Luˇkaꞈ 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tawrpirlu-anr Bofnaeq-euq Dawq

¹ Huiq-awr manr-eu Tawrpirlu-or! Nga’maf jawr-eu gar pyeuflar-euq garkawv deuq, tsawrhaq ghawqmya ghaq khar ghaenya-eu lof-aer pyeufyaf-euq garkawv-euq maeqhu maeqnan tsaqni sanqbof bofdov taq-euq mae.

² Garkawv heudeuq-anr yawbae ngae nae ya’mawr-awr, dawqmaeq maeq-eu tsawrhaq nae nga’maf-anr ja’naeq laf-euq lof-aer bofdov taq-euq ma.

³ Ngar khawf garkawv heudeuq dawqtawv luf-anr ardanq bae-eu gar nae yawmuiq paq-aer povtser duq-awr, maeqhu maeqnan tsaqni nawq-anr bofanr lef-eu tsaq taef-a laer, noeq-awr bofghae lef-euq ma.

⁴ Heu-aq, nawq nae yadzaw-euq deuq aqdirma-aer tsaq-eu nga laer bi siqduq-eu gharduq ma.

Bartirsaq Mrnaeq-eu Yorhaq Daefle Mae Laer Aernaeq-euq

⁵ Heqlor, Yurdav mirkhanq-anr uvlanrluf ngae, Aqbiryav-euq armaf-euq lafkhoer Zeqkaqlir laer kur-eu pirma tiq ghaq jawr-eu mae. Aqyawf-euq nymrdanq-aq, Aqloq-euq arjeuq arca-anr taf-eu Erlirsaqbaev laer kur-eu mae.

⁶ Aqnyaf dzerzaq, Miqyaer-euq maeqshi tsaq-awr dawr-eu tsawrhaq mae. Sanqpaq Miqyaer-euq zanrdawq khofdawq hawr-eu zanrsanrkhof dawqtawv luf-euq maeqnan cantae-awr, tiqjeq-anr-iq aerkhar maqza-eu tsawrhaq mae.

⁷ Aerkhawf, zaq maqjawr-a. Aqjeq mirnae aernar-aq, Erlirsaqbaev-aq, maqbaw aqma pyeuf-awr, aqnyaf dzerzaq nyiq ghaqluf mawqle-euq mae.

⁸ Miqyaer-euq maeqshi, pirma-euq gar ya’mr-eu deuq Zeqkaqlir-euq armaf-anr darlar-awr,

⁹ pirma deuq zanrsanrkhof jav-eu lof-aer shaevtsaq tsaqhaw ngae, aqyawf-anr darler-awr yawsaw jeq dofdamq-eu laer uqduq tanqnymr nymrma-euq lafkhoer urler-euq mae.

¹⁰ Yawsaw jeq dofdamqluf ngae, tsawrhaq armaf mafma deuq lafnyir paw jawr-awr guiqlanq sharluf-eu mae.

¹¹ Khoerngae, Sanqpaq Miqyaer-euq mqtav ghaqkhaer tiq ghaq dovle-awr, yawsaw jeq dofdamq-eu lawrduq-euq armar paw yawfluf-eu mae.

¹² Zeqkaqlir, khoer-anr ya’mawr ngae, yawkhav-aer tsawqguv-ir-awr guvluf-eu mae.

¹³ Khoerngae, mqtav ghaqkhaer khoerghaq, aqyawf-anr heulof-aer aernaeq-euq mae, “Zeqkaqlir-or! Taqguv, Miqyaer, nawq-euq guiqlanq shardawq-anr gaq-euq mae. Nawq-euq nymrdanq Erlirsaqbaev, nawq-euq gharduq zaqyo tiq ghaq ciq taef-a. Nawr, aqyawf-anr Yorhaq laer myanrnaeq-awq.

¹⁴ Zaq heughaq daefle-euq mirnae, nawr hawr-eu tsawrhaq ghawqmya’ni khawf laqkhaqcaer taef-a.

¹⁵ Aqyawf, Sanqpaq Miqyaer-euq maeqshi yawhuiq yawmanr ghaq pyeuflar taef-a. Aqyawf-aq, aqgaf dzaruir yawtav hawr-eu aqgaf dzaruir yawbyawq khawf maqdawr-ar. Aqma-euq uqmav-euq lafkhoer ur ngae nae, Yawshawr Saflar tiqbyanni byan taef-a.

¹⁶ “Aqyawf, Irsaqleqlav tsawrhaq ghawqmya ni-anr aqyawf maf-euq Sanqpaq Miqyaer jawr-eu paw bi ghoflar taef-a.

