Luˇkaꞈ 10 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Zaqlanr 70 Ghaq-anr Khaerghae-euq

¹ Khoernar-aq, Sanqpaq Yeqsur, zaqlanr nuideuq 70 ghaq-anr tsaqtsov-awr, aqyawf kharir-eu laer ghae-eu meuqdeuq pudeuq-anr, tiqpaw nyiq ghaq nyiq ghaq-aer aqyawf-euq maeqhu bi’ir-euq mae.

² Khoerngae, Yeqsur, aqyawf maf-anr heulof-aer aernaeq-euq mae, “Caer yaeqder lar-euq ghawqmya’ni jav-eu khawf, caer yaeq-eu tsawrhaq yawcuiv nga. Khoermirnae, aqyawf-euq caeryar-anr caer yaeq-eu tsawrhaq bi oeni, nawmaf caeryar-euq Yawsanr ghaq-anr shar-awq.

³ Nawmaf ir-awq. Hawsher-eq, ngar, nawmaf-anr khaqyaer baqmaf-euq tsanq-anr yawrzaq pyaequr ghae-eu lof-aer, khaerghae-eu ma.

⁴ Pyur pawqbaev, paertanr hawr-eu saeqnawv taq yurghae. Garpaer canluf ngae, aqcawq-anr dawqcawq puqpuq-aer taqjawr.

⁵ Nymr aqgeu nymr-anr davler-eu maqkaq, ‘Nymr heunymr-euq khoertav nuisar of-eu jeq keuvle luf-ur’ laer jeqhu aer-awq.

⁶ Khoergar nuisar-euq zaq jawr nar-aq, nawmaf-euq nuisar of-eu jeq aqyawf-euq khoertav keuv-ir taef-a. Maqjawr nar-aq, nawmaf-anr ghofkhoflar taef-a.

⁷ Nawmaf, nymr khoernymr-anr taef-aer jawr-awr, aqyawfmaf nae kharbi dzaq kharbi dawr-eu jeq-anr dzaq-awr dawr-awq. Aqjeq mirnae aernar-aq, gar mr-eu tsawrhaq-aq, ghaqgarpoeq za-eu geux mae. Yawqnymr yawq-anr taq davpar-ir.

⁸ “Nawmaf, meuq aqgeu meuq-anr ur-ir-eu maqkaq, aqyawfmaf, nawmaf-anr hageuf naeqlaf nar-aq, khar ciqdav naeqlaf-euq jeq dzaq-awq.

⁹ Meuq khoermeuq-anr jawr-eu, nar-awr gawr-eu tsawrhaq deuq-anr lavtaq naeq-awr, ‘Miqyaer uvlanr-eu jeq nawmaf-euq dawqpae keuvle taq-euq mae’ laer aernaeq-awq.

¹⁰ Meuq aqgeu meuq-anr ur-ir-eu maqkaq, aqyawfmaf, nawmaf-anr maq hageuf naeqlaf nar-aq, meuq khoermeuq-euq garjawq-anr yawf-awr heulof-aer aer-awq,

¹¹ ‘Nga’maf-euq aqkuir-anr laeflar-euq nawmaf-euq meuq-euq khaqlaer, nawmaf-euq maeqshi sawvkharyaf ma. Aerkhawf, Miqyaer uvlanr-eu jeq nawmaf-euq dawqpae paele-euq ngar-a laer nawmaf siqnya-awq.’

¹² Ngar, nawmaf-anr aernaeq nyar, arnan khoernan-anr, Sordoq navmaqtser meuq khoermeuq yadaq taef-a.

Maqjan-eu Meuqdeuq

¹³ “Kawrlaqseq-or! Nawr ghawqshar shaq-aer ya ghaesaef taef-a. Baeqdzerdaq-or! Nawr ghawqshar shaq-aer ya ghaesaef taef-a. Aqjeq mirnae aernar-aq, nawmaf-euq lafkhoer mr-euq baoq khav duidui-eu gardeuq, Durlu meuq hawr-eu Sirdoq meuq-euq lafkhoer mr-euq lawnmr-aq, aqyawfmaf arhu nae guqdar paerzeur dm-awr, khaqlaer tsanq-anr nuir-awr noeqpov noeqpar taef-a.

¹⁴ Aerkhawf, yarkhaqdar ngae nan, Durlu meuq hawr-eu Sirdoq meuq-aq, nawmaf nav-aer maqya daq-ar.

¹⁵ Gaqbeqneqoq-or! Nawr-aq, mq-anr tuvni bi ciqgor taq-euq khawf, shir-eu mirkhanq-anr yabi gheu’anrghae taef-a.

