirnae Yawjeq Majeq Dawq Zmq-eu

⁹ Khoerngae, aqyawf-euq zaqlanr deuq, Yeqsur-anr narhaq-eu, “Yawjeq majeq dawq heudawq, dawqtsuif aqjox-aer aermawf-eu la?”

¹⁰ Khoerngae, aqyawf heulof-aer aernaeq-euq mae, “Miqyaer uvlanr-eu garkawv zaftaq-euq deuq nawmaf-anr taef-aer bi siqnya-eu ma. Aerkhawf, nuideuq-anr-aq, ‘Haw khawf maq mawrnya-aer, gaq khawf maq ghovshaw nya’ni, Aqyawf maf-anr-aq, yawjeq majeq dawq-anr nae maeqnaeq-eu ma.’ (Isy 6:9)

Siqyoeq Saeq-eu Garkawv-euq Dawqtsuif

¹¹ “Yawjeq majeq heudawq-euq dawqtsuif-aq heulof-aer mae: siqyoeq khoer-aq, Miqyaer-euq dawq mae.

¹² Garma-anr ga-ir-euq deuq-aq, Miqyaer-euq dawq yagaq ngae, aqyawf maf-anr maqbi jan-aer, kakhof-eu jeq maqbi za’ni naef sanqpaq lar-awr, aqyawf maf-euq nuima-euq lafkhoer anr-eu dawq yurdov-eu mae.

¹³ Khaqlo-euq khoertav gadav-ir-euq deuq-aq, Miqyaer-euq dawq yagaq ngae, laqkhaq tiqcaer hageuf-euq khawf, duqcir maq ka’naf nya-eu mirnae, tiqkhaeq taef-aer jan-awr, murjur jur-eu jeq tanqpuq ngae, coq-ir-eu deuq-anr aermawf-eu mae.

¹⁴ Aqgan daefmyaq-eu tsanr-anr ga-ir-euq deuq-aq, Miqyaer-euq dawq yagaq-awr irdov ngae, mirtsaq-euq khoertav jawr ngae khanqlanr-eu jeq, pyurshuir myawqganq hawr-eu lurgha caergha-eu jeq nae bi uvtaeq taq-awr, arsiq siqle khawf maq lovlar nya-eu deuq-anr aermawf-eu mae.

¹⁵ Mirtsaq mirmuiq-anr ga-ir-euq deuq-aq, Miqyaer-euq dawq yagaq ngae, dawrcoeni ghae-eu nuima hawr-eu nuima yawmuiq anr-eu lafkhoer, zifdanni nyaeftaeq taq-awr, oror-aer arsiq siqle-eu mae.

Tsirkhmq Dof-eu Garkawv

¹⁶ “Tsawrhaq tiqghaq-iq tsirkhmq dof-awr oeqlanq nae maq moftsanq taq-aer, jaciq-euq uqmov khawf maq ciqtaq-ar. Urlar-eu tsawrhaq yawshaef-anr ya’mawrni, tsirkhmq ciqtaq duq-anr ciqdav taq-eu mae.

¹⁷ Khoermirnae, yawqjeq navluf yawbya-anr dovlar-awr, kharzaf taq-euq jeq ya siqnya-eu uqtaf, khar daeqkaq taq-euq jeq ya’mawr taef-a.

¹⁸ Khoermirnae, nawmaf aqjox-aer narhaq-eu le laer yanr-awq. Aqjeq mirnae aernar-aq, jav-eu tsawrhaq-anr par biflanq naeq-awr, maqjav-eu tsawrhaq-anr-aq, jav ma laer noeq-euq jeq khawf yurdovjir naeq taef-a.”

Yeqsur-euq Aqma Hawr-eu Aqnyir Deuq

¹⁹ Khoerngae, Yeqsur-euq aqnyir deuq hawr-eu aqyawf-euq aqma, aqyawf jawr-eu gar lar-euq mae. Aerkhawf, tsawrhaq ardzaeq-aer myaq-eu mirnae, aqyawf jawr-eu gar maq lekeuv nya-a.

²⁰ Khoerngae, aqcawq, Yeqsur-anr aernaeq ler-euq, “Nawqma hawr-eu nawq-euq aqnyir deuq, nawq-anr mawrmawf nya laer, lafnyir yawfluf-eu mae.”

