Luˇkaꞈ 22 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur-anr Saef-eu Laer Jawq-eu

¹ Khoerngae, Daeqtseq maqdawv-euq kaqmur dzaq-eu Baqsaqkaq laer kur-eu yawbui bui-eu aryamq paelar-euq mae.

² Pirma aqyuif deuq hawr-eu zanr maeq-eu deuq, tsawrhaq baqmaf-euq maeqshi Yeqsur-anr maq saefpeuq-eu mirnae, aqjox-aer ghae-awr nae saefbyov nya-eu paq nga laer jawqluf-eu mae.

³ Khoerngae, ghaqkhaer 12 ghaq-euq lafkhoer keuq-eu, Irsaqgaqliqoq laer kur-eu Yurdav-euq nuima-euq lafkhoer naef Saqdaq urler-euq mae.

⁴ Aqyawf, pirma aqyuif deuq hawr-eu uqduq tanqnymr nymrma-anr lofpir-eu aqyuif deuq jawr-eu gar le-awr, aqyawf maf-anr Yeqsur aqjox-aer anqdzaq-eu paq nga laer bawqdzaq ler-euq mae.

⁵ Aqyawfmaf laqkhaqcaer duidui lar-awr, Yurdav-anr pyur bif-eu gharduq nuima tsaq-eu mae.

⁶ Yurdav khawf kamq-awr, tsawrhaq armaf mafma maqjawr ngae, Yeqsur-anr aqyawf maf-euq aqlaf-anr a’naeq-eu aqmyan yaeflar-eu nga laer povluf-eu mae.

Baqsaqkaq Dzaqbyawr Laeqhmq-euq

⁷ Khoernar-aq, Daeqtseq maqdawv-eu kaqmur dzaq-eu arnan keuvlar-euq mae. Khoerngae nan Baqsaqkaq yawrzaq yasaef-eu mae.

⁸ Khoerngae, Yeqsur, Beqtuvluv hawr-eu Yorhaq-anr khaer-awr aer-eu, “Nawnyaf ir-awr, aqduimaf Baqsaqkaq dzaqbyawr dzaqtaf nya’ni, aqdui-euq gharduq laeqhmq-ir-awq.”

⁹ Aqyawfnyaf, Yeqsur-anr narhaq-eu, “Nga’nyaf-anr aqgeugar bi laeqhmq-ir mawf-eu nya?”

¹⁰ Yeqsur aer-eu, “Narhaq sher-eq, nawnyaf meuq-anr urler ngae, ircuf oeqlanq baf-awr can-eu zaqyo aqli tiq ghaq-anr ya tanqpuq taef-a. Nawnyaf, aqyawf-euq maeqnan cantae ghae-awr, aqyawf urler-eu nymr-anr urler-awq.

¹¹ Khoernar-aq, nymrsanr ghaq-anr heulof-aer aernaeq-awq, ‘Saqlaq, nawq-anr heulof-aer bi narhaq le-euq mae, “Ngar, ngaq-euq zaqlanr deuq naeq-aer Baqsaqkaq dzaqbyawr dzaqnya’ni, daqyan-euq kuvlawv aqgar jav-eu la?” ’

¹² Khoerngae, aqyawf, nawnyaf-anr laftav tiv-anr jav-eu lavsav taq-euq kuvlawv lawvma tiq lawv-anr sheuqhaw naeqlaf taef-a. Nawnyaf khoergar laeqhmq taq-awq.”

¹³ Aqyawfnyaf ir ngae, yawqjeq navluf Yeqsur nae aernaeq-euq lof-aer jav-eu gar ya’mawr-awr, aqyawfnyaf khoergar Baqsaqkaq dzaqbyawr laeqhmq-euq mae.

Sanqpaq-euq Cifhawq Dzaqbyawr

¹⁴ Aryamq keuvlar ngae, Yeqsur hawqje-anr jawqler-awr, ghaqkhaer deuq khawf aqyawf naeq-aer jawqluf-eu mae.

¹⁵ Khoerngae, Yeqsur, aqyawf maf-anr heulof-aer aernaeq-euq mae, “Ngar, shaqzanq maqya daq-euq minav-aer, nawmaf naeq-aer Baqsaqkaq dzaqbyawr heubyawr dzaqtaf mawf duidui mir-a.

