Lormav 1 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqcawq Puq-eu Dawq

¹ Ngar-aq, Yeqsur Kali-euq kuirlaf zaqkhav Pawrluv ma. Miqyaer, ngaq-anr ghaqkhaer geuf laer kur-awr, Miqyaer-euq guiqlanq dawq-euq gharduq bi tserpav taq-euq tiq ghaq ma.

² Guiqlanqdawq heu-aq, dzeurlaf ngae aqyawf-euq gharduq ngaeqdan-eu deuq-anr ghoe-awr, Shawr-eu Yaerbof-euq lafkhoer sarjax dzaqtaq-euq mae.

³ Khoer-aq, aqyawf-euq Zaqyo pyeuf-eu aqdui-euq Sanqpaq Yeqsur Kali-euq garkawv mae. Shiqshaq paw aerlef nar-aq, aqyawf-aq, Daqbir-euq aryoeq-anr nae daefle-euq mae.

⁴ Yawshawr Saflar-euq baoq-anr ghoe-awr nae Kali shir-euq khawf ghofdaef lar-euq mirnae, Miqyaer-euq Zaqyo mae laer bi siqnya naeqlaf-euq mae.

⁵ Nga’maf, aqyawf-euq baqda’nae, guiqlanq yawdzanr za-awr ghaqkhaer yageuf-euq ma. Khoer-aq, aqyawf-euq tsawrmyanr gharduq hawr-eu mirkhanq-euq tsawrjeuq dawqtawv luf-euq ghanrcae nae, jan-awr narhaq geuf-eu tsawrhaq bi dovlar-eu gharduq mae.

⁶ Nawmaf khawf tsawrjeuq tsawrca khoerdeuq-euq lafkhoer keuq-eu, Yeqsur Kali nae kur-euq tsawrhaq mae.

⁷ Miqyaer zawr gaq-awr, tsawrshawr pyeuflarni bi kurtaq-euq Lormav meuq-anr jawr-eu nawmaf dawqtawv luf-anr ngar sanqbof bofanr laf-euq ma. Aqdui-euq Aqda Miqyaer hawr-eu Sanqpaq Yeqsur Kali-euq guiqlanq yawdzanr hawr-eu nuisar of-eu jeq nawmaf-euq khoertav jav luf-ur.

Pawrluv, Lormav Meuq-anr Lemawf-eu

⁸ Yawbae jeq-aq, nawmaf, Miqyaer-anr jan-eu garkawv mirkhanq doeni gaqdoe-ir-euq mirnae, ngar, nawmaf dawqtawv luf-euq gharduq Yeqsur Kali-anr ghoe-awr ngaq-euq Miqyaer-anr jaceuq ma.

⁹ Ngar, nawmaf-euq gharduq maq naqlerni aqmyanluf guiqlanq shar-eu gar Miqyaer, ngaq-euq gharduq sarkir kamqnya mae. Ngar-aq, ngaq-euq nuima saflar nae aqyawf-euq gharduq mr-awr, aqyawf-euq Zaqyo-euq garkawv guiqlanqdawq maeqluf-eu ma.

¹⁰ Miqyaer nuima tsaq nar-aq, arsaq saqlar ngae, ngar, nawmaf jawr-eu gar larnya’ni garma tiqkanrnav bi danrlar naeqlaf laer, nymq-mr ngar guiqlanq sharluf-eu ma.

¹¹ Aqjeq mirnae aernar-aq, ngar, nawmaf-anr mawrmawf duidui nya. Ya’mawr nar-aq, nawmaf ziflarni, nawmaf-anr saflar paw-euq lafsawq tiqjeqnav bifnaeqmawf mir-a.

¹² Ngar heulof-aer aermawf-eu ma. Ngar jan-eu mirnae nawmaf ghaq khavlar-awr, nawmaf jan-eu mirnae ngar khawf ghaq khavlar-awr, nyiq pawluf ghaq khavlar-eu gar geufmawf mir-a.

