Luˇkaꞈ 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur Murjur Jur-eu Gar Yadaq-euq

¹ Yeqsur-aq, Yawshawr Saflar byan-eu lafkhoer, Yawrdaq lawrbaq-anr nae ghofler ngae, muiq-eu Saflar, aqyawf-anr bawrtsanq bawrdanr-anr sheuqghae-awr,

² naef sanqpaq nae murjur jur-euq gar 40 nan byanni yadaq-euq mae. Khoermyav nan-euq lafkhoer, aqyawf tiqjeq-iq maqdzaq-aq. Arnan khoerdeuq dzeur-euq nar-aq, aqyawf maeflar-euq mae.

³ Khoerngae, naef sanqpaq, aqyawf-anr aernaeq-eu, “Nawr, Miqyaer-euq Zaqyo ngeur nar-aq, khaqlo heusiq-anr kaqmur pyeuflar-awq laer dawq bif-awq lawr.”

⁴ Khoerngae, Yeqsur, aqyawf-anr aerkhof naeq-eu, “ ‘Tsawrhaqzaq-aq, dzaqdzaq dawrdawr-euq baqda’nae taef-aer daefnya-eu maqngeur-a.’ Aerkhawf, ‘Miqyaer-euq khaqmae-anr nae dovle-euq dawq yawqdawq navluf-euq baqda’nae daefnya-eu mae,’ (Dm 8:3) laer, Yaerbof-euq lafkhoer boftaq-euq mae”

⁵ Khoernar-aq, naef sanqpaq, aqyawf-anr gawqjawq yawgor-anr sheuqdav lef-awr, aqyawf-anr tiqkhaeq taef-aer mirtsaq-euq khoertav kharjav-eu mirkhanq dawqtawvluf bimawr-euq mae.

⁶ Khoerngae, naef sanqpaq, aqyawf-anr aernaeq-eu, “Aryaq dawqtawvluf hawr-eu mirkhanq-euq yawshaef khanqsaer dawqtawvluf ngar, nawq-anr bifnaeq ma. Heudeuq dawqtawvluf ngaq-anr bifnaeqlaf jir taq-euq mirnae, ngar bifmawf-eu ghaq-anr bifnya ma.

⁷ Khoermirnae, nawr, ngaq-anr uqduqtanq nar-aq, heudeuq dawqtawvluf nawq-euq bipyeuf ma.”

⁸ Khoerngae, Yeqsur, aqyawf-anr aernaeq-eu, “ ‘Naef Saqdaq-or! Ngaq-euq narkhan paw caev-awq. Nawq-euq Sanqpaq Miqyaer-anr taef-aer uqduq yatanq-awr, aqyawf-euq gar taef-aer ya’mr-eu mae’ (Dm 6:13) laer Yaerbof-euq lafkhoer boftaq-euq mae.”

⁹ Khoernar-aq, naef sanqpaq, aqyawf-anr Yeqlursaqlaeq-anr sheuqghae-awr, uqduq tanqnymr nymrma-euq khaqboeq-anr gordzaeq dzaeq-eu tsanr-anr sheuqdav lef-awr heulof-aer aernaeq-euq mae, “Nawr, Miqyaer-euq Zaqyo ngeur nar-aq, heugar nae tsawqka ghae-awq.

¹⁰ Aqjeq mirnae aernar-aq, Yaerbof-euq lafkhoer heulof-aer boftaq-euq mae, ‘Sanqpaq Miqyaer, aqyawf-euq mqtav ghaqkhaer deuq-anr khaer-awr nawq-anr bi hawpir taef-a.

¹¹ Nawq-euq aqkuir, khaqlo-anr maqya gazawni, aqyawf maf-euq aqlaf nae nawq-anr ciq taef-a.’ ” (Jc 91:11-12)

¹² Yeqsur, aqyawf-anr aerkhof-eu lafkhoer aer-eu, “ ‘Nawq-euq Sanqpaq Miqyaer-anr taq tsermrhaw’ (Dm 6:16) laer boftaq-euq mae.”

¹³ Naef sanqpaq, Yeqsur-anr yawqjeq navluf murjur jurhaw ghaq-euq nar-aq, aqyawf jawr-eu gar nae dov-ir-awr, aryamq tsaqlar-eu gar jawqluf-eu mae.

Yeqsur Gar Mrdanq Bae-euq

¹⁴ Yeqsur-aq, muiq-eu Saflar-euq baoq tiqbyanni anr-eu lafkhoer, Gaqliqlaer mirkhanq-anr ghofler-euq mae. Aqyawf-euq garkawv khoerkaq khoerlanr-anr gaqdoe-ir-euq mae.

¹⁵ Aqyawf, zanrdawq khawqnymr-anr maeqnaeq tsovnaeq ngae, tsawrhaq dawqtawvluf, aqyawf-anr ciqhuiq ciqmanr-eu mae.

