Luˇkaꞈ 20 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur-euq Aryaq-euq Garkawv Narhaq-eu

¹ Tiqnan-aq, Yeqsur, uqduq tanqnymr nymrma-euq lafkhoer tsawrhaq ghawqmya ni-anr maeqnaeq tsovnaeq-awr, guiqlanqdawq maeqnaeq luf-eu mae. Khoerngae, pirma aqyuif deuq, zanr maeq-eu deuq hawr-eu aqyuif aqtsu deuq naeq-aer tiqkawv lof-aer lar-awr, Yeqsur-anr narhaq-eu,

² “Nawr aryaq aqgeugar nae za-awr heudeuq mrluf-eu le? Aqsur ghaq nae nawq-anr aryaq bifnaeq laf-euq la laer nawr, nga’maf-anr aernaeqlaf sher-eq.”

³ Khoerngae, Yeqsur, aqyawf maf-anr heulof-aer aerkhof naeq-euq mae, “Ngar khawf nawmaf-anr tiq dawq narhaq la. Nawmaf, ngaq-anr aerkhof naeqlaf-awq.

⁴ Yorhaq bartirsaq mrnaeq-eu teu, mq-euq khoertav nae oe-awr bimr-euq la laq? Maqngeur nar-aq, tsawrhaq-anr nae lar-awr mrluf-eu la lor?”

⁵ Khoerngae, aqyawf maf-euq yawkaq jasawx jasawx-aer aer-eu, “Aqdui, ‘Mq-euq khoertav nae oe-euq mae’ laer aernar-aq, aqyawf heulof-aer aerlar taef-a, ‘Tox-aer mar-iq, nawmaf, aqyawf-anr aqjeq mirnae maqjan-eu le?’

⁶ ‘Tsawrhaq-anr nae lar-euq mae’ laer aernar-aq khawf tsawrhaq dawqtawvluf, aqdui-anr khaqlo biqlar taef-a. Aqjeq mirnae aernar-aq, Yorhaq-aq, Miqyaer gharduq ngaeqdan-eu tsawrhaq mae laer aqyawfmaf janduq taq-euq mae.”

⁷ Khoermirnae, aqgeugar nae oe-euq la laer aqyawfmaf maqsiq laer aerkhof naeq-euq mae.

⁸ Khoerngae, Yeqsur aer-eu, “Tox-aer mar-iq, ngar aryaq aqgeugar nae za-awr heudeuq mrluf-eu le laer, ngar khawf nawmaf-anr maq aernaeq.”

Aqgaf Yarkmr Mrpav Pav-euq Deuq

⁹ Khoerngae, Yeqsur, tsawrhaq armaf-anr yawjeq majeq dawq-anr nae heulof-aer maeqnaeq-euq mae: “Tsawrhaq tiq ghaq aqgaf yarkmr tiq kawq mr-awr, aqgaf yarkmr mr-eu deuq-anr ngaqnaeq yaf-awr nae, yawqkhanq yawqmir yawq-anr ghawqmyanrni jawr-ir-euq mae.

¹⁰ Aqgaf arsiq pyav-eu aryamq tsaqlar ngae, aqgaf yarkmr-euq arsiq tiqpavnav deuq, aqyawfmaf, aqyawf-anr bi pyavnaeqni, kuirlaf zaqkhav tiq ghaq-anr khaer-awr aqgaf yarkmr-anr mr-eu deuq jawr-eu gar bile-euq mae. Aerkhawf, aqgaf yarkmr-anr mr-eu deuq, aqyawf-anr diq-awr yawqngaef-aer bighof-ir-euq mae.

¹¹ “Khoernar-aq, kuirlaf zaqkhav yawqghaq yawq-anr parbi le-euq mae. Aqyawfmaf khoerghaq-anr khawf diq-euq uqtaf, shafdawrlar paq-aer janrnaeq-awr, yawqngaef-aer bighof-ir-euq mae.

¹² Khoernar-aq, aqyawf, kuirlaf zaqkhav smr ghaq tiqghaq-anr parbi le-euq mae. Aqyawfmaf khoerghaq-anr khawf lavnar naeq-awr, aqyawf-anr taedov dzae-euq mae.

¹³ “Khoerngae, yarsanr ghaq aer-eu, ‘Ngar aqjox-aer janr-euq paq nga? Ngar zawr gaq-eu ngaq-euq zaqyo-anr bile ma. Aqyawfmaf, ngaq-euq zaqyo-anr mawr ngae yawzeu baw-eu dur.’

¹⁴ Aerkhawf, aqgaf yarkmr-anr mr-eu deuq, aqyawf-anr ya’mawr ngae, aqyawf maf-euq yawkaq aer-eu, ‘Teughaq-aq, jeqbir of-eu ghaq ngar-a. Aqyawf-euq jeqbir aqdui-euq pyeuflarni aqyawf-anr saef kar-eur.’

¹⁵ Khoernar-aq, aqyawfmaf, aqyawf-anr aqgaf yarkmr-euq lafnyir paw taedov ghae-awr saef-euq mae. Khoerngaejawr, yarsanr ghaq, aqyawf maf-anr aqjox-aer janrnaeq-eu jeq la?

