Jaceuq 99 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Huiq-awr Muiq-eu Ya’we Miqyaer

¹ Ya’we Miqyaer uvlanrluf mae. Tsawrhaqzaq yawdzuq bidzuq-awq! Aqyawf, Jeqlurbeq-euq yawkaq-anr jawr-eu mae. Mirtsaq mirluv bi luvlar-awq!

² Ziroq-euq lafkhoer, Ya’we Miqyaer zawr huiq-eu mae. Aqyawf-aq, tsawrhaqzaq dawqtawv luf-euq khoertav gordzaeq-eu mae.

³ Aqyawfmaf nae, yawzeu bawlar paq-aer huiq-eu nawq-euq tsawrmyanr-anr bi jaceuq-awq—Aqyawf-aq yawshawr mae.

⁴ Sanqpaq-euq ghaq-aq, yawdawr yawtsaq-anr gaq-awr, Nawq nae tiqkawv dini dar-eu jeq lavzif taq-euq mae. Nawr, Yaqkov-euq lafkhoer tsaq-awr dawr-eu jeq, Hawr-eu dawr-awr tsaq-eu jeq mryaf-euq mae.

⁵ Aqdui-euq Miqyaer pyeuf-eu Ya’we Miqyaer-anr ciqpoeq ciqgor-awr; Aqyawf-euq aqkuir cawqtaqduq-anr uqduq tanq-awq. Aqyawf-aq yawshawr mae.

⁶ Morseq hawr-eu Aqloq-aq, aqyawf-euq pirma deuq-euq lafkhoer keuq-eu mae. Saqmeuqlav-aq, aqyawf-euq tsawrmyanr kur-eu deuq-euq lafkhoer tiq ghaq pyeuf-eu mae. Aqyawfmaf, Ya’we Miqyaer-anr kur ngae, aqyawf narhaq naeq-euq mae.

⁷ Aqyawf, aqyawf maf-anr mqdmr-euq khawrzeur-euq lafkhoer nae ngaeqcawq-awr; Aqyawfmaf, aqyawf nae bif-euq zanrtaq khoftaq hawr-eu, Dawqtmr dawqdzawr-anr cantae-euq mae.

⁸ Nga’maf-euq Miqyaer pyeuf-eu Ya’we Miqyaer-or! Nawr, aqyawfmaf shar-eu lof-aer bifnaeq-euq mae. Nawr, aqyawfmaf nae mr-euq gar tsaqni, lafpov povkhof naeq-euq khawf; Nawr-aq, aqyawf maf-anr iqbax pyaeq-euq Miqyaer mae.

⁹ Aqdui-euq Miqyaer pyeuf-eu Ya’we Miqyaer-anr ciqpoeq ciqgor-awq. Aqyawf-anr aqyawf-euq shawr-eu gawqjawq-anr uqduq tanqler-awq. Aqjeq mirnae aernar-aq, aqdui-euq Miqyaer pyeuf-eu, Ya’we Miqyaer-aq yawshawr mae.