Lormav 15 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqcawq-euq Gharduq Muiqni Mr-awq

¹ Aqdui jan-eu ghaq khav-eu tsawrhaq deuq, yawqha nuikhanr shirni mr-eu maqngeur-eu, ghaq baq-eu deuq-euq khavbaev cawpi naeq-eu tsaq mae.

² Aqdui yawqghaq navluf, yawqha-euq dawqpae jawr-eu tsawrhaq-anr muiqni, aqyawfmaf nuikhanr shirni mrnaeq-awr bihuiq bi manrlar kar-eur.

³ Aqjeq mirnae aernar-aq, Kali khawf yawqha nuikhanr shirni maqmr-aq. Yaerbof-euq lafkhoer boftaq-euq lof-aer, “Aqcawq, nawq-anr yaeqbawq-aer aer-euq, Dawq khoerdeuq dawqtawvluf, ngaq-anr gadavle taq-euq mae.” (Jc 69:9)

⁴ Arhu nae Yaerbof-euq lafkhoer khar boftaq-euq dawqtawvluf, aqdui-anr maeqnaeq tsovnaeq-eu gharduq mae. Yaerbof-euq lafkhoer maeqtaq-euq lof-aer ornya lar-awr, nuima sar-eu jeq za-eu mirnae, noeqtmq-eu jeq javlar-eu mae.

⁵ Nymq-mr, ornya-eu jeq hawr-eu nuima sar-eu jeq bifnaeq laf-eu Miqyaer, nawmaf, Yeqsur Kali lof-aer nuima tiqsiq taef-aer taqnya’ni janrnaeqlaf luf-ur.

⁶ Heu-euq baqda’nae, nawmaf nuima tiqgar taf-awr, khaqmae tiq mae lof-aer, aqdui-euq Sanqpaq Yeqsur Kali-euq Aqda Miqyaer-anr ciqhuiq ciqmanr luf-ur.

Tiqkawv Lof-aer Miqyaer-anr Jaceuq-eu

⁷ Khoermirnae, Miqyaer-euq yawshaef khanqsaer dovlarni, Kali, aqdui-anr hageuf-euq lof-aer tiqghaq tirghaq hageuf-awq.

⁸ Nymq-mr ngar aermawf-eu-aq, arhu Miqyaer nae aqpoeq deuq-anr sarjax dzaqtaq-euq khoerdeuq biduq bi marlarni hawr-eu, Miqyaer-euq yawtsaq yawdawr bi dovlar-eu gharduq, Yeqsur Kali, bawkhov maeqdzaq yaeq-euq tsawrhaq deuq-euq kuirlaf zaqkhav geufle-euq mae.

⁹ Khoeruqtaf, Miqyaer-euq ghawqshaq gaq-eu jeq-euq baqda’nae, aqcawq tsawrjeuq tsawrca deuq khawf, Miqyaer-anr bi ciqhuiq bi ciqmanr-eu gharduq mae. Yaerbof-euq lafkhoer boftaq-euq lof-aer, “Khoermirnae, ngar, nawq-euq garkawv, aqcawq tsawrjeuq tsawrca-euq ghanrcae aerdov-awr, Nawq-euq tsawrmyanr-anr carcar-aer jaceuq ma.” (Jc 18:48; 2Sml 22:50)

¹⁰ Aqyawf paraer-eu, “Aqcawq tsawrjeuq tsawrca deuq-or! Nawmaf, aqyawf-euq tsawrhaq deuq naeq-aer laqkhaq caer-awq!” (Dm 32:43)

¹¹ Aqyawf tiq pov paraer-eu, “Aqcawq tsawrjeuq tsawrca pyeuf-eu nawmaf dawqtawvluf, Sanqpaq Miqyaer-anr jaceuq-awq. Mirkhanqzaq pyeuf-eu nawmaf dawqtawvluf, aqyawf-anr ciqhuiq ciqmanr-awq.” (Jc 117:1)