¹⁷ Aqyawf, Erlirya-euq nuima hawr-eu baoq anr-eu lafkhoer, Miqyaer-euq maeqshi ir taef-a, ‘Aqda hawr-eu zaq tsaqler dzoerlerni’ maqaer, maq narhaq geuf-eu tsawrhaq, dawr-awr tsaq-eu tsawrhaq-euq zaqsiq tsawrganr-euq maeqnan cantae larni maqaer, Sanqpaq Miqyaer-euq gharduq aqyawf nuima tsaq-eu tsawrhaq laeqhmqtaq taef-a.”

¹⁸ Khoerngae, Zeqkaqlir, mqtav ghaqkhaer khoerghaq-anr aernaeq-eu, “Khoerlof-aer pyeuflar mae laer ngar aqjox-aer siqnya nmr-mq? Ngar mawqle-euq mir-a, ngaq-euq nymrdanq khawf mawqle-euq mae.”

¹⁹ Khoerngae, mqtav ghaqkhaer khoerghaq heulof-aer aerkhof naeq-euq mae, “Ngar-aq, Miqyaer-euq maeqshi yawfluf-eu Gaqbeqlar ma. Aqyawf, ngaq-anr khaer-awr laqkhaq caerlar paq-aer ghae-eu garkawv heu, nawq-anr bi tsafgaq le-euq mae.

²⁰ Aryamq tsaqlar ngae, ngaq nae aer-euq dawq heu byanlar taef-a. Aerkhawf, nawr maqjan-eu mirnae, garkawv heu maq pyeuflar-euq khoerkeuvni, nawr aqdzawq lof-aer dawq maq ngaeqnya’ni pyeuf-ir taef-a.”

²¹ Tsawrhaq tiqdeuq, lafnyir paw, Zeqkaqlir-anr dawqluf-eu mae. Aqyawf, uqduq tanqnymr nymrma-euq lafkhoer ghawqmyanrni jawr-eu mirnae zanqler-eu mae.

²² Aqyawf dovle ngae, aqyawf maf-anr dawq maq ngaeqcawq nya-a. Aqyawf, uqduq tanqmymr nymrma-euq lafkhoer mawrle-eu jeq tiqjeqnav-anr ya’mawr-euq ngar-a laer aqyawfmaf yasiq-euq mae. Aqyawf dawq maq ngaeqnya-eu mirnae, aqyawf maf-anr lafdzawr taef-aer dzawrnaeq-eu mae.

²³ Aqyawf, uqduq tanq-eu gar ya’mr-eu arnan aryamq jir-euq nar-aq, irkanr ghof-ir-euq mae.

²⁴ Khoernar-aq, aryamq uicuiv myanrlar ngae, aqyawf-euq nymrdanq Erlirsaqbaev, zaq tsaevler-awr, bala ngaq siq byanni tiqgar-iq maqdov-ir ni jawr-euq mae.

²⁵ Aqyawf aer-eu, “Sanqpaq Miqyaer, ngaq-anr haw-awr ghoer mrnaeq laf-euq mae. Nymq-mr pov-aq, ngar, tsawrhaq-euq maeqshi daqga-eu jeq-anr aqyawf nae yurdzae naeqlaf-euq ngar-a.”

Yeqsur Daefle-euq

²⁶ Bala kof siq byanlar ngae, Miqyaer, mqtav ghaqkhaer Gaqbeqlar-anr khaer-awr, Gaqliqlaer mirkhanq-anr jav-eu meuq tiq meuq-anr bi’oe-euq mae. Meuq khoermeuq-aq, Naqzaqlaer laer kur-eu mae.

²⁷ Daqbir-euq arjeuq arca Yorsaev laer kur-eu ghaq-anr danqdzaq-ir ma laer dawqtsaev ngaeqtaq-euq miqdaf dafshawr tiq ghaq jawr-eu gar dawqtsaf tsafle-euq mae. Miqdaf dafshawr khoerghaq-euq tsawrmyanr-aq, Maqliv laer kur-eu mae.

²⁸ Mqtav ghaqkhaer khoerghaq, Maqliv jawr-eu gar oe-awr aer-eu, “Guiqlanq zawr huiq-eu zaqmiq-or! Nawr nuisar of luf-ur. Sanqpaq Miqyaer, nawq naeq-aer jawrluf mae!”

²⁹ Maqliv-aq, dawq khoerdawq-euq baqda’nae tsawqguv-ir-awr, dawq teulof-aer ngaeqghae naeqlaf-eu teu, aqjeq aermawf-eu nga laer sharnoeq sharsawx luf-eu mae.