¹⁶ Aqyawf ghoflar-awr, aqgaf yarkmr-anr mr-eu khoerdeuq-anr saef-awr nae, yarkmr khoerkmr nuideuq-anr par ngaqnaeq taef-a.” Khoerngae, yagaq-euq deuq aer-eu, “Khoerlof-aer maq pyeuflar khmq-ar.”

¹⁷ Khoerngae, Yeqsur, aqyawf maf-anr hawtsov taq-awr aer-eu, “Tox-aer mar-iq, Yaerbof-euq lafkhoer boftaq-euq dawq heudawq aqjeq-anr aermawf-eu la? ‘Nymr tsov-eu deuq nae bafdzae taq-euq khaqlo khoersiq, lafcoer-euq lozif pyeuflar-euq mae.’ (Jc 118:22)

¹⁸ Khaqlo khoersiq-euq khoertav gadav-euq yawqghaq navluf khaef-ir khoev-ir taef-a. Khaqlo khoersiq nae kharbi gadav-euq tsawrhaq-aq, ya’meur yaloer-ir taef-a.”

Gaersaq-anr Jeq Dovnaeq-eu Garkawv

¹⁹ Zanr maeq-eu deuq hawr-eu pirma aqyuif deuq, Yeqsur-aq, yawjeq majeq dawq-anr nae maeq-eu heu, aqyawf maf-anr ngaeqcoeq mawf-eu nga laer siqnya-eu mirnae, khoerngae yamq-anr nae nar-aq, Yeqsur-anr nyaefmawf-eu mae. Aerkhawf, aqyawfmaf, tsawrhaq baqmaf-anr guv-eu mae.

²⁰ Khoermirnae, Yeqsur-euq dawq-anr yawlaeq nyaef-awr, aqyawf-anr baoq hawr-eu aryaq jav-eu meuqsanr-anr a’naeqni, khoeqsho haw-eu tsawrhaq-anr tsaq-awr dawr-eu tsawrhaq bi janrgeuf-awr, Yeqsur jawr-eu gar bi’ir-euq mae.

²¹ Khoeqsho haw-eu khoerdeuq, Yeqsur-anr heulof-aer narhaq-eu mae, “Saqlaq-or! Nawr-aq, tsaq-awr dawr-eu dawq ngaeq-awr maeq-eu uqtaf, myavpyawq huiqnyir maqtserni, Miqyaer-euq garma yawtsaq yawdawr-euq lafkhoer maeqnaeq-eu mae laer nga’maf siqnya ma.

²² Aqduimaf, sanqpaq Gaersaq-anr jeq tafnaeq-eu tsaq mae laq, maqngeur nar-aq, maqtsaq-a lor?”

²³ Khoerngae, Yeqsur, aqyawf maf-euq jaqmyawf-euq tsawrganr-anr hawdov-awr aqyawf maf-anr narhaq-eu, “Nawmaf, ngaq-anr aqjeq mirnae tsermr-eu le?

²⁴ Ngaq-anr pyur tiq byav bihaw naeqlaf sher-eq. Heugar aqsur ghaq-euq arbar, aqsur ghaq-euq tsawrmyanr anr-eu nga?” Aqyawfmaf aerkhof naeq-eu, “Sanqpaq Gaersaq-euq ngar-a.”

²⁵ Yeqsur, aqyawf maf-anr aernaeq-eu, “Tox-aer mar-iq, sanqpaq Gaersaq-euq myawq-aq, sanqpaq Gaersaq-anr bifnaeq-awr, Miqyaer-euq myawq-aq, Miqyaer-anr bifnaeq-awq.”

²⁶ Aerkhawf, aqyawfmaf, tsawrhaq baqmaf-euq maeqshi, aqyawfmaf nae narhaq-euq dawq khoerdawq-anr yawlaeq maq nyaefza nya-aq. Aqyawf nae aerkhof-euq dawq-anr khawf zanqler-awr ciqcurni jawr-eu mae.

Ghofdaef Lar-eu Garkawv

²⁷ Khoerngae, Saqduqgaer deuq, tsawrhaqzaq ghofdaef lar-eu maqbaw-a laer aer-eu mae. Aqyawfmaf tiqpavnav deuq, Yeqsur jawr-eu gar lar-awr heulof-aer narhaq-eu mae,

²⁸ “Saqlaq-or! Morseq, nga’maf-euq gharduq heulof-aer boftaq-euq mae, ‘Tsawrhaq tiq ghaq, miqzaq sheuq-awr, zaq maq jawrle-euq minav-aer shir-euq nar-aq, ardov ghaq-euq aryoeq za’ni, aqnyir ghaq, aqyawf-euq miqzaq-anr yasheuq-eu mae.’ (Dm 25:5)

²⁹ “Khoerngae, maernmr shif ghaq jawr-eu mae. Aqyuif yuifsaq ghaq miqzaq sheuq-awr, zaq maq jawrle-euq minav-aer shir-euq mae.

