Lormav 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Shaqzanq-anr Ghaqler-eu Jan-eu Jeq

¹ Aqdui jan-eu baqda’nae tsaq-awr dawr-eu tsawrhaq pyeuflar-awr, aqdui-euq Sanqpaq Yeqsur Kali-euq baqda’nae Miqyaer-anr tsaqler dzoerler-euq ma.

² Aqdui, Kali-anr ghoe-awr jan-eu baqda’nae, guiqlanq yawdzanr-euq lafkhoer ya urler-awr yawfluf-eu ma. Miqyaer-euq yawshaef khanqsaer-anr noeqtmq luf-eu mirnae laqkhaq caer-eu ma.

³ Khoeruqtaf, shaq-awr zanq-eu jeq-anr yadaq ngae khawf, aqdui laqkhaqcaer ma. Aqjeq mirnae aernar-aq, shaq-awr zanq-eu baqda’nae daqcoer orcoer lar-eu mae laer siqnya-eu ma.

⁴ Daqcoer orcoer-eu baqda’nae, jancoer ghoecoer lar-eu mae. Jancoer ghoecoer lar-euq baqda’nae noeqtmqnya lar-eu mae.

⁵ Noeqtmq-eu baqda’nae nuima yacawv-eu maqngeur-a. Aqjeq mirnae aernar-aq, aqdui-anr bifnaeq laf-euq Yawshawr Saflar, aqdui-euq nuima-euq lafkhoer, Miqyaer-euq gaq-eu jeq shaevanr naeqlaf-euq mae.

⁶ Aqjeq mirnae aernar-aq, aqdui ghaq baqluf ngae, Kali-aq, nanpax paxtaq-euq aryamq-anr iqbaxzaq-euq gharduq shirdan-euq mae.

⁷ Tsaq-awr dawr-eu tsawrhaq-euq gharduq shirdan-eu aer-eu-aq yawcuiv mae. Tsawrmuiq tsawrjaq tiq ghaq-euq gharduq lawnmr-aq, shirdan peuq-eu tsawrhaq jawr-eu baw-mr.

⁸ Aerkhawf, Miqyaer, aqdui-anr gaq-eu byacaevni bi mawrlar-eu laer aqdui, iqbaxzaq pyeufluf ngae, Kali, aqdui-euq gharduq shirdan-euq mae.

⁹ Khoernav maqtser, nymq-mr Kali-euq shiq-euq baqda’nae, aqdui tsaq-awr dawr-eu tsawrhaq pyeuflar-euq ma. Khoeruqtaf, aqyawf-euq baqda’nae aqdui, Miqyaer nuima paer-eu jeq-anr nae yabuq-ir taef-a.

¹⁰ Aqjeq mirnae aernar-aq, aqdui, Miqyaer-anr muir-eu tsawrhaq pyeufluf ngae, aqyawf-euq Zaqyo shirdan-euq mirnae, Miqyaer-anr tsaqler dzoerler-euq ma. Khoernav maqtser, tsaqler dzoerler ghaq-euq nar-aq, Kali daefluf-eu mirnae, aqdui-anr aqdir kakhof naeqlaf taef-a.

¹¹ Khoer taef-aer maqngeur-eu, aqdui-euq Sanqpaq Yeqsur Kali-euq baqda’nae Miqyaer-anr tsaqler dzoerler-awr, aqyawf-euq baqda’nae, Miqyaer-euq lafkhoer aqdui laqkhaq caerluf-eu ma.

Aqdaq-euq Lafkhoer Shir, Kali-euq Lafkhoer Daef

¹² Tsawrhaq tiq ghaq-euq baqda’nae mirtsaq-euq khoertav iqbax javle-awr, iqbax-euq baqda’nae shir-eu jeq javlar-euq mae. Tsawrhaqzaq dawqtawvluf iqbax mr-euq mirnae, shir-eu jeq tsawrhaq dawqtawv luf-euq khoertav keuvle-euq mae.

¹³ Mirtsaq-euq khoertav zanrdawq maq javlar-euq minav-aer iqbax javluf-eu mae. Aerkhawf, zanrdawq maqjav nar-aq, iqbax-anr iqbax laer maqsawx-a.