³⁰ Khoerngae, mqtav ghaqkhaer, aqyawf-anr heulof-aer aernaeq-euq mae: “Maqliv-or! Taqguv! Aqjeq mirnae aernar-aq, Miqyaer, nawq-anr ghawqshaq gaq-eu mae.

³¹ Nawr, zaq tsaevler-awr zaqyo tiq ghaq yaciq taef-a. Aqyawf-anr Yeqsur laer myanrnaeq-awq.

³² Aqyawf yawhuiq yawmanr ghaq pyeuf-awr, Gor duidui-eu ghaq-euq Zaqyo laer yabi kur taef-a. Sanqpaq Miqyaer, aqyawf-anr aqyawf-euq aqpoeq Daqbir-euq dzoeqdzaq-euq nuirmanq bif taef-a.

³³ Aqyawf-aq, mqmaq maqbyav yarzir Yaqkov-euq nymrkhanq-euq sanqpaq geuf taef-a. Aqyawf-euq mirkhanq arsaq saq-eu maqbaw-a.”

³⁴ Khoerngae, Maqliv, mqtav ghaqkhaer-anr aernaeq-eu, “Ngar maq danqdzaq-ir-aq siq, teulof-aer aqjox-aer pyeuflar nya-eu?”

³⁵ Mqtav ghaqkhaer heulof-aer aerkhof naeq-euq mae, “Yawshawr Saflar, nawq-euq khoertav zafka le-awr, Gor duidui-eu ghaq-euq baoq nawq-anr joeshmrle taef-a. Khoermirnae, daefle-eu Yawshawr ghaq-anr Miqyaer-euq Zaqyo laer kur taef-a.

³⁶ Khoeruqtaf, dzeurlaf ngae maqbaw aqma laer bikur-euq nawq-euq aqyuif aqnyir Erlirsaqbaev khawf, mawqle-euq gar zaqyo tiq ghaq piluf-awr, nymq-mr bala kof siq byanlar-euq mae.

³⁷ Aqjeq mirnae aernar-aq, Miqyaer maq janrnya-eu tiqjeq-iq maqjav-a.”

³⁸ Khoerngae, Maqliv aer-eu, “Ngar-aq, Sanqpaq Miqyaer-euq aqbur zaqkhav ma. Nawr aer-eu lof-aer ngaq-euq khoertav bi keuvle-awq.” Khoernar-aq, mqtav ghaqkhaer ghawq-ir-euq mae.

Erlirsaqbaev Jawr-eu Gar Ghaler-euq

³⁹ Khoerngae, Maqliv dov-ir-awr, Yurdav mirkhanq-euq lafkhoer danrtav jav-eu meuq tiq meuq-anr yawkawr-aer le-euq mae.

⁴⁰ Zeqkaqlir-euq nymr-anr urler-awr, Erlirsaqbaev-anr dawqcawq puq-euq mae.

⁴¹ Erlirsaqbaev, Maqliv dawqcawq puqlar-eu gar yagaq-euq naeq-aer, aqyawf piluf-eu zaq khoerghaq, uqmav-euq lafkhoer luvluv-aer teuv-eu mae. Khoeruqtaf, Erlirsaqbaev-anr Yawshawr Saflar byanle-awr,

⁴² tersar yawkhav-aer heulof-aer aer-eu mae: “Nawr-aq, zaqmiq aqbur deuq-euq lafkhoer nae guiqlanq huiqdzaeq dzaeq-eu ghaq ngar-a, nawq-euq uqmav-euq lafkhoer piluf-eu zaq khawf guiqlanq huiq-eu mae!

⁴³ Ngaq-euq Sanqpaq-euq aqma, ngar jawr-eu gar lar-eu heu, ngar aqgeugar nae za-euq guiqlanq nga?

⁴⁴ Aqjeq mirnae aernar-aq, nawr dawqcawq puq-eu tersar ngaq-euq naqbawr-anr gaqlar-eu naeq-aer, ngaq-euq uqmav-euq lafkhoer piluf-eu zaq laqkhaq caerlar-awr luvluv-aer teuvluf mir-a.

⁴⁵ Nawr-aq, jan-eu zaqmiq mirnae guiqlanqhuiq ngar-a. Aqjeq mirnae aernar-aq, Sanqpaq Miqyaer nae aqyawf-anr khar aernaeq-euq dawq yawqdawq navluf byanlar taef-a.”

