Luˇkaꞈ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur Daefle-euq

¹ Khoerngae yamq-anr, heulof-aer pyeuflar-euq mae. Mirkhanqzaq dawqtawvluf tsawrmyanr yadawv-eu mae laer sanqpaq Gaersaq Awrgurtuv dawq bif-euq mae.

² Heupov-aq, Surliv-anr Gurleqnir meuqsanr geufluf ngae, tsawrmyanr dawvbae bae-euq pov mae.

³ Tsawrhaq dawqtawvluf tsawrmyanr dawv-eu laer yawqha-euq meuq-anr ir-euq mae.

⁴ Yorsaev khawf, Daqbir-anr tsuif taf-eu arjeuq arca mirnae, Gaqliqlaer mirkhanq-anr jav-eu Naqzaqlaer-anr nae Yurdav mirkhanq-anr jav-eu Baeqlaeqhaeq laer kur-eu Daqbir-euq meuq-anr,

⁵ aqyawf sheuq ma laer aertsaev taq-euq Maqliv naeq-aer tsawrmyanr dawv-ir-euq mae. Khoerngae, Maqliv zaq ciqder le-euq mae.

⁶ Aqyawfnyaf khoergar jawrluf ngae, Maqliv zaq ciq-eu aryamq tsaqlar-awr,

⁷ huqbaw zaqyo baw-awr, builoq loq-awr nae jeqdzar khawrlawq-euq lafkhoer ciqyuf taq-euq mae. Aqjeq mirnae aernar-aq, daqyan yafduq-anr yafkhar maqza-a.

Mqtav Ghaqkhaer Hawr-eu Yawr Bozaq

⁸ Khoerngae, Baeqlaeqhaeq-euq yarpeuq-anr yawr bo-eu tsawrhaq, uqcif paw yawrdeuq-anr lofluf-eu mae.

⁹ Khoerngae, Sanqpaq Miqyaer-euq mqtav ghaqkhaer dovle-awr aqyawf maf-euq dawqpae yawfluf-eu mae. Sanqpaq Miqyaer-euq yawshaef khanqsaer aqyawf maf-euq tiqjawq byale-awr, yawr bo-eu deuq guv duidui-ir-euq mae.

¹⁰ Mqtav ghaqkhaer khoerghaq, aqyawf maf-anr heulof-aer aernaeq-euq mae, “Taqguv! Aqjeq mirnae aernar-aq, tsawrhaq dawqtawv luf-anr taf-eu laqkhaqcaer duiduilar paq-aer ghae-eu garkawv, ngar, nawmaf-anr tsafgaq le-euq ma.

¹¹ Iqnan, Daqbir-euq meuq-euq lafkhoer, nawmaf-anr Kakhof-eu ghaq Sanqpaq Kali daefle-euq mae.

¹² Nawmaf-anr bisiq bimawr paq-aer zaqnanq tiq ghaq-anr builoq loq-awr jeqdzar khawrlawq-euq lafkhoer ciqyuf taq-euq gar ya’mawr taef-a.”

¹³ Khoernar-aq, mqtav-euq guirzaq, baqmaf purjeq-aer japyuqni dovle-awr, mqtav ghaqkhaer khoerghaq naeq-aer Miqyaer-anr jaceuq-eu,

¹⁴ “Gor duidui-eu gar jawr-eu Miqyaer-euq yawshaef khanqsaer huiq luf-ur! Mirtsaq-euq khoertav, aqyawf nuikhanr shir-eu tsawrhaq deuq nuisar of luf-ur!”

¹⁵ Khoernar-aq, mqtav ghaqkhaer khoerdeuq, aqyawf maf-anr ghawq-ir-awr, mqtav ghofdavler ghaq ngae, yawr bo-eu deuq tiqghaq tirghaq cawq-eu, “Aqduimaf, Baeqlaeqhaeq-anr ir-awr, Sanqpaq Miqyaer nae aqdui-anr aernaeq laf-euq lof-aer pyeuflar-euq garkawv khoer-anr haw-ir kar-eur!”

