Jaceuq 97 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ya’we Miqyaer Uvlanrluf Mae

¹ Ya’we Miqyaer uvlanrluf mae. Mirtsaq tanqkhawr laqkhaq caer-awq. Irjawlanr-anr jawr-eu tsawrhaq baqmaf deuq khawf, lurgha caergha-awq.

² Mqdmr hawr-eu yawzanr, aqyawf-euq tiqjawq javluf-eu mae. Tsaq-awr dawr-eu jeq hawr-eu dawr-awr tsaq-eu jeq-aq, Aqyawf-euq nuirmanq-euq dawqpaeq duqpur mae.

³ Aqyawf-euq maeqhu paw miqdzaq dovle-awr; Tiqjawq jawr-eu, aqyawf-anr muir-eu deuq-anr puivsaef-eu mae.

⁴ Aqyawf-euq mqmyawf, mirtsaq tanqkhawr-anr yawshaef bi byalar-awr; Mirtsaq hawmawr ngae, yawdzuq dzuq-eu mae.

⁵ Mirtsaq dawqtawvluf Ya’we Miqyaer-euq maeqshi, Sanqpaq Miqyaer-euq maeqshi, Gawqjawq deuq byaqshanq lof-aer guir-ir-eu mae.

⁶ Mqdeuq, aqyawf-euq tsaq-awr dawr-eu garkawv dawqdzawr mr-awr; Tsawrhaqzaq dawqtawvluf, aqyawf-euq yawshaef khanqsaer-anr ya’mawr mae.

⁷ Nawmaf, miqyaer dawqtawvluf, aqyawf-anr uqduq tanq-awq. Taftaq-euq mawrkawr-euq gar mr-awr, Tanqpanq aqma mawrkawr-euq garkawv khanqsaer kharjaev-eu deuq, daqga-ir luf-ur.

⁸ Ya’we Miqyaer-or! Nawr yarkhaq dar-eu baqda’nae; Ziroq gaq ngae laqkhaq caer-awr, Yurdav-euq zaqmiq deuq lurgha caergha-eu mae.

⁹ Aqjeq mirnae aernar-aq, Ya’we Miqyaer-or, Nawr-aq, mirtsaq dawqtawv luf-euq khoertav gor duidui-eu ghaq mae. Nawr-aq, miqyaer dawqtawvluf navmaqtser, huiqdzaeq gordzaeq-eu mae.

¹⁰ Ya’we Miqyaer-anr gaq-eu nawmaf, yawdoer jeq-anr byae-awq. Aqyawf, aqyawf-euq tsawrshawr deuq-euq nuima saflar-anr hawpir naeq-awr; Aqyawf maf-anr tsawrcawv deuq-euq aqlaf-anr nae bibuq-ir-eu mae.

¹¹ Tsaq-awr dawr-eu tsawrhaq-euq khoertav yawshaef saeqdav naeq-awr, Nuima-euq lafkhoer dawrcoeni ghae-eu tsawrhaq-euq khoertav, Laqkhaq caer-eu jeq saeqdavnaeq taef-a.

¹² Tsaq-awr dawr-eu tsawrhaq, Ya’we Miqyaer-euq lafkhoer laqkhaq caer-awr; Aqyawf-euq shawr-eu tsawrmyanr-anr noeqkeuv ngae, Aqyawf-euq guiqlanq-anr jaceuq-awq.