Luˇkaꞈ 17 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Sanqtif Bi Tiflar-eu Garkawv

¹ Khoernar-aq, Yeqsur, zaqlanr deuq-anr heulof-aer par aernaeq-euq mae: “Maeqhu paw sanqtif tiflar-eu jeq ya’mawr taef-a. Aerkhawf, aqcawq-anr sanqtif bitifni mr-eu ghaq-aq, ghawqshar shaq-aer ya ghaesaef taef-a.

² Tsawrhaq khoerghaq, zaq yawnyir heudeuq-euq lafkhoer tiqghaq nav-anr bi mrlaeq-eu navmaqtser, aqyawf-euq kawqlanr-anr lolaeq paftawf-awr, iqmalavshav-anr bafpuf-eu-aq, aqyawf-euq gharduq muiqdzaeq-eu mae.

³ “Nawmaf yawqhar yawqha yawmuiq-aer hawpir-awq. Nawq-euq maernmr, nawq-anr mrlaeq-euq nar-aq, aqyawf-anr toeqmaeq naeq-awq. Aqyawf noeqpov noeqpar nar-aq, aqyawf-euq iqbax pyaeqnaeq-awq.

⁴ Tiq nan-euq lafkhoer taef-aer aqyawf, nawq-anr shif pov keuvni mrlaeq-awr, ‘Ngar noeqpov noeqpar ma’ laer shif pov keuvni aerlar nar-aq, nawr, aqyawf-euq iqbax yawqpov navluf ya pyaeqnaeq-eu mae.”

Jan-eu Jeq

⁵ Khoerngae, ghaqkhaer deuq, Sanqpaq Yeqsur-anr shar-eu, “Nga’maf-euq nuijan myaqlarni janrnaeq laf-awq.”

⁶ Khoerngae, Yeqsur aer-eu, “Nawmaf jan-eu jeq ghawqpaf arnuiv huini anr nar-aq, nawr, boeqdzar arbawr heubawr-anr, ‘Nawq-euq duqcir gheudov-awr, iqmalavshav-anr daef-ir-awq’ laer aernaeq ngae, boeqdzar arbawr heubawr nawmaf-euq dawq narhaq taef-a.”

Kuirlaf Zaqkhav-euq Gardeuq

⁷ “Nawq-euq kuirlaf zaqkhav daema tsaeq-ir-euq maqngeur nar-aq, yawr bo-ir-euq ghoflar ngae, ‘Yawkawr-aer jawq-awr dzaqlar-awq’ laer nawmaf-euq lafkhoer tiqghaqnav aqyawf-anr aernaeq ma lor?

⁸ ‘Ngaq-euq gharduq cifhawq laeqhmq-awq. Ngar dzaqdaev dawrdaev ngae keuvni jofpaf paf-awr ngaq-anr bosav naeqlaf-awq. Ngar dzaqghaq-awr nae taef-aer nawr dzaq lawq’ laer kuirlaf zaqkhav khoerghaq-anr aernaeq-eu maqngeur-a laq?

⁹ Kuirlaf zaqkhav khoerghaq, yawsanr ghaq khaer-euq lof-aer mr-eu mirnae, yawsanr ghaq, aqyawf-anr guiqlanqhuiq ma laer aernaeq taef-a lor? Maq, ngar teulof-aer maq noeqnya.

¹⁰ Khoerlof-aer durni, nawmaf khawf nawmaf-anr khaer-euq yawqjeq navluf mrluivjir ngae, ‘Nga’maf-aq, gardanr maqtsoeq-eu kuirlaf zaqkhav deuq ma. Nga’maf-anr dar-eu gardeuq-anr nga’maf mrjir-euq ma’ laer aer-awq.”

Coiqdoi Nar-eu Tser Ghaq-anr Bi Taqler-euq

¹¹ Yeqsur, Yeqlursaqlaeq-anr leluf ngae, Saqmaqliv mirkhanq hawr-eu Gaqliqlaer mirkhanq-euq mirkaq-anr canpav luf-eu mae.

¹² Yeqsur, pu tiq pu-anr urlerluf ngae, coiqdoi nar-eu tser ghaq garmanr kaq-eu gar yawf-awr, Yeqsur-anr ya’mawr-euq mae.

¹³ Aqyawfmaf tersar yawkhav-aer gur-eu, “Yeqsur-or! Yawsanr-or! Nga’maf-anr ghawqshaq gaqnaeq laf-awq.”

¹⁴ Yeqsur, aqyawf maf-anr ya’mawr ngae aernaeq-eu, “Nawmaf-euq mawrdo-anr pirma nae bihaw-ir-awq.” Aqyawfmaf leluf ngae shawrlar-euq mae.

¹⁵ Aqyawf maf-euq lafkhoer-euq tiq ghaq, aqyawf taqler-euq gar ya’mawr ngae, ghofdmr dzaelar-awr, tersar yawkhav-aer Miqyaer-anr ciqhuiq ciqmanr-eu mae.

¹⁶ Khoeruqtaf, Yeqsur-euq aqkuir-euq dawqpae awbyav taq-awr, Yeqsur-euq guiqlanq-anr jaceuq-eu mae. Tsawrhaq khoerghaq-aq, Saqmaqliv tsawrhaq mae.

¹⁷ Khoerngae, Yeqsur heulof-aer aer-eu mae, “Shawrlar-euq tsawrhaq tser ghaq maqngeur-a lor? Khoer ghoeq ghaq aqlaeq?

