Luˇkaꞈ 23 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pirlav, Yeqsur-anr Narhaq-euq

¹ Khoerngae, uiqlar taq-euq tsawrhaq armaf maflan-aer turlar-awr, Yeqsur-anr Pirlav jawr-eu gar sheuqghae-euq mae.

² Yeqsur-euq khoertav iqbax taqtaq-aer aer-eu, “Tsawrhaq heughaq-aq, nga’maf-euq tsawrjeuq tsawrca-anr nanrpov-aer daefni sheuqbanq-awr, sanqpaq Gaersaq-anr jeq taq dovnaeq laer lavtsoeq-eu uqtaf, yawqhar yawha Kali laer kur-eu Sanqpaq ma laer khawf, aqyawf aer-eu gar nga’maf yagaq ya’mawr-euq ma.”

³ Pirlav, Yeqsur-anr narhaq-eu, “Nawr, Yurdav tsawrhaq-euq Sanqpaq le lor?” Khoerngae, Yeqsur aerkhof naeq-eu, “Nawr aer-eu lof-aer ngeur ma.”

⁴ Khoernar-aq, Pirlav, pirma aqyuif deuq hawr-eu tsawrhaq armaf mafma deuq-anr aernaeq-eu, “Ngar, tsawrhaq heughaq-euq lafkhoer yawlaeq tiqjeq-iq maq povmawrnya nya.”

⁵ Aerkhawf, aqyawfmaf ngaeq-aer nar-aq ngaeq-aer yawkhav-aer aer-eu, “Tsawrhaq heughaq-aq, Yurdav mirkhanq doeni maeqmaeq-aer, tsawrhaq baqmaf deuq bi luiqgha lar-euq mae. Gaqliqlaer mirkhanq-anr nae maeqdanq bae-awr, heugar keuvni maeqkeuv lef-euq mae.”

Heqlor Jawr-eu Gar Sheuqghae-euq

⁶ Pirlav, Gaqliqlaer laer aer-eu dawq yagaq ngae, tsawrhaq heughaq Gaqliqlaer tsawrhaq-a laq laer narhaq-euq mae.

⁷ Yeqsur-aq, Heqlor uvlanr-eu mirkhanq-anr jawr-eu tsawrhaq nga laer Pirlav yasiq ngae, Yeqsur-anr Heqlor jawr-eu gar bi sheuqghae-euq mae. Khoerngae, Heqlor khawf Yeqlursaqlaeq-anr jawrluf-eu mae.

⁸ Heqlor, Yeqsur-anr ya’mawr ngae laqkhaqcaer duidui-eu mae. Aqjeq mirnae aernar-aq, aqyawf, Yeqsur-euq garkawv ghawqmya jeq yagaq-awr, Yeqsur-anr mawrmawf-eu myanrlar-euq uqtaf, aqyawf khavjeq-aer ghae-eu tiqjeqnav janr-eu gar khawf ya’mawrni noeqtmq taq-euq mae.

⁹ Khoermirnae, aqyawf, Yeqsur-anr ghawqmya jeq narhaq-euq mae. Aerkhawf, Yeqsur dawq tiqdawq-iq maq ngaeqkhof naeq-aq.

¹⁰ Pirma aqyuif deuq hawr-eu zanr maeq-eu deuq yawf-awr, Yeqsur-anr iqbax yawkhav-aer taq-eu mae.

¹¹ Heqlor hawr-eu aqyawf-euq guirzaq deuq, Yeqsur-anr shafdawr-ir ni janrnaeq-awr, aqjaf jafnaeq-euq mae. Khoernar-aq, guirzaq deuq nae aqyawf-anr muiq duidui-eu paerkhanq paermanr bidm-awr, Pirlav jawr-eu gar bi sheuqkhof ha-ir-euq mae.

¹² Dzeurlaf ngae, Heqlor hawr-eu Pirlav tiqghaq tirghaq muir-euq mae. Aerkhawf, khoerngae nan aqyawfnyaf tiqghaq tirghaq ghoerlar-euq mae.