Maqliv, Miqyaer-anr Jaceuq-eu

⁴⁶ Khoerngae, Maqliv heulof-aer aer-eu mae: “Ngaq-euq nuima saflar Sanqpaq Miqyaer-anr ciqhuiq ciqmanr ma.

⁴⁷ Ngaq-euq saflar, ngaq-anr Kakhof-eu ghaq Miqyaer baqda’nae laqkhaqcaer nya.

⁴⁸ Aqjeq mirnae aernar-aq, teq-awr nyir-eu aqyawf-euq aqbur zaqkhav-anr aqyawf noeqkeuv naeqlaf-euq mae. Aqkar nar-aq, tiqzir sair tiqzir ngaq-anr guiqlanq huiq-eu ghaq laer kur taef-a.

⁴⁹ Baoq huiq-eu ghaq, ngaq-anr huiq duidui-eu jeq janrnaeq laf-euq mae. Aqyawf-euq tsawrmyanr-aq yawshawr mae.

⁵⁰ Aqyawf-anr yawzeu baw-eu tsawrhaq-euq khoertav, Aqyawf-euq ghawqshaq gaq-eu jeq tiqzir sair tiqzir jav-eu mae.

⁵¹ Aqyawf-euq lafdu nae baoq huiq-eu deuq mr-euq mae. Yawqha-euq nuinoeq nuilov geufgeuf-aer nuima huiq-eu tsawrhaq-anr aqyawf taebyav-euq mae.

⁵² Aqyawf, baoq jav-eu deuq-anr nuirmanq-anr nae bi oeka-awr, Teq-awr nyir-eu deuq-anr bidav ler-euq mae.

⁵³ Maef-awr shuf-eu deuq-anr dzarkuir dzarmyaer tiqdaev bidzaq-awr, Smrmuiq smrbaw deuq-anr yawqngaef yawqkuq-aer bidov-ir-euq mae.

⁵⁴ Aqyawf, aqyawf-euq kuirlaf zaqkhav Irsaqleqlav-anr cawba naeq-awr, Maqngaer naeqni ghawqshaq gaqnaeq-euq mae.

⁵⁵ Khoer-aq, Aqbyaqhaq hawr-eu aqyawf-euq aryoeq-anr mqmaq maqbyav yarzir ghawqshaqgaq ma laer, Aqyawf, aqdui-euq aqpoeq deuq-anr aertaq-euq lof-aer mae.”

⁵⁶ Maqliv-aq, Erlirsaqbaev naeq-aer bala smr siq aerghaq jawr-awr irkanr ghof-ir-euq mae.

Bartirsaq Mrnaeq-eu Yorhaq Daefle-euq

⁵⁷ Erlirsaqbaev zaq ciqder le-awr, zaqyo tiq ghaq ciq-euq mae.

⁵⁸ Sanqpaq Miqyaer nae aqyawf-anr ghawqshaq khoernav nav-aer gaq naeq-euq gar nymrkaq taf-eu tsawrhaq hawr-eu, aqyuif aqnyir deuq yagaq ngae, aqyawf naeq-aer tiqkawv lof-aer laqkhaq cawcaer lar-euq mae.

⁵⁹ Khoernar-aq, yaef nan byanlar ngae, zaq khoerghaq-anr bawkhov maeqdzaq yaeqnaeq-eu laer aqyawfmaf uiqlar-euq mae. Zaq khoerghaq-anr aqyawf-euq aqda-euq tsawrmyanr lof-aer, Zeqkaqlir laer myanrnaeq-eu laer ghae-eu mae.

⁶⁰ Zaqnanq-euq aqma aer-eu, “Maq geufnya-a. Aqyawf-anr Yorhaq laer ya myanrnaeq-eu mae.”

⁶¹ Aqyawfmaf aer-eu, “Nawq-euq aqyuif aqnyir-euq lafkhoer, teulof-aer myanr-euq tiqghaq-iq maqjawr-a.”

⁶² Khoerngae, zaq heughaq-anr aqjox-aer bi myanrnaeq mawf-eu nya laer aqyawfmaf, aqda ghaq-anr lafdzawr dzawrnaeq-euq mae.

⁶³ Aqyawf sanqbof bof-eu terbyaf tiq byaf shar-awr bof-eu, “Aqyawf-euq tsawrmyanr-aq Yorhaq mae.” Khoerngae, aqyawfmaf dawqtawvluf zanqler jir-euq mae.