¹⁶ Ngar, nawmaf-anr aernaeq nyar, Miqyaer uvlanr-eu lafkhoer, dzaqbyawr heu-euq dawqtsuif maq byanlar-euq khoer-aq, ngar dzaqbyawr heu-anr maqpar dzaq ma.”

¹⁷ Khoernar-aq, Yeqsur khmqmaq ciq-awr jaceuq-awr nae heulof-aer aer-eu mae, “Khmqmaq heu ciq-awr, tiq ghaq uicuiv uicuiv-aer dawr-awq.

¹⁸ Ngar, nawmaf-anr aernaeq nyar, Miqyaer uvlanr-eu jeq maq keuvle-euq khoer-aq, ngar, aqgaf dzaruir heu maqpar dawr ma.”

¹⁹ Aqyawf, kaqmur paryur-awr, Miqyaer-euq guiqlanq-anr jaceuq-euq mae. Khoernar-aq, kaqmur ngawqpyaeq-awr, aqyawf maf-anr ciqnaeq-awr nae aer-eu, “Heu-aq, nawmaf-euq gharduq bifnaeq-eu ngaq-euq mawrdo ma. Nawmaf, ngaq-anr noeqkeuv-eu gharduq heulof-aer janr-awq.”

²⁰ Khoerlof-aer durni, cifhawq dzaqghaq ngae, aqyawf aqgaf dzaruir danq-eu khmqmaq ciq-awr heulof-aer aer-eu mae, “Khmqmaq heu-aq, dawqma sarjax yawshuif-anr taf-eu ngaq-euq shiq ma. Shiq heu nawmaf-euq gharduq bi yoerle ma.

²¹ Aerkhawf, hawsher-eq. Ngaq-anr anqdzaq-eu ghaq-euq aqlaf-aq, ngaq naeq-aer hawqje tiqje-anr jawqluf-eu ngar-a.

²² Tsawrhaq-euq Zaqyo-aq, Miqyaer nae noeqtsaev taq-euq lof-aer ya’ir taef-a. Aerkhawf, aqyawf-anr anqdzaq-euq khoerghaq-aq, ghawqshar shaq-aer ya ghaesaef taef-a.”

²³ Khoermirnae, zaqlanr deuq yawkaq ja-eu, aqyawf maf-euq lafkhoer khoerlof-aer janr-eu ghaq aqsur ghaq nga?

Aqgeu Ghaq Yahuiq Dzaeq-eu La?

²⁴ Khoeruqtaf, aqyawf maf-euq lafkhoer nae huiqdzaeq-eu aqgeu ghaq nga laer sharnoeq-awr zaqlanr deuq yawkaq pyaerluf-eu mae.

²⁵ Khoerngae, Yeqsur, aqyawf maf-anr heulof-aer aernaeq-euq mae: “Aqcawq tsawrjeuq tsawrca-euq sanqpaq deuq-aq, mirkhanqzaq-anr zuiv-eu mae. Mirkhanqzaq-aq, aqyawf maf-euq khoertav aryaq jav-eu deuq-anr ‘Guiqlanq janrnaeq laf-eu deuq’ laer kur-eu mae.

²⁶ Aerkhawf, nawmaf khoerlof-aer taqjanr. Nawmaf-euq lafkhoer aqcawq navmaqtser huiqdzaeq-eu ghaq, aqcawq navmaqtser nyirdzaeq-eu ghaq geuf-awq. Aqyuif geuf-eu ghaq khawf, kuirlaf lof-aer geuf-awq.

²⁷ Aqgeu ghaq huiqdzaeq-eu la? Jawq-awr dzaqluf-eu ghaq-a lor? Maqngeur nar-aq, hawqbyawr lavdawv naeq-eu ghaq-a laq? Jawq-awr dzaqluf-eu ghaq huiqdzaeq-eu maqngeur-a lor? Aerkhawf, ngar-aq, nawmaf-euq ghanrcae hawqbyawr lavdawv naeq-eu ghaq lof-aer geufluf-eu ma.

²⁸ “Aerkhawf, ngar tsermr haw-eu jeq-anr yadaq ngae, aqmyanluf ngaq naeq-aer jawr-eu-aq, nawmaf mae.

²⁹ NgaqDa, ngaq-anr uvlanr-euq jeq bifnaeq laf-euq lof-aer, ngar khawf, nawmaf-anr uvlanr-eu jeq bifnaeq ma.

