Luˇkaꞈ 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Landaw Jawrnan-euq Yawsanr

¹ Khoernar-aq, heulof-aer pyeuflar-euq mae. Nyiq jaw tiqjaw-euq landaw jawrnan-anr, Yeqsur caeryar-anr canpav luf-eu mae. Aqyawf-euq zaqlanr deuq caernmr tseuv-awr, aqlaf nae caerpyur laeqdov laeqdov-aer dzaq-eu mae.

² Khoerngae, Paqliqsaer tiqpavnav deuq, aqyawf maf-anr aernaeq-eu, “Aqjeq mirnae nawmaf landaw jawrnan ngae nan-anr maq janrkhmq-eu jeq janr-eu le?”

³ Khoerngae, Yeqsur, aqyawf maf-anr heulof-aer aernaeq-euq mae, “Daqbir hawr-eu aqyawf naeq-aer jawr-eu deuq hawq maeflar ngae aqjox-aer janr-euq gar, nawmaf maq guihaw-aq lor?

⁴ Aqyawf, Miqyaer-euq nymr-anr urler-awr, pirma deuq maqngeur nar-aq nuideuq maq dzaqkhmq-eu lawrdzar kaqmur yurdzaq-awr, aqyawf-euq maeqnan cantae-eu deuq-anr khawf bidzaq-euq garkawv maq guihaw-aq laq?”

⁵ Khoernar-aq, aqyawf, aqyawf maf-anr par aernaeq-eu, “Tsawrhaq-euq Zaqyo-aq, landaw jawrnan-euq Yawsanr ma.”

Lafshir Shir-eu Bi Taqler-euq

⁶ Yawqjaw yawq-euq landaw jawrnan-anr, Yeqsur, zanrdawq khawqnymr-euq lafkhoer urler-awr maeqnaeq tsovnaeq-euq mae. Khoerngae, khoergar, armar laf lafshir shir-eu zaqyo aqli tiq ghaq jawr-eu mae.

⁷ Zanr maeq-eu deuq hawr-eu Paqliqsaer deuq, Yeqsur-euq yawlaeq pov-awr daqler nya’ni, aqyawf, landaw jawrnan ngae nan nargawr lavtaq naeq-eu nga lor laer hawtsov taq-euq mae.

⁸ Yeqsur, aqyawf maf-euq nuinoeq-anr siqnya-awr, lafshir shir-eu khoerghaq-anr aernaeq-eu, “Tur-awr heugar yawf-awq.” Khoerngae, khoerghaq turlar-awr yawf-euq mae.

⁹ Khoerngae, Yeqsur, aqyawf maf-anr heulof-aer aernaeq-euq mae, “Ngar, nawmaf-anr narhaq nyar, landaw jawrnan ngae nan yawmuiq jeq mr-eu, maqngeur nar-aq, yawdoer jeq mr-eu, daefzir-anr bibuq-ir-eu, maqngeur nar-aq, daefzir-anr lavcawv-eu, aqgeu jeq mrkhmq-eu la?”

¹⁰ Yeqsur, tsawrhaq dawqtawv luf-anr tiqjawq hawdoe-awr khoerghaq-anr aernaeq-eu, “Nawq-euq aqlaf cawqja-awq.” Aqyawf, aqlaf cawqja ngae, aqlaf yawqlafyawq lof-aer muiqkhof lar-euq mae.

¹¹ Aqyawfmaf nuima paer duidui lar-awr, aqyawfmaf, Yeqsur-anr aqjox-aer janrnaeq-eu paq nga laer aqyawf maf-euq yawkaq bawqdzaq-eu mae.

Ghaqkhaer 12 Ghaq Tserdov-euq

¹² Khoerngae, heulof-aer pyeuflar-euq mae. Yeqsur dov-ir-awr, gawqjawq-anr davler-awr nae guiqlanq sharler-euq mae. Uqcif mirlan-aer Miqyaer-anr guiqlanq shar-euq mae.

¹³ Uqbya byalar ngae, aqyawf, zaqlanr deuq-anr kurlaf-awr, aqyawf, aqyawf maf-euq lafkhoer nae 12 ghaq tserdov-awr, aqyawf maf-anr ghaqkhaer laer kurnaeq-euq-aq heudeuq mae:

¹⁴ Beqtuvluv laer Yeqsur nae myanrnaeq-euq Sirmoq, aqyawf-euq maernmr Aqdaeqlaeq, Yaqkov hawr-eu Yorhaq, Pirlirpuv hawr-eu Baqtawrlaqmaer,

¹⁵ Maqtaeq hawr-eu Tormav, Aqlaqpaer-euq zaqyo Yaqkov hawr-eu Zeqlur laer kur-eu Sirmoq,

¹⁶ Yaqkov-euq zaqyo Yurdav hawr-eu Sanqpaq Yeqsur-anr anqdzaq-euq Yurdav Irsaqgaqliqoq.

