Luˇkaꞈ 19 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur Hawr-eu Saqgaer

¹ Khoerngae, Yeqsur, Yeqlirkor-anr ur-ir-awr cantsaev ghaeluf-eu mae.

² Khoergar, Saqgaer laer kur-eu jeq taf-eu aqyuif geuftaq-euq, smrmuiq smrbaw tiq ghaq jawr-eu mae.

³ Yeqsur aqjox-aer ghae-eu tiq ghaq nga laer siqmawf mawrmawf-eu mirnae, aqyawf haw-ir-euq khawf, tsawrhaq ardzaeq-aer myaq-awr, aqyawf-euq mawrdo khawf yaw’aw mirnae maq hawmawr nya-a.

⁴ Khoermirnae, Yeqsur-anr ya’mawrni maeqhu paw caevghae-awr, siqpuv arbawr-anr davler-euq mae. Aqjeq mirnae aernar-aq, Yeqsur khoergar nae ya cantsaev-eu mae.

⁵ Yeqsur khoergar oekeuv ngae, ghawrleur-awr aqyawf-anr haw-awr aernaeq-eu, “Saqgaer-or! Yawkawr-aer zafka le-awq. Iqnan ngar, nawq-euq nymr-anr yayaf nga.”

⁶ Aqyawf yawkawr-aer zafka le-awr, Yeqsur-anr laqkhaq caertavni hageuf-euq mae.

⁷ Tsawrhaq dawqtawvluf khoer-anr ya’mawr ngae jabu jadoer-awr aer-eu, “Aqyawf, iqbaxzaq-euq daqyan geuf-ir-eu nga.”

⁸ Khoerngae, Saqgaer gawqyawf yawf-awr, Sanqpaq Yeqsur-anr aernaeq-eu, “Sanqpaq-or! Haeq! Ngar kharjav-eu yawqjeq navluf tiq pav, irshaqzaq-anr bif ma. Ngar tiqghaq nav-anr myawfdzaq taq-euq jav nar-aq, oeq myav tsoeqkhofnaeq ma.”

⁹ Yeqsur, aqyawf-anr heulof-aer aernaeq-euq mae, “Iqnan nymr heunymr-anr kakhof-eu jeq keuvle-euq mae. Aqjeq mirnae aernar-aq, aqyawf khawf Aqbyaqhaq-euq zaq tiq ghaq mae.

¹⁰ Tsawrhaq-euq Zaqyo-aq, byov-ir-euq tsawrhaq-anr pov-awr bibuq-ir-eu gharduq oe-euq ma.”

Dzoeqdzaq Of-eu Sanqpaq Tiq Ghaq

¹¹ Aqyawfmaf dawq khoerdeuq-anr narhaqluf ngae, Yeqsur, Yeqlursaqlaeq-euq dawqpae lekeuv-euq baqda’nae, Miqyaer uvlanr-eu jeq tiqpov taef-aer keuvle-eu paq laer aqyawfmaf noeqluf-eu mae. Khoerngae, Yeqsur, aqyawf maf-anr yawjeq majeq dawq-anr nae heulof-aer maeqnaeq-euq mae.

¹² Khoermirnae, Yeqsur heulof-aer aernaeq-euq mae, “Tsawrhuiq tsawrma tiq ghaq garmanr kaq-eu mirkhanq-anr ir-awr, mirkhanq-anr uvlanr-eu dzoeqdzaq hageuf laq-ir-euq mae.

¹³ Aqyawf ir-eu laer ghae ngae, aqyawf, kuirlaf zaqkhav tser ghaq-anr kur-awr, tiq ghaq-anr pyur tiq khor bif-awr aernaeq-eu, ‘Ngar ghoflar ngae keuvni jeqgaf gaf-awq.’

¹⁴ “Aerkhawf, aqyawf-euq mirkhanq-euq zaqlanr deuq, aqyawf-anr byae-eu mirnae, aqyawf-euq maeqnan aqyawf maf-euq danzar khaerghae-awr heulof-aer bitsaf-ir-euq mae, ‘Nga’maf heughaq nae maqbi uvlanrmawf nya.’

¹⁵ “Aqyawf, mirkhanq teq-eu dzoeqdzaq za-awr ghoflar ngae, pyur biftaq yaf-euq kuirlaf zaqkhav khoerdeuq, aqyawf ghaq aqyawf armyavni gafjeuq taq-euq nga laer yasiqni, dawq bif-awr bi kurlaf-euq mae.

¹⁶ Yawbae ghaq lar-awr aer-eu, ‘Sanqpaq-or! Ngar, nawq-euq pyur khoerkhor nae tser khor gafjeuq-euq ma.’

¹⁷ Sanqpaq aer-eu, ‘Yawmuiq ngar-a. Kuirlaf zaqkhav yawmuiq ghaq-or! Nawr yawnyir jeq mr ngae sarjax zif-eu mirnae, meuq tser meuq-anr uvlanr-eu aryaq bifnaeq ma.’