²¹ Yeqsur aerkhof naeq-eu, “Miqyaer-euq dawq gaq-awr narhaq geuf-eu tsawrhaq-aq, ngaqma hawr-eu ngaq-euq aqnyir deuq ma.”

Jaqlaer Laerma-anr Bi Naqler-euq

²² Tiqnan-aq, Yeqsur, zaqlanr deuq naeq-aer lawq-anr urler-awr aer-eu, “Aqduimaf lan-euq khoerpaw baq-anr tsaev-ir kar-eur.” Khoernar-aq, aqyawfmaf irghae-euq mae.

²³ Aqyawfmaf tsaev-ir luf ngae, Yeqsur yufkhav-euq mae. Khoerngae, lan-anr jaqlaer laerma bawlar-awr, lawq-euq lafkhoer ircuf danqbyan larluf-eu mirnae, yawkhav-aer guvlar paq-aer pyeuflar-euq mae.

²⁴ Zaqlanr deuq, Yeqsur jawr-eu gar ir-awr lavnoeq-awr aer-eu, “Sanqpaq-or! Sanqpaq-or! Nga’maf yashir jir-eu keuvle-euq mir-a.” Yeqsur noeqlar-awr, jaqlaer laerma hawr-eu irluv luvma-anr daeq ngae, jaqlaer hawr-eu irluv naqler-awr, ciqcurni pyeuf-ir-euq mae.

²⁵ Yeqsur, aqyawf maf-anr aernaeq-eu, “Nawmaf-euq nuijan aqgeugar jav-eu la?” Khoerngae, aqyawfmaf guvdui zanq duidui ler-awr, aqyawf maf-euq yawkaq aer-eu, “Tsawrhaq heughaq aqsur ghaq nga? Aqyawf, jaqlaer hawr-eu ircuf-anr dawq bif ngae, jaqlaer hawr-eu ircuf khawf aqyawf-euq dawq narhaq-eu beu!”

Naef Ur-eu Tiq Ghaq-anr Bi Taqler-euq

²⁶ Khoernar-aq, aqyawfmaf, lawq dziq-awr, Gaqliqlaer mirkhanq-euq nuibaq-anr jav-eu Gaqdaqlar tsawrhaq-euq jawrduq-anr irkeuv-euq mae.

²⁷ Yeqsur lawrdzer davler ngae, khoermeuq-anr jawr-euq naef ur-eu tiq ghaq, aqyawf-anr tanqpuq le-euq mae. Tsawrhaq khoerghaq maeqtsoeq maqdm-aer irkanr khawf maqjawrni, lmqbymr-anr taef-aer jawrluf-eu myanrlar-euq mae.

²⁸ Aqyawf, Yeqsur-anr ya’mawr ngae, Yeqsur-euq maeqshi awbyav-awr, tersar yawkhav-aer gur-eu, “Gor duidui-eu Miqyaer-euq Zaqyo Yeqsur-or! Ngar, nawq naeq-aer aqjeq taf-eu la? Ngaq-anr taq khaeqnaeqlaf laer ngar, nawq-anr shar-eu ma.”

²⁹ Tsawrhaq khoerghaq-euq lafkhoer nae dovle-awq laer Yeqsur, naef yawjawf khoermawr-anr dawq bif-euq mirnae, khoerlof-aer aer-eu mae. Dzeurlaf ngae, naef khoermawr, aqyawf-anr ghawqmya pov nyaeftaeq-euq mirnae, aqcawq, aqyawf-anr kaflanr taq-awr, shmrcav hawr-eu kuirtawf nae tawftaq-euq khawf, aqyawf shmrcav khoer-anr gheutsaev-awr, naef, aqyawf-anr bawrtsanq bawrdanr-anr taeghae-euq mae.

³⁰ Khoerngae, Yeqsur, aqyawf-anr narhaq-eu, “Nawq-euq tsawrmyanr aqjox-aer kur-eu le?” Naef khoermawr aer-eu, “Ngar-aq, Guirmaf laer kur-eu ma.” Khoer-aq, aqyawf-euq lafkhoer naef ghawqmya’ni ur-eu mirnae mae.

³¹ Naef khoerdeuq, Yeqsur-anr li-eu maqbaw-eu duqkhanq-anr taqbi ir naeqlaf laer shar-eu mae.