Naqzaqlaer Tsawrhaq, Yeqsur-anr Maq Hageuf-a

¹⁶ Yeqsur, aqyawf huiqlar-euq Naqzaqlaer-anr lekeuv ngae, aqyawf yawqjawryawq mrlaf-euq lof-aer, landaw jawrnan ngae nan zanrdawq khawqnymr-anr urler-euq mae. Khoernar-aq, Yaerbof gui-eu laer aqyawf turlar-euq mae.

¹⁷ Khoerngae, aqcawq, aqyawf-anr Miqyaer gharduq ngaeqdan-eu Irsaqyar nae boftaq-euq sanqbof aryov bafnaeq-euq mae. Aqyawf puir-awr pov ngae, heulof-aer boftaq-euq tsanr-anr povmawr-euq mae:

¹⁸ “Sanqpaq Miqyaer-euq muiq-eu Saflar, ngaq-euq khoertav jawrluf-eu mae. Aqjeq mirnae aernar-aq, ngar, irshaqzaq-anr guiqlanqdawq bimaeq-eu gharduq, Aqyawf, ngaq-anr tsaqtsov naeqlaf-euq mae. Nuima nar-eu deuq-anr lavsavtaq naeq-awr, Bi paftawf taq-euq deuq-anr pyaeqnaeq-euq uqtaf, Myavbaef deuq-anr bi mawrnya lar-awr, Khaeq-awr khav-eu gar ya daqluf-eu deuq-anr pyaeqnaeq-eu hawr-eu,

¹⁹ Sanqpaq Miqyaer ghawqshaq gaq-eu arkhof-euq garkawv dawqdzawr mrni, Aqyawf, ngaq-anr khaerghae lef-euq mae.” (Isy 61:1-2)

²⁰ Khoernar-aq, sanqbof khoer laeqyov-awr, hawsav-eu ghaq-anr bifkhof-awr nuir-euq mae. Khoerngae, zanrdawq khawqnymr-anr jawr-eu tsawrhaq dawqtawvluf, aqyawf-anr hawtsov taq-euq mae.

²¹ Yeqsur, aqyawf maf-anr aernaeq-eu, “Nawmaf nae yagaq-euq Yaerbof heudeuv, iqnan byanlar-euq mae.”

²² Khoerngae, tsawrhaq dawqtawvluf, aqyawf-anr jaceuq-eu mae. Aqyawf-euq khaqmae-anr nae dovle-euq guiqlanq yawdzanr-euq dawqdeuq-anr zanqler-awr, aqyawfmaf aer-eu, “Teughaq, Yorsaev-euq zaqyo maqngeur-a lor?”

²³ Khoerngae, Yeqsur, aqyawf maf-anr aernaeq-eu, “ ‘Nargawr lavsav-eu tsawrhaq-or! Nawr, nawq-euq nargawr-anr lavtaq-awq’ laer aer-eu dawqdaq jav-eu lof-aer, nawq nae Gaqbeqneqoq-anr mr-euq gardeuq nga’maf yagaq-euq lof-aer, yawqha-euq jawrkhanq-anr khawf mr-awq lawr’ laer nawmaf, ngaq-anr aerlar taef-a laer ngar siqnya ma.”

²⁴ Yeqsur heulof-aer par aernaeq-euq mae, “Ngar, nawmaf-anr aqdirma-aer aernaeq nyar, Miqyaer gharduq ngaeqdan-eu tsawrhaq tiqghaq-iq yawqha-euq jawrkhanq-anr khanqsaer maqza-a.

²⁵ Ngar, nawmaf-anr aqdirma-aer aernaeq nyar, Erlirya-euq zir-anr smr khof taf tiq pav byanni uqyaer maq yaerle-euq mirnae, mirtsaq doeni maefdui shuf duidui-eu jeq keuvle ngae, Irsaqleqlav-euq lafkhoer miqcoeq miqma ghawqmya ghaq jawr-eu mae.

²⁶ Aerkhawf, Miqyaer, Erlirya-anr, miqcoeq miqma nuideuq jawr-eu gar maqbi ir-aer, Sirdoq mirkhanq-anr jav-eu Zaqlaqdar-anr jawr-eu, miqcoeq miqma tiq ghaq jawr-eu gar taef-aer bi’ir-euq mae.

²⁷ Miqyaer gharduq ngaeqdan-eu Erlirshaer-euq zir-anr Irsaqleqlav-euq lafkhoer coiqdoi nar-eu tsawrhaq ghawqmya’ni jawr-eu mae. Aerkhawf, Surliv tsawrhaq Neqmaq khoerghaq-anr maqngeur nar-aq, aqyawf maf-euq lafkhoer tiqghaq-anr-iq maqbi shawrlar-aq.”

²⁸ Zanrdawq khawqnymr-anr jawr-eu tsawrhaq dawqtawvluf, dawq khoerdawq-anr yagaq ngae, nuima davlar-euq mae.

²⁹ Khoernar-aq, tsawqtur-awr, Yeqsur-anr meuq-euq meuqdzer daeqdov ghae-euq mae. Aqyawf maf-euq meuq-aq, gawqjawq-euq khoertav javluf-eu mirnae, baqghapyaf-euq uqghmq-anr gheughae-awr, daeqka-eu laer ghae-eu mae.

