Lormav 11 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqcawq Tsawrjeuq Kakhof-eu Jeq Za-eu

¹ Tox-aer mar-iq, ngar narhaq mawf-eu-aq, Miqyaer, aqyawf-euq tsawrhaq-anr byaerdzae-euq la laq? Tiqpawf-iq maqngeur-a. Aqjeq mirnae aernar-aq, ngar khawf Irsaqleqlav tsawrhaq ma. Aqbyaqhaq-euq aryoeq pyeuf-eu Beqyaqmiq-euq arjeuq arca ma.

² Miqyaer, yawbae ngae nae siqluf-eu aqyawf-euq tsawrhaq-anr aqyawf maq byaerdzae-aq. Maqngeur nar-aq, Yaerbof-euq lafkhoer, Erlirya-euq garkawv boftaq-euq heu-anr nawmaf maq siqnya-eu le lor? Aqyawf, Miqyaer-euq maeqshi Irsaqleqlav tsawrhaq-anr iqbax taqtaq-aer guiqlanq shar-eu,

³ “Sanqpaq Miqyaer-or! Aqyawfmaf, nawq-euq gharduq ngaeqdan-eu deuq-anr saef-awr, nawq-euq lawrduq deuq-anr daepyav-euq mae. Ngar tiq ghaq taef-aer dzerlar-awr, aqyawfmaf, ngaq-anr khawf saef-eu laer povluf-eu mae.” (1Sp 19:10,14)

⁴ Aerkhawf, Miqyaer, aqyawf-anr aqjox-aer aerkhof naeq-euq nga laer aernar-aq, “Ngar, ngaq-euq gharduq, Baqlar tanqpanq aqma mawrkawr-anr pawqtsuif pawqdmq dmq-awr uqduq maq tanqhaw-euq tsawrhaq 7,000 ghaq bidzer-euq ma.” (1Sp 19:18)

⁵ Khoerlof-aer durni, nymq-mr khawf, Miqyaer-euq guiqlanq yawdzanr baqda’nae tserdov taq-euq tsawrhaq uicuiv dzer-a siq.

⁶ Guiqlanq yawdzanr-euq baqda’nae za-euq ngeur-eu law nar-aq, mr-awr shar-eu jeq-anr maqtaf-a. Mr-awr shar-eu jeq-anr taf-eu law nar-aq, guiqlanq yawdzanr maqpar ngeur-eu mae. Aerkhawf, mr-awr shar-eu jeq-euq baqda’nae ngeur-eu law nar-aq, guiqlanq yawdzanr-anr maqtaf-a. Guiqlanq yawdzanr-anr taf-eu law nar-aq, mr-awr shar-eu jeq maqpar ngeur-eu mae.

⁷ Heu-aq, ngar, aqyawf maf-euq iqbax yurdzaenaeq ngae, Aqyawf maf-anr aernaeq-eu ngaq-euq dawqma sarjax pyeuf-eu ma.” (Isy 59:20-21; 27:9)

⁸ Yaerbof-euq lafkhoer boftaq-euq lof-aer, “Iqnan keuvni, Miqyaer, aqyawf maf-anr yufnoeq maqbeur-eu saflar, Maq mawrnya-eu myavnuiv hawr-eu, Maq gaqnya-eu naqbawr bifnaeq taq-euq mae.” (Dm 29:5; Isy 29:10)

⁹ Daqbir khawf aer-eu, “Aqyawf maf-euq yawbui hawqje khoer lanrju bipyeuf-awr, lafpeu bipyeuf law. Sanqtif tifduq pyeuf-awr, aqyawf maf-anr janrkhof naeq-eu jeq khawf bipyeuf law.

¹⁰ Aqyawfmaf maqbi mawrnya paq-aer, aqyawf maf-euq myavnuiv bizanr-ir-awr, Aqmyanluf aqyawf maf-euq dartsuif yawkhof bikhof-ir law.” (Jc 69:22-23)

Aqcawq Tsawrjeuq Kakhof-eu Jeq Za-eu

¹¹ Tox-aer mar-iq, ngar narhaq mawf-eu-aq, Irsaqleqlav tsawrhaq sanqtif tif-euq khoer-aq, aqyawfmaf bi coqdzae-eu laer la lor? Maqngeur-a. Irsaqleqlav tsawrhaq coq-ir-euq khoer-aq, aqcawq tsawrjeuq tsawrca-anr kakhof-eu jeq bi keuvle-awr, Irsaqleqlav tsawrhaq myavnav binav-eu gharduq mae.