³² Khoerngae, gawqjawq khoerjawq-anr aqzaf ghawqmya’ni gavdzaq luf-eu mae. Aqzaf-euq lafkhoer biur-ir naeqlaf-awq laer naef, Yeqsur-anr shar-eu mirnae, Yeqsur, aqyawf maf-anr pyaeq-awr biur-ir-euq mae.

³³ Khoernar-aq, naef khoerdeuq, tsawrhaq khoerghaq-euq lafkhoer nae dovle-awr, aqzaf-euq lafkhoer ur-ir-euq mae. Khoerngae, aqzaf khoermaf baqghashaq-anr saerka ghae-awr, lan-anr gapufsaef jir-euq mae.

³⁴ Aqzaf bo-eu deuq khoerlof-aer pyeuflar-euq gar ya’mawr ngae, caevghof ghae-awr, garkawv khoer meuq hawr-eu pudeuq-anr dzawrnaeq-ir-euq mae.

³⁵ Garkawv khoer aqjox-aer pyeuflar-euq nga laer yasiqni, tsawrhaq armaf mafma hawlar-euq mae. Aqyawfmaf, Yeqsur jawr-eu gar larkeuv ngae, naef baqmaf dov-ir-euq khoerghaq, maeqtsoeq dm-awr, noeqbeur khoflar-awr, Yeqsur-euq aqkuir-euq dawqpae nuirluf-eu gar ya’mawr-euq mirnae, aqyawfmaf guv duidui-ir-euq mae.

³⁶ Garkawv khoer pyeuflar-euq gar ya’mawr-euq tsawrhaq deuq nae, naef ur-euq khoerghaq aqjox-aer taqler-euq la laer aqyawf maf-anr dzawrnaeq-euq mae.

³⁷ Gaqdaqlar mirkhanq-euq jawqlaw jawrlawr jawr-eu tsawrhaq dawqtawvluf guv duidui-eu mirnae, aqyawfmaf jawr-eu gar nae dov-ir naeqlaf laer Yeqsur-anr shar-euq mae. Khoermirnae, Yeqsur, lawq-anr ur-ir-awr ghofler-euq mae.

³⁸ Khoerngae, naef dov-ir-euq khoerghaq, Yeqsur-anr aqyawf naeq-aer bijawr naeqlaf laer shar-eu mae. Aerkhawf, Yeqsur, aqyawf-anr heulof-aer aernaeq-awr bighof-ir-euq mae,

³⁹ “Nawr, irkanr ghof-ir-awr, Miqyaer nae nawq-anr arnavni huiq-eu jeq janrnaeq laf-euq garkawv ja’naeq-ir-awq.” Khoermirnae, aqyawf ghof-ir-awr, Yeqsur nae aqyawf-anr arnavni huiq-eu jeq janrnaeq laf-euq garkawv, meuq doeni dzawrnaeq-ir-euq mae.

Yaqirlu-euq Zaqmiq Hawr-eu Shiq Dovdov-aer Nar-eu Zaqmiq Aqbur

⁴⁰ Yeqsur ghofkeuvler ngae, tsawrhaq armaf maflanni, aqyawf-anr dawqluf-eu mirnae, aqyawf-anr ha-euq mae.

⁴¹ Khoerngae, Yaqirlu laer kur-eu zanrdawq khawqnymr-euq aqyuif tiq ghaq lar-awr, Yeqsur-euq maeqshi awbyav-awr nae aqyawf-euq irkanr oe naeqlaf laer, Yeqsur-anr shar-eu mae.

⁴² Aqjeq mirnae aernar-aq, 12 khof khawvlar-euq aqyawf-euq zaqmiq shirler luf-eu mae. Aqyawf-aq, zaqmiq heughaq jawr-eu taef mae. Yeqsur irluf ngae, tsawrhaq armaf mafma, aqyawf-anr tanqjeq tanqciv luf-eu mae.

⁴³ Khoerngae, 12 khof byanni shiq dovdov-aer narluf-eu zaqmiq aqbur tiq ghaq jawr-eu mae. Aqyawf yawdaef daef-eu gharduq kharjav-eu jeq zmq-awr nargawr lavsav-eu tsawrhaq deuq nae bi lavsav-euq khawf, aqyawf-anr tiqghaq-iq maq lavtaq nya-a.