³⁰ Aerkhawf, aqyawf-aq, aqyawf maf-euq ghanrcae nae canpav ghae-awr dov-ir-euq mae.

Naef Yawjawf-anr Taedov-euq

³¹ Khoerngae, Yeqsur, Gaqliqlaer mirkhanq-anr jav-eu Gaqbeqneqoq-anr ir-awr, landaw jawrnan ngae nan-aq, tsawrhaq armaf-anr maeqnaeq tsovnaeq-euq mae.

³² Aqyawfmaf, Yeqsur maeqnaeq tsovnaeq-eu gar zanq duidui ler-eu mae. Aqjeq mirnae aernar-aq, aqyawf-euq dawq-aq, aryaq anr-eu mae.

³³ Zanrdawq khawqnymr-euq lafkhoer naef yawjawf ur-eu tiq ghaq jawr-eu mae. Aqyawf tersar yawkhav-aer gurgur-aer aer-eu,

³⁴ “Naqzaqlaer tsawrhaq Yeqsur-or! Nga’maf-anr taq banqgha naeqlaf, nawr, nga’maf-anr lavcawv le-euq le lor? Nawr aqsur ghaq-a laer ngar siqnya ma. Nawr-aq, Miqyaer-euq Yawshawr ghaq mae.”

³⁵ Khoerngae, Yeqsur, aqyawf-anr, “Aqcircu, teughaq-euq lafkhoer nae dovle-awq” laer daeqnaeq ngae, naef khoermawr tsawrhaq khoerghaq-anr tsawrhaq armaf mafma-euq ghanrcae biqanr ghae-awr, aqyawf-anr maq lavtanq maq lavnar naeqni dovle-euq mae.

³⁶ Tsawrhaq khoerdeuq dawqtawvluf zanq duidui ler-awr aqyawf maf-euq yawkaq ja-eu, “Dawq teudawq aqjox-aer ghae-eu dawq nga? Aqyawf aryaq za-awr baoq anr-eu lafkhoer naef yawjawf deuq-anr dawq bif ngae, naef yawjawf khoerdeuq dovle-eu nga.”

³⁷ Khoermirnae, Yeqsur-euq garkawv khoerkaq khoerlanr-anr yawqgar navluf gaqdoe-ir-euq mae.

Sirmoq-euq Tsawrmawq Aqbur Ghaq-anr Bi Taqler-euq

³⁸ Yeqsur tur-awr zanrdawq khawqnymr-anr nae dov-ir-awr, Sirmoq-euq nymr-anr ur-ir-euq mae. Sirmoq-euq tsawrmawq aqbur ghaq yawlanr ardzaeq-aer lanrlanr-aer pyaqluf-eu mirnae, aqcawq, aqyawf-euq gharduq Yeqsur-anr tanqshar-euq mae.

³⁹ Yeqsur, aqyawf-euq dawqpae yawf-awr, yawlanr lanrlanr-aer pyaqluf-eu khoer-anr daeqnaeq ngae, pyaq-eu khoer lawq-ir-euq mae. Aqyawf tiqpov taef-aer tsawqtur-awr, aqyawf maf-anr hawqbyawr lavdawv naeq-euq mae.

⁴⁰ Nanrma ga’anr-ir luf ngae, aqgeu jeq-euq nargawr baqda’nae pyaqluf-eu maqkaq, dawqtawv luf-anr Yeqsur jawr-eu gar sheuqlaf-euq mae. Yeqsur, aqyawfmaf yawqghaq navluf-euq khoertav aqlaf bafdav-awr, aqyawf maf-anr lavtaq naeq-euq mae.

⁴¹ “Nawr-aq, Miqyaer-euq Zaqyo Kali mae” laer gurgur-aer naefdeuq khawf ghawqmya ghaq-euq lafkhoer nae dovle-euq mae. Aqyawf-aq, Kali mae laer aqyawfmaf siqnya-eu mirnae, Yeqsur, aqyawf maf-anr dawq maqbi ngaeqni daeq-euq mae.

Gaqliqlaer-anr Dawqmaeq Maeq-euq

⁴² Uqbya byalar ngae, Yeqsur dov-ir-awr bawrtsanq bawrdanr-anr le-euq mae. Tsawrhaq armaf mafma deuq, aqyawf-anr povpov-aer aqyawf jawr-eu gar lekeuv ngae, Yeqsur, aqyawf maf-anr nae maqbi ghawq-ir ni bijawr-eu laer laejae-euq mae.

⁴³ Aerkhawf, Yeqsur, aqyawf maf-anr aernaeq-eu, “Ngar, meuq nuideuq-anr khawf Miqyaer uvlanr-eu garkawv dawqmaeq maqmaeq-ir-aer maq ghaenya-a. Aqjeq mirnae aernar-aq, ngaq-anr khoerlof-aer bimr-eu laer bi’oe naeqlaf-euq mae.”

⁴⁴ Khoernar-aq, Yeqsur, Gaqliqlaer mirkhanq-anr jav-eu zanrdawq khawqnymr-euq lafkhoer dawqmaeq maeq-ir-euq mae.