¹² Irsaqyar khawf aer-eu, “Aqyawf, Yeqshaer-euq duqcir-anr nae dovlar-awr, tsawrjeuq tsawrca-anr uvlanr taef-a. Aqcawq tsawrjeuq tsawrca, aqyawf-euq lafkhoer noeqtmqkhar za taef-a.” (Isy 11:10)

¹³ Yawshawr Saflar-euq baoq baqda’nae nawmaf noeqtmq-eu jeq myaqlarni, nawmaf jan-eu lafkhoer, noeqtmq-eu jeq bif-eu Miqyaer, nawmaf-anr laqkhaq caer-eu jeq hawr-eu nuisar of-eu jeq bi byanlar luf-ur.

¹⁴ Ngaq-euq aqyuif aqnyir deuq-or! Nawmaf yawmuiq jeq tiqbyanni anr-awr, siqnya-eu tsawrganr dawqtawvluf byan-eu uqtaf, tiqghaq tirghaq khawf ghaq bifnya-eu tsawrhaq mae laer ngar, nawmaf-anr yawduq baw-eu ma.

¹⁵ Aerkhawf, ngar, nawmaf-anr garkawv tiqdeuqnav aernoeq naeq-eu laer, nuima khaqduqni nawmaf-anr sanqbof bofanr laf-euq ma. Miqyaer, ngaq-anr guiqlanq yawdzanr bifnaeq laf-euq baqda’nae,

¹⁶ ngar, aqcawq tsawrjeuq tsawrca-euq gharduq Yeqsur Kali-euq gar mrzaq geuf-awr, Miqyaer-euq guiqlanq dawq-euq gar mrluf-eu ma. Yawshawr Saflar nae aqcawq tsawrjeuq tsawrca-anr lavshawr-euq nar-aq, aqyawf maf-anr yur-awr lawrnaeq-eu jeq lof-aer lawrnaeq ngae, Miqyaer hageuf paq-aer ngar mrluf-eu ma.

¹⁷ Khoermirnae, ngar, Miqyaer-euq gar mr-eu lafkhoer, Yeqsur Kali-euq baqda’nae khanqsaer jaevkhar za-eu ma.

¹⁸ Aqcawq tsawrjeuq tsawrca narhaqgeuf larni, Kali, ngaq-anr ghoe-awr ngaq-euq dawq hawr-eu ngaq nae mr-awr shar-euq jeq bi pyeufler-euq garkawv maqngeur nar-aq, ngar tiqjeq-iq maq aerpeuq nya.

¹⁹ Baoq huiq-eu bisiq bimawr-eu jeq hawr-eu zanqler paq-aer ghae-eu jeq heudeuq, Miqyaer-euq Saflar-euq baoq-anr ghoe-awr mr-euq ma. Khoerlof-aer mrmr-aer, ngar, Yeqlursaqlaeq-anr nae Irlurliv-anr keuvni, Kali-euq garkawv guiqlanqdawq maeqdoe-euq ma.

²⁰ Ngar, aqcawq nae dawqpaeq baetaq-euq gar maqya tsovdavni, Kali-euq tsawrmyanr maq gaqhaw-euq gar, guiqlanqdawq maeq-ir ma laer ngar noeqtsaev taq-euq ma.

²¹ Yaerbof-euq lafkhoer boftaq-euq lof-aer, “Aqyawf-euq garkawv dawqdzawr mr-eu gar maqya gaqhaw-euq tsawrhaq ya’mawr-awr, Aqyawf-euq garkawv maqya gaqhaw-euq deuq khawf ya ghovshaw taef-a.” (Isy 52:15)

Pawrluv, Lormav Meuq-anr Lemawf-eu

²² Heu-euq baqda’nae, nawmaf jawr-eu gar lar-eu laer ghae-euq khawf, lavtsoeq-eu jeq ghawqmya’ni jav-eu mirnae maqya lar-aq.