Yeqsur Nargawr Bi Taqler-euq

¹⁷ Yeqsur, aqyawfmaf naeq-aer gawqjawq-anr nae oeka ngae, Yurdav mirkhanq hawr-eu Yeqlursaqlaeq doeni, iqmalavshav-euq lawrdae-anr jav-eu Durlu hawr-eu Sirdoq-anr nae lar-euq tsawrhaq deuq, aqyawf-euq zaqlanr baqmaf hawr-eu aqyawf dawqmaeq maeq-eu gar narhaq-eu uqtaf, aqyawf maf-euq nargawr deuq bi lavtaq-eu laer uiqlar taq-euq tsawrhaq armaf mafma deuq khawf yawfluf-eu mae.

¹⁸ Naef yawjawf deuq nae bikhaeq bikhav-euq tsawrhaq deuq khawf taqler-euq mae.

¹⁹ Tsawrhaq armaf dawqtawvluf, aqyawf-anr ya toeqcivni laejae-eu mae. Aqjeq mirnae aernar-aq, aqyawf-euq lafkhoer nae baoq dovle-awr aqyawfmaf dawqtawv luf-anr bi taqler-euq mae.

Guiqlanq Huiq-eu Tsawrhaq

²⁰ Khoernar-aq, Yeqsur, aqyawf-euq myavnuiv zaqlanr deuq-anr hawhaw-aer heulof-aer aer-eu mae: “Nawmaf irshaq shaq-eu tsawrhaq deuq-aq, guiqlanq huiq-eu mae. Aqjeq mirnae aernar-aq, Miqyaer uvlanr-eu jeq nawmaf-anr of-eu mae.

²¹ “Nymq-mr nawmaf maef-awr shuf-eu tsawrhaq deuq-aq, guiqlanq huiq-eu mae. Aqjeq mirnae aernar-aq, nawmaf yadzaq ya dawrdaev taef-a. Nymq-mr tsawrngoer ngoerluf-eu nawmaf-aq, guiqlanq huiq-eu mae. Aqjeq mirnae aernar-aq, nawmaf ya’uir taef-a.

²² “Tsawrhaq-euq Zaqyo-euq baqda’nae aqcawq, nawmaf-anr byae-awr nawmaf-anr sawxdzae naeqlaf-eu uqtaf, nawmaf-anr yaeqbawq saerlu-aer aerlar-awr, nawmaf-euq tsawrmyanr-anr yawdoer laer sawxdzae naeflaf ngae, nawmaf guiqlanqhuiq taef-a.

²³ “Khoerngae nan-anr, nawmaf tsawqtsawq-aer laqkhaq caer-awq. Aqjeq mirnae aernar-aq, mq-euq khoertav nawmaf-euq mrpoeq lafsawq huiq duidui-eu mae. Aqyawf maf-euq aqpoeq deuq khawf, Miqyaer gharduq ngaeqdan-eu tsawrhaq-anr khoerlof-aer janrnaeq-euq mae.

Ghawqshar Shaq-aer Yaghae-eu Tsawrhaq

²⁴ “Aerkhawf, nawmaf smrmuiq smrbaw deuq-aq, ghawqshar shaq-aer ya ghaesaef taef-a. Aqjeq mirnae aernar-aq, nawmaf yawsar zadzeur-euq mae.

²⁵ “Nawmaf dzaqdaev dawrdaev luf-eu tsawrhaq deuq-aq, ghawqshar shaq-aer ya ghaesaef taef-a. Aqjeq mirnae aernar-aq, nawmaf ya’maef yashuf taef-a. Nymq-mr nawmaf uirluf-eu tsawrhaq deuq-aq, ghawqshar shaq-aer ya ghaesaef taef-a. Aqjeq mirnae aernar-aq, nawmaf tsawrngoer ngoer-awr, yawkhav-aer ya’ngoer taef-a.

²⁶ “Tsawrhaq dawqtawvluf nawmaf-anr jaceuqlar ngae, nawmaf ghawqshar shaq-aer ya ghaesaef taef-a. Aqjeq mirnae aernar-aq, aqyawf maf-euq aqpoeq deuq khawf, Miqyaer gharduq ngaeqdan-eu jaqmyawf deuq-anr khoerlof-aer jaceuq-euq mae.

