Lormav 7 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Zanrdawq-anr Nae Buq-ir-euq

¹ Aqyuif aqnyir deuq-or! Zanrdawq-anr siqnya-eu nawmaf-anr ngar heulof-aer aer-eu ma. Zanrdawq-aq, tsawrhaq daefluf ngae taef-aer uvlanr-eu mae laer nawmaf maq siqnya-eu le lor?

² Zanrdawq-aq, zaqmiqzaq tiq ghaq, aqyawf-euq khaqdzerzaq khardaef-eu khoerkeuvni, zaqmiqzaq khoerghaq-anr aqyawf-euq khaqdzerzaq naeq-aer ganrdzanq taq-euq mae. Aerkhawf, khaqdzerzaq shir-euq nar-aq, aqyawf, khaqdzerzaq-euq zanrtaq khoftaq-anr nae buq-ir-euq mae.

³ Khoermirnae, aqyawf-euq khaqdzerzaq daefluf ngae, zaqyo aqli nuighaq-anr danqdzaq-ir nar-aq, banq-awr muv-eu zaqmiqzaq laer yabi kur-eu mae. Aerkhawf, aqyawf-euq khaqdzerzaq shir-euq nar-aq, aqyawf zanrdawq khoer-anr nae buq-ir-euq mirnae, zaqyo aqli yawqghaq yawq-anr danqdzaq-ir-eu khawf, banq-awr muv-eu zaqmiqzaq maqngeur-a.

⁴ Ngaq-euq aqyuif aqnyir deuq-or! Khoerlof-aer durni, nawmaf khawf Kali-euq mawrdo-anr ghoe-awr, zanrdawq-anr nae shirdzeur-euq mae. Khoeruqtaf, nawmaf, shir-euq gar nae ghofdaef lar-euq khoerghaq-anr danqdzaq-ir-euq mae. Khoer-aq, aqdui, Miqyaer-euq gharduq arsiq bi siqle-eu laer mae.

⁵ Aqjeq mirnae aernar-aq, aqdui shiqshaq-euq lafkhoer daefluf ngae, shir-eu jeq-euq gharduq arsiq siqleni, aqdui-euq arsaer iqbax mr-eu laer bi lovlarni, zanrdawq gar mrluf-eu mae.

⁶ Aerkhawf, nymq-mr aqdui zanrdawq-anr nae buq-ir-euq ma. Dzeurlaf ngae, aqdui-anr ganrdzanq taq-euq zanrdawq-anr nae aqdui shirdzeur-euq mirnae, aqdui-aq, boftaq-euq zanrdawq yawoer-euq uqmov, Miqyaer-euq gar mr-eu maqngeur-aer, muiq-eu Saflar uvlanr-eu yawshuif-euq lafkhoer mrluf-eu ma.

Aqdui-euq Lafkhoer Anr-eu Iqbax

⁷ Tox-aer ngeur nar-aq, aqdui aqjox-aer aer nmr-mq? Zanrdawq-aq, iqbax pyeuf-eu la lor? Tiqpawf-iq maqngeur-a de-eq. Zanrdawq maqjav lawnmr-aq, ngar, iqbax-anr maq siqnya-a. “Aqcawq-euq myawq-anr maerjuir taqjuir,” (Di 20:17; Dm 5:21) laer zanrdawq maqaer lawnmr-aq, ngar maerjuir juir-eu jeq-anr maq siqnya-a.

⁸ Iqbax-aq, zanrdawq khofdawq-anr ghoe-awr, ngaq-euq lafkhoer nuikhanr yawdoer yawqjeq navluf bi dovlarni aryamq povluf-eu mae. Aqjeq mirnae aernar-aq, zanrdawq maqjav lawnmr-aq, iqbax-aq yawshir mae.

⁹ Dzeurlaf ngae, ngar, zanrdawq maqjav-aer daef-euq ma. Aerkhawf, zanrdawq khofdawq dovle ngae, iqbax daeflar-awr, ngar-aq, shir-euq ma.

¹⁰ Zanrdawq khofdawq daef-eu jeq bif paq-aer ghae-eu khawf, shir-eu jeq bif-eu nga laer ngar ya’mawr-euq ma.

¹¹ Aqjeq mirnae aernar-aq, iqbax-aq, zanrdawq khofdawq-anr ghoe-awr, ngaq-anr sheuqbanq lar-eu uqtaf, zanrdawq khofdawq-anr ghoe-awr, ngaq-anr saeflar-eu laer aryamq povluf-eu mae.

