Luˇkaꞈ 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kurbae Bae-euq Zaqlanr Deuq

¹ Yeqsur, Geqneqsaqlaer lan landzer yawfluf ngae, tsawrhaq armaf mafma, Miqyaer-euq dawq narhaq-eu laer aqyawf jawr-eu gar tan’urlef luf-eu mae.

² Lan landzer lawq nyiq lawq jav-eu gar aqyawf ya’mawr-euq mae. Ngaqshaq nyaef-eu deuq-aq, lawq-anr nae dov-ir-awr za lavbu luf-eu mae.

³ Lawq khoer nyiq lawq-anr nae tiq lawq-aq, Sirmoq-euq lawq mae. Yeqsur, Sirmoq-euq lawq-anr urler-awr, lan landzer-anr nae lan-euq lafkhoer uicuiv jivur ghaeni shar-euq mae. Khoernar-aq, lawq-euq lafkhoer nuir-awr nae tsawrhaq armaf mafma deuq-anr maeqnaeq tsovnaeq-euq mae.

⁴ Aqyawf dawq ngaeqghaq-awr, Sirmoq-anr aernaeq-eu, “Lawq, ircuf yawnaf-anr jivur ghae-awr, ngaqshaq milarni za dzae-awq.”

⁵ Khoerngae, Sirmoq, aqyawf-anr aerkhof naeq-eu, “Sanqpaq-or! Nga’maf uqcif mirlanni dzae-euq khawf tiqmawr-iq maq dzaemi-aq. Aerkhawf, ngar, nawq-euq dawq narhaq-awr za dzae ma.”

⁶ Aqyawfmaf za dzae’anrghae ngae, ngaqshaq ghawqmya’ni paflar-euq mirnae, za pyaq-ir luf-eu mae.

⁷ Khoermirnae, bi cawba le-eu gharduq, lawq yawqlawq yawq-anr ur-eu za dzaecawq deuq-anr lafdzawr dzawrnaeq-euq mae. Aqyawfmaf oe-awr lawq nyiq lawq luf-anr ngaqshaq nyaefanrbyan taq-euq mirnae, lawq ga’nuif-ir paq-aer pyeuflar taq-euq mae.

⁸ Sirmoq Beqtuvluv khoer-anr ya’mawr ngae, Yeqsur-euq aqkuir pawqtsuif-euq dawqpae awbyav ghae-awr aer-eu, “Sanqpaq-or! Ngar jawr-eu gar nae dov-ir-awq. Aqjeq mirnae aernar-aq, ngar-aq, iqbaxzaq tiq ghaq ma.”

⁹ Ngaqshaq khoermyav myav-aer dzaemi-euq mirnae, Sirmoq hawr-eu aqyawf naeq-aer kharjawr-eu deuq zanq duidui ler-euq mae.

¹⁰ Aqyawf-euq za dzaecawq Zeqbeqdaer-euq zaqyo Yaqkov hawr-eu Yorhaq khawf zanq duidui ler-euq mae. Yeqsur, Sirmoq-anr aernaeq-eu, “Taqguv! Iqnan tafnar-aq, nawr, tsawrhaq-anr pov-eu tsawrhaq pyeuflar taef-a.”

¹¹ Aqyawfmaf, lawq nyiq lawqluf lan landzer gheutaq yaf-awr, yawqjeq navluf byaerdzae yaf-awr nae, Yeqsur-euq maeqnan cantae ghae-euq mae.

Yeqsur, Coiqdoi Bi Shawrlar-euq

¹² Tiqpov, Yeqsur, meuq tiq meuq-anr jawrluf ngae, khoergar mawrdo dolan-aer coiqdoi nar-eu tiq ghaq, aqyawf-anr mawr-awr, aqyawf-euq myavpyawq mirtsa awbyav taq-awr Yeqsur-anr shar duidui-eu, “Sanqpaq-or! Nawr janrmawf nar-aq, ngar shawrlarni nawr janrnya mae.”

¹³ Khoerngae, Yeqsur, aqlaf cawqja-awr aqyawf-anr toeqciv-awr nae aer-eu, “Ngar janrmawf mir-a. Nawr shawrlar-awq.” Khoerngae, coiqdoi nargawr khoer tiqpov taef-aer byovjir-euq mae.

¹⁴ Khoerngae, Yeqsur, aqyawf-anr tiqghaq-anr-iq taq ja’naeq de-eq laer dawq bif-awr aer-eu, “Le-awr nawq-euq mawrdo pirma nae bi hawler-awr, nawr shawrlar-euq nga laer aqyawfmaf yasiqni Morseq nae dawq biftaq-euq lof-aer lawrnaeq-eu jeq lawrler-awq.”