Yeqsur Yashirni Dartsaev-euq

¹³ Khoerngae, Pirlav, pirma aqyuif deuq, aqyuif geuf-eu deuq hawr-eu tsawrhaq baqmaf-anr kuruiq-awr,

¹⁴ aqyawf maf-anr heulof-aer aernaeq-euq mae: “Tsawrhaq heughaq, tsawrhaq baqmaf-anr sheuqbanq-eu ghaq mae laer nawmaf aer-awr, ngar jawr-eu gar sheuqlaf-euq mae. Hawsher-eq. Ngar, nawmaf-euq maeqshi aqyawf-anr narhaqtser ngae, nawmaf, aqyawf-euq khoertav iqbax taq-eu lof-aer, ngar yawlaeq tiqjeq-iq maq povmawrnya nya.

¹⁵ Ngar, nawmaf-anr Heqlor jawr-eu gar bi’ir-euq ma lawr. Aqyawf khawf, Yeqsur-euq lafkhoer yawbanq maq povmawr nya-aq. Haeqsher-eq, heughaq-aq, shir paq-aer geux-eu yawbanq mrtaq-euq tiqjeq-iq maqjav nga.

¹⁶ Khoermirnae, ngar, aqyawf-anr diq-awr pyaeqnaeq ma.”

¹⁷ (Baqsaqkaq yawbui kharbui ngae, Pirlav, aqyawf maf-euq gharduq tiq ghaq-anr ya pyaeqnaeq-eu mae.)

¹⁸ Khoerngae, tsawrhaq baqmaf maflanni tiqkawv lof-aer gur-eu, “Tsawrhaq teughaq-anr saefdzae-awr, nga’maf-euq gharduq Baqlaqbar pyaeqnaeq laf-awq.”

¹⁹ Baqlaqbar-aq, meuq khoermeuq-euq lafkhoer puiq-awr, tsawrhaq khawf saef-euq mirnae, kuv-anr bi nyaefur taq-euq mae.

²⁰ Pirlav, Yeqsur-anr pyaeqnaeq mawf-eu mirnae, tsawrhaq khoerdeuq-anr tersar yawkhav-aer tiq pov par aernaeq-euq mae.

²¹ Aerkhawf, aqyawfmaf yawkhav-aer pargur-eu, “Aqyawf-anr lafyaq-euq khoertav tafsaef-awq. Lafyaq-euq khoertav tafsaef-awq!”

²² Khoerngae, Pirlav smq pov tiqpov aqyawf maf-anr aernaeq-eu, “Aqjeq mirnae bi tafsaef mawf-eu nya? Aqyawf yawdoer jeq mrtaq-euq aqgeu jeq jav-eu la? Ngar, aqyawf-euq lafkhoer shir paq-aer mrbanq taq-euq yawbanq tiqjeq-iq maq povmawr-aq. Khoermirnae, ngar, aqyawf-anr diq-awr pyaeqnaeq ma.”

²³ Aqyawf-anr lafyaq-euq khoertav tafsaef-awq laer aqyawfmaf hawr-eu, pirma aqyuif deuq yawkhav-aer gur-awr aertaer taeq-eu mirnae, arsaq saqlar ngae, aqyawfmaf nae gurghaq-euq mae.

²⁴ Khoermirnae, aqyawfmaf geufmawf-eu lof-aer Pirlav dartsaev naeq-euq mae.

²⁵ Mirkhanq-anr puiq-awr, tsawrhaq-anr saef-euq mirnae, kuv-anr bi nyaefur taq-euq khoerghaq-anr-aq, aqyawfmaf shar-eu lof-aer pyaeqdov naeq-euq mae. Yeqsur-anr-aq, aqyawfmaf janrnaeq mawf-eu lof-aer janrnaeq nya’ni, aqyawf maf-euq aqlaf-anr a’naeq-euq mae.

Yeqsur-anr Tafsaef-euq

²⁶ Yeqsur-anr sheuqdov ghaeluf ngae, Kurleqniq-anr jawr-eu Sirmoq, pu paw nae larluf-eu gar nyaef-awr, aqyawf-anr lafyaq bafdav naeq-awr nae, Yeqsur-euq maeqnan bi cantae-euq mae.

²⁷ Tsawrhaq armaf mafma, Yeqsur-euq maeqnan cantae luf-eu mae. Khoerdeuq-euq lafkhoer, zaqmiq aqbur ghawqmya ghaq Yeqsur-euq baqda’nae dawqkawq kawqkawq-aer tsawrngoer ngoerluf-eu mae.

²⁸ Yeqsur, aqyawf maf-anr nanrghof ghofhaw-awr heulof-aer aernaeq-euq mae, “Yeqlursaqlaeq-euq zaqmiq deuq-or! Ngaq-euq gharduq yawkhav-aer taqngoer. Aerkhawf, nawmaf yawqha-euq gharduq hawr-eu yawqha-euq zaq-euq gharduq ngoer-awq.