Muirlar-eu Tsawrhaq-anr Gaq-awq

²⁷ “Aerkhawf, nawmaf narhaq luf-eu deuq-anr ngar aernaeq nyar, nawmaf-anr muir-eu deuq-anr gaq-awr, nawmaf-anr byae-eu deuq-anr yawmuiq jeq janrnaeq-awq.

²⁸ Nawmaf-anr yaqkhaer yaq-eu deuq-anr dawq ngaeqghae naeq-awr, nawmaf-anr yaeqbawq saerlu-aer janrlar-eu deuq-euq gharduq guiqlanq shar-awq.

²⁹ Aqcawq, nawq-euq baqba tiq pyawq-anr taevlar nar-aq, yawqpyawqyawq khawf ciqdaq naeq-awq. Aqcawq, nawq-euq paerkhanq lafnyir kanr yurgeuflar nar-aq, lafkhoer kanr khawf bifnaeq-awq.

³⁰ Nawq-anr kharshar-eu tsawrhaq-anr bif-awr, aqcawq, nawq-euq myawq yurgeuf-euq nar-aq, taqpar sharkhof.

³¹ Aqcawq nae nawmaf-anr bi janrnaeq mawf-eu lof-aer, nawmaf khawf aqcawq-anr khoerlof-aer janrnaeq-awq.

³² “Aerkhawf, nawmaf, nawmaf-anr gaq-eu tsawrhaq-anr taef-aer gaq nar-aq, aqjeq guiqlanq za-eu? Iqbaxzaq deuq khawf aqyawf maf-anr gaq-eu tsawrhaq-anr gaqluf-eu mae.

³³ Nawmaf, nawmaf-anr yawmuiq jeq janrnaeq laf-eu tsawrhaq-anr taef-aer nawmaf yawmuiq jeq janrkhofnaeq nar-aq, aqjeq guiqlanq za-eu? Iqbaxzaq deuq khawf khoerlof-aer janrluf-eu mae.

³⁴ Nawmaf bifkhoflaf nya taef-a laer noeq-eu deuq-anr taef-aer nawmaf ngaqnaeq parnaeq nar-aq, aqjeq guiqlanq za-eu? Iqbaxzaq deuq khawf aqyawfmaf nae ngaqnaeq parnaeq-euq myavni zakhof taef-a laer noeqtmq-awr, iqbaxzaq deuq-anr ngaqnaeq parnaeq luf-eu mae.

³⁵ Nawmaf-aq, nawmaf-anr muir-eu deuq-anr gaq-awr, yawmuiq jeq janrnaeq-awq. Bifkhof laf-eu gar maq noeqtmqni aqcawq-anr ngaqnaeq-awq. Khoerlof-aer janr nar-aq, nawmaf-euq mrpoeq lafsawq ghawqmya’ni jav-awr, nawmaf, Gor duidui-eu ghaq-euq zaqyo pyeuflar taef-a. Aqjeq mirnae aernar-aq, aqyawf-aq, guiqlanq-anr maq noeqmawr nya-eu tsawrhaq hawr-eu tsawrdoer deuq-anr khawf ghawqshaq gaqnaeq-eu mae.

³⁶ Nawmaf-euq Aqda ghawqshaq gaqnya-eu lof-aer nawmaf khawf ghawqshaq gaq-eu nuima anr-awq.

Aqcawq-anr Yarkhaq Taqdar

³⁷ “Nawmaf, aqcawq-anr yarkhaq taqdar. Maqdar nar-aq, aqcawq khawf nawmaf-anr yarkhaq maq darlar-ar. Nawmaf, aqcawq-anr dartsaev-eu taqtaeq. Maq dartsaev nar-aq, aqcawq khawf dartsaev lar-eu maqkawr-ar. Nawmaf, aqcawq mrlaeq naeqlaf-euq iqbax-anr pyaeqnaeq-awq. Pyaeqnaeq nar-aq, aqcawq khawf pyaeqnaeqlaf taef-a.

³⁸ Nawmaf, aqcawq-anr bif-awq. Bif nar-aq, aqcawq khawf nawmaf-anr bifnaeqlaf taef-a. Khoeruqtaf, huiqdzaeq-eu khavpuq-anr nae daeqteur daeqteur-aer, ngawqteur ngawqteur-aer, byankhar-ir gar keuvni nawmaf-euq bawrkhanr-anr shaevanr naeqlaf taef-a. Aqjeq mirnae aernar-aq, nawmaf, aqcawq-anr paeqnaeq savnaeq-euq lof-aer, aqcawq khawf, nawmaf-anr paeqkhof savkhof naeqlaf taef-a.”

