Lormav 10 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Irsaqleqlav Hawr-eu Guiqlanqdawq

¹ Aqyuif aqnyir deuq-or! Irsaqleqlav tsawrhaq kakhof-eu jeq za’ni, ngaq-euq nuima geufmawf duidui-awr, aqyawf maf-euq gharduq Miqyaer-anr guiqlanq sharluf-eu ma.

² Aqyawfmaf, Miqyaer-euq gharduq nuima keuv duidui-eu mae laer ngar sarkir kamqnya ma. Aerkhawf, siqnya-eu tsawrganr anr-awr nae, nuima keuv-eu maqngeur-a.

³ Aqjeq mirnae aernar-aq, aqyawfmaf, Miqyaer-euq tsaq-awr dawr-eu jeq-anr maq siqnya-aer, yawqha-euq tsaq-awr dawr-eu jeq mrdov-eu laer laejae-eu mae. Khoermirnae, aqyawfmaf, Miqyaer-euq tsaq-awr dawr-eu jeq-euq uqmov maqjawr-a.

⁴ Kali-aq, aqyawf-anr kharjan-eu tsawrhaq yawqghaq navluf, tsaq-awr dawr-eu tsawrhaq pyeuflarni, zanrdawq mrbyan-eu ghaq mae.

Yeqsur-anr Sharpov-eu Tsawrhaq

⁵ Zanrdawq-anr taf-eu tsaq-awr dawr-eu garkawv Morseq heulof-aer boftaq-euq mae, “Zanrdawq-anr taf-eu tsaq-awr dawr-eu jeq mr-eu tsawrhaq-aq, zanrdawq-euq uqmov yadaef-eu mae.” (Lb 18:5)

⁶ Aerkhawf, jan-eu jeq-anr taf-eu tsaq-awr dawr-eu jeq-aq heulof-aer aer-eu mae: “Nawmaf-euq nuima-euq lafkhoer heulof-aer taqaer, ‘Mq-anr aqsur ghaq davler nmr-mq?’ ” (Dm 9:4) (Khoer-aq, Kali-anr mq-anr nae sheuqka lef-eu gar aermawf-eu mae.)

⁷ Maqngeur nar-aq, “ ‘Li-eu maqbaw-eu duqkhanq-anr aqsur ghaq ur-ir nmr-mq?’ ” (Khoer-aq, Kali-anr shir-eu mirkhanq-anr nae sheuqdov laq-ir-eu gar aermawf-eu mae.)

⁸ Jan-eu jeq-anr taf-eu tsaq-awr dawr-eu jeq aqjox-aer aermawf-eu nga laer aernar-aq, “Dawq heudawq-aq, nawq-euq dawqpae javluf-eu mae. Nawq-euq khaqmae-euq lafkhoer anr-awr, nawq-euq nuima-euq lafkhoer khawf anr-eu mae.” (Dm 30:12-14) (Dawq heudawq-aq, nga’maf maeqluf-eu jan-eu jeq-anr taf-eu dawqdeuq-anr aermawf-eu ma.)

⁹ Yeqsur-aq, Sanqpaq mae laer nawq-euq khaqmae nae aerdov-awr, Miqyaer, aqyawf-anr shir-euq gar nae bi ghofdaef lar-euq mae laer nawq-euq nuima-euq lafkhoer jan nar-aq, nawr kakhof-eu jeq za taef-a.

¹⁰ Aqjeq mirnae aernar-aq, tsawrhaq tiq ghaq nuima-euq lafkhoer jan nar-aq, tsaq-awr dawr-eu tsawrhaq pyeuflar-awr, khaqmae nae aerdov nar-aq, kakhof-eu jeq za-eu mae.