¹³ Aqyuif aqnyir deuq-or! Ngar, nawmaf-anr heulof-aer bi siqmawf mir-a. Nuigar jawr-eu aqcawq tsawrjeuq tsawrca-euq ghanrcae arsiq za-euq lof-aer, nawmaf-euq ghanrcae khawf arsiq uicuivnav za’ni, nawmaf jawr-eu gar lar ma laer ngar ghawqmya pov noeqtsaev-euq ma. Aerkhawf, nymq-mr keuvni lavtsoeq-eu jeq jav-eu mae.

¹⁴ Ngar, Heqlaqsar tsawrhaq hawr-eu yarsaq tsawrhaq-anr khawf, zaqsiq tsawrganr anr-eu hawr-eu zaqsiq tsawrganr maqanr-eu tsawrhaq-anr khawf dzirdzov davluf-eu ma.

¹⁵ Khoermirnae, ngar nuima keuv-eu lof-aer, Lormav meuq-anr jawr-eu nawmaf-anr khawf, guiqlanqdawq maeq-eu laer laeqhmqdan taq-euq ma.

Guiqlanq Dawq-euq Baoq

¹⁶ Ngar, Kali-euq guiqlanqdawq gharduq maq shafdawr. Aqjeq mirnae aernar-aq, guiqlanq dawq-aq, jan-eu tsawrhaq yawqghaq navluf-anr bibuq-ir nya-eu Miqyaer-euq baoq pyeuf-eu mae. Yurdav tsawrhaq-anr nae bae-awr, Heqlaqsar tsawrhaq-anr khawf bibuq-ir-eu mae.

¹⁷ Aqjeq mirnae aernar-aq, Miqyaer-euq tsaq-awr dawr-eu jeq-aq, jan-eu jeq-anr bae-awr jan-eu jeq-anr saqler-eu mae laer guiqlanq dawq-anr ghoe-awr, panmaeq naeqlaf-euq mae. Yaerbof-euq lafkhoer boftaq-euq lof-aer, “Tsaq-awr dawr-eu tsawrhaq-aq, jan-eu baqda’nae yadaef-eu mae.” (Hbk 2:4)

Tsawrhaq Dawqtawvluf Iqbaxzaq Mae

¹⁸ Miqyaer-anr yawzeu maqbaw-aer maqtsaq maqdawr-eu jeq mr-euq tsawrhaq yawqghaq navluf-euq khoertav, mq-anr nae Miqyaer nuima paer-eu jeq panmaeq naeqlaf-euq mae. Tsawrhaq khoerdeuq-aq, maqtsaq maqdawr-eu jeq nae yawtsaq yawdawr jeq-anr nyaefsuf luf-eu mae.

¹⁹ Miqyaer-euq garkawv tsawrhaqzaq siqnya paq-aer ghae-eu deuq, tsawrhaqzaq-anr byacaevni bimawr-euq mae. Aqjeq mirnae aernar-aq, Miqyaer, aqyawf maf-anr panmaeq naeq-euq mae.

²⁰ Mqbae mirbae bae ngae nan-anr nae, Miqyaer-euq mqmaq maqbyav yarzir zif-eu baoq hawr-eu aqyawf, Miqyaer pyeuf-eu garkawv byacaevni siqduq mawrduq lar-eu mae. Myavnuiv nae maq hawmawr nya-eu khawf, aqyawf nae baetaq-euq deuq-anr haw-awr siqduq lar-eu mae. Khoermirnae, aqyawfmaf tiqjeq-anr-iq daeqlaefkhar maqza-a.

²¹ Aqyawfmaf, Miqyaer-anr siqnya-eu khawf, aqyawf-anr Miqyaer lof-aer maq ciqhuiq maq ciqmanr-eu uqtaf, guiqlanq-anr khawf maq jaceuq-a. Aerkhawf, aqyawfmaf tiqjeq-iq gardanr maqtsoeq-eu jeq taef-aer sharnoeq sharsawx-awr, maqganr-eu aqyawf maf-euq nuima zanrtsuini pyeuf-ir taq-euq mae.

²² Yawqhar yawqha yawganr ma laer aer-eu khawf, aqdzawq argan pyeuf-ir taq-euq mae.