¹⁸ Aqcawq tsawrjeuq tsawrca heughaq maqngeur nar-aq, ghofdmr dzaelar-awr, Miqyaer-anr jaceuq lar-eu tiqghaq-iq maqjawr-a laq?”

¹⁹ Khoernar-aq, Yeqsur, aqyawf-anr aernaeq-eu, “Tur-awr ghof-ir-awq. Nawr jan-eu jeq, nawq-anr bi taqler-euq mae.”

Miqyaer Uvlanr-eu Jeq Keuvle-eu

²⁰ Khoerngae, Paqliqsaer deuq narhaq-eu, “Miqyaer uvlanr-eu jeq aqmyan keuvle-eu la?” Yeqsur heulof-aer aerkhof naeq-euq mae, “Miqyaer uvlanr-eu jeq keuvle-eu-aq, myavnuiv nae mawrnya-eu jeq maqngeur-a.

²¹ ‘Hawsher-eq. Heugar jav nga. Hawsher-eq. Khoergar jav mae’ laer khawf, aqcawq maqaer nya-ar. Aqjeq mirnae aernar-aq, hawsher-eq, Miqyaer uvlanr-eu jeq-aq, nawmaf-euq lafkhoer anrluf-eu mae.”

²² Yeqsur, zaqlanr deuq-anr heulof-aer par aernaeq-euq mae, “Nawmaf, Tsawrhaq-euq Zaqyo-euq arnan-anr mawrmawf-eu aryamq keuvle taef-a. Aerkhawf, maqya mawr-ar.

²³ ‘Heugar hawlar-awq. Khoergar haw-ir-awq’ laer aqcawq, nawmaf-anr aerlar ngae, nawmaf taqhaw-ir. Aqyawf maf-euq maeqnan khawf taq cantae.

²⁴ Aqjeq mirnae aernar-aq, mq tiqpawdzer mqmyawf myawf-eu yawqdzer yawq-anr byakeuv-ir-eu lof-aer, Tsawrhaq-euq Zaqyo-aq, aqyawf-euq arnan keuvle ngae khoerlof-aer ghae taef-a.

²⁵ Aerkhawf, yawbae jeq-aq, aqyawf khaeq-awr khav-eu ghawqmya jeq-anr yadaq-awr heuzir-euq tsawrhaq, aqyawf-anr byaerdzae taef-a.

²⁶ Noraq-euq arnan-anr aqjox-aer pyeufyaf-euq ngeur nar-aq, Tsawrhaq-euq Zaqyo-euq arnan-anr khawf, khoerlof-aer pyeuflar taef-a.

²⁷ Noraq, lawq lawqma-euq lafkhoer urler-awr, ircuf danqpymq lar-awr aqyawfmaf dawqtawv luf-anr lavcawv ngae nan keuvni, aqyawfmaf dzaqluf dawrluf-eu uqtaf, miqzaq sheuq, smrmir irluf-eu mae.

²⁸ Lortav-euq zir-anr khawf pardur-eu mae. Aqyawfmaf dzaqluf dawrluf, anqluf zeurluf, kadzaq kadawr luf-awr, nymr tsovluf-eu mae.

²⁹ Aerkhawf, Lortav, Sordoq-anr nae dov-ir ngae nan, mq-anr nae miqdzaq hawr-eu miqdzar dzarshuir gale-awr, aqyawfmaf dawqtawv luf-anr lavcawv jir-euq mae.

³⁰ Tsawrhaq-euq Zaqyo-anr bi dovle ngae nan khawf, khoerlof-aer dur taef-a.

³¹ “Khoerngae nan, nymrmq-anr dav-eu tsawrhaq, myawq, irkanr-euq lafkhoer jav nar-aq, myawq laq-ir-eu laer taq zafka-ir. Khoerlof-aer durni, yarngae jawr-eu tsawrhaq khawf, irkanr taq ghofler.

³² Lortav-euq miqzaq-anr noeqmawr-awq de-eq.

³³ Aqsur ghaq maqkaq, yawqha-euq daefzir buq-ir ni laejae nar-aq, yawqha-euq daefzir smq taef-a. Aqsur ghaq maqkaq, yawha-euq daefzir bismq nar-aq, yawqha-euq daefzir-anr jeqhmqnya taef-a.

³⁴ “Ngar, nawmaf-anr aernaeq nyar, khoerngae mir, zaqyo aqli nyiq ghaq yufzar tiqgar taf-awr yufluf ngae, tiq ghaq-anr sheuqdav-awr, tiq ghaq-anr bi jawryaf taef-a.

³⁵ Zaqmiq aqbur nyiq ghaq tiqkawv lof-aer caermeu laeqluf-eu gar, tiq ghaq-anr sheuqdav-awr, tiq ghaq-anr bi jawryaf taef-a.

³⁶ Tsawrhaq nyiq ghaq yarngae jawrluf-eu gar, tiq ghaq-anr sheuqdav-awr, tiq ghaq-anr bi jawryaf taef-a.”

³⁷ Khoerngae, zaqlanr deuq narhaq-eu, “Sanqpaq-or! Aqgeugar pyeuflar-eu la?” Yeqsur aer-eu, “Shirtaq-euq mawrdo kharjav-eu gar, jeqshir khaqdzer uiqle taef-a.”