Luˇkaꞈ 21 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqcoeq Miqma Tiq Ghaq-euq Pyurdamq

¹ Yeqsur hawghae ngae, smrmuiq smrbaw deuq pyurdamq dawvduq-anr pyur dawvanr luf-eu gar ya’mawr-euq mae.

² Khoernar-aq, irshaq irtaw miqcoeq miqma tiq ghaq, guiqshuir marbyav nyiq byav dawvanr-eu gar khawf ya’mawr-euq mae.

³ Khoerngae, Yeqsur heulof-aer aer-eu mae, “Ngar, nawmaf-anr aqdirma-aer aernaeq nyar, irshaq irtaw miqcoeq miqma heughaq nae dawvanr-euq khoer-aq, aqyawfmaf dawqtawv luf-euq myavmaqtser myaqdzaeq-eu mae.

⁴ Aqjeq mirnae aernar-aq, tsawrhaq dawqtawvluf ghawqmya’ni jav-eu lafkhoer nae Miqyaer-anr damqnaeq-eu jeq damqlar-euq mae. Aerkhawf, miqcoeq miqma heughaq-aq, shaq-awr zanq-eu lafkhoer, aqyawf yawdaef daef-eu gharduq kharjav-eu dawqtawvluf dawvanr jir-euq mae.”

Uqduq Tanqnymr Nymrma Yapyav-ir-eu

⁵ Khoerngae, uqduq tanqnymr nymrma-anr jaqdar janrtaq-euq khaqlo loma yawmuiq deuq hawr-eu, damqtaq-euq deuq-anr aqcawq jaluf ngae,

⁶ Yeqsur aer-eu, “Nawmaf mawrluf-eu heudeuq-anr arnan aryamq keuvlar ngae, heugar, khaqlo tiqsiq-euq khoertav tiqsiq maqbi javyafni yabi daepyav dzaejir taef-a.”

Arsaq Saq-eu Aryamq Paelar-euq

⁷ Khoerngae, aqyawfmaf, Yeqsur-anr narhaq-eu, “Saqlaq-or, heudeuq aqmyan pyeuflar-eu la? Heudeuq pyeuflar-eu laer ghae ngae, bisiq bimawr-eu jeq, aqgeu jeq ya’mawr-eu la?”

⁸ Yeqsur heulof-aer aernaeq-euq mae, “Aqcawq nae nawmaf-anr maershuir maqya bi shuirtawvni yanr-awq. Aqjeq mirnae aernar-aq, tsawrhaq ghawqmya’ni ngaq-euq tsawrmyanr-anr ghoeghoe-aer, ‘Ngar-aq, Kali ma’ laer aer-awr, ‘Aryamq dawqpae paele-euq mae’ laer aer taef-a. Khoermirnae, aqyawf maf-euq maeqnan taqcan taeghae.

⁹ Guirdeuv deuvluf-eu gar maqaer, mirkhanq suqsaq luf-eu gar maqaer, nawmaf yagaq ngae guv-eu nuima taqanr. Aqjeq mirnae aernar-aq, heudeuq jeqhu ya pyeuflar-eu mae. Aerkhawf, tiqpov taef-aer arsaq saq-eu aryamq keuvle-eu maqngeur-a.”

¹⁰ Khoeruqtaf, Yeqsur, aqyawf maf-anr heulof-aer aernaeq-euq mae, “Tsawrjeuq tiqjeuq tirjeuq deuvcae cae-awr, mirkhanq tiqkhanq tirkhanq deuvcaecae taef-a.

¹¹ Mirluvluv duiduilar taef-a. Ghawqmya gar maef-awr shuf-eu jeq hawr-eu yawjaw nar-eu jeq keuvle taef-a. Mq-anr nae guvlar paq-aer ghae-eu jeq hawr-eu zawr huiq-eu bisiq bimawr-eu jeq dovle taef-a.