¹⁶ Khoernar-aq, aqyawfmaf yawkawr-aer ir-awr, Maqliv hawr-eu Yorsaev-anr khawf, jeqdzar khawrlawq-euq lafkhoer ciqyuf taq-euq zaqnanq-anr khawf, povmawr-euq mae.

¹⁷ Aqyawfmaf ya’mawr-awr, zaqnanq khoerghaq-euq garkawv mqtav ghaqkhaer nae aer-euq lof-aer jakhawq jabyan ghae-euq mae.

¹⁸ Kharya gaq-euq tsawrhaq dawqtawvluf, yawr bo-eu deuq nae, aqyawf maf-anr ja’naeq-euq dawq-anr zanq duidui ler-eu mae.

¹⁹ Aerkhawf, Maqliv-aq, garkawv khoerdeuq dawqtawvluf nuima-euq lafkhoer juiruiq taq-awr sharnoeq sharsawx-euq mae.

²⁰ Mqtav ghaqkhaer nae aqyawf maf-anr ja’naeq-euq lof-aer, dawqtawvluf yagaq ya’mawr-euq mirnae, yawr bo-eu deuq Miqyaer-anr ciqhuiq ciqmanr-eu lafkhoer jaceuq jaceuq-aer ghof-ir-euq mae.

Yeqsur-anr Zaqmyanr Myanr-awr Miqyaer-anr A’naeq-euq

²¹ Yaef nan byanlar-euq nar-aq, aqyawfmaf, zaqnanq-anr bawkhov maeqdzaq yaeqnaeq ngae, aqyawf-anr Yeqsur laer myanrnaeq-euq mae. Tsawrmyanr heumyanr-aq, aqma-euq uqmav-euq lafkhoer maq tsaevler-euq minav-aer mqtav ghaqkhaer nae myanrtaq-euq mae.

²² Morseq-euq zanrdawq jav-eu lof-aer, mawrdo shawr-eu zanr janr-eu arnan keuvlar ngae, aqnyaf dzerzaq, zaqnanq euq-awr, Yeqlursaqlaeq-anr le-awr nae, Sanqpaq Miqyaer-anr a’naeq-euq mae.

²³ Sanqpaq Miqyaer-euq zanrdawq-euq lafkhoer boftaq-euq lof-aer, “Daefbae baele-euq zaqyo yawqghaq navluf-anr Sanqpaq Miqyaer-euq gharduq yawshawr laer yasawx-eu mae.” (Di 13:2,12,15)

²⁴ Khoeruqtaf, Sanqpaq Miqyaer-euq zanrdawq-euq lafkhoer aertaq-euq lof-aer, “Khaqkhoeq tiq gu maqngeur nar-aq, yarmir khaqkhoeqzaq tiq gu yalawr-eu mae.” (Lb 12:8)

Surmoq Mawrle-eu Jeq Ya’mawr-euq

²⁵ Khoerngae, Yeqlursaqlaeq-anr Surmoq laer kur-eu tiq ghaq jawr-eu mae. Aqyawf-aq, dawrcoeni ghae-awr, Miqyaer-anr yawzeu baw-eu tiq ghaq mae. Aqmyanluf Irsaqleqlav tsawrhaq-anr nuima bi sarlar-eu ghaq oekeuv-eu gar noeqtmq luf-eu mae. Khoeruqtaf, Yawshawr Saflar, aqyawf-euq lafkhoer jawrluf-eu mae.

²⁶ Aqyawf maqshir-euq minav-aer Sanqpaq Miqyaer-euq Kali-anr ya’mawr taef-a laer, Yawshawr Saflar, aqyawf-anr panmaeqnaeq taq-euq mae.