⁴⁴ Aqyawf, Yeqsur-euq narkhan paw lar-awr, Yeqsur-euq paerkhanq paerdanq-anr toeqciv ngae, shiq dov-eu khoer tiqpov taef-aer tsirler-euq mae.

⁴⁵ Khoerngae, Yeqsur narhaq-eu, “Ngaq-anr aqsur ghaq toeqciv-euq la?” Tiqghaq-iq Yeqsur-anr toeqciv-euq ma laer maqaer-a. Khoerngae, Beqtuvluv hawr-eu tiqkawv lof-aer canluf-eu deuq yawqghaq navluf aer-eu, “Sanqpaq-or! Tsawrhaq armaf mafma suftini nawq-anr tanqjeq tanqciv luf-eu maqngeur nga lor? Nawr, ‘Aqsur ghaq, ngaq-anr toeqciv-euq la’ laer narhaq le lor?”

⁴⁶ Khoerngae, Yeqsur aer-eu, “Ngaq-anr tiq ghaq toeqciv-euq mir-a. Aqjeq mirnae aernar-aq, ngaq-euq lafkhoer nae baoq dov-ir-euq gar ngar siqnya ma.”

⁴⁷ Maqpar jawrzaf nya-eu ngar-a laer zaqmiq aqbur khoerghaq-anr siqler ngae, yawdzuq gan’gan-aer lar-awr Yeqsur-euq aqkuir-euq dawqpae awbyav-awr, aqjeq mirnae Yeqsur-anr toeqciv-euq hawr-eu, tiqpov taef-aer aqjox-aer taqler-euq garkawv, tsawrhaq dawqtawv luf-euq maeqshi Yeqsur-anr aernaeq-euq mae.

⁴⁸ Khoerngae, Yeqsur, aqyawf-anr aernaeq-eu, “Zaqmiq-or! Laqkhaq caer-awq. Nawq-euq jan-eu jeq nae, nawq-anr bi taqler-euq mae. Nuima sarlaevni ghof-ir-awq.”

⁴⁹ Yeqsur khoerlof-aer aernaeqluf ngae, zanrdawq khawqnymr-euq aqyuif ghaq-euq nymr-anr nae tiq ghaq lar-awr aer-eu, “Nawqbur shirtsaev-euq mae. Saqlaq-anr taqpar lavbanq.”

⁵⁰ Aerkhawf, Yeqsur dawq khoerdawq-anr yagaq ngae, aqyawf-anr aernaeq-eu, “Khanq taqlanr. Jannar-aq ghaq-ar. Aqyawf taqler taef-a.”

⁵¹ Yeqsur, aqyawf-euq nymr-anr irkeuv ngae, Beqtuvluv, Yorhaq, Yaqkov hawr-eu aqbur khoerghaq-euq aqma aqda-anr maqngeur nar-aq, tiqghaq-anr-iq irkanr-euq lafkhoer maqbi urlar-aq.

⁵² Aqbur khoerghaq-euq baqda’nae, tsawrhaq dawqtawvluf yawkhav-aer ngoer-awr dawqkawq kawqkawq-aer khawf ngoer-eu gar mawr ngae, Yeqsur aer-eu, “Taqngoer, aqyawf shir-euq maqngeur-a. Yufkhav luf-eu taef mae.”

⁵³ Aqbur khoerghaq shirtsaev dzeur-euq mae laer aqyawfmaf siqnya-eu mirnae, Yeqsur-anr uir-eu mae.

⁵⁴ Khoerngae, aqyawf, aqyawfmaf dawqtawv luf-anr bidov-ir-awr, Yeqsur, aqyawf-euq aqlaf-anr nyaeftaeq-awr aer-eu, “Aqburzaq-or! Turlar-awq!”

⁵⁵ Khoerngae, aqyawf-euq saflar ghofur le-awr, aqyawf tiqpov taef-aer turlar-euq mae. Khoernar-aq, Yeqsur nae aqyawf-anr tiqjeqpaq bidzaq-awq laer dawq bif-euq mae.

⁵⁶ Aqyawf-euq aqma aqda zanq duidui ler-euq mae. Garkawv heu tiqghaq-anr-iq taq ja’naeq laer Yeqsur, aqnyaf dzerzaq-anr dawq bif-euq mae.