Luˇkaꞈ 7 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur, Guirzaq-anr Bi Taqler-euq

¹ Yeqsur, tsawrhaq khoerdeuq-anr dawq heudeuq dawqtawvluf maeqnaeq tsovnaeqghaq ngae, Gaqbeqneqoq-anr ir-euq mae.

² Khoergar, yardzoeq guirhuq tiq ghaq jawr-eu mae. Aqyawf zawr gaq-eu kuirlaf zaqkhav tiq ghaq shir paq-aer narluf-eu mae.

³ Yardzoeq guirhuq khoerghaq, Yeqsur-euq garkawv yagaq ngae, Aqyawf-euq kuirlaf zaqkhav-anr lavtaq naeqle sher-eq laer Yurdav tsawrhaq-euq aqyuif aqtsu heumyav ghaq-anr khaer-awr, Yeqsur-anr bi tanqshar ler-euq mae.

⁴ Aqyawfmaf, Yeqsur jawr-eu gar lekeuv ngae, Yeqsur, tsawrhaq heughaq-anr heulof-aer janrnaeq-eu-aq, geux mae laer aqyawf-anr yawkhav-aer sharshar-aer aernaeq-euq mae.

⁵ “Aqjeq mirnae aernar-aq, aqyawf, aqdui-euq tsawrjeuq tsawrca-anr gaq-awr, aqdui-euq gharduq zanrdawq khawqnymr tsovnaeq laf-euq mae.”

⁶ Khoerngae, Yeqsur, aqyawfmaf naeq-aer ir-euq mae. Khoerghaq-euq nymr-anr nae ardzaeq-aer maqkaq-eu gar irkeuv ngae, yardzoeq guirhuq khoerghaq, aqyawf-euq cawq heumyav ghaq-anr Yeqsur jawr-eu gar khaerlaf-awr, heulof-aer bi’aer lar-euq mae, “Sanqpaq-or! Nawq-euq mawrdo-anr coeqlarni taqjanr. Aqjeq mirnae aernar-aq, nawr, ngaq-euq irkanr urle-eu gar ngar maqgeux nya.

⁷ Ngar khawf nawq-anr mawrlar-eu maqgeux nya laer yawqhar yawqha noeq-euq ma. Nawr dawq tiq dawq taef-aer ngaeq-eu khawf, ngaq-euq kuirlaf zaqkhav taqler taef-a.

⁸ Aqjeq mirnae aernar-aq, ngar, aqcawq-euq aryaq-euq lafov artiv-anr yajawr-awr, ngaq-euq lafov khawf guirzaq deuq jawr-eu ma. Heughaq-anr ‘Ir-awq’ laer aer ngae, aqyawf ir-awr, khoerghaq-anr ‘Lar-awq’ laer kur nar-aq, aqyawf lar-eu mae. ‘Nawr heujeq mr-awq’ laer ngaq-euq kuirlaf zaqkhav-anr aernaeq ngae, aqyawf mr-eu mae.”

⁹ Yeqsur dawq khoerdawq-anr yagaq ngae zanqler-awr, aqyawf-euq maeqnan cantae luf-eu tsawrhaq armaf mafma jawr-eu paw ciqpyawr-awr aer-eu, “Ngar, nawmaf-anr aernaeq nyar, Irsaqleqlav-euq lafkhoer khawf heunav nav-aer jan-eu tsawrhaq ngar maq mawrhaw-aq siq.”

¹⁰ Dawqtsaf tsafle-euq khoerdeuq, yardzoeq guirhuq-euq irkanr ghofkeuv-ir ngae, kuirlaf zaqkhav khoerghaq taqler-awr jawr-eu gar ya’mawr-euq mae.

Miqcoeq Miqma-euq Zaq Bi Ghofdaef Lar-eu

¹¹ Nishawq ngae nan, Yeqsur, Naqirnav laer kur-eu meuq tiq meuq-anr le-euq mae. Aqyawf-euq zaqlanr hawr-eu tsawrhaq ghawqmya’ni khawf aqyawf naeq-aer le-euq mae.

¹² Meuq-euq lanrkhaeq-anr lekeuv ngae, aqcawq shir-euq tsawrhaq tiq ghaq-anr baf-awr oedov luf-eu mae. Khoerghaq-euq aqma-aq, miqcoeq miqma pyeuf-awr, aqyawf, zaqyo khoer tiq ghaq jawr-eu taef mae. Meuq-anr jawr-eu tsawrhaq ghawqmya’ni miqcoeq miqma khoerghaq naeq-aer oeluf-eu mae.