²⁷ Muiq-eu Saflar nae aqyawf-anr bi noeqdov lar-euq mirnae, aqyawf, uqduq tanqnymr nymrma-euq lafkhoer urler-euq mae. Khoerngae nyiqpav-aer, zanrdawq-euq zanrsanrkhof jav-eu lof-aer janrnaeq-eu laer Yeqsur-euq aqma aqda, zaqnanq ciq-awr urlar luf-eu gar tanqpuq-euq mae.

²⁸ Khoerngae, Surmoq, zaqnanq ciq-awr, Miqyaer-anr jaceuq jaceuq-aer heulof-aer aer-eu mae:

²⁹ “Sanqpaq Miqyaer-or! Nymq-mr nawq-euq kuirlaf zaqkhav-anr nuisar of-eu lafkhoer zir jirnya’ni, Nawq-euq dawq aertaq-euq lof-aer pyaeqnaeq laf-euq mir-a.

³⁰ Aqjeq mirnae aernar-aq, ngaq-euq myavnuiv nae nawq-euq kakhof-eu jeq-anr ya mawrghaq-euq ma.

³¹ Tsawrjeuq tsawrca dawqtawv luf-euq maeqshi, Kakhof-eu heujeq nawr lavsav taq-euq mae.

³² Kakhof-eu jeq heu-aq, aqcawq tsawrjeuq tsawrca-anr bya’naeq-eu yawshaef pyeuf-awr, Nawq-euq tsawrjeuq tsawrca Irsaqleqlav tsawrhaq-euq yawshaef khanqsaer mae.”

³³ Yeqsur-euq garkawv khoerlof-aer aer-eu mirnae, zaqnanq-euq aqma aqda zanq duidui ler-euq mae.

³⁴ Surmoq, aqnyaf dzerzaq-anr dawq ngaeqghae naeq-awr, zaqnanq-euq aqma Maqliv-anr bisiq bimawr-eu jeq heulof-aer aernaeq-euq mae, “Zaqnanq heughaq-euq baqda’nae Irsaqleqlav tsawrhaq ghawqmya ghaq coqdzae-ir-awr, ghawqmya ghaq turlar taef-a. Aqyawf-aq, aqcawq yaeqbawq saerlu-aer aerduq pyeuf taef-a.

³⁵ Tsawrhaq ghawqmya ghaq-euq nuima-euq lafkhoer noeqluf-eu deuq pandovlaf taef-a. Nawq-euq nuima saflar-anr micaer tsawvbyoe laf-eu lof-aer ghaelar taef-a.”

Aqna Sarkir Kamq-eu

³⁶ Khoerngae, Aqsaq-euq arjeuq arca Paqnoeqlar-euq zaqmiq Aqna laer kur-eu, Miqyaer gharduq ngaeqdan-eu zaqmiq aqbur tiq ghaq jawr-eu mae. Aqyawf-aq, mawq duidui le-euq mae. Aqyawf miqdaf dafshawr pyeufluf ngae danqdzaq-ir-awr, aqyawf-euq khaqdzerzaq naeq-aer shif khof taef-aer yajawr-awr nae, miqcoeq miqma pyeuf-ir-euq mae.

³⁷ Nymq-mr aqyawf 84 khof khawvlar-euq mae. Aqyawf, uqduq tanqnymr nymrma-anr taef-aer jawrjawr-aer uqcif nan’ghanr maqaer, dzardzaq sheuqsheuq-aer guiqlanq shar-awr Miqyaer-anr uqduq tanqluf-eu mae.

³⁸ Khoerngae nyiqpav-aer aqyawf lar-awr Miqyaer-anr jaceuq-eu mae. Yeqlursaqlaeq-anr kakhof naeqlaf-eu gar noeqtmq luf-eu tsawrhaq dawqtawv luf-anr, aqyawf, zaqnanq khoerghaq-euq garkawv ja’maeq naeq-euq mae.

Naqzaqlaer-anr Ghofler-euq

³⁹ Yorsaev hawr-eu Maqliv, Sanqpaq Miqyaer-euq zanrdawq jav-eu lof-aer dawqtawvluf mrluiv jir-awr, Gaqliqlaer mirkhanq-anr jav-eu aqyawf nyaf-euq meuq Naqzaqlaer-anr ghofler-euq mae.