³⁹ Khoeruqtaf, Yeqsur, aqyawf maf-anr yawjeq majeq dawq-anr nae heulof-aer par maeqnaeq-euq mae: “Myavbaef cawqcawq myavbaef, garma sheuqmaeq naeqnya taef-a lor? Nyiq ghaqluf duqkhanq-anr ga’anr-ir-eu maqngeur-a laq?

⁴⁰ Zaqlanr-aq, saqlaq taf-aer maq huiqdzaeqler nya-a. Aerkhawf, yawmuiq-aer bi maeqbym-euq aqsur ghaq maqkaq, yawqha-euq saqlaq lof-aer pyeuflarnya taef-a.

⁴¹ “Aqjeq mirnae, nawq-euq myavnuiv-euq lafkhoer, pyaqdmq anr-eu gar maq sharsawx-aer, nawq-euq aqyuif aqnyir-euq myavnuiv-euq lafkhoer anr-eu myavpawf-anr hawluf-eu le?

⁴² Nawr, yawqha-euq myavnuiv-euq lafkhoer pyaqdmq anrluf-eu khawf, maq hawmawrni, aqjeq mirnae nawq-euq aqyuif aqnyir-anr, ‘Maernmr-or, ngar, nawq-euq myavnuiv-euq lafkhoer anr-eu myavpawf paevdovnaeq nyar’ laer aernya-eu le? Yawmuiq janrgeuf-eu tsawrhaq-or! Nawq-euq myavnuiv-anr anr-eu pyaqdmq jeqhu ngawqdov-awq. Khoernar-aq, nawq-euq aqyuif aqnyir-euq myavnuiv-euq lafkhoer anr-eu myavpawf aqjox-aer ya paevdov-eu nga laer nawq-anr mawrduqlar taef-a.

Arbawr Hawr-eu Arsiq

⁴³ “Arbawr yawmuiq-anr arsiq yawdoer maq siqle nya-aer, arbawr yawdoer-anr khawf arsiq yawmuiq maq siqle nya-a.

⁴⁴ Arsiq-anr haw nar-aq, arbawr yawqbawr navluf-anr siqnya taef-a. Tsawrhaqzaq-aq, aqgan arbawr-anr siqguq arsiq maqya pyavhaw-ar. Aqgan bawduv-anr khawf aqgaf arsiq maqya pyavhaw-ar.

⁴⁵ Tsawrhaq yawmuiq deuq-aq, aqyawf-euq nuima-euq lafkhoer, myawqganq yawmuiq shardawv taq-euq gar nae, yawmuiq jeq yurdov laf-eu mae. Tsawrhaq yawdoer deuq-aq, aqyawf-euq nuima-euq lafkhoer myawqganq yawdoer shardawv taq-euq gar nae, yawdoer jeq ngaeqdov laf-eu mae. Aqjeq mirnae aernar-aq, nuima-euq lafkhoer khardawvbyan taq-euq jeq, khaqmae-anr ngaeqdov laf-eu mae.

Nymr Tsov-eu Nyiq Jeq

⁴⁶ “Nawmaf, ngaq-anr ‘Sanqpaq-or! Sanqpaq-or’ laer kur-eu gar nae, aqjeq mirnae ngaq nae aertaq-euq lof-aer maqmr-eu le?

⁴⁷ Ngar jawr-eu gar lar-awr, ngar maeq-eu dawq gaq-awr kharmr-ir-eu tsawrhaq-aq, aqyawf aqjox-aer ghae-eu tsawrhaq-anr dur-eu nga laer ngar, nawmaf-anr aernaeq nyar.

⁴⁸ Aqyawf-aq, nymr tsov ngae, duqkhanq yawnaf naf-aer khanq-awr, khaqlo-euq khoertav zeurdanr danr-eu tsawrhaq-anr dur-eu mae. Ircuf huiqle-awr, irghaq khav-eu irkhawr, nymr khoernymr-anr ciqtanq ciqtuv khawf, khaqlo-euq khoertav zeurdanr danrtaq-euq mirnae, maqluv maqlav lar-a.

⁴⁹ Aerkhawf, ngar maeq-eu dawq gaq-awr, maqmr-ir-eu tsawrhaq-aq, zeurdanr maqdanrni, mirtsaq-euq khoertav taef-aer nymr tsov-eu tsawrhaq-anr dur-eu mae. Ircuf irkhawr, nymr khoernymr-anr ciqtanq ciqtuvle ngae, tiqpov taef-aer coqdzae ghae-awr, coqpyav coqshav jir-eu mae.”