³⁰ Heulof-aer bif-eu-aq, nawmaf, ngar uvlanr-eu mirkhanq-euq lafkhoer, ngaq-euq hawqje-anr jawq-awr, dzaqtaf dawrtaf-awr, dzoeqdzaq-euq nuirmanq-anr nuir-awr, Irsaqleqlav tsawrjeuq 12 jeuq-anr yarkhaq bidar-eu gharduq ma.”

Beqtuvluv, Yeqsur-anr Maqsiq Laer Pyaer Taef-a

³¹ Khoerngae, Yeqsur heulof-aer aer-eu mae, “Sirmoq-or! Sirmoq-or! Hawtaq-awq, caer-anr khaqjeq nae jeq-eu lof-aer naef Saqdaq, nawq-anr jeq-eu laer sharza taq-euq mae.

³² Aerkhawf, nawr jan-eu jeq maqya byaerdzaeni, ngar, nawq-euq gharduq guiqlanq shar-euq ma. Nawr, ngar jawr-eu gar ghofkhoflar ngae, nawq-euq cawq zaqlanr nuideuq-anr ghaq bi khavlar-awq.”

³³ Beqtuvluv, aqyawf-anr aernaeq-eu, “Sanqpaq-or! Ngar, nawq naeq-aer kuv-anr ur-ir-eu hawr-eu shir-eu gharduq khawf laeqhmqdan taq-euq ma.”

³⁴ Khoerngae, Yeqsur aer-eu, “Beqtuvluv-or! Ngar, nawq-anr aernaeq nyar, nymrcif yapoer maq doerlar-euq minav-aer, nawr, ngaq-anr maqsiq laer smq pov keuvni pyaer taef-a.”

Pyur Pawqbaev, Paertanr Hawr-eu Micaer

³⁵ Yeqsur, aqyawf maf-anr aernaeq-eu, “Ngar, nawmaf-anr pyur pawqbaev, paertanr hawr-eu saeqnawv maqyurni ir-awq laer khaerghae ngae, nawmaf-anr tiqjeqpaq mawflar-euq la laq?” Aqyawfmaf aer-eu, “Tiqjeq-iq maq mawflar-aq.”

³⁶ Yeqsur, aqyawf maf-anr heulof-aer aernaeq-euq mae: “Aerkhawf, nymq-mr povjawr-aq, pyur pawqbaev jav-eu deuq yurghae-awr, paertanr jav-eu deuq khawf shaf ghae-awq. Micaer maqjav-eu deuq maeqtsoeq anq-awr micaer zeur-ir-awq.

³⁷ Ngar, nawmaf-anr aernaeq nyar, ‘Aqcawq, aqyawf-anr mrbanq mrlaeq-euq deuq naeq-aer sawxanr taef-a’ (Isy 53:12) laer boftaq-euq Yaerbof heudawq ngaq-euq lafkhoer ya byanlar taef-a. Aqjeq mirnae aernar-aq, ngaq-euq garkawv khar boftaq-euq deuq ya byanlar taef-a.”

³⁸ Khoerngae, aqyawfmaf aer-eu, “Sanqpaq-or! Haeq, heugar micaer nyiq kanr jav ngar-a.” Yeqsur aer-eu, “Ghaq taef-a.”

Saqloq Gawqjawq-anr Guiqlanq Sharler-euq

³⁹ Yeqsur dov-ir-awr, aqmyanmyan janr-eu lof-aer Saqloq gawqjawq-anr davler-euq mae. Zaqlanr deuq khawf aqyawf-euq maeqnan cantaedav lef-euq mae.

⁴⁰ Yeqsur khoergar lekeuv ngae, aqyawf maf-anr aernaeq-eu, “Nawmaf murjur jurlar-eu gar maqya tawvlerni guiqlanq shar-awq.”

⁴¹ Khoernar-aq, aqyawf, aqyawfmaf jawr-eu gar nae khaqlo darbiq tiq biq kaq-eu gar ir-awr, pawqtsuif pawqdmq dmq-awr guiqlanq shar-eu lafkhoer aer-eu,

⁴² “Aqda-or! Nawr nuima tsaq nar-aq, khmqmaq heu ngaq-anr nae ciqdzae naeqlaf-awq. Aerkhawf, ngar nuima tsaq-eu lof-aer taqbi pyeuf. Nawr nuikhanr shir-eu lof-aer bipyeuf law.”

⁴³ Khoerngae, mqtav ghaqkhaer tiq ghaq mq-anr nae aqyawf jawr-eu gar dovle-awr, aqyawf-anr ghaq biflanq le-euq mae.