¹⁵ Aerkhawf, Yeqsur-euq garkawv yawbae navmaqtser par gaqdoe-ir-euq mae. Tsawrhaq ghawqmya’ni aqyawf-euq dawq narhaqni maqaer, aqyawf maf-euq nar-awr gawr-eu jeq aqyawf nae bi lavtaqni maqaer uiqlar taq-euq mae.

¹⁶ Aerkhawf, Yeqsur-aq, tiqkhaeq maqtaqni bawrtsanq bawrdanr-anr ir-awr guiqlanq shar-ir-eu mae.

Yeqsur, Kuirshir Lafshir-anr Bi Taqler-euq

¹⁷ Tiqnan, Yeqsur maeqnaeq tsovnaeqluf ngae, Paqliqsaer deuq hawr-eu zanrdawq maeq-eu tsawrhaq deuq gardzer paw nuirluf-eu mae. Aqyawf maf-aq, Yeqlursaqlaeq, Gaqliqlaer mirkhanq hawr-eu Yurdav mirkhanq-euq lafkhoer jav-eu pu dawqtawv luf-anr nae oe-eu mae. Aqyawf-euq lafkhoer, nar-eu tsawrhaq-anr lavtaq nya-eu Sanqpaq Miqyaer-euq baoq anr-eu mae.

¹⁸ Khoerngae, tsawrhaq tiqpavnav deuq kuirshir lafshir shir-eu tiq ghaq-anr yufzar-euq khoertav biyuf-awr baflaf-awr nae, Yeqsur-euq maeqshi bafanr lef-eu laer ghae-euq mae.

¹⁹ Aerkhawf, tsawrhaq ardzaeq-aer myaq-eu mirnae, tiqpaw nae-iq bafur lef-eu garma maqdanr-a. Khoermirnae, nymrmq-anr bafdav lef-awr nymrmq lavpaef-awr nae, khoerghaq-anr yufzar-euq khoertav biyuf-awr, tsawrhaq khoerdeuq-euq ghanrcae, Yeqsur-euq maeqshi pyaeqkaghae lef-euq mae.

²⁰ Yeqsur, aqyawf maf-euq nuijan-anr ya’mawr ngae tsawrhaq khoerghaq-anr aernaeq-eu, “Cawq-or! Nawq-euq iqbax pyaeqnaeq ghaq-euq ma.”

²¹ Khoerngae, zanr maeq-eu deuq hawr-eu Paqliqsaer deuq danqbae-awr jasawx-eu, “Yaeqbawq saerlu-aer ngaeq-eu teughaq aqsur ghaq la? Miqyaer tiq ghaq maqngeur nar-aq, iqbax aqsur ghaq pyaeqnya-eu?”

²² Aqyawfmaf khoerlof-aer noeqluf-eu gar Yeqsur siqnya-awr aqyawf maf-anr heulof-aer aerkhof naeq-euq mae, “Nawmaf aqjeq mirnae nuima-euq lafkhoer sharnoeq sharsawx luf-eu le?

²³ ‘Nawq-euq iqbax pyaeqnaeq ghaq-euq ma,’ maqngeur nar-aq, ‘Nawr tur-awr can’ghae-awq’ laer aernaeq-eu, aqgeu dawq awqdzaeq-eu la?

²⁴ Aerkhawf, Tsawrhaq-euq Zaqyo-aq, mirtsaq-euq khoertav iqbax pyaeqnya-eu aryaq jav-eu ngar-a laer nawmaf-anr bisiq-eu ma.” Khoernar-aq, kuirshir lafshir shir-eu khoerghaq-anr aernaeq-eu, “Ngar, nawq-anr aernaeq nyar, tur-awr nawq-euq yufzar baf-awr irkanr ghof-ir-awq.”

²⁵ Khoerghaq, aqyawf maf-euq maeqshi yawkawr-aer tsawqtur-awr, aqyawf nae yuf-euq khawqdaq baf-awr nae, Miqyaer-anr jaceuq jaceuq-aer irkanr ghof-ir-euq mae.

²⁶ Tsawrhaq armaf mafma dawqtawvluf zanq duidui ler-awr Miqyaer-anr ciqhuiq ciqmanr-eu uqtaf, guv duidui-eu lafkhoer aer-eu, “Iqnan aqduimaf maq mawrhaw-euq jeq-anr ya’mawr-euq ma.”

