Luˇkaꞈ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yorhaq Dawqmaeq Maeq-eu

¹ Gaersaq Diqbeqlir sanqpaq uqdzan geuf-awr dzoeq-eu 15 khof byanlar ngae, Yurdav mirkhanq-anr Boqtiv Pirlav meuqsanr geufluf-awr, Gaqliqlaer mirkhanq-anr Heqlor uvlanr luf-awr, Irtuqlaer hawr-eu Daqlaqgawrnir-anr Heqlor-euq maernmr Pirlirpuv uvlanr luf-awr, Aqbirleq-anr Lursaqnir uvlanr luf-eu mae.

² Aqna hawr-eu Gaqyaqpar pirma yawhuiq geufluf ngae, Zeqkaqlir-euq zaqyo Yorhaq bawrtsanq bawrdanr-anr jawr-eu gar Miqyaer-euq dawq keuvle-euq mae.

³ Aqyawf-aq, Yawrdaq lawrbaq lawrdzer doeni ir-awr, iqbax pyaeq-eu jeq za’ni noeqpov noeqpar-eu lafkhoer bartirsaq mr-awq laer dawqmaeq maeqluf-eu mae.

⁴ Miqyaer gharduq ngaeqdan-eu Irsaqyar-euq sanqbof-euq lafkhoer boftaq-euq lof-aer, “Bawrtsanq bawrdanr-anr tsawrhaq tiq ghaq-euq tersar gur-eu, ‘Sanqpaq Miqyaer-euq garma shardanr-awr, Aqyawf-euq garma dawrcoeni lavdawr-awq.

⁵ Ghaqlawq yawqlawq navluf ya dzmlar-awr, Gawqjawq hawr-eu gawqdur dawqtawvluf ya dile taef-a. Garghof deuq ya lavdawr-awr, maqdi-eu garma deuq ya lavdi taef-a.

⁶ Shiqshaq khar piluf-eu tsawrhaq dawqtawvluf, Miqyaer-euq kakhof-eu jeq-anr ya’mawr taef-a. Shiqshaq khar piluf-eu tsawrhaq dawqtawvluf Miqyaer-euq kakhof-eu jeq-anr ya’mawr taef-a.’ ” (Isy 40:3-5)

⁷ Aqyawf nae bartirsaq bi mrnaeq-eu laer oetaq-euq tsawrhaq armaf mafma deuq-anr Yorhaq heulof-aer aernaeq-euq mae: “Dof khav-eu arlawr-euq zaqdeuq-or! Aqkar keuvle-eu nuima paer-eu jeq-anr caevdzeur nya’ni, nawmaf-anr aqsur ghaq nae aernaeq laf-euq la?

⁸ Nawmaf noeqpov noeqpar-euq gar geux-eu arsiq bi siqle-awq. ‘Aqbyaqhaq-aq, nga’maf-euq aqda yawdzanr ma’ laer nawmaf-euq nuima-euq lafkhoer taqnoeq. Ngar, nawmaf-anr aernaeq nyar, Miqyaer-aq, khaqlo heudeuq-anr Aqbyaqhaq-euq oeqpaq oeqma bi pyeuflar nya-eu mae.

⁹ Nymq-mr deuvhaq, arbawr-euq dawqpaeq-anr bafmawq taq-euq mae. Arsiq yawmuiq maq siqle-eu arbawr yawqbawr navluf-anr turdzae-awr, miqdzaq-anr bafpuiv taef-a.”

¹⁰ Khoerngae, tsawrhaq armaf mafma deuq, Yorhaq-anr narhaq-eu, “Tox-aer mar-iq, nga’maf aqjox-aer yajanr-eu la?”

¹¹ Yorhaq aerkhof naeq-eu, “Paerkhanq nyiq kanr jav-eu tsawrhaq-aq, maqjav-eu tsawrhaq-anr birnaeq-awr, dzaqdzaq dawrdawr jav-eu tsawrhaq khawf, khoerlof-aer durni birnaeq-awq.”

¹² Jeq taf-eu tsawrhaq khawf bartirsaq bi mrnaeq-eu laer oe-awr narhaq-eu, “Saqlaq-or! Nga’maf aqjeq yajanr-eu la?”

¹³ Khoerngae, Yorhaq, aqyawf maf-anr aernaeq-eu, “Aertsaev taq-euq myavni maqngeur nar-aq taq tafdzaeq.”

¹⁴ Guirzaq deuq khawf, aqyawf-anr narhaq-eu, “Nga’maf lawr nae aqjox-aer yaghae-eu la?” Khoerngae, Yorhaq, aqyawf maf-anr aernaeq-eu, “Tiqghaq-iq-euq myawq-anr taqkhaeq taq khavgeuf, aqcawq-euq pyur-anr taqmyawf taq shuirdzaq, yawqha zaluf-eu ghaqgar poeq-anr nuikhanr shir-awq.”