⁴⁴ Yeqsur shaqzanq mr duidui-eu mirnae, yawbae navmaqtser, yawshaq-anr teufler-awr guiqlanq parshar-euq mae. Aqyawf-euq kuqpyur, shiq lof-aer pyeuf-ir-awr, mirtsa dzavka luf-eu mae.

⁴⁵ Aqyawf guiqlanq sharghaq-awr tur-awr nae, zaqlanr deuq jawr-eu gar ghoflar ngae, aqyawfmaf noeqshaq duidui-eu mirnae yufkhav taq-euq gar ya’mawr-euq mae.

⁴⁶ Khoerngae, aqyawf maf-anr aernaeq-eu, “Nawmaf aqjeq mirnae yufkhav luf-eu le? Murjur jurlar-eu gar maqya tawvlerni, tur-awr guiqlanq shar-awq.”

Yeqsur Binyaef-euq

⁴⁷ Yeqsur khoerlof-aer aernaeqluf ngae, ghaqkhaer 12 ghaq-euq lafkhoer keuq-eu Yurdav laer kur-eu khoerghaq jeqhuq huq-awr, tsawrhaq armaf mafma sheuq-awr oe-euq mae. Yurdav, Yeqsur-anr maeqsaw saw-eu laer, Yeqsur-euq dawqpae lepae-euq mae.

⁴⁸ Khoerngae, Yeqsur, aqyawf-anr aernaeq-eu, “Yurdav-or! Nawr maeqsaw saw-awr, Tsawrhaq-euq Zaqyo-anr anqdzaq-eu ma laq?”

⁴⁹ Aqjeq pyeuflar-eu ghae-eu nga laer Yeqsur-anr jawrjawq taq-euq deuq hawsiq-awr aer-eu, “Sanqpaq-or! Nga’maf, micaer nae coer-awq laq?”

⁵⁰ Aqyawf maf-euq lafkhoer-euq tiq ghaq, pirma yawhuiq ghaq-euq kuirlaf zaqkhav-anr coerghae-awr, khoerghaq-euq naqpaf armar paw pyawq coertsaev ghae-euq mae.

⁵¹ Khoerngae, Yeqsur aerkhof naeq-eu, “Ghaq-ar. Taqpar janr!” Khoernar-aq, kuirlaf zaqkhav khoerghaq-euq naqpaf-anr toeqciv-awr lavtaq naeq-euq mae.

⁵² Khoerngae, Yeqsur-anr lavtsoeq-eu laer oe-euq pirma aqyuif deuq, uqduq tanqnymr nymrma-anr lofpir-eu aqyuif deuq hawr-eu aqyuif aqtsu deuq-anr Yeqsur heulof-aer aernaeq-euq mae, “Nawmaf smrkhoeq tanrjoe-anr nyaef-eu lof-aer, micaer baf, darkawq sheu-awr ngar jawr-eu gar oe-euq le lor?

⁵³ Ngar yawqnan navluf nawmaf naeq-aer uqduq tanqnymr nymrma-anr jawrluf-eu khawf, nawmaf, ngaq-anr maqnyaef-a. Aerkhawf, aryamq heu-aq, nawmaf-euq aryamq mae. Nymq-mr-aq, yawzanr-euq baoq uvlanr luf-eu mae.”

Beqtuvluv, Yeqsur-anr Maqsiq Laer Pyaer-euq

⁵⁴ Khoerngae, aqyawfmaf, Yeqsur-anr nyaef-awr, aqyawf-anr sheuqghae-awr, pirma yawhuiq ghaq-euq nymr-anr sheuqur lef-euq mae. Beqtuvluv-aq, uicuiv garmanr kaq-eu gar cantae luf-eu mae.

⁵⁵ Khoerngae, aqcawq, povka miqdzaq bawdof-awr, tiqgar taef-aer nuirluf-eu gar, Beqtuvluv khawf aqyawfmaf naeq-aer nuirler-euq mae.

⁵⁶ Beqtuvluv, miqdzaq bya-eu gar nuirluf ngae, kuirlaf zaqkhav aqbur tiq ghaq ya’mawr-awr, aqyawf-anr hawtsov taq-awr aer-eu, “Heughaq khawf, aqyawf naeq-aer jawr-euq tsawrhaq mae.”