¹² Khoermirnae, zanrdawq-aq yawshawr mae. Zanrdawq khofdawq-aq, shawr-awr, dawr-awr tsaq-eu uqtaf, yawmuiq mae.

¹³ Tox-aer mar-iq, yawmuiq jeq khoer ngaq-anr bishir laf-eu nga lor? Tiqpawf-iq maqngeur-a de-eq. Ngaq-anr bishir laf-eu-aq iqbax mae. Iqbax-aq, iqbax nga laer bi dovlarni, yawmuiq jeq-anr ghoe-awr ngaq-anr bishir laf-euq mae. Khoermirnae, zanrtaq khoftaq-aq, iqbax arnavni doer-eu nga laer byacaevni maeqnaeq laf-euq mae.

Lafkhoer Paw Deuvcae Caeluf-eu

¹⁴ Zanrdawq-aq, saflar-anr taf-eu mae laer aqdui siqnya-eu ma. Aerkhawf, ngar-aq, shiqshaq-anr taf-awr, iqbax-anr bi anqnaeq taq-euq ma.

¹⁵ Aqjeq mirnae aernar-aq, ngar mrluf-eu deuq-anr ngar maq ghovshawnya nya. Ngar mrmawf-eu deuq-anr ngar maqmr-aer, ngar byae-eu deuq-anr ngar mrluf-eu mir-a.

¹⁶ Ngar maq mrmawf-eu deuq-anr ngar mr nar-aq, zanrdawq-aq, yawmuiq mae laer ngar aerluf-eu gar dur-eu mae.

¹⁷ Aerkhawf, khoerlof-aer mr-eu khoer-aq, ngar mr-eu maqngeur-aer, ngaq-euq lafkhoer anr-eu iqbax mr-eu mae.

¹⁸ Shiqshaq-anr taf-eu ngaq-euq mawrdo-euq lafkhoer yawmuiq jeq maqanr nya laer ngar siqnya ma. Aqjeq mirnae aernar-aq, yawmuiq jeq mrmawf-eu nuima anr-eu khawf, aqjox-aer ya’mr-eu la laer maq povmawrnya nya.

¹⁹ Ngar mrmawf-eu yawmuiq jeq-anr maqmrni, ngar maq mrmawf-eu yawdoer jeq-anr mrluf-eu mir-a.

²⁰ Ngar maq mrmawf-eu jeq-anr mr-eu ngeur nar-aq, ngar mr-eu maqngeur-aer, ngaq-euq lafkhoer anr-eu iqbax mr-eu mae.

²¹ Khoermirnae, ngar zanr heu tiqjeq-anr povmawr-euq ma. Ngar yawmuiq jeq mrdov laf-eu laer ghae ngae, ngaq-euq lafkhoer nae yawdoer jeq khawf mrdov laf-eu laer ghae-eu mir-a.

²² Aqjeq mirnae aernar-aq, ngaq-euq lafkhoer paw-euq saflar taef lawnmr-aq, Miqyaer-euq zanr-anr laqkhaqcaer mir-a.

²³ Aerkhawf, ngaq-euq arsaer-euq lafkhoer zanr yawqjeqyawq anr-eu gar ngar ya’mawr-euq ma. Zanr khoer-aq, ngaq-euq nuinoeq-euq zanr naeq-aer deuvcae caeluf-eu mae. Khoeruqtaf, ngaq-euq arsaer-euq lafkhoer anr-eu iqbax-euq zanr-euq uqmov bijawrni ngaq-anr paf-awr tsanrghae luf-eu mae.

²⁴ Ngar-aq, ghawqshar shaq-aer ghaelar paq-aer ghae-eu tsawrhaq tiq ghaq mir-a. Shir-eu gar sheuqghae luf-eu mawrdo heu-anr nae, ngaq-anr aqsur ghaq bibuq-ir nya-eu la?

²⁵ Aqdui-euq Sanqpaq Yeqsur Kali-anr ghoe-awr, ngar, Miqyaer-anr jaceuq ma. Khoermirnae, ngaq-euq nuinoeq Miqyaer-euq zanr-anr tsaq-eu lof-aer mr-eu khawf, ngaq-euq shiqshaq paw-aq, iqbax-euq zanr-anr tsaqni mrluf-eu nya siq.