¹⁶ Nawmaf-euq dawq narhaq geuf-eu tsawrhaq-aq, ngaq-euq dawq narhaq geuf-eu mae. Nawmaf-anr byaerdzae-eu tsawrhaq-aq, ngaq-anr byaerdzae-eu mae. Ngaq-anr byaerdzae-eu tsawrhaq-aq, ngaq-anr bi’oe-euq ghaq-anr byaerdzae-eu mae.”

Zaqlanr 70 Ghaq Ghoflar-euq

¹⁷ Khoerngae, zaqlanr 70 ghaq laqkhaq caertavni ghoflar-awr aer-eu, “Sanqpaq-or! Nga’maf, nawq-euq tsawrmyanr-anr ghoe ngae, naefdeuq khawf nga’maf-euq aerdawq narhaq-eu mae.”

¹⁸ Yeqsur, aqyawf maf-anr heulof-aer aernaeq-euq mae, “Ngar, naef Saqdaq mqmyawf myawf-eu lof-aer mq-anr nae gale-eu gar mawr-euq ma.

¹⁹ Ngar, nawmaf-anr arlawr hawr-eu boeqkaqlaqma-anr nawqtaeq nya-awr, nawmaf-anr muir-eu deuq-euq baoq dawqtawv luf-anr ghaqler nya’ni, aryaq bif-euq ma. Nawmaf-anr lavtanq lavnar nya-eu tiqjeq-iq maqjav-ar.

²⁰ Aerkhawf, naefdeuq, nawmaf-euq aerdawq narhaq-eu mirnae laqkhaq taqcaer. Mq-euq khoertav nawmaf-euq tsawrmyanr bofanr taq-euq mirnae laqkhaq caer-awq.”

Yeqsur Laqkhaq Caer-eu

²¹ Khoerngae, Yeqsur, Yawshawr Saflar-euq baqda’nae laqkhaq caer-awr heulof-aer aer-eu mae: “Mq hawr-eu mir-euq Yawsanr pyeuf-eu Aqda-or! Ngar, nawq-anr jaceuq ma. Aqjeq mirnae aernar-aq, nawr, zaqsiq tsawrganr anr-eu tsawrhaq hawr-eu noeqdanr doe-eu tsawrhaq-anr nae garkawv heudeuq zaftaq-awr, zaqnanq deuq-anr panmaeq naeq-euq mae. Aqda-or! Heu-aq, nawr nuima tsaq-eu jeq pyeuf-eu mae.

²² Heudeuq dawqtawvluf ngaqDa nae, ngaq-anr bifnaeq laf-euq mae. Aqda maqngeur nar-aq, Zaqyo aqsur ghaq-a laer tiqghaq-iq maq siqnya-a. Zaqyo hawr-eu Zaqyo panmaeqnaeq mawf-eu tsawrhaq maqngeur nar-aq, Aqda aqsur ghaq-a laer tiqghaq-iq maq siqnya-a.”

²³ Khoerngae, Yeqsur, zaqlanr deuq jawr-eu paw ghawrpyawr-awr, aqyawf maf-anr taef-aer ciqcurni heulof-aer aernaeq-euq mae, “Nawmaf nae ya’mawr-euq deuq-anr ya’mawr-euq myavnuiv-aq, guiqlanq huiq-eu mae.

²⁴ Ngar, nawmaf-anr aernaeq nyar, arhu-euq, Miqyaer gharduq ngaeqdan-eu tsawrhaq ghawqmya ghaq hawr-eu mirkhanq-euq sanqpaq ghawqmya ghaq, nawmaf nae ya’mawr-euq deuq-anr mawrmawf-eu khawf maqya mawr-aer, nawmaf nae yagaq-euq deuq-anr gaqmawf-eu khawf maqya gaq-aq.”

Muiq-eu Saqmaqliv Tsawrhaq

²⁵ Khoerngae, zanrdawq siqzaq tiq ghaq, Yeqsur-anr tsermr haw-eu laer lar-awr aer-eu, “Sanqpaq-or! Ngar mqmaq maqbyav yarzir daef-eu jeqbir ofni aqjeq ya’mr-eu la?”

²⁶ Khoerngae, Yeqsur, aqyawf-anr aernaeq-eu, “Zanrdawq-euq lafkhoer aqjeq laer boftaq-euq la? Nawr aqjeq guimawr-euq le?”

²⁷ Aqyawf aerkhof-eu, “ ‘Nawq-euq nuima dawqtawvluf, saflar dawqtawvluf, ghaq dawqtawvluf, nuinoeq nuidur dawqtawvluf, nawq-euq Sanqpaq Miqyaer-anr gaq-awq. (Dm 6:5) Yawqha-euq mawrdo-anr gaq-eu lof-aer, yawqha-euq dawqpae jawr-eu tsawrhaq-anr gaq-awq.’ ” (Lb 19:18)

²⁸ Yeqsur, aqyawf-anr aernaeq-eu, “Nawr aerkhof naeqlaf-eu tsaq mae. Nawr khoerlof-aer mr-ir-awq. Mr nar-aq, saflar yadaef taef-a.”