²³ Aerkhawf, nymq-mr-aq, jawrkhanq heupyawq-anr maeqkhar maqpar za-eu mae. Khoeruqtaf, ngar, nawmaf jawr-eu gar larmawf duidui-eu ghawqmya khof byanlar-euq ma.

²⁴ Ngar, Saqbeq-anr le ngae, nawmaf jawr-eu gar lar taef-a. Aqjeq mirnae aernar-aq, ngar, nawmaf-anr jeqhu ya’mawr-awr nawmaf naeq-aer cawq tiqkhaeq yacawq-eu gar noeqtmq-eu uqtaf, ngar, Saqbeq-anr lenya’ni nawmaf cawba naeqlaf-eu gar khawf noeqtmq-eu ma.

²⁵ Aerkhawf, nymq-mr ngar, tsawrshawr deuq-anr cawba-eu gharduq, Yeqlursaqlaeq-anr le-eu laer ghaeluf-eu ma.

²⁶ Aqjeq mirnae aernar-aq, Maqgeqdawrniv mirkhanq hawr-eu Aqgaqyar mirkhanq-anr jawr-eu tsawrshawr deuq, Yeqlursaqlaeq-anr jawr-eu tsawrshawr deuq-euq lafkhoer irshaqzaq deuq-euq gharduq, pyur damq-awr cawba-eu gar nuikhanr shir-eu mae.

²⁷ Khoer-aq, aqyawf maf-anr aqdir nuikhanr bi shirler-euq mae. Khoeruqtaf, aqyawfmaf dzirdzov tsoeqnaeq-eu laer khawf aernya-eu mae. Aqjeq mirnae aernar-aq, aqcawq tsawrjeuq tsawrca deuq, saflar paw Yurdav tsawrhaq naeq-aer tiqkawv lof-aer guiqlanq za-euq ngeur nar-aq, shiqshaq paw-euq myawqganq Yurdav tsawrhaq-anr bifnaeq-eu-aq, aqyawfmaf ya’mr-eu gar pyeuf-eu mae.

²⁸ Khoermirnae, ngar gar heu mrluiv ghaq-awr, pyur heudeuq aqyawf maf-anr a’naeq ghaq-euq nar-aq, nawmaf jawr-eu gar nae Saqbeq-anr le ma.

²⁹ Ngar, nawmaf jawr-eu gar lar ngae, Kali-euq guiqlanq dawq-euq guiqlanq deuq tiqbyanni anr-eu lafkhoer lar-eu ma laer siqnya ma.

³⁰ Aqyuif aqnyir deuq-or! Aqdui-euq Sanqpaq Yeqsur Kali-euq baqda’nae hawr-eu, muiq-eu Saflar-euq gaq-eu jeq-euq baqda’nae, ngar, nawmaf-anr heulof-aer shar-eu ma. Ngaq-euq gharduq ngaq naeq-aer Miqyaer-anr guiqlanq cawshar naeqlaf-awq.

³¹ Yurdav mirkhanq-euq lafkhoer jawr-eu, maqjan-eu tsawrhaq deuq-euq aqlaf-anr nae ngar yabuq-ir ni sharcaw naeqlaf-awq. Yeqlursaqlaeq-anr jawr-eu tsawrshawr deuq, ngaq nae gar mr-euq gar hageufni khawf sharcaw naeqlaf-awq.

³² Khoeruqtaf, Miqyaer nuima tsaq-eu lafkhoer, ngar laqkhaq caertavni nawmaf jawr-eu gar ya larkeuv-awr, nawmaf naeq-aer tiqkawv lof-aer ghaqdoer danlarni, guiqlanq sharcaw naeqlaf laer ngar, nawmaf-anr shar-eu ma.

³³ Nuisar bif-eu Miqyaer, nawmaf yawqghaq navluf naeq-aer jawr luf-ur. Aqmeq.