¹² “Aerkhawf, heudeuq dawqtawvluf maq pyeuflar-euq minav-aer, aqcawq, nawmaf-anr nyaef-awr, khaeqlar khavlar taef-a. Aqcawq, nawmaf-anr zanrdawq khawqnymr-anr a’naeq-awr, kuv-anr khawf nyaefur naeqlaf taef-a. Ngaq-euq tsawrmyanr baqda’nae, nawmaf-anr sanqpaq deuq hawr-eu uvlanr-eu deuq-euq maeqshi sheuqghae naeqlaf taef-a.

¹³ Aerkhawf, khoerlof-aer pyeuflar-eu-aq, nawmaf-euq gharduq sarkir kamq-eu aryamq pyeuf-eu mae.

¹⁴ Khoermirnae, aqjox-aer ya aerkhof naeq-eu nga laer, aryamq maq keuvlar-euq minav-aer ngar maq sharnoeq laer, nawmaf yawqha-euq nuima-euq lafkhoer noeqtsaev taq-awq.

¹⁵ Aqjeq mirnae aernar-aq, nawmaf-anr muir-eu tsawrhaq dawqtawvluf pyaer-eu khawf maq pyaernya-aer, lavtsoeq-eu khawf maq lavtsoeq nya-eu dawq hawr-eu zaqsiq tsawrganr, ngar, nawmaf-anr bifnaeq ma.

¹⁶ Nawmaf-euq aqma aqda, maernmr deuq, aqyuif aqnyir hawr-eu cawqdeuq khawf, nawmaf-anr anqdzaq taef-a. Aqyawfmaf, nawmaf tiqpavnav deuq-anr shir-eu gar bikeuv taef-a.

¹⁷ Khoeruqtaf, ngaq-euq tsawrmyanr baqda’nae, tsawrhaq dawqtawvluf nawmaf-anr byae taef-a.

¹⁸ Aerkhawf, nawmaf-euq tsaerkanr tiq kanr taef-aer khawf maqya ga-ir-ar.

¹⁹ Nawmaf orcoer-eu baqda’nae, nawqmaf-euq nuima saflar za taef-a.”

Shaqdui Zanq Duidui-eu Jeq

²⁰ “Yeqlursaqlaeq-anr guirmaf lofjawq taq-euq gar nawmaf ya’mawr ngae, meuq heumeuq meuqtsoeq tsoeq-ir-eu dawqpae paele-euq ngar-a laer siqnya-awq.

²¹ Khoerngae, Yurdav mirkhanq-anr jawr-eu tsawrhaq, gawqjawq-anr caevdav lef-awq. Yeqlursaqlaeq-euq lafkhoer jawr-eu deuq, lafnyir irdov-awr, meuq-euq lafnyir jawr-eu deuq, meuq-anr taq urler.

²² Aqjeq mirnae aernar-aq, khar boftaq-euq khoerdeuq dawqtawvluf byanlarni, arnan aryamq khoer-aq, lafpov povkhof-eu aryamq mae.

²³ Khoerngae yamq-anr, zaq jeuqluf-eu deuq hawr-eu aqcoer dawrzaq-euq aqma deuq ghawqshar shaq-aer ya ghaesaef taef-a. Aqjeq mirnae aernar-aq, mirtsaq-euq khoertav noeqshaq duidui paq-aer ghae-eu jeq keuvle taef-a. Tsawrhaq heudeuq-euq khoertav nuima paer duidui-eu jeq keuvle taef-a.

²⁴ Aqyawfmaf, micaer khaeq-anr yashir taef-a. Aqyawfmaf, mirkhanq yawqkhanq navluf-anr zaqkhav lof-aer yabi nyaefghae taef-a. Aqcawq tsawrjeuq tsawrca deuq, aqyawf maf-euq aryamq byanlar ngae keuvni, Yeqlursaqlaeq-anr nawqtaeqtaq taef-a.”