²⁹ Aerkhawf, heughaq, yawqha-aq tsaq-awr dawr-eu ma laer geufmawf-eu mirnae Yeqsur-anr narhaq-eu, “Ngaq-euq dawqpae jawr-eu tsawrhaq aqsur ghaq la?”

³⁰ Khoerngae, Yeqsur heulof-aer aerkhof naeq-eu mae, “Tsawrhaq tiq ghaq, Yeqlursaqlaeq-anr nae Yeqlirkor-anr irluf ngae, tanrjoe nae bidae-euq mae. Aqyawfmaf, aqyawf-euq maeqtsoeq nyaeflaevjir naeq-awr, aqyawf-anr lavnar-awr, maqshir maqdaef-aer byaerdzae yaf-awr can-euq mae.

³¹ Khoernar-aq, pirma tiq ghaq garma khoerkanr irba tsaq-awr, tsawrhaq khoerghaq-anr ya’mawr ngae, garjaw jaw-awr irdzeur ghae-euq mae.

³² Khoerlof-aer durni, Leqbir tsawrhaq tiq ghaq khawf khoergar irkeuv ngae, lepae-awr haw-euq nar-aq, garjaw jaw-awr irdzeur ghae-euq mae.

³³ Aerkhawf, Saqmaqliv tsawrhaq tiq ghaq garma khoerkanr-anr canluf ngae, tsawrhaq khoerghaq ga-eu gar irkeuv-awr aqyawf-anr ya’mawr ngae, aqyawf-anr ghawqshaqgaq duidui-eu mae.

³⁴ Khoermirnae, aqyawf ga-eu gar ir-awr, markhaeq-anr aqgaf dzaruir hawr-eu tsir laefnaeq-awr, saqpar nae lanrcuf naeq-euq mae. Khoernar-aq, aqyawf-euq jeqzaq-euq khoertav bafdziq-awr, daqyan yafduq-anr sheuqghae-awr nae, aqyawf-anr bosav naeq-euq mae.

³⁵ “Nishawq ngae nan, aqyawf dov-ir ngae, yawsanr ghaq-anr pyur nyiq byav yurdov naeq-awr aer-eu, ‘Aqyawf-anr bosav naeq-awq. Heumyav maqtser zmqdzaeq-euq nar-aq, ngar par ghoflar ngae, nawq-anr tsoeqnaeq ma.’

³⁶ Nawr sharnoeq ngae, tsawrhaq heu smr ghaq-euq lafkhoer nae, tanrjoe nae bidae-euq khoerghaq-euq dawqpae jawr-eu laer aernya-eu tsawrhaq aqgeu ghaq nya?”

³⁷ Aqyawf aer-eu, “Aqyawf-anr ghawqshaq gaqnaeq-euq khoerghaq mir-a.” Khoerngae, Yeqsur aer-eu, “Nawr khawf ir-awr khoerlof-aer mr-ir-awq.”

Maqta Hawr-eu Maqliv

³⁸ Aqyawfmaf garpaer-anr leluf ngae, Yeqsur, pu tiq pu-anr urler-euq mae. Maqta laer kur-eu zaqmiq aqbur tiq ghaq, Yeqsur-anr aqyawf-euq irkanr ha’ur-euq mae.

³⁹ Maqta-aq, Maqliv laer kur-eu aqnyir tiq ghaq jawr-eu mae. Maqliv-aq, Yeqsur-euq aqkuir-euq dawqpae nuir-awr, aqyawf-euq dawq narhaq luf-eu mae.

⁴⁰ Aerkhawf, Maqta-aq, aqjax mr-awr banqgha luf-eu mirnae, Yeqsur jawr-eu gar lar-awr aer-eu, “Sanqpaq-or! Ngaq-euq aqnyir, ngaq-anr taef-aer byaerdzae-awr aqjax bi mrnaeq laf-euq gar, nawr tiqjeq-iq maq sharnoeq-eu nya lor? Ngaq-anr cawba naeq-awq laer aqyawf-anr aernaeq sher-eq.”

⁴¹ Khoerngae, Yeqsur, aqyawf-anr heulof-aer aerkhof naeq-euq mae, “Maqta-or! Maqta, nawr-aq, ghawqmya jeq-anr nuima maqsar-aer khanqlanr luf-eu nga.

⁴² Aerkhawf, mawf-eu-aq tiqjeq jav-eu taef mae. Maqliv-aq, aqcawq maq ludov nya-eu muiqdzaeq-eu khoerjeq-anr tsergeuf-euq mae.”