¹⁸ “Nyiq ghaq tiqghaq lar-awr aer-eu, ‘Sanqpaq-or! Ngar, nawq-euq pyur khoerkhor nae ngaq khor gafjeuq-euq ma.’

¹⁹ Khoerlof-aer durni, sanqpaq, aqyawf-anr aernaeq-eu, ‘Nawr, meuq ngaq meuq-anr uvlanr-awq.’

²⁰ “Khoernar-aq, tiq ghaq parlar-awr heulof-aer aer-eu mae, ‘Sanqpaq-or! Haeq, nawq-euq pyur khoerkhor, ngaq nae parjae yur-awr toevkaq taq-awr bijav-euq ma.

²¹ Nawr-aq, zawr zir-eu tiq ghaq pyeuf-eu gar, ngar, nawq-anr guv-eu mirnae, heulof-aer janr-euq ma. Nawr-aq, nawq nae maqbif-euq gar yur-awr, nawq nae maqsaeq-euq gar yaeq-eu tsawrhaq mae.’

²² Khoerngae, sanqpaq, aqyawf-anr heulof-aer aernaeq-euq mae, ‘Zawr cawv-eu kuirlaf zaqkhav-or! Nawq-euq khaqmae-anr nae dovle-euq dawq nae ngar, nawq-anr yarkhaqdar ma. Ngar-aq, zawr zir-eu tiq ghaq pyeuf-awr, ngaq nae maqbif-euq gar yur-awr, ngaq nae maqsaeq-euq gar yaeq-eu mae laer nawr siqnya-eu jeq mar-iq,

²³ Aqjeq mirnae ngaq-euq pyur teukhor jirjeuq za-eu pyur taqduq-anr maq dawvanr-ir-euq le? Dawvanr-ir-euq lawnmr-aq, ngar ghoflar ngae, ngar, ngaq-euq pyur jeqma hawr-eu jirjeuq khawf za taef-a.’

²⁴ “Khoernar-aq, aqyawf-euq dawqpae yawfluf-eu deuq-anr aernaeq-eu, ‘Aqyawf-euq pyur khoerkhor yurdov-awr, pyur tser khor anr-eu ghaq-anr bifnaeq-awq.’

²⁵ (Aqyawfmaf aerkhof naeq-eu, ‘Sanqpaq-or! Aqyawf pyur tser khor anr-eu mae.’)

²⁶ “ ‘Aqjeq mirnae aernar-aq, ngar, nawmaf-anr aernaeq nyar, jav-eu tsawrhaq yawqghaq navluf-anr par biflanq naeq-awr, maqjav-eu tsawrhaq-anr-aq, aqyawf kharjav-eu jeq khawf yabi yurdovjir taef-a.

²⁷ Khoeruqtaf, ngaq-anr muir-awr, ngaq-anr aqyawf maf-euq khoertav maqbi uvlanr mawf-eu deuq-anr sheuqlaf-awr ngaq-euq maeqshi saef-awq.’ ”

Yeqsur, Yeqlursaqlaeq-anr Urler-euq

²⁸ Khoerngae, Yeqsur khoerlof-aer aerghaq-awr, maeqhuq huq-awr nae Yeqlursaqlaeq-anr davler-euq mae.

²⁹ Khoerngae, heulof-aer pyeuflar-euq mae. Baerpaqjeq pu hawr-eu Beqtaqnir pu-euq dawqpae jav-eu Saqloq gawqjawq laer kur-eu khoerjawq-anr lekeuv ngae, aqyawf-euq zaqlanr nyiq ghaq-anr khaer-awr heulof-aer aernaeq-euq mae,

³⁰ “Nawnyaf maeqhu paw jav-eu pu-anr ir de-eq. Irur ngae, tsawrhaq tiqghaq-iq maq dziqhaw-euq manq tanqlavzaq tiq mawr paftawf taq-euq gar ya’mawr taef-a. Tseuvpuir-awr heugar tsanrlaf-awq.

³¹ ‘Aqjeq mirnae tseuvpuir-eu le’ laer tiqghaqnav narhaqlar nar-aq, ‘Sanqpaq mawf-eu nya jer’ laer aernaeq-awq.”

³² Bi khaerghae-euq khoer nyiq ghaq irkeuv ngae, Yeqsur nae aqyawf nyaf-anr kharaer-euq lof-aer ya’mawr-euq mae.

³³ Aqyawfnyaf manq tanqlavzaq-euq arcav tseuvpuirluf ngae, manq tanqlav-euq yawsanr deuq, aqyawf nyaf-anr narhaq-eu, “Aqjeq mirnae manq tanqlavzaq-anr tseuvpuir luf-eu le?”

