Lormav 16 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pawrluv Dawqcawq Puq-eu

¹ Geqjeq Kalizaq armur-anr cawba-eu ghaq geufluf-eu, aqdui-euq dmrma Pirbeq-aq, noeqpoeq paq-aer ghae-eu tiq ghaq mae laer nawmaf-anr bisiq-eu ma.

² Sanqpaq Miqyaer-euq lafkhoer, tsawrshawr deuq mr paq-aer ghae-eu lof-aer, nawmaf, aqyawf-anr hageuf naeq-awq. Aqyawf, nawmaf-anr nae mawf-eu aqgeu jeq maqkaq, nawmaf, aqyawf-anr cawba naeq-awq. Aqjeq mirnae aernar-aq, aqyawf, tsawrhaq ghawqmya ghaq-anr cawba naeqluf-eu uqtaf, ngaq-anr khawf cawba naeqlaf-euq mae.

³ Ngaq naeq-aer Yeqsur Kali-euq gar mrcawq pyeuf-eu, Birgirla hawr-eu Aqgurla-anr dawqcawq puq-eu ma.

⁴ Ngaq-euq daefzir-euq gharduq, aqnyaf dzerzaq, yawqha-euq kawqlanr nae kamqpeuq-euq mae. Ngar taef-aer aqnyaf dzerzaq-anr jaceuq-eu maqngeur-a. Aqcawq tsawrjeuq tsawrca pyeuf-eu Kalizaq armur dawqtawvluf khawf jaceuq-eu mae.

⁵ Aqnyaf dzerzaq-euq nymr-anr uiqler luf-eu Kalizaq armur-anr khawf, dawqcawq puq-eu ma. Aqgaqyar-euq lafkhoer Kali-euq gharduq arsiq siqbae baele-euq, ngar zawr gaq-eu Irbaernaer-anr khawf dawqcawq puq-eu ma.

⁶ Aqdui-euq gharduq gar mr duidui-eu Maqliv-anr khawf dawqcawq puq-eu ma.

⁷ Ngaq naeq-aer kuv-anr urhaw-euq ngaq-euq aqyuif aqnyir pyeuf-eu Aqdawrniv hawr-eu Yurniv aqnyaf-anr khawf dawqcawq puq-eu ma. Aqyawf nyaf-aq, ngaq-euq maeqhu nae Kalizaq pyeuflar-awr, ghaqkhaer deuq-euq ghanrcae tsawrmyanr muiq-eu mae.

⁸ Sanqpaq Miqyaer-euq lafkhoer ngar zawr gaq-eu Aqbaqlir-anr khawf dawqcawq puq-eu ma.

⁹ Kali-euq lafkhoer aqdui-euq gar mrcawq Urlaqbaq hawr-eu ngar zawr gaq-eu Seqdaqgur-anr khawf dawqcawq puq-eu ma.

¹⁰ Kali-euq lafkhoer tsermr haw-eu gar yadaq-euq, Aqbeqler-anr khawf Aqlirdawrbuv-euq zawfjir-anr khawf dawqcawq puq-eu ma.

¹¹ Ngaq-euq aqyuif aqnyir pyeuf-eu, Heqlordiroq hawr-eu Sanqpaq Miqyaer-euq lafkhoer jawr-eu Naqgiqsur-euq zawfjir-anr khawf dawqcawq puq-eu ma.

¹² Sanqpaq Miqyaer-euq lafkhoer gar mrluf-eu, Daqlurpaernav hawr-eu Daqlurpawrsav-anr khawf, Sanqpaq Miqyaer-euq lafkhoer gar yawkhav-aer mrluf-eu, aqdui zawr gaq-eu Beqlaqsir-anr khawf dawqcawq puq-eu ma.

¹³ Sanqpaq Miqyaer-euq lafkhoer tserdov taq-euq Lurpur hawr-eu ngaq-euq aqma lof-aer sawxtaq-euq aqyawf-euq aqma-anr khawf dawqcawq puq-eu ma.

¹⁴ Aqsoqgaqler, Paqleqgoq, Heqlaqmeq, Barlawrbar, Heqlaqmar hawr-eu, aqyawfmaf naeq-aer jawr-eu aqyuif aqnyir deuq-anr dawqcawq puq-eu ma.

¹⁵ Pirlawrlur hawr-eu Yurliv, Neqlur hawr-eu aqyawf-euq dmrma Awrloqpar hawr-eu aqyawfmaf naeq-aer jawr-eu tsawrshawr yawqghaq navluf-anr khawf dawqcawq puq-eu ma.