⁶⁴ Khoerngae, Zeqkaqlir-euq khaqmae tiqpov taef-aer mrnga’nya lar-awr, maeqlar khawf juvlar-euq mirnae, dawq ngaeqngaeq-aer Miqyaer-anr jaceuq-eu mae.

⁶⁵ Garkawv heudeuq Yurdav mirkhanq-anr jav-eu danrtav doeni gaqbyan-ir-awr, jawqlaw jawrlawr tiqjawq jawr-eu tsawrhaq dawqtawvluf guv-eu mae.

⁶⁶ Kharya gaq-euq tsawrhaq dawqtawvluf garkawv heudeuq nuima-euq lafkhoer juiruiq taq-awr aer-eu, “Zaq teughaq, aqkar aqjox-aer pyeuflar-eu maqsiq ngar-a.” Aqjeq mirnae aernar-aq, Sanqpaq Miqyaer, aqyawf naeq-aer jawrluf-eu mae.

Zeqkaqlir Nae Miqyaer Gharduq Ngaeqdan-euq Dawq

⁶⁷ Khoerngae, Yawshawr Saflar, Yorhaq-euq aqda Zeqkaqlir-anr byanle-awr, Miqyaer gharduq heulof-aer ngaeqdan-euq mae:

⁶⁸ “Irsaqleqlav-euq Sanqpaq Miqyaer-anr jaceuq-eu tsaq mae. Aqjeq mirnae aernar-aq, aqyawf-euq zaqlanr-anr aqyawf ngaeqghae le-awr, aqyawf maf-anr kakhof-euq mae.

⁶⁹ Aqyawf-euq kuirlaf zaqkhav Daqbir-euq nymrkhanq-euq lafkhoer, Aqdui-euq gharduq huiq duidui-eu Kakhof-eu ghaq bi turlar-euq mae.

⁷⁰ Sanqpaq Miqyaer khoerlof-aer janr-eu-aq, Arhuba nae shawr-eu Miqyaer gharduq ngaeqdan-eu tsawrhaq deuq-anr ghoe-awr aertaq-euq lof-aer janr-euq mae.

⁷¹ Aqyawf, aqdui-anr muir-eu tsawrhaq deuq hawr-eu, Aqdui-anr byae-eu tsawrhaq dawqtawv luf-euq aqlaf-euq lafkhoer nae aqdui-anr kakhof naeqlaf-euq mae.

⁷² Aqyawf, aqdui-euq aqpoeq deuq-anr ghawqshaq gaq-eu lafkhoer janrnaeq-awr, Aqyawf-euq shawr-eu dawqma sarjax-anr noeqkeuv-euq mae.

⁷³ Khoer-aq, aqyawf nae aqdui-euq aqda yawdzanr Aqbyaqhaq-anr kamqtaq-euq dawq mae.

⁷⁴ Dawq khoerdawq-euq baqda’nae, Aqdui-anr muir-eu tsawrhaq deuq-euq aqlaf-euq lafkhoer nae bidzeur-ir-awr,

⁷⁵ Yawshawr hawr-eu tsaq-awr dawr-eu lafkhoer, Aqdui zir jir ngae keuvni guv-eu nuima maqanr-aer, aqyawf-euq maeqshi aqyawf-euq gar ya’mr taef-a.

⁷⁶ Aqli-or! Nawq-anr Gor duidui-eu ghaq-euq gharduq ngaeqdan-eu ghaq laer kur taef-a. Aqjeq mirnae aernar-aq, nawr-aq, Sanqpaq-euq maeqshi yale-awr, aqyawf-euq garma ya shardanr taef-a.

⁷⁷ Khoerlof-aer janr-awr, aqyawf-euq tsawrhaq deuq-euq iqbax pyaeqnaeq-euq mirnae, kakhof-eu jeq-anr siqnyalar taef-a.

⁷⁸ Aqdui-euq Miqyaer ghawqshaq gaq-eu nuima anr-eu mirnae, Kakhof-eu jeq uqshawq paw-euq yawshaef mqtav nae aqdui-euq khoertav bi byale-awr,

⁷⁹ Yawzanr-euq lafkhoer shir-eu narshmr-euq uqmov jawr-eu tsawrhaq-anr yawshaef bya’naeq-awr, Aqdui-euq aqkuir-anr nuisar of-eu garma-anr sheuqmaeq naeqlaf taef-a.”

⁸⁰ Zaq heughaq huiqlar-awr, saflar khawf ghaq khavlar-euq mae. Aqyawf, Irsaqleqlav tsawrhaq-euq maeqshi maq dovlar-euq khoerkeuvni, bawrtsanq-anr jawr-euq mae.