¹² Irsaqleqlav tsawrhaq coq-ir-euq khoer, mirtsaqzaq-anr bi sanrlar-awr, aqyawfmaf nae laeq-ir-euq khoer, aqcawq tsawrjeuq tsawrca-anr bi sanrlar-eu ngeur nar-aq, aqyawfmaf dawqtawvluf kakhof-eu jeq za lawnmr-aq, ngeurdzaeq arnavni par sanrlar-eu paq nga!

¹³ Khoermirnae, aqcawq tsawrjeuq tsawrca pyeuf-eu nawmaf-anr ngar heulof-aer aernaeq-eu ma. Ngar-aq, aqcawq tsawrjeuq tsawrca-euq ghaqkhaer pyeuf-eu mirnae, ngar, ngaq-euq guiqlanq-euq gar heu-anr taqhuiq-eu ma.

¹⁴ Ngar heulof-aer mr-eu mirnae, ngaq-anr shiqshaq taf-eu tsawrhaq myavnav navlar-awr, aqyawfmaf tiqpavnav deuq-anr bibuq-ir nya’ni ngar noeqtmq luf-eu ma.

¹⁵ Irsaqleqlav tsawrhaq bi byaerdzae taq-euq mirnae, mirtsaqzaq, Miqyaer-anr tsaqler dzoerler-euq ngeur nar-aq, Irsaqleqlav tsawrhaq-anr par hageuf-eu-aq, shir-euq tsawrhaq ghofdaef lar-euq gar dur-eu maqngeur-a lor?

¹⁶ Kaqmur tiq siq-euq lafkhoer nae yawbae lawrnaeq-euq pyaeq yawshawr nar-aq, kaqmur tiq siq siqlanni yawshawr mae. Duqcir yawshawr nar-aq, uqpyaq uqlaf khawf yawshawr taef-a.

¹⁷ Tsawrhaqzaq nae kataq-euq saqloq uqpyaq tiqdeuq nav-anr deuvdzae-awr, bawrtsanq-euq saqloq uqpyaq pyeuf-eu nawmaf-anr tsafnaeq laf-awr, uqpyaq nuideuq naeq-aer tiqkawv lof-aer saqloq-euq duqcir-euq ardziq-anr shuvluf-eu ngeur nar-aq,

¹⁸ bi deuvdzae-euq uqpyaq khoerdeuq-euq khoertav huiqmawf manrmawf-eu nuima maqya anr-a. Huiqmawf manrmawf-eu nuima anr nar-aq, duqcir, nawq-anr ghoe-awr daef-eu maqngeur-a. Nawr, duqcir-anr ghoe-awr daefluf-eu mae laer siqnya paq-aer ghae-eu mae.

¹⁹ Nawr heulof-aer aermawf taef-a, “Ngar, arbawr-anr ya tsaflerni, uqpyaq khoerdeuq bi deuvtsaev dzae-euq mae.”

²⁰ Tsaq mae. Aqyawfmaf maqjan-eu mirnae bi deuvdzae-euq mae. Nawr jan-eu mirnae zifluf-eu mae. Aerkhawf, nawr nuima taqhuiq, guv-eu lafkhoer jawr-awq.

²¹ Arbawr-anr nae tsofdov le-euq uqpyaq-anr Miqyaer maq taqnaeq nar-aq, nawq-anr khawf maq taqnaeq-ar.

²² Khoermirnae, Miqyaer-euq yawmuiq jeq hawr-eu aqyawf yawkhav-aer janrnaeq-eu jeq-anr sharnoeqhaw sher-eq. Aqyawf, coqdzae-euq tsawrhaq-anr yawkhav-aer janrnaeq-awr, nawr aqmyanluf aqyawf-euq yawmuiq jeq-euq lafkhoer jawr nar-aq, aqyawf-euq yawmuiq jeq nawq-euq khoertav jav taef-a. Aerkhawf, nawr maqjawr nar-aq, aqyawf, nawq-anr khawf deuvtsaevdzae naeqlaf taef-a.

²³ Khoerlof-aer durni, aqyawfmaf tiqjawr-iq maqpar jan-eu maqngeur nar-aq, aqyawf maf-anr par tsafnaeq taef-a. Aqjeq mirnae aernar-aq, Miqyaer, aqyawf maf-anr parbi tsafkhof lerni janrnya-eu mae.