¹¹ Aqjeq mirnae aernar-aq, Yaerbof aer-eu, “Aqyawf-anr kharjan-eu tsawrhaq-aq, tiqghaq-iq daq maqya ga-ar.” (Isy 28:16)

¹² Yurdav tsawrhaq hawr-eu Heqlaqsar tsawrhaq maq beugar-a. Aqjeq mirnae aernar-aq, Miqyaer-aq, tsawrhaq dawqtawv luf-euq Sanqpaq pyeuf-awr, aqyawf-anr kur-eu tsawrhaq yawqghaq navluf-anr guiqlanq tiqbyanni bifnaeq-eu mae.

¹³ Aqjeq mirnae aernar-aq, “Sanqpaq Miqyaer-euq tsawrmyanr-anr kharkur-eu tsawrhaq-anr aqyawf kakhofnaeq taef-a.” (Yil 2:32)

Yagaq-euq Mirnae Jan-eu

¹⁴ Aerkhawf, aqyawfmaf, aqyawf-anr maqjan nar-aq, aqyawf-anr aqjox-aer kurnya-eu? Aqyawf-euq garkawv maq gaqhaw-euq nar-aq, aqyawf-anr aqjox-aer jannya-eu? Dawqmaeq maeq-eu tsawrhaq maqjawr nar-aq, aqjox-aer gaqnya-eu?

¹⁵ Dawqmaeq maeq-eu tsawrhaq maq khaerghae-euq nar-aq, dawqmaeq aqjox-aer maeqnya-eu? Yaerbof-euq lafkhoer boftaq-euq lof-aer, “Nuisar of-eu guiqlanqdawq maeq-eu tsawrhaq deuq-euq aqkuir arnavni hawmuiq-eu nga. Aqyawfmaf, yawmuiq jeq-euq laqkhaq caer-eu guiqlanqdawq pi-awr canluf-eu mae.” (Isy 52:7)

¹⁶ Aerkhawf, yawqghaq navluf-aer guiqlanq dawq-anr narhaq geuf-eu maqngeur-a. Aqjeq mirnae aernar-aq, Irsaqyar aer-eu, “Sanqpaq Miqyaer-or! Nga’maf-euq dawqdzawr-anr aqsur ghaq jan-eu la?” (Isy 53:1)

¹⁷ Khoermirnae, jan-eu jeq-aq, yagaq-euq mirnae jan-eu mae. Yagaq-euq khoer-aq, Miqyaer-euq dawq yagaq-euq mae.

¹⁸ Aerkhawf, ngar narhaq mawf-eu-aq, aqyawfmaf maqya gaq-aq lor? Aqdir yagaq-euq mae. “Aqyawf maf-euq tersar, mirkhanq doeni irkhawq ghae-awr, Aqyawf maf-euq dawq mqdzer mirdzer irkeuv taq-euq mae.” (Jc 19:3)

¹⁹ Ngar par narhaq la sher-eq. Irsaqleqlav tsawrhaq maq siqnya-eu la lor? Yawbae ngae nae Morseq aer-eu, “Ngar, mirkhanq maqbaw-eu tsawrjeuq-anr zmq-awr, nawmaf myavnav navlarni janr ma. Ngar aqdzawq argan pyeuf-eu tsawrjeuq tiq jeuq-anr ghoe-awr, nawmaf nuima paerlarni janr ma.” (Dm 32:21)

²⁰ Aerkhawf, Irsaqyar nuima khaqduqni aer-eu, “Ngaq-anr maq sharpov-eu tsawrhaq-anr, Ngar, aqyawf maf-anr bi povmawr-awr, Ngaq-anr maqshar-eu tsawrhaq-anr, Ngar, aqyawf maf-anr byacaevni bimawr ma.” (Isy 65:1)

²¹ Miqyaer, Irsaqleqlav tsawrhaq-anr aernaeq-eu, “Maq narhaq geuf-aer dawqpov povkhof lar-eu tsawrhaq-anr hageuf-eu laer, Ngar nan’ga-i aqlaf cawqja taq-euq ma.” (Isy 65:2)