Tsawrhaq-euq Zaqyo Zafka Le-eu

²⁵ “Khoerngae, nanrma, bala hawr-eu aqguir-anr nae bisiq bimawr-eu jeq dovle taef-a. Mirtsaq-euq khoertav jav-eu mirkhanq dawqtawv luf-euq khoertav shaq-awr zanq-eu jeq keuvle taef-a. Iqmalavshav hawr-eu irkhawr dzae-eu tersar manr duidui-eu mirnae, zanq duidui ler taef-a.

²⁶ Mirtsaq-euq khoertav keuvle teurle-eu laer ghae-eu garkawv deuq-anr tsawrhaqzaq sharnoeq ngae, guv-ir-awr surlar bar-ir taef-a. Aqjeq mirnae aernar-aq, mqtav-euq baoqdeuq nyaenyae-aer ghaelarjir taef-a.

²⁷ Khoerngae, aqyawfmaf, Tsawrhaq-euq Zaqyo baoq hawr-eu zawr huiq-eu yawshaef khanqsaer-euq lafkhoer, mqdmr-anr dziq-awr zafka le-eu gar ya’mawr taef-a. (Dyl 7:13)

²⁸ Heudeuq pyeufdanq baelar ngae, nawmaf uqduq bafleur-awr laftav paw haw-awq. Aqjeq mirnae aernar-aq, nawmaf-anr kakhof-eu jeq dawqpae paelar-euq mae.”

Siqguq Arbawr-anr Haw-awr Yamqlaw Tof-awq

²⁹ Khoernar-aq, Yeqsur, aqyawf maf-anr yawjeq majeq dawq-anr nae heulof-aer ja’naeq-euq mae: “Siqguq arbawr hawr-eu khardaef-eu arbawr deuq-anr haw-awq.

³⁰ Khoerdeuq bawnmq nmqlar-eu gar nawmaf ya’mawr ngae, jawrla yamq dovle shaw-iq ngar-a laer nawmaf yawqha yawqha siqnya-eu mae.

³¹ Khoerlof-aer durni, nawmaf heudeuq pyeuflar luf-eu gar ya’mawr ngae, Miqyaer uvlanr-eu jeq dawqpae paele-euq ngar-a laer siqnya-awq.

³² “Ngar, nawmaf-anr aqdirma-aer aernaeq nyar, heudeuq dawqtawvluf maq pyeuflar-euq khoer-aq, heuzir-euq tsawrhaq maqya shir-ar.

³³ Mqmir byov-ir taef-a. Aerkhawf, ngaq-euq dawq-aq, tiqjeq ghaenae-iq maqbyov-ir-ar.”

Yawbeur Beur-aer Jawr-awq

³⁴ “Nawmaf yawmuiq-aer yanr-awq. Dzaqyaef dawryaef-awr jiryaef tiqjawr-iq maqbeurni, daefzir gharduq khanqlanr-eu baqda’nae, nuima kafduiqni ghae-awr, maqnoeq maqdur-aer jawr ngae, arnan khoernan nawmaf-euq khoertav keuvle taef-a.

³⁵ Arnan khoernan-aq, mirtsaq heusiq siqlanni hawr-eu, tsawrhaq yawqghaq navluf-euq khoertav lanrju lof-aer keuvle taef-a.

³⁶ Khoermirnae, keuvle-eu laer ghae-eu heudeuq dawqtawv luf-anr nawmaf yabuq-ir-awr, Tsawrhaq-euq Zaqyo-euq maeqshi yawf-eu geux-eu tsawrhaq laer bisawxni, nawmaf aqmyanluf guiqlanq sharshar-aer, yawbeur beur-aer jawr-awq.”

³⁷ Yeqsur nan’ghanr paw uqduq tanqnymr nymrma-euq lafkhoer maeqnaeq tsovnaeq-awr, uqcif paw meuq-anr nae dov-ir-awr, Saqloq laer kur-eu gawqjawq-anr jawr-ir-eu mae.

³⁸ Uqshawq yawnaf-aer, tsawrhaq dawqtawvluf, Yeqsur-anr narhaq-eu laer, uqduq tanqnymr nymrma-euq lafkhoer aqyawf jawr-eu gar lar-eu mae.