Lormav 13 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aryaq-euq Lafov Jawr-awq

¹ Tsawrhaq yawqghaq navluf, uvlanr-eu aryaq-euq uqmov yawmuiq-aer jawr-awq. Aqjeq mirnae aernar-aq, Miqyaer-anr nae maqoe-euq aryaq tiqjeq-iq maqjav-aer, kharjav-eu aryaq-aq, Miqyaer nae bif-euq mae.

² Khoermirnae, aryaq-anr puiq-eu aqsur ghaq maqkaq, Miqyaer-euq aryaq-anr puiq-eu tsawrhaq mae. Puiq-eu tsawrhaq-aq, yawqhar yawqha yarkhaq dar-eu jeq bi keuvle-eu laer pov-eu mae.

³ Aqjeq mirnae aernar-aq, uvlanr-eu deuq-aq, yawmuiq jeq mr-eu deuq-euq gharduq guvlar paq-aer maqghae-aer, yawdoer jeq mr-eu deuq-euq gharduq guvlar paq-aer ghae-eu mae. Nawr, aryaq jav-eu deuq-anr maqguv-eu tsawrhaq pyeufmawf mir-a lor? Yawmuiq jeq mr-awq. Mr nar-aq, aqyawfmaf, nawq-anr jaceuq naeqlaf taef-a.

⁴ Aqjeq mirnae aernar-aq, aqyawf, Miqyaer-euq kuirlaf zaqkhav geuf-eu khoer-aq, nawq-anr bimuiq-eu gharduq mae. Aerkhawf, nawr yawdoer jeq mr nar-aq, guv paq-aer ghae-eu mae. Aqjeq mirnae aernar-aq, aqyawf, micaer yawqngaef-aer shafluf-eu maqngeur-a. Aqyawf-aq, Miqyaer-euq kuirlaf zaqkhav geuf-awr, yawdoer jeq kharmr-eu tsawrhaq deuq-anr yarkhaq dar-eu ghaq pyeuf-eu mae.

⁵ Khoermirnae, nuima paer-eu jeq-anr guv-eu mirnae taef-aer maqngeur-aer, nawmaf-euq zaqsiq nuisiq-anr tsaqni, nawmaf sanqpaq deuq uvlanr-eu lafov yawmuiq paq-aer jawr-awq.

⁶ Heu-euq baqda’nae, nawmaf khawf jeq dovluf-eu mae. Aqjeq mirnae aernar-aq, aqyawfmaf, Miqyaer-euq gar mrzaq pyeuf-awr, aqmyanluf gar khoerdeuq mrluf-eu mae.

⁷ Tsawrhaq yawqghaq navluf-anr bif paq-aer ghae-eu lof-aer bifnaeq-awq. Jeq tafnaeq paq-aer ghae-eu deuq-anr tafnaeq-awr, pyur dovnaeq paq-aer ghae-eu deuq-anr dovnaeq-awq. Guv paq-aer ghae-eu tsawrhaq-anr guv-awr, taqhuiqnaeq paq-aer ghae-eu tsawrhaq-anr taqhuiq naeq-awq.

Dawqpae Jawr-eu Tsawrhaq-anr Gaq-awq

⁸ Nawmaf tiqghaq tirghaq gaq-eu dzirdzov maqngeur nar-aq, nuijeq-euq dzirdzov taqbi dav. Aqjeq mirnae aernar-aq, aqcawq-anr gaqnya-eu tsawrhaq-aq, zanrdawq-anr mrbyan-eu mae.

⁹ “Aqcawq-euq miqzaq yozaq-anr taqbanq taqjoe,” “Tsawrhaq-anr taqsaef,” “Smrkhoeq taqkhoeq,” “Maqtsaq maqdawr-eu tsawrkaq taqgeuf,” “Aqcawq-euq myawq-anr maerjuir taqjuir,” (Di 20:13-15,17; Dm 5:17-19,21) laer aertaq-euq zanrdawq khofdawq hawr-eu, zanrdawq khofdawq nuideuq jav nar-aq khawf, “Yawqha-anr gaq-eu lof-aer yawqha-euq dawqpae jawr-eu tsawrhaq-anr gaq-awq,” (Lb 19:18) laer aertaq-euq dawq heudawq-euq lafkhoer anrjir-eu mae.

¹⁰ Gaq-eu jeq-aq, yawqha-euq dawqpae jawr-eu tsawrhaq-anr lavtanq lavnar-eu jeq maqmr-a. Khoermirnae, gaq-eu jeq-aq, zanrdawq-anr mrbyan-eu mae.

Yeqsur Kali Dmdav-awq

¹¹ Heu uqtaf, nymq-mr-aq, uqnoeq noeqlar-eu yamq tsaqlar-euq ngar-a laer nawmaf siqnya-eu mae. Aqjeq mirnae aernar-aq, aqdui janbae baelar ngae navmaqtser, nymq-mr-aq, aqdui-anr buq-ir-eu jeq paedzaeq le-euq mae.

¹² Uqcif dzeur-awr, uqbya byalar shaw-iq-eu ngar-a. Khoermirnae, yawzanr-euq gardeuq-anr byaerdzae yaf-awr, yawshaef-euq guirdeuv keuka dmdav kar-eur.

¹³ Aqdui nan’ghanr paw daef paq-aer ghae-eu lof-aer daefghae-awq. Byaeqlaeq shaevdae-aer bui-eu jeq hawr-eu dzaqnyawq dawryaef-eu jeq-euq lafkhoer maqdaef-aer, jawflafni ghae-eu jeq hawr-eu shiqshaq-euq nuikhanr-euq lafkhoer maqdaef-eu uqtaf, cae-awr myavnav nav-eu lafkhoer taqdaef.

¹⁴ Maeqtsoeq dm-eu lof-aer Sanqpaq Yeqsur Kali dmdav-awq. Shiqshaq-euq nuikhanr mrbyan-eu laer tiqjeq-iq laeqhmq taq-awr taqbi jav.