¹³ Sanqpaq Yeqsur, miqcoeq miqma khoerghaq-anr ya’mawr ngae, aqyawf-anr ghawqshaq hawgaq-awr, “Taqngoer” laer aernaeq-euq mae.

¹⁴ Yeqsur dawqpae le-awr, aqlaf seuvyof-anr bafdav ngae, bafluf-eu tsawrhaq deuq naqler-awr, Yeqsur aer-eu, “Zaqguqzaq-or! Turlar-awq laer ngar, nawq-anr dawq bif-eu ma.”

¹⁵ Khoerngae, shir-euq khoerghaq turnuir lar-awr, dawq khawf ngaeq-eu mae. Khoernar-aq, Yeqsur, zaqyo aqli khoerghaq, aqyawf-euq aqma-anr a’khof naeq-euq mae.

¹⁶ Tsawrhaq dawqtawvluf zanq duidui ler-awr, Miqyaer-anr ciqhuiq ciqmanr-eu lafkhoer aer-eu, “Aqdui-euq lafkhoer, Miqyaer gharduq ngaeqdan-eu yawhuiq ghaq dovlar-euq ngar-a.” Khoeruqtaf, “Miqyaer, aqyawf-euq tsawrhaq-anr hawle-euq ngar-a” laer khawf aer-eu mae.

¹⁷ Yeqsur nae mr-euq garkawv khoer Yurdav mirkhanq hawr-eu jawqlaw jawrlawr gaqdoe-ir-euq mae.

Yorhaq-euq Zaqlanr, Yeqsur-anr Narhaq-ir-euq

¹⁸ Khoerngae, Yorhaq-euq zaqlanr deuq garkawv khoer dawqtawvluf, Yorhaq-anr aergaq naeqler-euq mae.

¹⁹ Yorhaq, aqyawf-euq zaqlanr nyiq ghaq-anr kur-awr, Sanqpaq Yeqsur-anr heulof-aer bi narhaq-ir-euq mae. “Oe taef-a laer aer-eu khoerghaq, nawr ma lor? Maqngeur nar-aq, nga’maf yawqghaq yawq-anr parya dawq-a siq laq?”

²⁰ Aqyawfnyaf, Yeqsur jawr-eu gar oekeuv ngae aernaeq-eu, “Bartirsaq mrnaeq-eu Yorhaq, nga’nyaf-anr khaerlef-awr, nawq-anr heulof-aer bi narhaq le-euq mae, ‘Oe taef-a laer aer-eu khoerghaq, nawr ma lor? Maqngeur nar-aq, nga’maf yawqghaq yawq-anr parya dawq-a siq laq?’ ”

²¹ Aryamq khoeryamq-euq lafkhoer, Yeqsur-aq, nargawr ghawqmya jeq bi taqler luf-awr shaqzanq ghawqmya jeq-anr lavsav luf-euq uqtaf, naef yawjawf ur-eu gar taedovnaeq luf-awr myavbaef ghawqmya ghaq-anr khawf myavnuiv bi mawrnyalar luf-eu mae.

²² Yeqsur, aqyawf nyaf-anr heulof-aer aerkhof naeq-euq mae, “Nawnyaf ghofler-awr, yagaq-awr ya’mawr-euq deuq, Yorhaq-anr dzawrnaeq ler-awq. Myavbaef mawrnyalar, kuircawv cannyalar, coiqdoi nar-eu tsawrhaq shawrlar, naqbawq deuq gaqnyalar, shir-euq tsawrhaq ghofdaef lar-awr, irshaqzaq deuq guiqlanqdawq yagaq-euq mae.

²³ Ngaq-euq baqda’nae sanqtif maqtif-eu tsawrhaq-aq, guiqlanqhuiq taef-a.”

²⁴ Yorhaq nae khaerlef-euq tsawrhaq ghofler dzeur-euq nar-aq, Yeqsur, Yorhaq-euq garkawv tsawrhaq armaf mafma deuq-anr heulof-aer aernaeq-euq mae: “Nawmaf bawrtsanq bawrdanr-anr ir-awr aqjeq-anr haw-eu laer ir-euq le? Jaqlaer baw-eu mirnae nyaeluf-eu artof-euq arkanq-anr laq?

²⁵ Aqdir aernar-aq, nawmaf aqjeq-anr haw-ir-eu laer dov-ir-euq le? Jurgafni ghae-eu maeqtsoeq dmluf-eu tsawrhaq-anr haw-ir-euq le lor? Hawsher-eq, jurgafni ghae-eu maeqtsoeq dmdm-aer, dzarkuir dzarmyaer dzaqdzaq-aer sarsuqni daef-eu tsawrhaq-aq, sanqpaq yawhuiq ghaq-euq nymr-anr jawr-eu mae.