²⁹ Aqjeq mirnae aernar-aq, heulof-aer ya’aer-eu arnan aryamq keuvle taef-a, ‘Maqbaw aqma deuq, zaq maqbaw haw-euq uqmav deuq, zaqnanq-anr aqcoer maqbi dawrhaw-euq zaqmiq aqbur deuq-aq, guiqlanq huiq-eu mae.’

³⁰ Khoerngae, ‘Aqyawfmaf, gawqjawq deuq-anr, “Nga’maf-anr byavtaeq lef-awq” laer aernaeq-awr, gawqdur deuq-anr, “Nga’maf-anr daeqkaq naeqlaf-awq” ’ (Hs 10:8) laer aernaeq taef-a.

³¹ Aqyawfmaf, arbawr yawjmq-anr heunav nav-aer janrnaeq nar-aq, arbawr yawgui-anr ngeurdzaeq arnavni janrnaeq nmr-mq?”

³² Khoerngae, Yeqsur naeq-aer tiqkawv lof-aer bisaef-eu laer yawbanq jeq mr-euq nyiq ghaq-anr khawf sheuqdov ghaeluf-eu mae.

³³ Uqduqkhmq laer kur-eu khoertsanr-anr lekeuv ngae, aqyawfmaf, Yeqsur-anr lafyaq-euq khoertav taftaeq-euq mae. Yawbanq jeq mr-euq khoer nyiq ghaq-anr khawf, armar paw tiq ghaq, arcar paw tiq ghaq laer taftaeq taq-euq mae.

³⁴ Khoerngae, Yeqsur aer-eu, “Aqda-or! Aqyawf maf-euq iqbax-anr pyaeqnaeq-awq. Aqjeq mirnae aernar-aq, aqyawfmaf aqjeq mrluf-eu le laer aqyawfmaf maq siqnya-a.” Khoerngae, aqyawfmaf shaevtsaq tsaq-awr, Yeqsur-euq maeqtsoeq birgeuf-euq mae.

³⁵ Tsawrhaq baqmaf khoergar yawf-awr hawluf-eu mae. Uvlanr-eu tsawrhaq deuq, Yeqsur-anr aqjaf jafjaf-aer aer-eu, “Aqyawf, aqcawq-anr bibuq-ir-euq mae. Aqyawf-aq, Miqyaer nae tserdov taq-euq Kali laer kur-eu ghaq ngeur nar-aq, yawqhar yawqha bibuq-ir sher-eq.”

³⁶ Guirzaq deuq khawf dawqpae lar-awr nae, caermyawvni ghae-eu aqgaf dzaruir, aqyawf-anr bidawr-eu laer cawqnaeq-awr, aqjaf jafjaf-aer aer-eu,

³⁷ “Nawr, Yurdav tsawrhaq-euq Sanqpaq ngeur nar-aq, yawqhar yawqha bibuq-ir-awq lawr.”

³⁸ Yeqsur-euq laftavdzer, Lorma, Heqlaqsar hawr-eu Heqbyaer sanqbof nae heulof-aer boftaq-euq mae: HEUGHAQ-AQ, YURDAV TSAWRHAQ-EUQ SANQPAQ MAE.

³⁹ Khoerngae, tiqkawv lof-aer bi taftaeq taq-euq yawbanq jeq mr-euq nyiq ghaq-anr nae tiq ghaq, Yeqsur-anr yaeqbawq saerlu-aer aer-eu, “Nawr, Kali ngeur mar-iq, yawqhar yawqha bibuq-ir-awr, nga’nyaf-anr khawf bibuq-ir naeqlaf-awq.”

⁴⁰ Aerkhawf, yawqghaqyawq, khoerghaq-anr heulof-aer daeqnaeq-euq mae, “Nawr, aqyawf lof-aer dartsaev taq-euq gar ya daqluf-eu khawf, Miqyaer-anr maqguv nya lor?

⁴¹ Arnyaf heulof-aer yadaq-eu-aq tsaq mae. Arnyaf mrbanq-euq mirnae, daq paq-aer ghae-eu lof-aer daqluf-eu ma. Aerkhawf, teughaq-aq, tiqjeq-iq maq mrbanq-aq.”