¹⁶ Shawr-eu maeqsaw saw-eu jeq nae nawmaf tiqghaq tirghaq dawqcawq puq-awq. Kali-euq Kalizaq armur deuq, nawmaf-anr dawqcawq puqanr laf-euq mae.

Arsaq Saq-eu Maeqnaeq Tsovnaeq-eu Dawq

¹⁷ Aqyuif aqnyir deuq-or! Nawmaf nae yadzaw-euq dawqmaeq dawqtsov naeq-aer dawrnaq-aer mr-eu lafkhoer, aqcawq-anr bighawq bighaer-ir-awr, sanqtif bitif-eu tsawrhaq deuq-anr garjaw jaw-awq laer ngar, nawmaf-anr tanqshar-eu ma.

¹⁸ Aqjeq mirnae aernar-aq, khoerlof-aer ghae-eu tsawrhaq deuq-aq, aqdui-euq Sanqpaq Yeqsur Kali-euq gar maqmr-aer, yawqha-euq uqmav-euq gharduq taef-aer mr-eu mae. Aqyawf maf-aq, narhaq muiq-eu dawq hawr-eu jaceuq-eu dawq nae, maqdzaw-euq tsawrhaq-anr shuirtawv-eu mae.

¹⁹ Nawmaf, Miqyaer-euq dawq narhaq geuf-eu garkawv, yawqghaq navluf siqnya lar-euq mae. Khoermirnae, ngar, nawmaf-euq gharduq laqkhaqcaer nya. Aerkhawf, nawmaf yawmuiq jeq-anr tsawrganr anr-awr, yawdoer jeq-anr maq sharnoeq nya-eu tsawrhaq bi pyeufmawf mir-a.

²⁰ Ghawqmyanr maqghae-aer, nuisar bif-eu Miqyaer-aq, nawmaf-euq aqkuir paeqzar-euq uqmov, naef Saqdaq-anr nawqpyaev taef-a. Aqdui-euq Sanqpaq Yeqsur Kali-euq guiqlanq yawdzanr nawmaf-euq khoertav jav luf-ur.

²¹ Ngaq-euq gar mrcawq Tivmorseq hawr-eu ngaq-euq aqyuif aqnyir pyeuf-eu Lurgir, Yaqsoq hawr-eu Sawrsirpaqtav aqha’maf, nawmaf-anr dawqcawq puqanr laf-euq mae.

²² Ngar-aq, Pawrluv-euq gharduq sanqbof heupur bofluf-eu Deqlaqtir ma. Sanqpaq Yeqsur-euq lafkhoer ngar, nawmaf-anr dawqcawq puq-eu ma.

²³ Ngaq-anr hageuf-awr, Kalizaq armur murlan-anr hageuf naeqlaf-euq Gaqyur khawf, nawmaf-anr dawqcawq puqanr laf-euq mae. Meuq heumeuq-euq pyur jeqhmq-eu ghaq Erlaqdur hawr-eu maernmr Gawqtu khawf, nawmaf-anr dawqcawq puqanr laf-euq mae.

²⁴ Aqdui-euq Sanqpaq Yeqsur Kali-euq guiqlanq yawdzanr nawmaf yawqghaq navluf-euq khoertav jav luf-ur. Aqmeq.

Pawrluv-euq Arsaq Saq-eu Guiqlanq Shardawq

²⁵ Mirtsaq bae ngae nae maqbi siq-aer zaftaq-euq jeq-euq garkawv panmaeq naeqlaf-euq mirnae, ngar maeq-eu guiqlanqdawq hawr-eu Yeqsur Kali-euq garkawv dawqmaeq maeq-eu baqda’nae, nawmaf-anr bi ziflar nya-eu ghaq-anr jaceuq ma.

²⁶ Mirkhanq-euq tsawrjeuq dawqtawvluf janlar-awr narhaq geufnya’ni, mqmaq maqbyav yarzir daef-eu Miqyaer nae dawq biftaq-euq lof-aer zaftaq-euq khoer, nymq-mr panmaeq naeqlaf-awr, Miqyaer gharduq ngaeqdan-eu deuq-euq sanqbof-anr ghoe-awr, tsawrjeuq tsawrca dawqtawvluf zaftaq-euq khoer-anr byacaevni ya’mawr-euq mae.

²⁷ Miqyaer tiq ghaq taef-aer tsawrganr byan-eu mirnae, Yeqsur Kali-anr ghoe-awr, mqmaq maqbyav yarzir aqyawf-anr ciqhuiq ciqmanr kar-eur. Aqmeq.