²⁶ Maqngeur nar-aq, nawmaf dov-ir-awr, aqjeq-anr haw-ir-euq le? Miqyaer gharduq ngaeqdan-eu tsawrhaq-anr laq? Ngeur mae. Ngar, nawmaf-anr aernaeq nyar. Aqyawf-aq, Miqyaer gharduq ngaeqdan-eu tsawrhaq deuq navmaqtser huiqdzaeq-eu mae.

²⁷ Aqyawf-aq, Yaerbof-euq lafkhoer heulof-aer bofkeuv taq-euq khoerghaq mae, ‘Hawde-eq. Ngar, ngaq-euq ghaqzaq ghaqkhaer-anr nawq-euq maeqhu bi’ir-awr, Nawq-euq maeqshi garma bi shardanr-ir ma.’ (Mlk 3:1)

²⁸ Ngar, nawmaf-anr aernaeq nyar. Zaqmiq aqbur-anr nae khar daefle-euq tsawrhaq-euq lafkhoer, Yorhaq taf-aer huiqdzaeq-eu Miqyaer gharduq ngaeqdan-eu tsawrhaq tiqghaq-iq maqjawr-a. Aerkhawf, Miqyaer uvlanr-eu jeq-euq lafkhoer nyirdzaeq-eu ghaq khawf, Yorhaq navmaqtser huiqdzaeq-eu mae.”

²⁹ Yorhaq nae bartirsaq bi mrnaeq-euq tsawrhaq deuq hawr-eu jeq taf-eu tsawrhaq dawqtawv luf-aq, dawq khoerdawq-anr yagaq ngae, Miqyaer-aq, tsaq-awr dawr-eu mae laer aer-eu mae.

³⁰ Aerkhawf, Paqliqsaer deuq hawr-eu zanrdawq siqzaq deuq-aq, Yorhaq nae bartirsaq maqbi mrnaeq-aer, Miqyaer nae aqyawf maf-euq gharduq lavsav taq-euq gar maq hageuf-aq.

³¹ Sanqpaq Yeqsur heulof-aer par aernaeq-euq mae: “Ngar heuzir-euq tsawrhaq, aqgeu jeq-anr ciqcaev-eu paq nga? Aqyawfmaf aqjeq-anr dur-eu la?

³² Aqyawf maf-aq, zaqdeuq, laev-anr nuir-awr, tiqghaq tirghaq heulof-aer gurcawq luf-eu gar dur-eu mae, ‘Nga’maf, nawmaf-euq gharduq lafjeq baw-eu khawf, nawmaf lafjeq maqtsawq-a. Nga’maf, nawmaf-euq gharduq tsawrngoer ngoer-eu khawf, nawmaf maqngoer-a.’

³³ Bartirsaq mrnaeq-eu Yorhaq oe ngae, kaqmur maqdzaq, aqgaf dzaruir maqdawr-eu mirnae, nawmaf, ‘Aqyawf-aq, naef ur-eu tsawrhaq nga’ laer nawmaf aer-eu mae.

³⁴ Tsawrhaq-euq Zaqyo oe ngae, dzaq khawf dzaq, dawr khawf dawr-eu mirnae, ‘Tsawrhaq heughaq-aq, ardzaeq-aer dzaqdzeur dawrdzeur-eu tsawrhaq pyeuf-eu uqtaf, jeq taf-eu tsawrhaq hawr-eu iqbaxzaq-euq cawq nga’ laer nawmaf aer-eu mae.

³⁵ Aerkhawf, zaqsiq tsawrganr-aq, dawr-awr tsaq-eu ngar-a laer, aqyawf-euq zaq dawqtawvluf mrdov laf-eu gar nae siqlar taef-a.”

Yeqsur, Sirmoq-euq Nymr-anr Hawq Dzaq-ir-euq

³⁶ Paqliqsaer tiq ghaq, Yeqsur-anr kur-awr aqyawf naeq-aer hawq bi dzaqtaf le-euq mae. Khoermirnae, Yeqsur, Paqliqsaer khoerghaq-euq irkanr ir-awr hawqjawq jawqluf-eu mae.

³⁷ Meuq khoermeuq-euq lafkhoer zaqmiq aqbur tiq ghaq jawr-eu mae. Aqyawf-aq, iqbaxzaq tiq ghaq mae. Yeqsur, Paqliqsaer-euq irkanr hawq dzaqluf-eu mae laer yasiq ngae, tsir yawsaw danq-eu martsaf tsafpyur ciqlaf-awr,

³⁸ Yeqsur-euq narkhan paw aqkuir-euq dawqpae yawf-awr ngoerluf-eu mae. Myavbir, Yeqsur-euq aqkuir-anr dzavaq-awr, aqyawf-euq uqduq-euq tsaerkanr nae sivgui naeq-euq mae. Khoernar-aq, Yeqsur-euq aqkuir-anr maeqsaw sawsaw-aer, yawsaw jeq laefnaeq-euq mae.