Yeqsur, Leqbir-anr Kur-euq

²⁷ Garkawv khoer dzeur-euq nar-aq, Yeqsur dov-ir-awr, Leqbir laer kur-eu jeq taf-eu tiq ghaq, jeq tafduq-anr nuirluf-eu gar mawr-awr aqyawf-anr aernaeq-eu, “Ngaq-euq maeqnan cantae lar-awq.”

²⁸ Khoerngae, aqyawf dawqtawv luf-anr byaerdzae yaf-awr tsawqtur-awr nae, Yeqsur-euq maeqnan cantae ghae-euq mae.

²⁹ Leqbir, aqyawf-euq nymr-euq lafkhoer Yeqsur-euq gharduq hawqbyawr byawrma tiq byawr lawr-euq mae. Jeq taf-eu tsawrhaq hawr-eu nuideuq ghawqmya’ni aqyawfmaf naeq-aer jawqluf-eu mae.

³⁰ Khoerngae, aqyawf maf-euq zanr maeq-eu deuq hawr-eu Paqliqsaer deuq-aq, Yeqsur-euq zaqlanr deuq-anr jabu jadoer-eu lafkhoer aer-eu, “Nawmaf aqjeq mirnae jeq taf-eu tsawrhaq hawr-eu iqbaxzaq deuq naeq-aer dzaqtaf dawrtaf-eu le?”

³¹ Yeqsur, aqyawf maf-anr heulof-aer aerkhof naeq-euq mae, “Jawrsar dov-eu tsawrhaq-aq, nargawr lavsav-eu tsawrhaq-anr maqmawf-ar; nar-eu tsawrhaq deuq taef-aer mawf-eu mae.

³² Ngar, tsaq-awr dawr-eu tsawrhaq-anr kur-eu laer oe-euq maqngeur, iqbaxzaq yawqha-euq iqbax noeqpov noeqpar larni oe-euq ma.”

Dzardzaq Sheuq-eu Garkawv

³³ Khoernar-aq, aqyawfmaf, Yeqsur-anr aernaeq-eu, “Yorhaq-euq zaqlanr deuq-aq, tiqkhaeq maqtaqni dzardzaq sheuqsheuq-aer guiqlanq shar-eu mae. Paqliqsaer-euq zaqlanr deuq khawf khoerlof-aer janrluf-eu mae. Aerkhawf, aqjeq mirnae nawq naeq-aer jawrluf-eu deuq-aq, dzaqluf dawrluf-eu la?”

³⁴ Yeqsur, aqyawf maf-anr heulof-aer aernaeq-euq mae, “Yoshuif, aqyawf-euq cawqdeuq naeq-aer jawr ngae, nawmaf, aqyawf maf-anr dzardzaq aqjox-aer bi sheuqnya-eu la?

³⁵ Aerkhawf, aqyawf maf-anr nae yoshuif yabi sheuqghawq ghae-eu arnan keuvle taef-a. Khoerngae nan-anr aqyawfmaf dzardzaq yasheuq-eu mae.”

³⁶ Yeqsur yawjeq majeq tiq kawv parja-awr aqyawf maf-anr heulof-aer aernaeq-euq mae: “Paerkhanq yawshuif caeqpyaq-awr paerkhanq yawcaer-anr paertsanr dof-eu tiqghaq-iq maqjawr-ar. Khoerlof-aer janr nar-aq, paerkhanq yawshuif caeqpyaq-eu uqtaf, caeqpyaq-euq yawshuif khoerpyaeq paerkhanq yawcaer-anr maq gawfler-ar.

³⁷ Shaqkhov irpuq yawoer-anr aqgaf dzaruir yawshuif tiqghaq-iq maq shaevanr-ar. Khoerlof-aer janr nar-aq, aqgaf dzaruir yawshuif khoer shaqkhov irpuq-anr tanqpav ghae-eu mirnae, aqgaf dzaruir yoerdov-awr, shaqkhov irpuq khawf cawv-ir taef-a.

³⁸ Aerkhawf, aqgaf dzaruir yawshuif-aq, shaqkhov irpuq yawshuif-anr shaevanr nar-aq, nyiq jeq luf-anr jeqhmqnya taef-a.

³⁹ Aqgaf dzaruir yawoer dawrghaq-euq naeq-aer aqgaf dzaruir yawshuif dawrmawf-eu tsawrhaq tiqghaq-iq maqjawr-ar. Aqgaf dzaruir, ‘Yawoer-aq, kuirdzaeq mir-a’ laer aqyawf aer taef-a.”