³⁰ Nyiq ghaq tiqghaq, zaqmiqzaq khoerghaq-anr sheuq-euq khawf, zaq maq jawrleni shir-euq mae.

³¹ Khoernar-aq, smr ghaq tiqghaq, aqyawf-anr sheuq-euq mae. Khoerlof-aer durni, shif maernmrluf zaqmiqzaq khoerghaq-anr sheuq-awr, zaq maq jawrleni shir-euq mae.

³² Arsaq saqlar ngae, zaqmiqzaq khoerghaq khawf shir-euq mae.

³³ Tox-aer mar-iq, ghofdaeflar ngae nan, zaqmiqzaq khoerghaq aqgeu ghaq-euq miqzaq yapyeuf-eu la? Aqjeq mirnae aernar-aq, shif maernmrluf aqyawf-anr sheuq-euq mae.”

³⁴ Yeqsur, aqyawf maf-anr heulof-aer aerkhof naeq-euq mae, “Heuzir-euq tsawrhaq deuq-aq, sheuqdanq dzaq-awr, smrmir ir-eu mae.

³⁵ Aerkhawf, aqkar karzir hawr-eu shir-awr ghofdaef lar-eu gar geux-eu laer sawxtaq-euq tsawrhaq deuq-aq, sheuqdanq dzaq-eu hawr-eu smrmir ir-eu maqbaw-a.

³⁶ Aqjeq mirnae aernar-aq, aqyawfmaf maq shirnya-aer mqtav ghaqkhaer lof-aer pyeuf taef-a. Aqyawf maf-aq, ghofdaef lar-eu tsawrhaq mirnae, Miqyaer-euq zaq pyeuf taef-a.

³⁷ ‘Sanqpaq Miqyaer-anr Aqbyaqhaq-euq Miqyaer, Irtsav-euq Miqyaer hawr-eu Yaqkov-euq Miqyaer’ (Di 3:6) laer Morseq aer ngae, shir-euq tsawrhaq deuq ghofdaef lar-eu garkawv, aqyawf nae miqdzaq dofluf-eu bawduv-euq garkawv boftaq-euq ardeuv khoerdeuv-anr panmaeq naeqlaf-euq mae.

³⁸ Miqyaer-aq, shir-euq tsawrhaq-euq Miqyaer maqngeur-a. Daefluf-eu tsawrhaq-euq Miqyaer mae. Aqjeq mirnae aernar-aq, aqyawf-euq maeqshi tsawrhaq dawqtawvluf yawdaef mae.”

³⁹ Khoerngae, zanr maeq-eu tiqpavnav deuq aer-eu, “Saqlaq-or! Nawr aer-eu-aq, yawmuiq mir-a.”

⁴⁰ Khoernar-aq, aqyawfmaf, Yeqsur-anr tiqjeq-iq maqpar narhaq peuq-eu mae.

Kali, Aqsur Ghaq-euq Zaqyo La?

⁴¹ Khoerngae, Yeqsur, aqyawf maf-anr heulof-aer aernaeq-euq mae, “Aqcawq aqjox-aer Kali-aq, Daqbir-euq Zaqyo mae laer aernya-eu la?

⁴² Jaceuq-eu sanqbof-euq lafkhoer Daqbir, aqyawfghaq heulof-aer aer-eu mae, ‘Sanqpaq Miqyaer, ngaq-euq Sanqpaq-anr aernaeq-euq,

⁴³ “Ngar, nawq-anr muir-eu deuq, nawq-euq aqkuir cawqtaqduq maqbi pyeuflar-euq khoerkeuvni, ngaq-euq armar paw nuir-awq.” ’ (Jc 110:1)

⁴⁴ Daqbir, aqyawf-anr ‘Sanqpaq’ laer kur-eu ngeur nar-aq, aqyawf aqjox-aer Daqbir-euq Zaqyo par pyeufnya-eu la?”

Yeqsur, Zanr Maeq-eu Deuq-anr Daeq-euq

⁴⁵ Tsawrhaq dawqtawvluf narhaqluf ngae, Yeqsur, aqyawf-euq zaqlanr deuq-anr heulof-aer aernaeq-euq mae,

⁴⁶ “Nawmaf, zanr maeq-eu deuq-anr yanr-awq. Aqyawf maf-aq, paerkhanq paermanr dmdm-aer canmawf-eu mae. Laevkawv doeni aqcawq, aqyawf maf-anr dawqcawq puqlar-eu gar geufmawf-eu mae. Zanrdawq khawqnymr-euq lafkhoer khanqsaer jav-eu nuirduq-anr nuirmawf-awr, yawbuibui ngae, khawrmaer paw nuirmawf-eu mae.

⁴⁷ Aqyawfmaf, miqcoeq miqma-euq nymr-anr khaeqdzaq khavdzaq-eu mae. Aqcawq bimawr-eu gharduq guiqlanq ghawqmanrni shar-eu mae. Tsawrhaq khoerdeuq-aq, aqcawq navmaqtser yarkhaq dar-eu gar yadaq taef-a.”