²³ Aqyawfmaf, shir-eu maqbaw-eu Miqyaer-euq yawshaef khanqsaer-euq gharduq, shirnya-eu tsawrhaq, arjir deuq, oeq kuir tsof-eu jeqzaq hawr-eu joejoe-aer can-eu jeqzaq deuq-euq mawrkawr lavpyeuf-euq mae.

²⁴ Khoermirnae, aqyawf maf-euq yawkaq yawha-euq mawrdo-anr maq taqhuiq-aer, nuima-euq lafkhoer kharnoeq kharlov-eu lof-aer, jawflafni ghae-eu jeq mrghaeni, Miqyaer, aqyawf maf-anr pyaeqnaeq-euq mae.

²⁵ Aqyawfmaf, Miqyaer-euq yawtsaq yawdawr jeq yur-awr, jaqmyawf myawf-eu jeq-anr pargeuf-euq mae. Bae-euq ghaq-anr uqduq maqtanq-aer, aqyawf-euq gar maqmrni, aqyawf nae baetaq-euq deuq-anr uqduq tanqtanq-aer, khoerdeuq-euq gharduq gar mr-eu mae. Bae-euq ghaq-anr li-eu maqbawni jaceuq kar-eur. Aqmeq.

²⁶ Khoerlof-aer mr-eu mirnae, aqyawfmaf yawjawf jeq mrmawf duidui-eu nuima anr-eu lof-aer mrni, Miqyaer, aqyawf maf-anr pyaeqnaeq-euq mae. Aqyawf maf-euq zaqmiq aqbur deuq-aq, baetaq-euq lof-aer maqngeurni, zaqmiq aqbur yawkaq maq mrkhmq-eu jeq mrluf-eu mae.

²⁷ Zaqyo aqli deuq khawf, khoerlof-aer mrluf-eu mae. Zaqmiq aqbur naeq-aer yuftafni baetaq-euq jeq, khoer-anr byaer-awr zaqyo aqli yawkaq khaqmiq sheutaf mawf-eu nuikhanr anr duidui-awr, zaqyo aqli yawkaq tiqghaq tirghaq shafdawr duidui paq-aer ghae-eu jeq janr-eu mirnae, aqyawf maf-euq yawlaeq-anr geuxni, aqyawf maf-euq mawrdo yadaq-eu mae.

²⁸ Aqyawfmaf dirdaq-aer Miqyaer-anr maq siqnya mawf-eu lof-aer, maq noeqsiq maq noeqmawr nya-eu nuima bi anrlar-awr, maqtsaq-eu jeq mrni, Miqyaer, aqyawf maf-anr pyaeqnaeq-euq mae.

²⁹ Aqyawf maf-euq lafkhoer heudeuq dawqtawvluf anr-eu mae: maqtsaq maqdawr-eu jeq, banq-awr khaqmiq sheu-eu jeq, yawcawv jeq, maerjuir juir-eu jeq, yawdoer jeq mr-eu, myavnav nav-eu, tsawrhaq-anr saef-eu, caemawf-eu, jaqmyawf maershuir shuir-eu, noeqdoer-eu hawr-eu jabu jadoer-eu mae.

³⁰ Narkhan paw jadoer-eu, Miqyaer-anr byae-eu, aqcawq-anr lavtanq lavnar-eu, nuima huiq-eu, jasae-eu, yawdoer jeq mr-eu garkawv sharnoeq-eu, aqma aqda-euq aerdawq maq narhaq geuf-eu.

³¹ Maq tsermr nya-eu, ghoecoer paq-aer maqghae-eu, nuigaq maqanr-aer, iqbax maqpyaeq-eu, ghawqshaq gaq-eu khawf maq siqnya-eu.

³² Heudeuq kharmr-eu tsawrhaq-aq, shir-eu geux mae laer Miqyaer nae tsaq-awr dawr-eu lafkhoer dartsaev taq-euq khoer-anr aqyawfmaf siqnya luf-eu khawf, aqyawfmaf mrluf-eu uqtaf, aqcawq khawf khoerlof-aer mrni nuima tsaq-eu mae.