Jaceuq 98 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Laqkhaq Tiqcaer Gur-awq

Jaceuq-eu cardawq

¹ Or, Ya’we Miqyaer-anr cardawq yawshuif carnaeq-awq! Aqjeq mirnae aernar-aq, aqyawf zanqler paq-aer muiq-eu jeq mr-euq mae. Aqyawf-euq armar laf hawr-eu aqyawf-euq shawr-eu lafdu nae, Aqyawf ghaqler-euq mae.

² Ya’we Miqyaer, aqyawf-euq kakhof-eu jeq-euq garkawv bisiq-euq mae. Tsawrjeuq tsawrca mawr-eu gar, aqyawf-euq tsaq-awr dawr-eu jeq panmaeq naeq-euq mae.

³ Aqyawf, Irsaqleqlav-euq nymrkhanq-euq gharduq, Aqyawf-euq ghawqshaq gaq-eu jeq hawr-eu, Sarjax zif-eu jeq noeqkeuv naeq-euq mae. Mqdzer mirdzer dawqtawvluf, aqdui-euq Miqyaer-euq kakhof-eu jeq ya’mawr-euq mae.

⁴ Mirtsaq dawqtawvluf laqkhaq tiqcaer, Ya’we Miqyaer-anr gurnaeq-awr; Dawqcar car-awr, laqkhaq caer-eu uqtaf, car-awr jaceuq-awq.

⁵ Ya’we Miqyaer-anr deur-mq diq-awr carnaeq-awq. Deur-mq hawr-eu jaceuq-eu tersar nae jaceuq-awq.

⁶ Darhae hawr-eu uqcoer baw-eu tersar naeq-aer, Aqdui-euq Sanqpaq pyeuf-eu, Ya’we Miqyaer-euq maeqshi, Laqkhaq tiqcaer gur-awq.

⁷ Iqmalavshav hawr-eu iqmalavshav-euq lafkhoer kharur-eu jeq, Tersar manrdov laf-awr; Mirtsaq tanqkhawr hawr-eu mirtsaq-euq khoertav kharjawr-eu jeq, Tersar bi manrdov laf-awq.

⁸ Ya’we Miqyaer-euq maeqshi ircuf lawrbaq deuq, Aqyawf maf-euq aqlaf nae lafkhawv bitaev-awr; Gawqdur deuq tiqkawv lof-aer laqkhaq bicaer-awq.

⁹ Aqjeq mirnae aernar-aq, aqyawf, mirtsaq-anr yarkhaq dar-eu laer oeluf-eu mae. Aqyawf, mirtsaq tanqkhawr-anr tsaq-awr dawr-eu lafkhoer dar-awr, Tsawrhaqzaq-anr tiqkawv dini dar taef-a.