¹⁵ Tsawrhaq khoerdeuq noeqtmq-awr dawqluf-eu lafkhoer, Yorhaq teughaq Kali ngeur-eu maqsiq, maqngeur-eu maqsiq laer aqyawfmaf dawqtawvluf yawqha-euq nuima-euq lafkhoer sharnoeq sharsawx luf-eu mae.

¹⁶ Khoerngae, Yorhaq, aqyawfmaf dawqtawv luf-anr heulof-aer aernaeq-euq mae: “Ngar-aq, aqdir nawmaf-anr ircuf nae bartirsaq mrnaeq luf-eu ma. Aerkhawf, ngaq-euq navmaqtser huiq-eu tiq ghaq oeluf-eu mae. Ngar-aq, aqyawf-euq saeqnawv-euq arcav-anr tseuvpuir naeq-eu taef khawf maqgeux-a. Aqyawf-aq, nawmaf-anr Yawshawr Saflar hawr-eu miqdzaq nae bartirsaq mrnaeqlaf taef-a.

¹⁷ Aqyawf-euq aqlaf-euq lafkhoer caer bawseu nyaeftaeq taq-awr, aqyawf-euq caerbymr saqkhawf-anr nae caer bawshawr-awr, caermar deuq caerjir-anr pi’anr taef-a. Aerkhawf, caerkhawf deuq-anr-aq, maqmiv-ir-eu miqdzaq nae keuqdzae taef-a.”

¹⁸ Yorhaq-aq, tsawrhaq khoerdeuq-anr dawqmaeq maeq-eu lafkhoer ghawqmya jeq-euq garkawv nae ghaq bifnaeq-euq mae.

¹⁹ Aerkhawf, Gaqliqlaer mirkhanq-euq sanqpaq Heqlor-aq, aqyawf-euq maernmr-euq miqzaq Heqlordir-anr sheuqgeuf-euq uqtaf, yawdoer ghawqmya jeq mr-euq mirnae, Yorhaq nae bidaeq-euq mae.

²⁰ Khoermirnae, yawqjeq navluf-euq khoertav par mrlanq-euq jeq-aq, Yorhaq-anr kuv-anr nyaefur-euq khoer mae.

Yeqsur Bartirsaq Hageuf-euq

²¹ Khoerngae, heulof-aer pyeuflar-euq mae. Tsawrhaq khoerdeuq dawqtawvluf bartirsaq hageufluf ngae, Yeqsur khawf hageuf-awr guiqlanqshar ngae, mq panlar-euq mae.

²² Khoerngae, Yawshawr Saflar, khaqkhoeq lof-aer dur-eu lafkhoer, aqyawf-euq khoertav zafka le-awr, mq-anr nae tersar ngaeqdov lef-eu, “Nawr-aq, ngar zawr gaq-eu ngaq-euq Zaqyo ma. Ngar, nawq-anr nuikhanrshir duidui ma.”

Yeqsur Kali-euq Tsuif

²³ Yeqsur, aqyawf-euq guiqlanq-euq gar mrdanqbae ngae, 30 khof aerghaqni khawvlar-euq mae. Aqyawf-aq, Yorsaev-euq zaqyo mae laer tsawrhaq noeq-eu mae. Tsuif guidavlef ngae heulof-aer mae: Yorsaev, Heqlir,

²⁴ Maqdav, Leqbir, Meqlaqkir, Yaqnav, Yorsaev,

²⁵ Maqdaqtir, Aqmor, Naqhmq, Ersaqlir, Naqgair,

²⁶ Maqav, Maqdaqtir, Seqmir, Yorsaev, Yurdav,

²⁷ Yorhaqna, Leqsar, Zeqlurbaqbeqlar, Shaqtirlav, Neqlir,

²⁸ Meqlaqkir, Ardir, Gorsamq, Erlaqmordamq, Erlav,

²⁹ Yorseq, Erleqzaq, Yorlirmq, Maqdav, Leqbir,

³⁰ Surmoq, Yurdav, Yorsaev, Yornaq, Erlirkmq,

³¹ Meqleq, Mernaq, Maqdaqdar, Naqdaq, Daqbir,

³² Yeqshaer, Orbaev, Borzav, Saqlaqmor, Naqshoq,

³³ Aqmiqnaqdar, Lamq, Heqzaqloq, Peqlev, Yurdav,

³⁴ Yaqkov, Irtsav, Aqbyaqhaq, Teqlav, Naqhor,

³⁵ Seqlur, Laqgawr, Peqlaev, Eqbeur, Sheqlav,

³⁶ Gaqirnaq, Aqpaqsav, Sheqmav, Noraq, Laqmaer,

³⁷ Meqtuqseqlar, Ernov, Jarleq, Maqhaqleqlar, Gernaq,

³⁸ Ernoq, Seqtav, Aqdaq-aq, Miqyaer-euq zaqyo mae.