¹⁴ Aqdaq-anr nae Morseq-euq zir-anr keuvni shir-eu jeq uvlanr luf-eu mae. Tsawrhaq khoerdeuq nae iqbax mr-euq hawr-eu, Aqdaq nae mrbanq mrlaeq-euq jeq maq durler-eu khawf, shir-eu jeq aqyawf maf-anr uvlanr luf-eu mae. Aqdaq-aq, aqkar oe-eu khoerghaq-euq arbar mae.

¹⁵ Aerkhawf, mrbanq lavlaeq-euq khoer-aq, yawqngaef-aer bif-eu lafsawq-anr maqdur-a. Aqjeq mirnae aernar-aq, tsawrhaq tiq ghaq mrbanq lavlaeq-euq mirnae, tsawrhaq ghawqmya’ni yashir-eu ngeur nar-aq, Miqyaer-euq guiqlanq yawdzanr hawr-eu Yeqsur Kali laer kur-eu khoerghaq-euq guiqlanq yawdzanr-euq lafkhoer anr-eu lafsawq-aq, ngeurdzaeq, tsawrhaq ghawqmya ni-euq gharduq byandzaeq-eu mae.

¹⁶ Khoeruqtaf, tsawrhaq tiq ghaq iqbax mr-euq mirnae pyeuflar-eu jeq khawf, yawqngaef-aer bif-eu lafsawq-anr maqdur-a. Aqjeq mirnae aernar-aq, tiq pov mrbanq-euq taef khawf, yawlaeq ngar-a laer yarkhaq darnaeq-eu gar yadaq-eu mae. Aerkhawf, ghawqmya’ni mrbanq-euq baqda’nae, yawqngaef-aer bif-euq lafsawq-aq, tsaq-awr dawr-eu jeq bi dovlar-eu mae.

¹⁷ Tsawrhaq tiq ghaq mrbanq lavlaeq-awr, shir-eu jeq aqyawf-euq baqda’nae uvlanr luf-eu ngeur nar-aq, Miqyaer-euq huiqdui myaq duidui-eu guiqlanq yawdzanr hawr-eu, tsaq-awr dawr-eu lafsawq za-euq tsawrhaq-aq, ngeurdzaeq, Yeqsur Kali-anr ghoe-awr daef-eu jeq-euq lafkhoer uvlanr taef-a.

¹⁸ Tsawrhaq tiq ghaq nae mrbanq lavlaeq-euq mirnae, tsawrhaq dawqtawvluf yawlaeq ngar-a laer yarkhaq darnaeq-eu gar yadaq-euq lof-aer, tsawrhaq tiq ghaq tsaq-awr dawr-eu jeq mr-euq mirnae, tsawrhaq dawqtawvluf yawqngaef-aer bif-euq lafsawq za-awr, mrshawr-euq jeq-euq lafkhoer yadaef-eu mae.

¹⁹ Tsawrhaq tiq ghaq maq narhaq geuf-euq mirnae, tsawrhaq ghawqmya’ni iqbaxzaq pyeuf-ir-euq lof-aer, tsawrhaq tiq ghaq narhaq geuf-euq mirnae, tsawrhaq ghawqmya’ni tsaq-awr dawr-eu tsawrhaq pyeuflar taef-a.

²⁰ Zanrdawq javle-awr mrbanq lavlaeq-eu jeq myaqlar-euq mae. Aerkhawf, iqbax myaq-eu jawrduq-anr-aq, Miqyaer-euq guiqlanq yawdzanr par myaqdzaeq lar-eu mae.

²¹ Iqbax uvlanr-eu baqda’nae shir-eu gar bikeuv-awr, tsaq-awr dawr-eu jeq-anr ghoe-awr guiqlanq yawdzanr uvlanr-eu baqda’nae, aqdui-euq Sanqpaq Yeqsur Kali-anr ghoe-awr, mqmaq maqbyav yarzir daef-eu lafkhoer sheuqkeuv lef-eu mae.