Lormav 12 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Daefluf-eu Lawrnaeq-eu Jeq

¹ Khoermirnae, aqyuif aqnyir deuq-or! Miqyaer-euq ghawqshaq gaq-eu jeq-euq baqda’nae, ngar, nawmaf-anr shar-eu ma. Miqyaer nuima tsaq-eu, shawrjaevni ghae-eu, daefluf-eu lawrnaeq-eu jeq lof-aer, nawmaf-euq mawrdo a’naeq-awq. Nawmaf heulof-aer mr-eu-aq, aqdir uqduq tanq-eu jeq pyeuf-eu mae.

² Nawmaf, mirtsaqzaq daef-eu lof-aer taqdaef. Aerkhawf, nuima bi lavshuif-awr daefzir parlar-awq. Khoernar-aq, nawmaf, Miqyaer nuima tsaq-eu jeq-anr siqnya lar-awr, yawmuiq jeq, Miqyaer nuikhanr shir-eu jeq hawr-eu byan-eu jeq-anr siqnyalar taef-a.

³ Ngaq-anr bifnaeq laf-euq guiqlanq yawdzanr baqda’nae, nawmaf-euq lafkhoer jawr-eu yawqghaq navluf-anr ngar heulof-aer aernaeq-eu ma. Yawqhar yawqha sharnoeq paq-aer ghae-eu taf-aer taqnoeq huiqdzeur. Aerkhawf, Miqyaer nae tiqghaq sair tiqghaq-anr jan-eu jeq bifnaeq taq-euq gar tsaqni taef-aer, yawmuiq-aer sharnoeq sharsawx-awq.

⁴ Aqjeq mirnae aernar-aq, aqdui-euq mawrdo tiq do-anr arsaer ghawqmya’ni tsof-eu mae. Aerkhawf, arsaer dawqtawvluf mr-eu gar maq durler-a.

⁵ Khoerlof-aer durni, aqdui tsawrhaq yawmyaq khawf, Kali-euq lafkhoer mawrdo tiq do taef ma. Aqdui tiqghaq tirghaq-euq arsaer pyeuf-eu ma.

⁶ Aqdui-anr bifnaeq laf-euq guiqlanq yawdzanr-euq baqda’nae, aqdui zataq-euq lafsawq maq durler-a. Aqdui lafsawq khoerdeuq zmq kar-eur: Miqyaer gharduq ngaeqdan-eu lafsawq za-euq ngeur nar-aq, jan-eu ghaq kharkhav-eu lof-aer Miqyaer gharduq ngaeqdan-awq.

⁷ Kuirlaf zaqkhav geuf-eu lafsawq za-euq ngeur nar-aq, kuirlaf zaqkhav geuf-awq. Maeq-awr tsov-eu lafsawq za-euq ngeur nar-aq, maeqnaeq tsovnaeq-awq.

⁸ Ghaq bif-eu lafsawq za-euq ngeur nar-aq, ghaq bif-awq. Bif-awr damq-eu lafsawq za-euq ngeur nar-aq, nuima jerloni bif-awr damq-awq. Sheuqghae-eu lafsawq za-euq ngeur nar-aq, laejae-awr sheuqghae-awq. Ghawqshaq gaq-eu lafsawq za-euq ngeur nar-aq, laqkhaq tiqcaer ghawqshaq gaqnaeq-awq.

Kalizaq Yawdaef Daef-eu

⁹ Nawmaf, gaq-eu jeq jaqmyawf maqbi anrni, aqdir gaq-eu jeq bipyeuf-awq. Yawdoer jeq-anr byae-awr, yawmuiq jeq-anr zifdanni nyaeftaeq taq-awq.

¹⁰ Aqyuif aqnyir yawkaq gaq-eu lof-aer tiqghaq tirghaq ghoer-awr gaq-awq. Yawqha-anr navmaqtser aqcawq-anr noeqpoeq-awr, tiqghaq tirghaq taqhuiq taqmanr-awq.

¹¹ Saflar-euq lafkhoer shaqdaef shaqnar anr-awr, nymrgawq yawdoer maqanrni, Sanqpaq Miqyaer-euq gar mr-awq.

¹² Noeqtmq-eu lafkhoer laqkhaq caer-awr, shaqzanq yadaq ngae or-eu uqtaf, aqmyanluf nuima keuvkeuv-aer guiqlanq shar-awq.

¹³ Tsawrshawr mawf-eu jeq-anr cawba naeq-awq. Aqcawq-anr hageuf mawf-eu nuima anr-awq.

¹⁴ Nawmaf-anr khaeqlar khavlar-eu deuq-anr dawq ngaeqghae naeq-awr, yaqkhaer maqyaq-aer, dawqmuiq ngaeqnaeq-awq.

¹⁵ Laqkhaq caer-eu tsawrhaq naeq-aer laqkhaq cawcaer-awr, ngoer-eu tsawrhaq naeq-aer cawngoer-awq.

¹⁶ Tiqghaq tirghaq tsaqler dzoerler-eu nuima anr-awq. Huiqmawf manrmawf-eu nuima maqanr-aer, teq-awr nyir-eu tsawrhaq deuq naeq-aer khawf cawq cawq-awq. Yawqhar yawqha tsawrganr anr-eu ma laer taqnoeq. (Dd 3:7)

¹⁷ Aqcawq yawdoer janrlar-eu gar yawdoer taq janrkhof. Tsawrhaq dawqtawvluf haw ngae yawmuiq yawjaq ngar-a laer noeq-eu jeq mr-awq.

¹⁸ Nawq-euq navni kharjav-eu jeq, khar ghaenya-eu lof-aer, tsawrhaq yawqghaq navluf naeq-aer tsaqler dzoerlerni daef-awq.

¹⁹ Ngar zawr gaq-eu cawqdeuq-or! Yawqha yawqha lafpov taq povkhof. Aerkhawf, Miqyaer nuima paer-eu jeq-euq gharduq taq-awq. Aqjeq mirnae aernar-aq, Yaerbof-euq lafkhoer boftaq-euq, “Lafpov povkhof naeq-eu jeq-aq, ngaq-euq gar ma. Ngar janrkhofnaeq ma,” (Dm 32:35) laer Sanqpaq Miqyaer aer-eu mae.

²⁰ Khoermirnae, “Nawq-anr muir-eu tsawrhaq, hawq maef nar-aq bidzaq-awr, ircuf maef nar-aq, bidawr-awq. Aqjeq mirnae aernar-aq, nawr khoerlof-aer janrnaeq-eu-aq, Aqyawf-euq uqduq-euq khoertav miqdzaq miqdziv tawvdav naeq-euq gar dur-eu mae.” (Dd 25:21-22)

²¹ Yawdoer jeq nae nawmaf-anr taqbi ghaqlar. Yawmuiq jeq nae yawdoer jeq-anr ghaqler-awq.