³⁴ Khoerngae, aqyawfnyaf aer-eu, “Sanqpaq mawf-eu nya jer.”

³⁵ Khoernar-aq, aqyawfnyaf, Yeqsur jawr-eu gar tsanrlaf-euq mae. Manq tanqlavzaq khoermawr-euq khoertav, aqyawfmaf yawqha-euq maeqtsoeq laevdav-awr, Yeqsur-anr bi dziqler-euq mae.

³⁶ Aqyawf irluf ngae, tsawrhaq ghawqmya’ni yawqha-euq maeqtsoeq garma-anr khawq-eu mae.

³⁷ Aqyawf, Yeqlursaqlaeq-euq dawqpae, Saqloq gawqjawq-euq gartoeq-anr irkaluf ngae, zaqlanr baqmaf maflan-aer aqyawfmaf nae ya’mawr-euq baoq huiq-eu lafkhoer mr-euq yawqjeq navluf-euq baqda’nae, danqbae-awr laqkhaq caertavni tersar yawkhav-aer Miqyaer-anr jaceuq jaceuq-aer aer-eu,

³⁸ “ ‘Sanqpaq Miqyaer-euq tsawrmyanr-euq uqmov oeluf-eu Sanqpaq-anr jaceuq-awq.’ Mq-euq khoertav nuisar of-eu jeq jav luf-ur. Gor duidui-eu gar yawshaef khanqsaer jav luf-ur.” (Jc 118:26)

³⁹ Tsawrhaq armaf mafma-euq lafkhoer keuq-eu Paqliqsaer tiqpavnav deuq, Yeqsur-anr aernaeq-eu, “Saqlaq-or! Nawq-euq zaqlanr deuq-anr daeqnaeq sher-eq.”

⁴⁰ Khoerngae, Yeqsur aerkhof naeq-eu, “Ngar, nawmaf-anr aernaeq nyar, tsawrhaq heudeuq ciqcurni jawr nar-aq, tiqpov taef-aer khaqlo heudeuq gurdovlaf taef-a.”

Yeqlursaqlaeq-euq Gharduq Ngoer-euq

⁴¹ Khoerngae, Yeqsur, Yeqlursaqlaeq-euq dawqpae lekeuv-awr, meuq-anr ya’mawr ngae, khoermeuq-euq gharduq tsawrngoer ngoerngoer-aer heulof-aer aer-eu mae:

⁴² “Yeqlursaqlaeq-or! Iqnan nae nawq-anr nuisar biof-eu jeq-anr nawr siqnya lawnmr-aq muiq-eu mae. Aerkhawf, nymq-mr-aq, nuisar biof-eu jeq khoer-anr nawq-euq myavnuiv-anr nae zaftaq-euq mae.

⁴³ Nawq-anr muir-eu deuq, nawq-euq tiqjawq lanr ciq-awr, nawq-anr yawqpaw navluf lofjawq-awr taesuf lar-eu arnan keuvle taef-a.

⁴⁴ Nawq-anr muir-eu deuq, nawr hawr-eu nawq-euq lafkhoer jawr-eu nawq-euq zaqdeuq-anr mirtsa dini lavcawvjir naeqlaf taef-a. Nawq-euq lafkhoer anr-eu khaqlo deuq khawf tiqsiq-euq khoertav tiqsiq maqbi javyaf-eu gar keuvni janrnaeqlaf taef-a. Aqjeq mirnae aernar-aq, Miqyaer, nawq-anr hawle-euq aryamq-anr nawr maq siqnya-eu beu!”

Uqduq Tanqnymr Nymrma Lavshawr-euq

⁴⁵ Khoernar-aq, Yeqsur, uqduq tanqnymr nymrma-anr urler-awr, lafkhoer paw myawq anq-awr myawq zeurluf-eu tsawrhaq-anr, danqbae-awr taedzae-euq mae.

⁴⁶ Yeqsur, aqyawf maf-anr aernaeq-eu, “ ‘Ngaq-euq nymr-aq, guiqlanq shar-eu nymr pyeuf-eu mae’ (Isy 56:7) laer boftaq-euq khawf, nawmaf-aq, nymr heunymr-anr ‘Smrkhoeq tanrjoe-euq jawrduq’ bi pyeuflar taq-euq nga.”

⁴⁷ Yeqsur nan-anr nae uqduq tanqnymr nymrma-euq lafkhoer maeqnaeq tsovnaeq luf-eu mae. Pirma aqyuif deuq, zanr maeq-eu deuq hawr-eu mirkhanqzaq-euq aqyuif aqtsu deuq, aqyawf-anr saef-eu laer jawqluf-eu mae.

⁴⁸ Aerkhawf, tsawrhaq dawqtawvluf, aqyawf-anr yawmuiq-aer narhaq luf-eu mirnae, aqyawfmaf tiqjeq-iq maq janrnya-a.