²⁴ Nawmaf-aq, bawrtsanq-anr khardaef maqdaef-aer daef-eu saqloq arbawr-anr nae deuv-awr, kataq-euq saqloq arbawr-anr bi tsaftaq-euq khoer-aq, baetaq-euq naeq-aer nanrpov-aer jav-eu mae. Tox-aer ngeur nar-aq, bi deuvdzae-euq uqpyaq khoerdeuq, ngeurdzaeq yawqha-euq saqloq arbawr-anr par tsafler nya-eu maqngeur-a lor?

Irsaqleqlav Tsawrhaq Kakhof-eu Jeq Za-eu

²⁵ Aqyuif aqnyir deuq-or! Nawmaf yawqhar yawqha zaqsiq tsawrganr anr ma laer maqya noeqni, ngar, nawmaf-anr zaftaq-euq garkawv heu-anr maq siqnya-aer maqbi ghaemawf nya. Aqcawq tsawrjeuq tsawrca maq urbyan lar-euq khoerkeuvni, Irsaqleqlav tsawrhaq tiqpavnav deuq myavbaefbaef taef-a.

²⁶ Aqcawq tsawrjeuq tsawrca urbyan lar-euq nar-aq, Irsaqleqlav tsawrhaq dawqtawvluf yabuq-ir taef-a. Yaerbof-euq lafkhoer boftaq-euq lof-aer, “Kakhof-eu ghaq, Ziroq-anr nae dovle-awr, Yaqkov-anr nae Miqyaer-anr yawzeu maqbaw-eu jeq-anr taedzae taef-a.

²⁷ Heu-aq, ngar, aqyawf maf-euq iqbax yurdzaenaeq ngae, Aqyawf maf-anr aernaeq-eu ngaq-euq dawqma sarjax pyeuf-eu ma.” (Isy 59:20-21; 27:9)

²⁸ Guiqlanqdawq pawdzer nae aerlef nar-aq, nawmaf guiqlanq za’ni, aqyawfmaf, muir-eu tsawrhaq pyeuf-eu mae. Aerkhawf, tserdov-euq pawdzer nae aerlef nar-aq, aqyawf maf-euq aqpoeq deuq-euq baqda’nae, Miqyaer zawr gaq-euq tsawrhaq pyeuf-eu mae.

²⁹ Aqjeq mirnae aernar-aq, Miqyaer-aq, aqyawf nae bif-euq lafsawq hawr-eu, aqyawf nae kur-euq khoer-anr maqpov maq parlar-a.

³⁰ Khoerlof-aer durni, nawmaf, Miqyaer-euq dawq maq narhaq geuf-aq. Aerkhawf, nymq-mr-aq, Irsaqleqlav tsawrhaq, Miqyaer-euq dawq maq narhaq geuf-euq mirnae, nawmaf, Miqyaer-euq ghawqshaq gaq-eu jeq-anr za-euq mae.

³¹ Khoergar durni, nawmaf, Miqyaer-euq ghawqshaq gaq-eu jeq za-euq lof-aer, aqyawfmaf khawf Miqyaer-euq ghawqshaq gaq-eu jeq za’ni, nymq-mr aqyawfmaf maq narhaq geuf-a.

³² Aqjeq mirnae aernar-aq, tsawrhaq dawqtawv luf-anr ghawqshaq gaqnaeqni, Miqyaer, tsawrhaq dawqtawv luf-anr maq narhaq geuf-eu jeq-euq lafkhoer kalanr taq-euq mae.

³³ Miqyaer-euq sanr duidui-eu zaqsiq tsawrganr hawr-eu siqnya-eu tsawrganr arnavni naf-eu nga! Aqyawf yarkhaq dar-eu jeq-anr tiqghaq-iq maq noeqdov coer-a. Aqyawf-euq garma-anr tiqghaq-iq maq cawmawrduq nya-a!

³⁴ “Sanqpaq Miqyaer-euq nuinoeq-anr aqsur ghaq siqnya-eu la? Aqyawf-anr, aqsur ghaq maeqbawq bifhaw-euq la?” (Isy 40:13)

³⁵ “Tsawrhaq tiqghaq nav-anr tsoeqkhofnaeq paq-aer, Miqyaer-anr jeqhu bifnaeq taq-euq aqsur ghaq jawr-eu la?” (Yb 41:11)

³⁶ Aqjeq mirnae aernar-aq, kharjawr kharjav-eu yawqjeq navluf, aqyawf-anr nae dovle-awr aqyawf-euq baqda’nae javluf jawrluf-awr, aqyawf-euq gharduq taef mae. Mqmaq maqbyav yarzir aqyawf-anr yawshaef khanqsaer damqnaeq kar-eur. Aqmeq.