Lormav 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kali-euq Lafkhoer Daef-eu

¹ Tox-aer mar-iq, aqdui aqjox-aer aer nmr-mq? Guiqlanq yawdzanr bi myaqlarni aqdui iqbax mrmr-aer daef-eu laq?

² Khoerlof-aer tiqpawf-iq taqmr! Aqdui iqbax-anr nae shirdzeur-euq tsawrhaq, iqbax-euq lafkhoer aqjox-aer par daefghae-eu?

³ Aqdui ghawqmya ghaq bartirsaq hageuf-awr Yeqsur Kali-anr gawfler-euq deuq-aq, bartirsaq hageuf-eu lafkhoer, aqyawf-euq shir-euq jeq-anr khawf gawfler-euq gar nawmaf maq siqnya-eu le lor?

⁴ Khoermirnae, aqdui bartirsaq hageuf-eu lafkhoer, aqyawf shir-euq jeq-anr gawfler-awr, aqyawf naeq-aer tiqkawv lof-aer bi bafpanq-euq ma. Aqda Miqyaer-euq yawshaef khanqsaer-euq baqda’nae, Kali shir-euq gar nae ghofdaef lar-euq lof-aer, tsawrhaq yawshuif pyeuflar-eu lafkhoer yadaef-eu mae.

⁵ Aqyawf shir-euq lof-aer durni, aqdui, aqyawf naeq-aer gawfler-euq nar-aq, aqyawf ghofdaef lar-euq lof-aer durni, aqdui, aqyawf naeq-aer gawfler taef-a.

⁶ Aqdui iqbax-euq zaqkhav maqpar yageuf-aer, iqbax-euq mawrdo heu-anr lavcawv nya’ni, aqdui-euq yawoer ghaq, aqyawf naeq-aer lafyaq-euq khoertav bi taftaeq-euq mae laer aqdui siqnya-eu ma.

⁷ Aqjeq mirnae aernar-aq, shir-euq tsawrhaq-aq, iqbax-anr nae buq-ir-euq mae.

⁸ Aqdui, Kali naeq-aer shir nar-aq, aqdui khawf aqyawf naeq-aer yadaef taef-a laer jan-eu ma.

⁹ Kali shir-euq gar nae ghofdaef lar-euq mirnae, aqyawf tiqjawr-iq maqpar shir-eu mae. Shir-eu jeq aqyawf-anr maqpar uvlanr nya-eu mae laer aqdui siqnya ma.

¹⁰ Aqyawf shir-euq khoer-aq, iqbax-anr tafler-awr tiq pov shir-euq taef khawf, dawqtawv luf-euq gharduq luiv-eu mae. Aerkhawf, aqyawf daefluf-eu-aq, Miqyaer-euq gharduq mae.

¹¹ Khoerlof-aer durni, nawmaf khawf iqbax-anr nae shirdzeur-awr, Yeqsur Kali-euq lafkhoer, Miqyaer-euq gharduq daefluf-eu tsawrhaq ma laer yawqhar yawqha sawx-awq.

¹² Nawmaf-euq shiqshaq-euq nuikhanr-anr maqya narhaq geufni, nawmaf-euq shirnya-eu mawrdo-anr iqbax nae taqbi uvlanr.

¹³ Nawmaf-euq arsaer deuq maqtsaq maqdawr-eu jeq mr-eu gar zmq-eu keuka bi pyeufni, iqbax-anr taq a’naeq. Shir-euq gar nae ghofdaef lar-euq tsawrhaq lof-aer, yawqha-euq mawrdo, Miqyaer-anr a’naeq-awr, nawmaf-euq arsaer deuq khawf, tsaq-awr dawr-eu jeq-euq gharduq zmq-eu keuka pyeufni, Miqyaer-anr a’naeq-awq.

¹⁴ Nawmaf zanrdawq-euq uqmov maqpar jawr-aer, guiqlanq yawdzanr-euq uqmov jawr-eu mirnae, iqbax nawmaf-anr maqpar uvlanrluf mae.

Miqyaer-euq Zaqkhav Pyeuflar-euq

¹⁵ Tox-aer mar-iq aqjox-aer la? Aqdui zanrdawq-euq uqmov maqpar jawr-aer, Miqyaer-euq guiqlanq yawdzanr-euq uqmov jawrluf-eu mirnae, iqbax mr-eu tsaq taef-a lor? Tiqpawf-iq maqtsaq-a.

¹⁶ Nawmaf, tsawrhaq tiq ghaq-euq zaqkhav geuf-awr aerdawq narhaqgeuf nar-aq, nawmaf aerdawq narhaq geuf-eu khoerghaq-euq zaqkhav pyeuf-eu mae laer nawmaf maq siqnya-eu le laq? Iqbax-euq zaqkhav geuf nar-aq yashir-awr, Miqyaer-anr narhaqgeuf nar-aq, tsaq-awr dawr-eu tsawrhaq pyeuflar-eu mae.

¹⁷ Dzeurlaf ngae, nawmaf iqbax-euq zaqkhav geuf-euq mae. Aerkhawf, nymq-mr-aq, nawmaf-anr maeqnaeq-euq dawqmaeq dawqtsov-anr nuima nae narhaq geuf-euq mirnae, Miqyaer-euq guiqlanq-anr jaceuq ma.

¹⁸ Nawmaf iqbax-anr nae yabuq-ir-awr, tsaq-awr dawr-eu jeq-euq zaqkhav pyeuflar-euq mae.

¹⁹ Nawmaf shiqshaq paw ghaq baq-eu mirnae, tsawrhaq yaw’awq awq-aer ghovshaw nya’ni, dawq heudeuq ngar, nawmaf-anr aernaeq-eu ma. Dzeurlaf ngae, nawmaf-euq arsaer deuq zanrdawq-anr leur-eu jeq mrni, maqshawr-eu jeq hawr-eu, zanrdawq-anr leur-eu jeq-euq zaqkhav bigeuf-eu laer a’naeq-euq mae. Aerkhawf, nymq-mr nawmaf shawrlarni, tsaq-awr dawr-eu jeq-euq zaqkhav bigeuf-eu gharduq, nawmaf-euq arsaer deuq a’naeq-awq.

²⁰ Nawmaf iqbax-euq zaqkhav geufluf ngae, tsaq-awr dawr-eu jeq-euq uqmov maqjawr-aq.

²¹ Nawmaf khoerlof-aer mrluf ngae aqjeq za-euq le? Khoerlof-aer mr-euq mirnae, nymq-mr nawmaf shafdawr-eu mae. Aqjeq mirnae aernar-aq, khoer-euq arsaq saqduq-aq yashir-eu mae.

²² Aerkhawf, nymq-mr nawmaf iqbax-anr nae buq-ir-awr, Miqyaer-euq zaqkhav pyeuflar-euq mirnae, shawr-eu arsiq siqle luf-eu mae. Heu-euq arsaq saqduq-aq, mqmaq maqbyav yarzir daef-eu jeq za-eu mae.

²³ Aqjeq mirnae aernar-aq, iqbax mr-eu mirnae za-eu arpoeq-aq yashir-eu mae. Aerkhawf, Miqyaer nae bifnaeq laf-euq lafsawq-aq, aqdui-euq Sanqpaq Yeqsur Kali-euq lafkhoer, mqmaq maqbyav yarzir yadaef-eu mae.