⁴⁰ Zaq khoerghaq huiqlar-awr, saflar khawf ghaq khavlar-euq uqtaf, zaqsiq tsawrganr tiqbyanni anrlar-awr, Miqyaer-euq guiqlanq yawdzanr khawf, aqyawf-euq khoertav jav-eu mae.

Zaqguq Yeqsur, Uqduq Tanqnymr-anr Jawryaf-euq

⁴¹ Baqsaqkaq yawbui bui-eu aryamq keuvlar-euq nar-aq, aqyawf-euq aqma aqda yawqkhof navluf Yeqlursaqlaeq-anr le-eu mae.

⁴² Aqyawf 12 khof khawv ngae, aqyawf maf-euq zanr jav-eu lof-aer Yeqlursaqlaeq-anr le-awr yawbuibui ler-euq mae.

⁴³ Yawbui bui-eu arnan jir-awr aqyawfmaf ghof-ir ngae, zaqguq Yeqsur-aq, Yeqlursaqlaeq-anr jawryaf-euq mae. Aerkhawf, Yorsaev hawr-eu aqyawf-euq aqma maq siqnya-aq.

⁴⁴ Aqyawf, tsawrhaq armaf mafma deuq naeq-aer ghof-ir luf taef-a laer aqnyaf dzerzaq noeq-awr, tiq nan-euq garma irghaq-awr nae, aqyuif aqnyir hawr-eu siqnya-eu tsawrhaq jawr-eu gar povhaw-euq mae.

⁴⁵ Aerkhawf, maq povmawr nya-eu mirnae, Yeqlursaqlaeq-anr ghofkhof ler-awr aqyawf-anr povler-euq mae.

⁴⁶ Smq nan dzeur-awr, aqyawf, uqduq tanqnymr nymrma-euq lafkhoer jawr-eu gar ya’mawr-euq mae. Aqyawf, saqlaq deuq-euq ghanrcae nuir-awr, aqyawfmaf ngaeq-eu gar narhaq-awr, aqyawf maf-anr kharngeur-eu jeq narhaqtser luf-eu mae.

⁴⁷ Aqyawf ngaeq-eu gar kharya gaq-euq tsawrhaq dawqtawvluf, aqyawf ghovshaw nya-awr ngaeqkhof nya-eu gar zanq duidui ler-eu mae.

⁴⁸ Aqyawf-euq aqma aqda, aqyawf-anr ya’mawr ngae, zanq duidui ler-awr aqyawf-euq aqma aer-eu, “Aqli-or! Aqjeq mirnae nawr, nga’nyaf-anr heulof-aer janrnaeq laf-eu le? Nawqda nga’nyaf khanqlanr duidui-eu lafkhoer nawq-anr povluf-eu ma.”

⁴⁹ Khoerngae, Yeqsur aerkhof naeq-eu, “Aqjeq mirnae ngaq-anr povluf-eu le? Ngar, ngaqDa-euq nymr-anr yajawr-eu mae laer nawnyaf maq siqnya-eu le lor?”

⁵⁰ Aerkhawf, aqyawf aer-eu dawq-anr aqyawfnyaf maq ghovshaw nya-a.

⁵¹ Khoernar-aq, aqyawf, aqyawfnyaf naeq-aer Naqzaqlaer-anr ghofler-awr, aqyawf nyaf-euq lafov yawmuiq-aer jawr-euq mae. Aqyawf-euq aqma-aq, garkawv khoerdeuq dawqtawvluf nuima-euq lafkhoer juiruiq taq-euq mae.

⁵² Yeqsur-aq, zaqsiq tsawrganr hawr-eu mawrdo huiqlar-awr, Miqyaer khawf, tsawrhaqzaq khawf, aqyawf-anr ghoer mr-eu mae.