⁵⁷ Aerkhawf, Beqtuvluv pyaer-eu, “Zaqmiq aqbur-or! Ngar, aqyawf-anr maq siqnya nya.”

⁵⁸ Ghawqmyanr maqghae-aer, yawqghaqyawq, Beqtuvluv-anr mawr-awr aer-eu, “Nawr khawf aqyawf maf-euq armur-anr keuq-eu tiq ghaq ngar-a.” Khoerngae, Beqtuvluv aer-eu, “Tsawrhaq heu-aq, ngar maqngeur laer aernar-aq.”

⁵⁹ Naqliq tiq laf aerghaqni kar-ir ngae, yawqghaqyawq khaqduqni paraer taertaeq-eu, “Heughaq-aq, aqdir aqmar aqyawf naeq-aer jawr-euq tsawrhaq ngar-a. Aqjeq mirnae aernar-aq, aqyawf khawf Gaqliqlaer tsawrhaq beu.”

⁶⁰ Aerkhawf, Beqtuvluv parpyaer-eu, “Tsawrhaqzaq-or, nawr aqjeq aerluf-eu teu, ngaq-anr maq siqlar nya!” Aqyawf khoerlof-aer aerluf ngae yapoer doerlar-euq mae.

⁶¹ Khoerngae, Sanqpaq Yeqsur, Beqtuvluv jawr-eu paw ghawrpyawr lef-awr Beqtuvluv-anr hawcawq-euq mae. Khoerngae, Beqtuvluv, Sanqpaq Yeqsur nae aqyawf-anr aernaeq-euq dawq heudawq noeqdov ler-euq mae, “Yapoer maq doerlar-euq minav-aer, nawr, ngaq-anr maq siqnya nya laer smq pov keuvni pyaer taef-a.”

⁶² Khoernar-aq, Beqtuvluv dov-ir-awr nuima cawv-eu lafkhoer ngoer duidui-euq mae.

Yeqsur-anr Aqjaf Jafnaeq-euq

⁶³ Yeqsur-anr nyaef-awr hawluf-eu tsawrhaq khoerdeuq, aqyawf-anr aqjaf jafjaf-aer diq-euq mae.

⁶⁴ Khoeruqtaf, aqyawf-euq myavnuiv-anr kafkaq-awr taev-awr nae aer-eu, “Nawq-anr taev-euq aqsur ghaq la laer, nawr, Miqyaer gharduq ngaeqdan hawsher-eq!”

⁶⁵ Aqyawfmaf, aqyawf-anr coeqler paq-aer yaeqbawq saerlu-aer ghawqmya jeq ngaeqnaeq-euq mae.

Khavma Armur, Yeqsur-anr Yarkhaq Dar-euq

⁶⁶ Uqbya byalar-euq naeq-aer, Yurdav tsawrhaq-euq aqyuif aqtsu deuq, pirma aqyuif deuq hawr-eu zanr maeq-eu deuq tiqkawv lof-aer uiqler-awr, Yeqsur-anr aqyawf maf-euq khavma armur bawqdzaq-eu gar sheuqur lef-awr nae aer-eu,

⁶⁷ “Nawr Kali mar-iq, nga’maf-anr aernaeq laf-awq lawr.” Khoerngae, Yeqsur, aqyawf maf-anr heulof-aer aernaeq-euq mae, “Ngar, nawmaf-anr aernaeq law-awr khawf, nawmaf maqjan-ar.

⁶⁸ Ngar, nawmaf-anr narhaq law-awr khawf, nawmaf, ngaq-anr maq aerkhof naeqlaf-eu uqtaf, maq pyaeqnaeq laf-ar.

⁶⁹ Aqkar nar-aq, Tsawrhaq-euq Zaqyo-aq, Miqyaer-euq baoq-euq armar paw ya’nuir taef-a.” (Jc 110:1)

⁷⁰ Khoerngae, aqyawfmaf dawqtawvluf aer-eu, “Tox-aer mar-iq, nawr-aq, Miqyaer-euq Zaqyo nga aerlawq?” Yeqsur, aqyawf maf-anr aernaeq-eu, “Nawmaf aer-eu lof-aer ngar pyeuf-eu ma.”

⁷¹ Khoerngae, aqyawfmaf aer-eu, “Aqduimaf sarkir nuijeq aqjeq parmawf-eu? Aqjeq mirnae aernar-aq, aqyawf-euq khaqmae nae ngaeqdov lef-euq dawq, aqduimaf ya gaqghaq-euq ma.”