³⁹ Khoerngae, Yeqsur-anr kur-euq Paqliqsaer khoerghaq khoer-anr ya’mawr ngae, nuima-euq lafkhoer noeq-eu, “Tsawrhaq heughaq, Miqyaer gharduq ngaeqdan-eu tsawrhaq ngeur-eu law nar-aq, aqyawf-anr toeqciv luf-eu aqsur ghaq la? Aqjox-aer ghae-eu zaqmiq aqbur tiq ghaq la laer khawf siqnya taef-a. Teughaq-aq, iqbaxzaq tiq ghaq beu nae.”

⁴⁰ Khoerngae, Yeqsur, aqyawf-anr aernaeq-eu, “Sirmoq-or! Ngar, nawq-anr tiq dawq aernaeqmawf nya.” Sirmoq aer-eu, “Saqlaq-or! Aer-awq.”

⁴¹ Yeqsur heulof-aer aernaeq-euq mae, “Pyur parnaeq-eu ghaq-anr dzirdzov dav-eu nyiq ghaq jawr-eu mae. Tiq ghaq-aq, 500 byav dav-awr, tiq ghaq-aq, 50 byav dav-eu mae.

⁴² Aqyawfnyaf tiqjeq-iq tsoeqkhof naeq-eu maqjav-eu mirnae, pyur parnaeq-euq ghaq ghawqshaq gaq-eu lafkhoer, aqyawf nyaf-anr dzirdzov maqbi tsoeqkhof-aq. Heu nyiq ghaq-anr nae, aqgeu ghaq aqyawf-anr gaqdzaeq-eu jeq nya?”

⁴³ Khoerngae, Sirmoq aerkhof naeq-eu, “Dzirdzov davdzaeq-eu ghaq gaqdzaeq taef-a laer ngar noeq mir-a.” Yeqsur aer-eu, “Nawr dar-eu tsaq mae.”

⁴⁴ Khoernar-aq, Yeqsur, zaqmiq aqbur khoerghaq jawr-eu paw ciqpyawr-awr, Sirmoq-anr heulof-aer aernaeq-euq mae, “Nawr, zaqmiq aqbur heughaq-anr mawrluf ma laq? Ngar, nawq-euq irkanr urlar ngae, ngar, aqkuir dzuif-eu gharduq nawr ircuf maq ciqnaeq laf-aq. Aerkhawf, zaqmiq aqbur heughaq-euq myavbir, ngaq-euq aqkuir-anr bi dzavdav-awr, uqduq-euq tsaerkanr nae sivgui naeqlaf-euq mae.

⁴⁵ Nawr, ngaq-anr maeqsaw maqsaw-aq. Aerkhawf, zaqmiq aqbur heughaq-aq, ngar urlar ngae nae nymq-mr keuvni, ngaq-euq aqkuir-anr maeqsaw sawluf-eu mae.

⁴⁶ Nawr, ngaq-euq uqduq-anr tsir maq laefnaeq laf-aq. Aerkhawf, zaqmiq aqbur heughaq-aq, ngaq-euq aqkuir-anr tsir yawsaw laef naeqlaf-euq mae.

⁴⁷ Khoermirnae, ngar, nawq-anr aernaeq nyar, Aqyawf-euq iqbax ghawqmya’ni bi pyaeqnaeq-euq mirnae, aqyawf-euq gaq-eu jeq khawf myaq-eu mae. Aerkhawf, iqbax uicuiv taef-aer bi pyaeqnaeq-euq tsawrhaq-aq, aqyawf-euq gaq-eu jeq khawf yawcuiv mae.”

⁴⁸ Khoernar-aq, zaqmiq aqbur khoerghaq-anr aernaeq-eu, “Nawq-euq iqbax pyaeqnaeq ghaq-euq ma.”

⁴⁹ Khoerngae, aqyawf naeq-aer hawqjawq jawqluf-eu deuq, aqyawf maf-euq yawkaq aer-eu, “Tsawrhaq-euq iqbax pyaeqnya paq-aer, tsawrhaq heughaq aqsur ghaq la?”

⁵⁰ Khoernar-aq, Yeqsur, zaqmiq aqbur khoerghaq-anr aernaeq-eu, “Nawr jan-eu jeq, nawq-anr bibuq-ir-euq mae. Nuisar of-eu lafkhoer ghof-ir-awq.”