⁴² Khoernar-aq, aqyawf, Yeqsur-anr aernaeq-eu, “Sanqpaq Yeqsur-or! Nawr uvlanr-eu jeq keuvle ngae, ngaq-anr taqngaer naeqlaf de-eq.”

⁴³ Khoerngae, Yeqsur, aqyawf-anr aernaeq-eu, “Ngar, nawq-anr aqdirma-aer aernaeq nyar. Iqnan, nawr, ngaq naeq-aer Baqlaqdirsuv-euq lafkhoer yajawr taef-a.”

Yeqsur Saf Tsaev-euq

⁴⁴ Khoerngae, nanlov caelar-euq nar-aq, uqciftaw naqliq smr laf-anr keuvni, mirtsaq dawqtawvluf zanrtsuini pyeuf-ir-awr,

⁴⁵ nanrma-euq yawshaef maqbya-a. Khoerngae, uqduq tanqnymr nymrma-euq lafkhoer tawtaq-euq lawvkaq saqpar ghanrcae-anr nae nyiq pav-aer pyaq-ir-euq mae.

⁴⁶ Khoerngae, Yeqsur tersar yawkhav-aer gur-eu, “Aqda-or! ‘Ngar, ngaq-euq saflar, nawq-euq aqlaf-euq lafkhoer a’naeq ma. ’ ” (Jc 31:5) Aqyawf khoerlof-aer aerghaq-euq nar-aq, saf tsaev-euq mae.

⁴⁷ Yardzoeq guirhuq tiq ghaq khoerlof-aer pyeuflar-euq gar ya’mawr ngae, Miqyaer-anr ciqhuiq ciqmanr-eu lafkhoer aer-eu, “Tsawrhaq heughaq-aq, aqdir aqmar tsaq-awr dawr-eu tsawrhaq ngar-a!”

⁴⁸ Khoergar uiq-awr hawluf-eu tsawrhaq armaf maflanni khoerlof-aer pyeuflar-euq gar ya’mawr ngae, yawqha-euq khanq-anr terter-aer ghof-ir-euq mae.

⁴⁹ Aerkhawf, Yeqsur-anr siqnya-eu tsawrhaq deuq hawr-eu Gaqliqlaer mirkhanq-anr nae aqyawf-euq maeqnan cantae luf-eu zaqmiq aqbur deuq, heudeuq dawqtawvluf uicuiv garmanr kaq-eu gar yawf-awr, pyeuflar luf-eu heudeuq-anr hawluf-eu mae.

Yeqsur-anr Bafpanq-euq

⁵⁰ Khoerngae, Yorsaev laer kur-eu dawr-awr tsaq-eu tsawrmuiq tsawrjaq tiq ghaq jawr-eu mae. Aqyawf-aq, khavma armur-euq lafkhoer keuq-eu tiq ghaq mae.

⁵¹ Aerkhawf, aqyawf, khavma armur nae bawqtsaev-awr mr-euq gar nuima maqtsaq-a. Aqyawf-aq, Aqlirmaqtaeq-anr jawr-eu, Miqyaer uvlanr-eu jeq-anr dawqluf-eu tiq ghaq mae.

⁵² Aqyawf, Pirlav jawr-eu gar le-awr, Yeqsur-euq mawrdo sharler-euq mae.

⁵³ Khoernar-aq, Yeqsur-euq mawrdo bafka-awr, sheqsha saqpar nae mawrtawv tawv-awr, tiqghaq-iq maq bafpanq haw-euq, khaqlo-anr taftaq-euq lmqbymr-euq lafkhoer bafpanq-ir-euq mae.

⁵⁴ Khoerngae nan-aq, laeqhmq-eu arnan pyeuf-awr, landaw jawrnan keuvlar shaw-iq-eu mae.

⁵⁵ Gaqliqlaer mirkhanq-anr nae Yeqsur naeq-aer lar-euq zaqmiq aqbur deuq-aq, narkhan pawdzer cantae lef-awr, lmqbymr-anr hawr-eu Yeqsur-euq mawrdo aqjox-aer baftaq yaf-euq gar ya’mawr-euq mae.

⁵⁶ Khoernar-aq, aqyawfmaf ghofler-awr, yawsaw jeq hawr-eu tsir yawsaw deuq laeqhmq taq-euq mae. Zanrdawq khofdawq aertaq-euq lof-aer, landaw jawrnan ngae nan-aq, aqyawfmaf ghaqnaq naq-euq mae.